১০. পরিব্বাজকসুত্তৰণ্ণনা

৩০. দসমে অভিঞ্ঞাতাতি এদিসো চ এদিসো চাতি অভিলক্খণৰসেন ঞাতা. তেনাহ ‘‘ঞাতা পাকটা’’তি. পটিসল্লানা ৰুট্ঠিতোতি এত্থ পটিসল্লানন্তি তেহি তেহি সদ্ধিৰিহারিকঅন্তেৰাসিকউপাসকাদিসত্তেহি চেৰ রূপারম্মণাদিসঙ্খারেহি চ পটিনিৰত্তিত্ৰা অপসক্কিত্ৰা সল্লীনং নিলীযনং, একীভাৰো পৰিৰেকোতি ৰুত্তং হোতি. যো ততো ৰুট্ঠিতো, সো পটিসল্লানা ৰুট্ঠিতো নাম হোতি. ভগৰা পন যস্মা পটিসল্লানা উত্তমতো ফলসমাপত্তিতো ৰুট্ঠাসি, তস্মা ৰুত্তং ‘‘পটিসল্লানা ৰুট্ঠিতোতি ফলসমাপত্তিতো ৰুট্ঠিতো’’তি. ৰত্থুকামেসূতি রূপাদীসু কিলেসকামস্স ৰত্থুভূতেসু কামেসু. বহলরাগন্তি থিরমূলদুম্মোচনীযতাহি অজ্ঝোসানেন বহলভূতং কিলেসকামং. সকারণাতি যেহি কারণেহি পরেসং ৰাদে দোসং দস্সেন্তি, তেহি কারণেহি সকারণা. ন হি লক্খণযুত্তেন হেতুনা ৰিনা পরৰাদেসু দোসং দস্সেতুং সক্কা.

এৰমাদীতি এত্থ আদিসদ্দেন ‘‘নত্থি হেতু নত্থি পচ্চযো সত্তানং সংকিলেসাযা’’তি (দী. নি. ১.১৬৮) এৰমাদিং সঙ্গণ্হাতি, তস্মা এৰমাদিৰাদিনো এৰং হেতুপ্পটিক্খেপৰাদিনোতি অত্থো. এত্থ চ নত্থিকদিট্ঠি ৰিপাকং পটিবাহতি, অকিরিযদিট্ঠি কম্মং পটিবাহতি, অহেতুকদিট্ঠি উভযং পটিবাহতি. তত্থ কম্মং পটিবাহন্তেন ৰিপাকো পটিবাহিতো হোতি, ৰিপাকং পটিবাহন্তেনপি কম্মং পটিবাহিতং. ইতি সব্বেপেতে অত্থতো উভযপটিবাহকা অহেতুৰাদা চেৰ অকিরিযৰাদা চ নত্থিকৰাদা চ হোন্তি.

ওক্কন্তনিযমাতি ওগাল়্হমিচ্ছত্তনিযমা. সজ্ঝাযতীতি তং দিট্ঠিদীপকং গন্থং উগ্গহেত্ৰা পঠতি. ৰীমংসতীতি তস্স অত্থং ৰিচারেতি. তস্সাতিআদি ৰীমংসনাকারদস্সনং. তস্মিং আরম্মণেতি যথাপরিকপ্পিতহেতুপচ্চযাভাৰাদিকে নত্থি হেতূতিআদিনযপ্পৰত্তায লদ্ধিযা আরম্মণে. মিচ্ছাসতি সন্তিট্ঠতীতি ‘‘নত্থি হেতূ’’তিআদিৰসেন অনুস্সৰূপলদ্ধে অত্থে তদাকারপরিৰিতক্কনেহি সৰিগ্গহে ৰিয সরূপতো চিত্তস্স পচ্চুপট্ঠিতে চিরকালপরিচযেন এৰমেতন্তি নিজ্ঝানক্খমভাৰূপগমনেন নিজ্ঝানক্খন্তিযা তথাগহিতে পুনপ্পুনং তথেৰ আসেৰন্তস্স বহুলীকরোন্তস্স মিচ্ছাৰিতক্কেন সমানীযমানা মিচ্ছাৰাযামোপত্থম্ভিতা অতংসভাৰং তংসভাৰন্তি গণ্হন্তী মিচ্ছাসতীতি লদ্ধনামা তংলদ্ধিসহগতা তণ্হা সন্তিট্ঠতি. চিত্তং একগ্গং হোতীতি যথাৰুত্তৰিতক্কাদিপচ্চযলাভেন তস্মিং আরম্মণে অৰট্ঠিততায অনেকগ্গতং পহায চিত্তং একগ্গং অপ্পিতং ৰিয হোতি মিচ্ছাসমাধিনা. সোপি হি পচ্চযৰিসেসেন লদ্ধভাৰনাবলো কদাচি সমাধানপটিরূপকিচ্চকরো হোতিযেৰ পহরণৰিজ্ঝনাদীসু ৰিযাতি দট্ঠব্বং.

জৰনানি জৰন্তীতি অনেকক্খত্তুং তেনাকারেন পুব্বভাগিযেসু জৰনৰারেসু পৰত্তেসু সব্বপচ্ছিমে জৰনৰারে সত্ত জৰনানি জৰন্তি. পঠমজৰনে সতেকিচ্ছো হোতি, তথা দুতিযাদীসূতি ধম্মসভাৰদস্সনমেতং, ন পন তস্মিং খণে তেসং সতেকিচ্ছভাৰাপাদনং কেনচি সক্কা কাতুং. তত্থাতি তেসু তীসু মিচ্ছাদস্সনেসু. কোচি একং দস্সনং ওক্কমতীতি যস্স একস্মিংযেৰ অভিনিৰেসো আসেৰনা পৰত্তা, সো একংযেৰ দস্সনং ওক্কমতি. যস্স দ্ৰীসু তীসুপি ৰা অভিনিৰেসো আসেৰনা পৰত্তা, সো দ্ৰে তীণি ওক্কমতি. এতেন যা পুব্বে উভযপটিবাহিকতামুখেন পৰত্তা অত্থসিদ্ধা সব্বদিট্ঠিকা, সা পুব্বভাগিযা, মিচ্ছানিযামোক্কন্তিযা পন যথাসকং পচ্চযসমুদাগমদিট্ঠিতো ভিন্নারম্মণানং ৰিয ৰিসেসাধিগমানং একজ্ঝং অনুপ্পত্তিযা অভিকিণ্ণা এৰাতি দস্সেতি. একস্মিং ওক্কন্তেপি দ্ৰীসু তীসু ওক্কন্তেসুপি নিযতমিচ্ছাদিট্ঠিকোৰ হোতীতি ইমিনা তিস্সন্নম্পি দিট্ঠীনং সমানফলতং সমানবলঞ্চ দস্সেতি. তস্মা তিস্সোপি চেতনা একস্স উপ্পন্না অঞ্ঞমঞ্ঞং অনুবলপ্পদাযিকা হোন্তি.

কিং পনেস এতস্মিঞ্ঞেৰ অত্তভাৰে নিযতো, উদাহু অঞ্ঞস্মিম্পীতি? এতস্মিঞ্ঞেৰ নিযতো. অকুসলঞ্হি নামেতং অবলং, ন কুসলং ৰিয মহাবলং. অঞ্ঞথা সম্মত্তনিযামো ৰিয অচ্চন্তিকো সিযা, আসেৰনৰসেন পন ভৰন্তরেপি তং তং দিট্ঠিং রোচেতিযেৰ. তেনেৰাহ ‘‘ৰট্টখাণুকো নামেস সত্তো’’তি. তস্মা ‘‘সকিং নিমুগ্গো নিমুগ্গো এৰ বালো’’তি ৰিয ৰট্টখাণুজোতনা, যাদিসেহি পন পচ্চযেহি অযং তং দস্সনং ওক্কন্তো পুন কদাচি মিচ্ছত্তনিযামো তপ্পটিক্খেপপচ্চযে পটিচ্চ ততো সীসুক্খেপনমস্স ন হোতীতি ন ৰত্তব্বং. তেন ৰুত্তং ‘‘যেভুয্যেনা’’তি. এদিসাতি ‘‘বুদ্ধানম্পি অতেকিচ্ছা’’তিআদিনা ৰুত্তসদিসা.

অত্তনো নিন্দাভযেনাতি ‘‘সম্মা দিট্ঠিঞ্চ নাম তে গরহন্তী’’তিআদিনা অত্তনো উপরি পরেহি ৰত্তব্বনিন্দাভযেন. ঘট্টনভযেনাতি তথা পরেসং অপসাদনভযেন. সহধম্মেন পরেন অত্তনো উপরি কাতব্বনিগ্গহো উপারম্ভো, ততো পরিত্তাসো উপারম্ভভযং. তং পন অত্থতো উপৰাদভযং হোতীতি আহ ‘‘উপৰাদভযেনা’’তি. পটিপ্পস্সদ্ধিৰসেন অভিজ্ঝা ৰিনযতি এতেনাতি অভিজ্ঝাৰিনযো, অরহত্তফলং. তেনাহ ‘‘অভিজ্ঝাৰিনযো ৰুচ্চতি অরহত্ত’’ন্তি.

পরিব্বাজকসুত্তৰণ্ণনা নিট্ঠিতা.

উরুৰেলৰগ্গৰণ্ণনা নিট্ঠিতা.