৫-৬. রোহিতস্সসুত্তাদিৰণ্ণনা

৪৫-৪৬. পঞ্চমে (সং. নি. টী. ১.১.১০৭) একোকাসেতি চক্কৰাল়স্স পরিযন্তসঞ্ঞিতে একস্মিং ওকাসে. ভুম্মন্তি ‘‘যত্থা’’তি ইদং ভুম্মৰচনং. সামঞ্ঞতো ৰুত্তম্পি ‘‘সো লোকস্স অন্তো’’তি ৰচনতো ৰিসিট্ঠৰিসযমেৰ হোতি. ‘‘ন জাযতি, ন মীযতী’’তি ৰত্ৰা পুন ‘‘ন চৰতি, ন উপপজ্জতী’’তি কস্মা ৰুত্তন্তি আহ ‘‘ইদং অপরাপরং…পে… গহিত’’ন্তি. পদগমনেনাতি পদসা গমনেন. সত্থা সঙ্খারলোকস্স অন্তং সন্ধায ৰদতি উপরি সব্বানি পকাসেতুকামো. সঙ্খারলোকস্স হি অন্তো নিব্বানং.

দল়্হং থিরং ধনু এতস্সাতি দল়্হধন্ৰা, সো এৰ ‘‘দল়্হধম্মা’’তি ৰুত্তো. তেনাহ ‘‘দল়্হধনূ’’তি. উত্তমপ্পমাণং নাম সহস্সথামধনু. ধনুগ্গণ্হনসিপ্পচিত্তকতায ধনুগ্গহো, ন ধনুগ্গহণমত্তেনাতি আহ ‘‘ধনুগ্গহোতি ধনুআচরিযো’’তি. ‘‘ধনুগ্গহো’’তি ৰত্ৰা ‘‘সিক্খিতো’’তি ৰুত্তে ধনুসিক্খায সিক্খিতোতি ৰিঞ্ঞাযতি. সিক্খা চ এত্তকেন কালেন সিক্খন্তস্স উক্কংসগতা হোতীতি আহ ‘‘দ্ৰাদস ৰস্সানি ধনুসিপ্পং সিক্খিতো’’তি. উসভপ্পমাণেতি ৰীসতি যট্ঠিযো উসভং, তস্মিং উসভপ্পমাণে পদেসে. ৰালগ্গন্তি ৰালকোটিং. কতহত্থোতি পরিচিতহত্থো. কতসরক্খেপোতি থিরলক্খে চ চললক্খে চ পরেসং দস্সনৰসেন সরক্খেপস্স কতাপী. তেনাহ ‘‘দস্সিতসিপ্পো’’তি, ‘‘কতযোগ্গো’’তি কেচি. অসন্তি এতেনাতি অসনং, কণ্ডো. তালচ্ছাদিন্তি তালচ্ছাযং. সা পন রতনমত্তা ৰিদত্থিচতুরঙ্গুলা.

পুরত্থিমা সমুদ্দাতি একস্মিং চক্কৰাল়ে পুরত্থিমা সমুদ্দা. সমুদ্দসীসেন পুরত্থিমচক্কৰাল়মুখৰট্টিং ৰদতি. পচ্ছিমসমুদ্দোতি এত্থাপি এসেৰ নযো. নিপ্পপঞ্চতন্তি অদন্তকারিতং. সম্পত্তেতি তাদিসেন জৰেন গচ্ছন্তেন সম্পত্তে. অনোতত্তেতি এত্থাপি ‘‘সম্পত্তে’’তি পদং আনেত্ৰা সম্বন্ধো, তথা ‘‘নাগলতাদন্তকট্ঠ’’ন্তি এত্থাপি. তদাতি যদা সো লোকন্তগৰেসকো অহোসি, তদা. দীঘাযুককালোতি অনেকৰস্সসহস্সাযুককালো. চক্কৰাল়লোকস্সাতি সামঞ্ঞৰসেন একৰচনং, চক্কৰাল়লোকানন্তি অত্থো. ইমস্মিংযেৰ চক্কৰাল়ে নিব্বত্তিপুব্বপরিচযসিদ্ধায নিকন্তিযা.

সসঞ্ঞিম্হি সমনকেতি ন রূপধম্মমত্তকে, অথ খো পঞ্চক্খন্ধসমুদাযেতি দস্সেতি. সমিতপাপোতি সমুচ্ছিন্নসংকিলেসধম্মো. ছট্ঠং উত্তানমেৰ.

রোহিতস্সসুত্তাদিৰণ্ণনা নিট্ঠিতা.