(১৬) ৬. অচেলকৰগ্গৰণ্ণনা

১৫৭-১৬৩. ইতো পরেসু পন সুত্তপদেসু ‘‘গাল়্হা’’তি ৰুত্তমত্থং ৰিৰরন্তো ‘‘কক্খল়া’’তি আহ. কক্খল়চারো চস্সা ন লূখসভাৰো. অথ খো তণ্হাৰসেন থিরগ্গহণন্তি আহ ‘‘লোভৰসেন থিরগ্গহণা’’তি. অগাল়্হা পটিপদাতি ৰা কামানং ওগাহনং পটিপত্তি, কামসুখানুযোগোতি অত্থো. নিজ্ঝামা পটিপদাতি কাযস্স নিজ্ঝাপনৰসেন খেপনৰসেন পৰত্তা পটিপত্তি, অত্তকিলমথানুযোগোতি অত্থো. নিচ্চেলোতি নিস্সট্ঠচেলো সব্বেন সব্বং পটিক্খিত্তচেলো. নগ্গিযৰতসমাদানেন নগ্গো. ঠিতকোৰ উচ্চারং করোতীতিআদি নিদস্সনমত্তং ৰমিত্ৰা মুখৰিক্খালনাদিআচারস্সপি তেন ৰিস্সট্ঠত্তা. জিৰ্হায হত্থং অপলেখতি অৰলেখতি উদকেন অধোৰনতো. দুতিযৰিকপ্পেপি এসেৰ নযো. ‘‘এহি, ভদন্তে’’তি ৰুত্তে উপগমনসঙ্খাতো ৰিধি এহিভদন্তো, তং চরতীতি এহিভদন্তিকো, তপ্পটিক্খেপেন ন এহিভদন্তিকো. ন করোতি ‘‘সমণেন নাম পরস্স ৰচনকরেন ন ভৰিতব্ব’’ন্তি অধিপ্পাযেন.

পুরেতরন্তি তং ঠানং অত্তনো উপগমনতো পুরেতরং. তং কির সো ‘‘ভিক্খুনা নাম যদিচ্ছকা এৰ ভিক্খা গহেতব্বা’’তি অধিপ্পাযেন ন গণ্হাতি. উদ্দিস্স কতং মম নিমিত্তভাৰেন বহূ খুদ্দকা পাণা সঙ্ঘাতং আপাদিতাতি ন গণ্হাতি. নিমন্তনং ন সাদিযতি এৰং তেসং ৰচনং কতং ভৰিস্সতীতি. কুম্ভি আদীসুপি সো সত্তসঞ্ঞীতি আহ ‘‘কুম্ভি-কল়োপিযো’’তিআদি. কবল়ন্তরাযো হোতীতি উট্ঠিতস্স দ্ৰিন্নম্পি কবল়ন্তরাযো হোতি. গামসভাগাদিৰসেন সঙ্গম্ম কিত্তেন্তি এতিস্সাতি সঙ্কিত্তি, যথাসংহততণ্ডুলাদিসঞ্চযো. মানুসকানীতি ৰেয্যাৰচ্চকরা মনুস্সা.

সুরাপানমেৰাতি মজ্জলক্খণপ্পত্তায সুরায পানমেৰ. সুরাগহণেনেৰেত্থ মেরযম্পি সঙ্গহিতং. একাগারমেৰ উঞ্ছতীতি একাগারিকো. একালোপেনেৰ ৰত্ততীতি একালোপিকো. দীযতি এতাযাতি দত্তি, দ্ৰত্তিআলোপমত্তগ্গাহি খুদ্দকং ভিক্খাদানভাজনং. তেনাহ ‘‘খুদ্দকপাতী’’তি. অভুঞ্জনৰসেন একো অহো এতস্স অত্থীতি একাহিকো, আহারো, তং একাহিকং. সো পন অত্থতো একদিৰসং লঙ্ঘকো হোতীতি আহ ‘‘একাদিৰসন্তরিক’’ন্তি. দ্ৰাহিকন্তিআদীসুপি এসেৰ নযো. একাহং অভুঞ্জিত্ৰা একাহং ভুঞ্জনং একাহৰারো, তং একাহিকমেৰ অত্থতো. দ্ৰীহং অভুঞ্জিত্ৰা দ্ৰীহং ভুঞ্জনং দ্ৰীহৰারো. সেসপদদ্ৰযেপি এসেৰ নযো. উক্কট্ঠো পন পরিযাযভত্তভোজনিকো দ্ৰীহং অভুঞ্জিত্ৰা একাহমেৰ ভুঞ্জতি. সেসদ্ৰযেপি এসেৰ নযো.

মিচ্ছাৰাযামৰসেনেৰ উক্কুটিকৰতানুযোগোতি আহ ‘‘উক্কুটিকৰীরিযমনুযুত্তো’’তি. অত্তকিলমথানুযোগন্তি অত্তনো কিলমথানুযোগং, সরীরদুক্খকারণন্তি অত্থো. সরীরপরিযাযো হি ইধ অত্তসদ্দো ‘‘অত্তন্তপো’’তিআদীসু (ম. নি. ২.৪১৩) ৰিয. দ্ৰে অন্তেতি উভো কোটিযো, উভো লামকপটিপত্তিযোতি অত্থো. লামকম্পি হি অন্তোতি ৰুচ্চতি ‘‘অন্তমিদং, ভিক্খৰে, জীৰিকানং (সং. নি. ৩.৮০; ইতিৰু. ৬১), কোট্ঠকো অন্তো’’তি এৰমাদীসু. মজ্ঝিমপটিপদায উপ্পথভাৰেন অমনীযা গন্তব্বা ঞাতব্বাতি অন্তা. ততো এৰ লামকা.

অচেলকৰগ্গৰণ্ণনা নিট্ঠিতা.

পেয্যালৰগ্গৰণ্ণনা

১৬৪-১৮৪. সমনুঞ্ঞোতি সম্মদেৰ কতানুঞ্ঞো. তেনাহ ‘‘সমানজ্ঝাসযো’’তি. সেসমেত্থ উত্তানমেৰ.

ইতি মনোরথপূরণিযা অঙ্গুত্তরনিকায-অট্ঠকথায

তিকনিপাতৰণ্ণনায অনুত্তানত্থদীপনা সমত্তা.