৭. কণ্হসুত্তৰণ্ণনা

৭. সত্তমে যথা ‘‘কণ্হা গাৰী’’তিআদীসু কাল়ৰণ্ণেন সমন্নাগতা ‘‘কণ্হা’’তি ৰুচ্চতি, ন এৰং কাল়ৰণ্ণতায ধম্মা ‘‘কণ্হা’’তি ৰুচ্চন্তি, অথ খো কণ্হাভিজাতিনিব্বত্তিহেতুতো অপ্পভস্সরভাৰকরণতো ৰা ‘‘কণ্হা’’তি ৰুচ্চন্তীতি দস্সেন্তো ‘‘ন কাল়ৰণ্ণতাযা’’তিআদিমাহ. কণ্হতাযাতি কণ্হাভিজাতিতায. কণ্হাভিজাতীতি চ অপাযা ৰুচ্চন্তি মনুস্সেসু চ দোভগ্গিযং. সরসেনাতি সভাৰেন. ন হিরীযতি ন লজ্জতীতি অহিরিকো, পুগ্গলো, চিত্তং, তং সম্পযুত্তধম্মসমুদাযো ৰা. তস্স ভাৰো অহিরিক্কন্তি ৰত্তব্বে একস্স ক-কারস্স লোপং কত্ৰা অহিরিকন্তি ৰুত্তন্তি আহ ‘‘অহিরিকন্তি অহিরিকভাৰো’’তি. ন ওত্তপ্পতীতি অনোত্তাপী, পুগ্গলো, যথাৰুত্তধম্মসমুদাযো ৰা, তস্স ভাৰো অনোত্তপ্পন্তি আহ ‘‘অনোত্তাপিভাৰো’’তি.

কণ্হসুত্তৰণ্ণনা নিট্ঠিতা.