১১-১৩. পঠমমোরনিৰাপসুত্তাদিৰণ্ণনা

১৪৪-১৪৬. একাদসমে অকুপ্পধম্মতায খযৰযসঙ্খাতং অন্তং অতীতাতি অচ্চন্তা, এৰং অপরিহাযনসভাৰত্তা অচ্চন্তা নিট্ঠা অস্সাতি অচ্চন্তনিট্ঠো. তেনাহ ‘‘অন্তং অতিক্কন্তনিট্ঠো’’তিআদি. ন হি পটিৰিদ্ধস্স লোকুত্তরধম্মস্স দস্সনং কুপ্পনং নাম অত্থি. ধুৰনিট্ঠোতি সততনিট্ঠো. অচ্চন্তমেৰ চতূহি যোগেহি খেমো এতস্স অত্থীতি অচ্চন্তযোগক্খেমী, নিচ্চযোগক্খেমীতি অত্থো. মগ্গব্রহ্মচরিযস্স ৰুসিতত্তা তস্স অৰিহাযনসভাৰত্তা অচ্চন্তং ব্রহ্মচারীতি অচ্চন্তব্রহ্মচারী, নিচ্চব্রহ্মচারীতি অত্থো. পরিযোসানন্তি ব্রহ্মচরিযপরিযোসানং ৰট্টদুক্খপরিযোসানঞ্চ. অচ্চন্তং পরিযোসানমস্সাতি অচ্চন্তপরিযোসানো. দ্ৰাদসমতেরসমানি উত্তানত্থানেৰ.

পঠমমোরনিৰাপসুত্তাদিৰণ্ণনা নিট্ঠিতা.

যোধাজীৰৰগ্গৰণ্ণনা নিট্ঠিতা.

১৪৭-১৫৬. মঙ্গলৰগ্গো উত্তানত্থোযেৰ.

ততিযপণ্ণাসকং নিট্ঠিতং.