১৪. এতদগ্গৰগ্গো

(১৪) ৬. ছট্ঠএতদগ্গৰগ্গৰণ্ণনা

তপুস্স-ভল্লিকৰত্থু

২৪৮. উপাসকপাল়িসংৰণ্ণনায পঠমে সব্বপঠমং সরণং গচ্ছন্তানন্তি সব্বেসং পঠমং হুত্ৰা সরণং গচ্ছন্তানং. ইতো পরন্তি সত্তসত্তাহতো পরং. গমনূপচ্ছেদং অকাসীতি গমনৰিচ্ছেদং অকাসি. যথা তে গোণা ধুরং ছড্ডেত্ৰা পোথিযমানাপি ন গচ্ছন্তি, তথা অকাসীতি অত্থো. তেসন্তি তপুস্সভল্লিকানং. অধিমুচ্চিত্ৰাতি আৰিসিত্ৰা. যক্খস্স আৰট্টো যক্খাৰট্টো. এৰং সেসেসুপি. অতীতবুদ্ধানং আচিণ্ণং ওলোকেসীতি অতীতবুদ্ধা কেন ভাজনেন পটিগ্গণ্হিংসূতি বুদ্ধাচিণ্ণং ওলোকেসি. দ্ৰেৰাচিকে সরণে পতিট্ঠাযাতি সঙ্ঘস্স অনুপ্পন্নত্তা বুদ্ধধম্মৰসেন দ্ৰেৰাচিকে সরণে পতিট্ঠহিত্ৰা. চেতিযন্তি পূজনীযৰত্থুং. জীৰকেসধাতুযাতি জীৰমানস্স ভগৰতো কেসধাতুযা.

অনাথপিণ্ডিকসেট্ঠিৰত্থু

২৪৯. দুতিযে তেনেৰ গুণেনাতি তেনেৰ দাযকভাৰসঙ্খাতেন গুণেন. সো হি সব্বকামসমিদ্ধতায ৰিগতমচ্ছেরতায করুণাদিগুণসমঙ্গিতায চ নিচ্চকালং অনাথানং পিণ্ডমদাসি. তেন সব্বকালং উপট্ঠিতো অনাথানং পিণ্ডো এতস্স অত্থীতি অনাথপিণ্ডিকোতি সঙ্খং গতো. যোজনিকৰিহারে কারেত্ৰাতি যোজনে যোজনে একমেকং ৰিহারং কারেত্ৰা. ‘‘এৰরূপং দানং পৰত্তেসী’’তি ৰত্ৰা তমেৰ দানং ৰিভজিত্ৰা দস্সেন্তো ‘‘দেৰসিকং পঞ্চ সলাকভত্তানি হোন্তী’’তিআদিমাহ. তত্থ সলাকায গাহেতব্বং ভত্তং সলাকভত্তং. একস্মিং পক্খে একদিৰসং দাতব্বং ভত্তং পক্খিকভত্তং. ধুরগেহে ঠপেত্ৰা দাতব্বং ভত্তং ধুরভত্তং. আগন্তুকানং দাতব্বং ভত্তং আগন্তুকভত্তং. এৰং সেসেসুপি. পঞ্চ আসনসতানি গেহে নিচ্চপঞ্ঞত্তানেৰ হোন্তীতি গেহে নিসীদাপেত্ৰা ভুঞ্জন্তানং পঞ্চন্নং ভিক্খুসতানং পঞ্চ আসনসতানি নিচ্চপঞ্ঞত্তানি হোন্তি.

চিত্তগহপতিৰত্থু

২৫০. ততিযে মিগা এৰ মিগরূপানি. ভিক্খং সমাদাপেত্ৰাতি, ‘‘ভন্তে, ময্হং অনুগ্গহং করোথ, ইধ নিসীদিত্ৰা ভিক্খং গণ্হথা’’তি ভিক্খাগহণত্থং সমাদাপেত্ৰা. ৰিৰট্টং উদ্দিস্স উপচিতং নিব্বেধভাগিযকুসলং উপনিস্সযো. সল়াযতনৰিভত্তিমেৰ দেসেসীতি সল়াযতনৰিভাগপ্পটিসংযুত্তমেৰ ধম্মকথং কথেসি. থেরেনাতি তত্থ সন্নিহিতানং সব্বেসং জেট্ঠেন মহাথেরেন. পঞ্হং ৰিস্সজ্জেতুং অসক্কোন্তেনাতি চিত্তেন গহপতিনা ‘‘যা ইমা, ভন্তে থের, অনেকৰিহিতা দিট্ঠিযো লোকে উপ্পজ্জন্তি, ‘সস্সতো লোকো’তি ৰা, ‘অসস্সতো লোকো’তি ৰা, ‘অন্তৰা লোকো’তি ৰা, ‘অনন্তৰা লোকো’তি ৰা, ‘তং জীৰং তং সরীর’ন্তি ৰা, ‘অঞ্ঞং জীৰং অঞ্ঞং সরীর’ন্তি ৰা, ‘হোতি তথাগতো পরং মরণা’তি ৰা, ‘ন হোতি তথাগতো পরং মরণা’তি ৰা, ‘হোতি চ ন হোতি চ তথাগতো পরং মরণা’তি ৰা, ‘নেৰ হোতি ন ন হোতি তথাগতো পরং মরণা’তি ৰা যানি চিমানি দ্ৰাসট্ঠি দিট্ঠিগতানি ব্রহ্মজালে গণিতানি, ইমা নু খো, ভন্তে, দিট্ঠিযো কিস্মিং সতি হোন্তি, কিস্মিং অসতি ন হোন্তী’’তি এৰমাদিনা (সং. নি. ৪.৩৪৫) পঞ্হে পুট্ঠে তং পঞ্হং ৰিস্সজ্জেতুং অসক্কোন্তেন. ইমং কির পঞ্হং যাৰততিযং পুট্ঠো মহাথেরো তুণ্হী অহোসি. অথ ইসিদত্তত্থেরো চিন্তেসি – ‘‘অযং থেরো নেৰ অত্তনা ব্যাকরোতি, ন অঞ্ঞং অজ্ঝেসতি, উপাসকো চ ভিক্খুসঙ্ঘং ৰিহেসতি, অহমেতং ব্যাকরিত্ৰা ফাসুৰিহারং কত্ৰা দস্সামী’’তি. এৰং চিন্তেত্ৰা চ আসনতো ৰুট্ঠায থেরস্স সন্তিকং গন্ত্ৰা ‘‘ব্যাকরোমহং, ভন্তে, চিত্তস্স গহপতিনো এতং পঞ্হ’’ন্তি (সং. নি. ৪.৩৪৫) আহ. এৰং ৰুত্তে থেরো ‘‘ব্যাকরোহি ত্ৰং, আৰুসো ইসিদত্ত, চিত্তস্স গহপতিনো এতং পঞ্হ’’ন্তি ইসিদত্তং অজ্ঝেসি. তেন ৰুত্তং – ‘‘পঞ্হং ৰিস্সজ্জেতুং অসক্কোন্তেন অজ্ঝিট্ঠো’’তি.

পঞ্হং ৰিস্সজ্জেত্ৰাতি ‘‘যা ইমা, গহপতি, অনেকৰিহিতা দিট্ঠিযো লোকে উপ্পজ্জন্তি ‘সস্সতো লোকো’তি ৰা, ‘অসস্সতো লোকো’তি ৰা…পে… যানি চিমানি দ্ৰাসট্ঠি দিট্ঠিগতানি ব্রহ্মজালে গণিতানি, ইমা খো, গহপতি, দিট্ঠিযো সক্কাযদিট্ঠিযা সতি হোন্তি, সক্কাযদিট্ঠিযা অসতি ন হোন্তী’’তিআদিনা নযেন পঞ্হং ৰিস্সজ্জেত্ৰা. গিহিসহাযকভাৰে ঞাতেতি থেরস্স গিহিসহাযকভাৰে চিত্তেন গহপতিনা ঞাতে. চিত্তো কির, গহপতি, তস্স পঞ্হৰেয্যাকরণে তুট্ঠো ‘‘কুতো, ভন্তে, অয্যো ইসিদত্তো আগচ্ছতী’’তি ৰত্ৰা ‘‘অৰন্তিযা খো অহং, গহপতি, আগচ্ছামী’’তি ৰুত্তো ‘‘অত্থি, ভন্তে, অৰন্তিযা ইসিদত্তো নাম কুলপুত্তো অম্হাকং অদিট্ঠসহাযো পব্বজিতো, দিট্ঠো সো আযস্মতা’’তি পুচ্ছি. থেরো চ ‘‘এৰং, গহপতী’’তি ৰত্ৰা ‘‘কহং নু খো, ভন্তে, সো আযস্মা এতরহি ৰিহরতী’’তি পুন পুট্ঠো তুণ্হী অহোসি. অথ চিত্তো গহপতি ‘‘অয্যো নো, ভন্তে, ইসিদত্তো’’তি পুচ্ছিত্ৰা ‘‘এৰং, গহপতী’’তি ৰুত্তে অত্তনো গিহিসহাযভাৰং অঞ্ঞাসি.

তেজোসমাপত্তিপাটিহারিযং দস্সেত্ৰাতি একস্মিং কির দিৰসে চিত্তো গহপতি ‘‘সাধু মে, ভন্তে, অয্যো উত্তরিমনুস্সধম্মা ইদ্ধিপাটিহারিযং দস্সেতূ’’তি মহাথেরং যাচি. থেরো ‘‘তেন হি ত্ৰং, গহপতি, আল়িন্দে উত্তরাসঙ্গং পঞ্ঞাপেত্ৰা তত্থ তিণকলাপং ওকিরা’’তি ৰত্ৰা তেন চ তথা কতে সযং ৰিহারং পৰিসিত্ৰা চ ঘটিকং দত্ৰা তথারূপং ইদ্ধাভিসঙ্খারং অভিসঙ্খারেসি, যথা তাল়চ্ছিগ্গল়েন চ অগ্গল়ন্তরিকায চ অচ্চি নিক্খমিত্ৰা তিণানি ঝাপেতি, উত্তরাসঙ্গং ন ঝাপেতি. অথ চিত্তো গহপতি উত্তরাসঙ্গং পপ্ফোটেত্ৰা সংৰিগ্গো লোমহট্ঠজাতো একমন্তং ঠিতো থেরং বহি নিক্খমন্তং দিস্ৰা ‘‘অভিরমতু, ভন্তে, অয্যো মচ্ছিকাসণ্ডে, রমণীযং অম্বাটকৰনং, অহং অয্যস্স উস্সুক্কং করিস্সামি চীৰরপিণ্ডপাতসেনাসনগিলানপচ্চযভেসজ্জপরিক্খারান’’ন্তি আহ. ততো থেরো ‘‘ন দানি ইধ ৰসিতুং সক্কা’’তি তম্হা ৰিহারা পক্কামি. তং সন্ধাযেতং ৰুত্তং – ‘‘তেজোসমাপত্তি পাটিহারিযং দস্সেত্ৰা ‘ইদানি ইধ ৰসিতুং ন যুত্ত’ন্তি যথাসুখং পক্কামী’’তি. দ্ৰে অগ্গসাৰকাতিআদীসু যং ৰত্তব্বং, তং ৰিত্থারতো ৰিনযপাল়িযং আগতমেৰ.

সদ্ধোতি লোকিযলোকুত্তরায সদ্ধায সমন্নাগতো. সীলেনাতি অগারিযসীলং অনগারিযসীলন্তি দুৰিধং সীলং, তেসু ইধ অগারিযং সীলং অধিপ্পেতং, তেন সমন্নাগতোতি অত্থো. যসোভোগসমপ্পিতোতি যাদিসো অনাথপিণ্ডিকাদীনং পঞ্চউপাসকসতপরিৰারসঙ্খাতো অগারিযো যসো, তাদিসেনেৰ যসেন, যো চ ধনধঞ্ঞাদিকো চেৰ সত্তৰিধঅরিযধনসঙ্খাতো চাতি দুৰিধো ভোগো, তেন চ সমন্নাগতোতি অত্থো. যং যং পদেসন্তি পুরত্থিমাদীসু দিসাসু এৰরূপো কুলপুত্তো যং যং পদেসং ভজতি, তত্থ তত্থ এৰরূপেন লাভসক্কারেন পূজিতোৰ হোতীতি অত্থো.

হত্থকআল়ৰকৰত্থু

২৫১. চতুত্থে চতুব্বিধেন সঙ্গহৰত্থুনাতি দানপিযৰচনঅত্থচরিযাসমানত্ততাসঙ্খাতেন চতুব্বিধেন সঙ্গহৰত্থুনা. ‘‘স্ৰে ভত্তচাটিযা সদ্ধিং আল়ৰকস্স পেসেতব্বো অহোসী’’তি ৰুত্তমত্থং পাকটং কত্ৰা দস্সেতুং – ‘‘তত্রাযং অনুপুব্বিকথা’’তিআদিমাহ. মিগৰত্থায অরঞ্ঞং গন্ত্ৰাতি আল়ৰকো রাজা ৰিৰিধনাটকূপভোগং ছড্ডেত্ৰা চোরপ্পটিবাহনত্থঞ্চ পটিরাজনিসেধনত্থঞ্চ ব্যাযামকরণত্থঞ্চ সত্তমে সত্তমে দিৰসে মিগৰং গচ্ছন্তো একদিৰসং বলকাযেন সদ্ধিং ‘‘যস্স পস্সেন মিগো পলাযতি, তস্সেৰ সো ভারো’’তি কতকতিকৰত্তো মিগৰত্থায অরঞ্ঞং গন্ত্ৰা. একং মিগন্তি অত্তনো ঠিতট্ঠানেন পলাতং এণিমিগং. অনুবন্ধিত্ৰাতি তিযোজনমগ্গং এককোৰ অনুবন্ধিত্ৰা. জৰসম্পন্নো হি রাজা ধনুং গহেত্ৰা পত্তিকোৰ তিযোজনং তং মিগমনুবন্ধি. ঘাতেত্ৰাতি যস্মা এণিমিগা তিযোজনৰেগা এৰ হোন্তি, তস্মা পরিক্খিণজৰং তং মিগং উদকং পৰিসিত্ৰা ঠিতং ঘাতেত্ৰা. দ্ৰিধা ছেত্ৰা ধনুকোটিযং লগেত্ৰা নিৰত্তেত্ৰা আগচ্ছন্তোতি অনত্থিকোপি মংসেন ‘‘নাসক্খি মিগং গহেতু’’ন্তি অপৰাদমোচনত্থং দ্ৰিধা ছিন্নং ধনুকোটিযং লগেত্ৰা আগচ্ছন্তো. সন্দচ্ছাযন্তি ঘনচ্ছাযং বহলপত্তপলাসং.

রুক্খে অধিৰত্থা দেৰতাতি আল়ৰকং যক্খং সন্ধায ৰদতি. সো হি মহারাজূনং সন্তিকা ৰরং লভিত্ৰা মজ্ঝন্হিকসমযে তস্স রুক্খস্স ছাযায ফুট্ঠোকাসং পৰিট্ঠে পাণিনো খাদন্তো তত্থ পটিৰসতি. আল়ৰকস্স নিসীদনপল্লঙ্কে নিসীদীতি যত্থ অভিলক্খিতেসু মঙ্গলদিৰসাদীসু আল়ৰকো নিসীদিত্ৰা সিরিং অনুভোতি, তস্মিংযেৰ দিব্বরতনপল্লঙ্কে নিসীদি. অত্তনো গমনে অসম্পজ্জমানে ‘‘কিং নু খো কারণ’’ন্তি আৰজ্জেন্তাতি তদা কির সাতাগিরহেমৰতা ভগৰন্তং জেতৰনেযেৰ ৰন্দিত্ৰা ‘‘যক্খসমাগমং গমিস্সামা’’তি সপরিৰারা নানাযানেহি আকাসেন গচ্ছন্তি, আকাসে চ যক্খানং ন সব্বত্থ মগ্গো অত্থি, আকাসট্ঠানি ৰিমানানি পরিহরিত্ৰা মগ্গট্ঠানেনেৰ মগ্গো হোতি, আল়ৰকস্স পন ৰিমানং ভূমট্ঠং সুগুত্তং পাকারপরিক্খিত্তং সুসংৰিহিতদ্ৰারট্টালকগোপুরং উপরি কংসজালসঞ্ছন্নমঞ্জূসাসদিসং তিযোজনং উব্বেধেন, তস্স উপরি মগ্গো হোতি, তে তং পদেসমাগম্ম গন্তুমসমত্থা অহেসুং. বুদ্ধানঞ্হি নিসিন্নোকাসস্স উপরিভাগেন যাৰ ভৰগ্গা কোচি গন্তুমসমত্থো, তস্মা অত্তনো গমনে অসম্পজ্জমানে ‘‘কিং নু খো কারণ’’ন্তি আৰজ্জেসুং. তেসং কথং সুত্ৰা চিন্তেসীতি যস্মা অস্সদ্ধস্স সদ্ধাকথা দুক্কথা হোতি দুস্সীলাদীনং সীলকথাদযো ৰিয, তস্মা তেসং যক্খানং সন্তিকা ভগৰতো পসংসং সুত্ৰা এৰ অগ্গিম্হি পক্খিত্তলোণসক্খরা ৰিয অব্ভন্তরে উপ্পন্নকোপেন পটপটাযমানহদযো হুত্ৰা চিন্তেসি. পব্বতকূটন্তি কেলাসপব্বতকূটং.

ইতো পট্ঠায আল়ৰকযুদ্ধং ৰিত্থারেতব্বন্তি সো কির মনোসিলাতলে ৰামপাদেন ঠত্ৰা ‘‘পস্সথ দানি তুম্হাকং ৰা সত্থা মহানুভাৰো, অহং ৰা’’তি দক্খিণপাদেন সট্ঠিযোজনমত্তং কেলাসকূটপব্বতং অক্কমি, তং অযোকূটপ্পহতো ৰিয নিদ্ধন্তঅযপিণ্ডো পপটিকাযো মুঞ্চি. সো তত্র ঠত্ৰা ‘‘অহং আল়ৰকো’’তি উগ্ঘোসেসি, সকলজম্বুদীপং সদ্দো ফরি. তিযোজনসহস্সৰিত্থতহিমৰাপি সম্পকম্পি যক্খস্সানুভাৰেন. সো ৰাতমণ্ডলং সমুট্ঠাপেসি ‘‘এতেনেৰ সমণং পলাপেস্সামী’’তি. তে পুরত্থিমাদিভেদা ৰাতা সমুট্ঠহিত্ৰা অড্ঢযোজনযোজনদ্ৰিযোজনতিযোজনপ্পমাণানি পব্বতকূটানি পদালেত্ৰা ৰনগচ্ছরুক্খাদীনি উম্মূলেত্ৰা আল়ৰিনগরং পক্খন্দা জিণ্ণহত্থিসালাদীনি চুণ্ণেন্তা ছদনিট্ঠকা আকাসে ভমেন্তা. ভগৰা ‘‘মা কস্সচি উপরোধো হোতূ’’তি অধিট্ঠাসি. তে ৰাতা দসবলং পত্ৰা চীৰরকণ্ণমত্তম্পি চালেতুং নাসক্খিংসু. ততো মহাৰস্সং সমুট্ঠাপেসি ‘‘উদকেন অজ্ঝোত্থরিত্ৰা সমণং মারেস্সামী’’তি. তস্সানুভাৰেন উপরূপরি সতপটলসহস্সপটলাদিভেদা ৰলাহকা উট্ঠহিত্ৰা পৰস্সিংসু. ৰুট্ঠিধারাৰেগেন পথৰী ছিদ্দা অহোসি. ৰনরুক্খাদীনং উপরি মহোঘো আগন্ত্ৰা দসবলস্স চীৰরে উস্সাৰবিন্দুমত্তম্পি তেমেতুং নাসক্খি. ততো পাসাণৰস্সং সমুট্ঠাপেসি. মহন্তানি মহন্তানি পব্বতকূটানি ধূমাযন্তানি পজ্জলন্তানি আকাসেনাগন্ত্ৰা দসবলং পত্ৰা দিব্বমালাগুল়ানি সম্পজ্জিংসু. ততো পহরণৰস্সং সমুট্ঠাপেসি. একতোধারা উভতোধারা অসিসত্তিখুরপ্পাদযো ধূমাযন্তা পজ্জলন্তা আকাসেনাগন্ত্ৰা দসবলস্স পাদমূলে দিব্বপুপ্ফানি অহেসুং.

ততো অঙ্গারৰস্সং সমুট্ঠাপেসি. কিংসুকৰণ্ণা অঙ্গারা আকাসেনাগন্ত্ৰা দসবলস্স পাদমূলে দিব্বপুপ্ফানি হুত্ৰা ৰিকিরিংসু. ততো কুক্কুল়ৰস্সং সমুট্ঠাপেসি. অচ্চুণ্হো কুক্কুল়ো আকাসেনাগন্ত্ৰা দসবলস্স পাদমূলে চন্দনচুণ্ণং হুত্ৰা নিপতি. ততো ৰালিকৰস্সং সমুট্ঠাপেসি. অতিসুখুমা ৰালিকা ধূমাযন্তা পজ্জলন্তা আকাসেনাগন্ত্ৰা দসবলস্স পাদমূলে দিব্বপুপ্ফানি হুত্ৰা নিপতিংসু. ততো কললৰস্সং সমুট্ঠাপেসি. তং ধূমাযন্তং পজ্জলন্তং আকাসেনাগন্ত্ৰা দসবলস্স পাদমূলে দিব্বগন্ধং হুত্ৰা নিপতি. ততো অন্ধকারং সমুট্ঠাপেসি ‘‘ভিংসেত্ৰা সমণং পলাপেস্সামী’’তি. চতুরঙ্গসমন্নাগতং অন্ধকারসদিসং হুত্ৰা দসবলং পত্ৰা সূরিযপ্পভাৰিহতমিৰন্ধকারং অন্তরধাযি. এৰং যক্খো ইমাহি নৰহি ৰাতৰস্সপাসাণপহরণঙ্গারকুক্কুল়ৰালিককললন্ধকারৰুট্ঠীহি ভগৰন্তং পলাপেতুমসক্কোন্তো নানাৰিধপ্পহরণহত্থঅনেকপ্পকাররূপভূতগণসমাকুলায চতুরঙ্গিনিযা সেনায সযমেৰ ভগৰন্তং অভিগতো. তে ভূতগণা অনেকপ্পকারৰিকারে কত্ৰা ‘‘গণ্হথ হনথা’’তি ভগৰতো উপরি আগচ্ছন্তা ৰিয চ হোন্তি. অপিচ খো নিদ্ধন্তলোহপিণ্ডং ৰিয মক্খিকা ভগৰন্তং অল্লীযিতুমসমত্থা এৰ অহেসুং.

এৰং সব্বরত্তিং অনেকপ্পকারৰিভিংসাকারদস্সনেনপি ভগৰন্তং চালেতুমসক্কোন্তো আল়ৰকো চিন্তেসি – ‘‘যংনূনাহং কেনচি অজেয্যং দুস্সাৰুধং মুঞ্চেয্য’’ন্তি. সচে হি সো দুট্ঠো আকাসে তং দুস্সাৰুধং মুঞ্চেয্য, দ্ৰাদস ৰস্সানি দেৰো ন ৰস্সেয্য. সচে পথৰিযং মুঞ্চেয্য, সব্বরুক্খতিণাদীনি সুস্সিত্ৰা দ্ৰাদসৰস্সন্তরং ন পুন রুহেয্যুং. সচে সমুদ্দে মুঞ্চেয্য, তত্তকপালে উদকবিন্দু ৰিয সব্বং সুস্সেয্য. সচে সিনেরুপব্বতে মুঞ্চেয্য, খণ্ডাখণ্ডং হুত্ৰা ৰিকিরেয্য. সো এৰংমহানুভাৰং দুস্সাৰুধং উত্তরিসাটকং মুঞ্চিত্ৰা অগ্গহেসি. যেভুয্যেন দসসহস্সিলোকধাতুদেৰতা ৰেগেন সন্নিপতিংসু ‘‘অজ্জ ভগৰা আল়ৰকং দমেস্সতি, তত্থ ধম্মং সোস্সামা’’তি. যুদ্ধদস্সনকামাপি দেৰতা সন্নিপতিংসু. এৰং সকলম্পি আকাসং দেৰতাহি পরিপুণ্ণং অহোসি. অথাল়ৰকো ভগৰতো সমীপে উপরূপরি ৰিচরিত্ৰা ৰত্থাৰুধং মুঞ্চি. তং অসনিচক্কং ৰিয আকাসে ভেরৰসদ্দং করোন্তং ধূমাযন্তং পজ্জলন্তং ভগৰন্তং পত্ৰা যক্খস্স মানমদ্দনত্থং পাদপুঞ্ছনচোল়ং হুত্ৰা পাদমূলে নিপতি. আল়ৰকো তং দিস্ৰা ছিন্নৰিসাণো ৰিয উসভো, উদ্ধটদাঠো ৰিয সপ্পো নিত্তেজো নিম্মদো নিপাতিতমানদ্ধজো অহোসি. এৰমিদং আল়ৰকযুদ্ধং ৰিত্থারেতব্বং.

অট্ঠ পঞ্হে পুচ্ছীতি –

‘‘কিং সূধ ৰিত্তং পুরিসস্স সেট্ঠং,

কিং সু সুচিণ্ণং সুখমাৰহাতি;

কিং সু হৰে সাদুতরং রসানং,

কথং জীৰিং জীৰিতমাহু সেট্ঠ’’ন্তি. (সং. নি. ১.২৪৬; সু. নি. ১৮৩) –

আদিনা অট্ঠ পঞ্হে পুচ্ছি. সত্থা ৰিস্সজ্জেসীতি –

‘‘সদ্ধীধ ৰিত্তং পুরিসস্স সেট্ঠং,

ধম্মো সুচিণ্ণো সুখমাৰহাতি;

সচ্চং হৰে সাদুতরং রসানং,

পঞ্ঞাজীৰিং জীৰিতমাহু সেট্ঠ’’ন্তি. (সং. নি. ১.২৪৬; সু. নি. ১৮৪) –

আদিনা ৰিস্সজ্জেসি. ৰিক্কন্দমানাযাতি অচ্চন্তং পরিদেৰমানায.

মহানামসক্কৰত্থু

২৫২. পঞ্চমে সত্থা ততো পরং পটিঞ্ঞং নাদাসীতি সংৰচ্ছরতো পরং সিক্খাপদপঞ্ঞত্তিযা পচ্চযপ্পৰারণাসাদিযনস্স ৰারিতত্তা ‘‘পটিঞ্ঞং নাদাসী’’তি ৰুত্তং. তথা হি ভগৰা ততিযৰারেপি মহানামেন সক্কেন ‘‘ইচ্ছামহং, ভন্তে, সঙ্ঘং যাৰজীৰং ভেসজ্জেন পৰারেতু’’ন্তি (পাচি. ৩০৪-৩০৫) ৰুত্তে ‘‘সাধু সাধু, মহানাম, তেন হি ত্ৰং, মহানাম, সঙ্ঘং যাৰজীৰং ভেসজ্জেন পৰারেহী’’তি পটিঞ্ঞং অদাসিযেৰ. এৰং পটিঞ্ঞং দত্ৰা পচ্ছা ছব্বগ্গিযেহি ভিক্খূহি মহানামস্স সক্কস্স ৰিহেঠিতভাৰং সুত্ৰা ছব্বগ্গিযে ভিক্খূ ৰিগরহিত্ৰা সিক্খাপদং পঞ্ঞপেসি ‘‘অগিলানেন ভিক্খুনা চাতুমাসপ্পচ্চযপৰারণা সাদিতব্বা অঞ্ঞত্র পুনপ্পৰারণায অঞ্ঞত্র নিচ্চপ্পৰারণায. ততো চে উত্তরি সাদিযেয্য, পাচিত্তিয’’ন্তি. তস্মা পঠমং অনুজানিত্ৰাপি পচ্ছা সিক্খাপদবন্ধনেন ৰারিতত্তা ‘‘পটিঞ্ঞং নাদাসী’’তি ৰুত্তং.

উগ্গগহপত্যাদিৰত্থু

২৫৩-২৫৬. ছট্ঠসত্তমঅট্ঠমনৰমানি সুৰিঞ্ঞেয্যানেৰ.

নকুলপিতুগহপতিৰত্থু

২৫৭. দসমে সুসুমারগিরিনগরেতি এৰংনামকে নগরে. তস্স কির নগরস্স ৰত্থুপরিগ্গহদিৰসে অৰিদূরে উদকরহদে সুসুমারো সদ্দমকাসি, গিরং নিচ্ছারেসি. অথ নগরে অনন্তরাযেন মাপিতে তমেৰ সুসুমারগিরকরণং সুভনিমিত্তং কত্ৰা ‘‘সুসুমারগিরী’’ত্ৰেৰস্স নামং অকংসু. কেচি পন ‘‘সুসুমারসণ্ঠানত্তা সুসুমারো নাম একো গিরি, সো তস্স নগরস্স সমীপে, তস্মা তং সুসুমারগিরি এতস্স অত্থীতি সুসুমারগিরীতি ৰুচ্চতী’’তি ৰদন্তি. ভেসকল়াৰনেতি ভেসকল়ানামকে ৰনে. ‘‘ভেসকলাৰনে’’তিপি পাঠো. কথং পন ভগৰতি নেসং পুত্তসঞ্ঞা পতিট্ঠাসীতি আহ – ‘‘অযং কিরা’’তিআদি. দহরস্সেৰ দহরা আনীতাতি মে দহরস্সেৰ সতো দহরা আনীতাতি অত্থো. অতিচরিতাতি অতিক্কমিত্ৰা চরন্তো.

(ছট্ঠএতদগ্গৰগ্গৰণ্ণনা নিট্ঠিতা.)

উপাসকপাল়িসংৰণ্ণনা নিট্ঠিতা.