নমো তস্স ভগৰতো অরহতো সম্মাসম্বুদ্ধস্স

অঙ্গুত্তরনিকাযে

এককনিপাত-টীকা

গন্থারম্ভকথা

অনন্তঞাণং করুণানিকেতং,

নমামি নাথং জিতপঞ্চমারং;

ধম্মং ৰিসুদ্ধং ভৰনাসহেতুং,

সঙ্ঘঞ্চ সেট্ঠং হতসব্বপাপং.

কস্সপং তং মহাথেরং, সঙ্ঘস্স পরিণাযকং;

দীপস্মিং তম্বপণ্ণিম্হি, সাসনোদযকারকং.

পটিপত্তিপরাধীনং, সদারঞ্ঞনিৰাসিনং;

পাকটং গগনে চন্দ-মণ্ডলং ৰিয সাসনে.

সঙ্ঘস্স পিতরং ৰন্দে, ৰিনযে সুৰিসারদং;

যং নিস্সায ৰসন্তোহং, ৰুড্ঢিপ্পত্তোস্মি সাসনে.

অনুথেরং মহাপঞ্ঞং, সুমেধং সুতিৰিস্সুতং;

অৰিখণ্ডিতসীলাদি-পরিসুদ্ধগুণোদযং.

বহুস্সুতং সতিমন্তং, দন্তং সন্তং সমাহিতং;

নমামি সিরসা ধীরং, গরুং মে গণৰাচকং.

আগতাগমতক্কেসু, সদ্দসত্থনযঞ্ঞুসু;

যস্সন্তেৰাসিভিক্খূসু, সাসনং সুপ্পতিট্ঠিতং.

যো সীহল়িন্দো ধিতিমা যসস্সী,

উল়ারপঞ্ঞো নিপুণো কলাসু;

জাতো ৰিসুদ্ধে রৰিসোমৰংসে,

মহব্বলো অব্ভুতৰুত্তিতেজো.

জিত্ৰারিৰগ্গং অতিদুপ্পসয্হং,

অনঞ্ঞসাধারণৰিক্কমেন;

পত্তাভিসেকো জিনধম্মসেৰী,

অভিপ্পসন্নো রতনত্তযম্হি.

চিরং ৰিভিন্নে জিনসাসনস্মিং,

পচ্চত্থিকে সুট্ঠু ৰিনিগ্গহেত্ৰা;

সুধংৰ সামগ্গিরসং পসত্থং,

পাযেসি ভিক্খূ পরিসুদ্ধসীলে.

কত্ৰা ৰিহারে ৰিপুলে চ রম্মে,

তত্রপ্পিতেনেকসহস্সসঙ্খে;

ভিক্খূ অসেসে চতুপচ্চযেহি,

সন্তপ্পযন্তো সুচিরং অখণ্ডং.

সদ্ধম্মৰুদ্ধিং অভিকঙ্খমানো,

সযম্পি ভিক্খূ অনুসাসযিত্ৰা;

নিযোজযং গন্থৰিপস্সনাসু,

অকাসি ৰুদ্ধিং জিনসাসনস্স.

তেনাহমচ্চন্তমনুগ্গহীতো,

অনঞ্ঞসাধারণসঙ্গহেন;

যস্মা পরক্কন্তভুজৰ্হযেন,

অজ্ঝেসিতো ভিক্খুগণস্স মজ্ঝে.

তস্মা অনুত্তানপদানমত্থং,

সেট্ঠায অঙ্গুত্তরৰণ্ণনায;

সন্দস্সযিস্সং সকলং সুবোদ্ধুং,

নিস্সায পুব্বাচরিযপ্পভাৰং.

গন্থারম্ভকথাৰণ্ণনা

১. সংৰণ্ণনারম্ভে রতনত্তযং নমস্সিতুকামো তস্স ৰিসিট্ঠগুণযোগসন্দস্সনত্থং ‘‘করুণাসীতলহদয’’ন্তিআদিমাহ. ৰিসিট্ঠগুণযোগেন হি ৰন্দনারহভাৰো, ৰন্দনারহে চ কতা ৰন্দনা যথাধিপ্পেতমত্থং সাধেতি. এত্থ চ সংৰণ্ণনারম্ভে রতনত্তযপ্পণামকরণপ্পযোজনং তত্থ তত্থ বহুধা পপঞ্চেন্তি আচরিযা, মযং পন ইধাধিপ্পেতমেৰ পযোজনং দস্সযিস্সাম, তস্মা সংৰণ্ণনারম্ভে রতনত্তযপ্পণামকরণং যথাপটিঞ্ঞাতসংৰণ্ণনায অনন্তরাযেন পরিসমাপনত্থন্তি ৰেদিতব্বং. ইদমেৰ হি পযোজনং আচরিযেন ইধাধিপ্পেতং. তথা হি ৰক্খতি –

‘‘ইতি মে পসন্নমতিনো, রতনত্তযৰন্দনামযং পুঞ্ঞং;

যং সুৰিহতন্তরাযো, হুত্ৰা তস্সানুভাৰেনা’’তি.

রতনত্তযপ্পণামকরণেন চেত্থ যথাপটিঞ্ঞাতসংৰণ্ণনায অনন্তরাযেন পরিসমাপনং রতনত্তযপূজায পঞ্ঞাপাটৰতো, তায পঞ্ঞাপাটৰঞ্চ রাগাদিমলৰিধমনতো. ৰুত্তঞ্হেতং –

‘‘যস্মিং, মহানাম, সমযে অরিযসাৰকো তথাগতং অনুস্সরতি, নেৰস্স তস্মিং সমযে রাগপরিযুট্ঠিতং চিত্তং হোতি, ন দোসপরিযুট্ঠিতং চিত্তং হোতি, ন মোহপরিযুট্ঠিতং চিত্তং হোতি, উজুগতমেৰস্স তস্মিং সমযে চিত্তং হোতী’’তিআদি (অ. নি. ৬.১০; ১১.১১).

তস্মা রতনত্তযপূজনেন ৰিক্খালিতমলায পঞ্ঞায পাটৰসিদ্ধি.

অথ ৰা রতনত্তযপূজনস্স পঞ্ঞাপদট্ঠানসমাধিহেতুত্তা পঞ্ঞাপাটৰং. ৰুত্তঞ্হি তস্স সমাধিহেতুত্তং –

‘‘উজুগতচিত্তো খো পন, মহানাম, অরিযসাৰকো লভতি অত্থৰেদং, লভতি ধম্মৰেদং, লভতি ধম্মূপসংহিতং পামোজ্জং, পমুদিতস্স পীতি জাযতি, পীতিমনস্স কাযো পস্সম্ভতি, পস্সদ্ধকাযো সুখং ৰেদিযতি, সুখিনো চিত্তং সমাধিযতী’’তি (অ. নি. ৬.১০; ১১.১১).

সমাধিস্স চ পঞ্ঞায পদট্ঠানভাৰো ৰুত্তোযেৰ – ‘‘সমাহিতো যথাভূতং পজানাতী’’তি (সং. নি. ৩.৫; ৪.৯৯; ৫.১০৭১). ততো এৰং পটুভূতায পঞ্ঞায পটিঞ্ঞামহত্তকতং খেদমভিভুয্য অনন্তরাযেন সংৰণ্ণনং সমাপযিস্সতি.

অথ ৰা রতনত্তযপূজায আযুৰণ্ণসুখবলৰড্ঢনতো অনন্তরাযেন পরিসমাপনং ৰেদিতব্বং. রতনত্তযপ্পণামেন হি আযুৰণ্ণসুখবলানি ৰড্ঢন্তি. ৰুত্তঞ্হেতং –

‘‘অভিৰাদনসীলিস্স, নিচ্চং ৰুড্ঢাপচাযিনো;

চত্তারো ধম্মা ৰড্ঢন্তি, আযু ৰণ্ণো সুখং বল’’ন্তি. (ধ. প. ১০৯) –

ততো আযুৰণ্ণসুখবলৰুদ্ধিযা হোতেৰ কারিযনিট্ঠানং.

অথ ৰা রতনত্তযগারৰস্স পটিভানাপরিহানাৰহত্তা. অপরিহানাৰহঞ্হি তীসুপি রতনেসু গারৰং. ৰুত্তঞ্হেতং –

‘‘সত্তিমে, ভিক্খৰে, অপরিহানীযা ধম্মা. কতমে সত্ত? সত্থুগারৰতা, ধম্মগারৰতা, সঙ্ঘগারৰতা, সিক্খাগারৰতা, সমাধিগারৰতা, সোৰচস্সতা, কল্যাণমিত্ততা’’তি (অ. নি. ৭.৩৪).

হোতেৰ চ ততো পটিভানাপরিহানেন যথাপটিঞ্ঞাতপরিসমাপনং.

অথ ৰা পসাদৰত্থূসু পূজায পুঞ্ঞাতিসযভাৰতো. ৰুত্তঞ্হি তস্সা পুঞ্ঞাতিসযত্তং –

‘‘পূজারহে পূজযতো, বুদ্ধে যদি ৰ সাৰকে;

পপঞ্চসমতিক্কন্তে, তিণ্ণসোকপরিদ্দৰে.

তে তাদিসে পূজযতো, নিব্বুতে অকুতোভযে;

ন সক্কা পুঞ্ঞং সঙ্খাতুং, ইমেত্তমপি কেনচী’’তি. (ধ. প. ১৯৫-১৯৬; অপ. থের ১.১০.১-২);

পুঞ্ঞাতিসযো চ যথাধিপ্পেতপরিসমাপনূপাযো. যথাহ –

‘‘এস দেৰমনুস্সানং, সব্বকামদদো নিধি;

যং যদেৰাভিপত্থেন্তি, সব্বমেতেন লব্ভতী’’তি. (খু. পা. ৮.১০);

উপাযেসু চ পটিপন্নস্স হোতেৰ কারিযনিট্ঠানং. রতনত্তযপূজা হি নিরতিসযপুঞ্ঞক্খেত্তসম্বুদ্ধিযা অপরিমেয্যপ্পভাৰো পুঞ্ঞাতিসযোতি বহুৰিধন্তরাযেপি লোকসন্নিৰাসে অন্তরাযনিবন্ধনসকলসংকিলেসৰিদ্ধংসনায পহোতি, ভযাদিউপদ্দৰঞ্চ নিৰারেতি. তস্মা ৰুত্তং – ‘‘সংৰণ্ণনারম্ভে রতনত্তযপ্পণামকরণং যথাপটিঞ্ঞাতসংৰণ্ণনায অনন্তরাযেন পরিসমাপনত্থ’’ন্তি.

এৰঞ্চ সপ্পযোজনং রতনত্তযৰন্দনং কত্তুকামো পঠমং তাৰ ভগৰতো ৰন্দনং কাতুং তম্মূলকত্তা সেসরতনানং ‘‘করুণাসীতলহদযং…পে… গতিৰিমুত্ত’’ন্তি আহ. তত্থ যস্সা দেসনায সংৰণ্ণনং কত্তুকামো, সা ন ৰিনযদেসনা ৰিয করুণাপধানা, নাপি অভিধম্মদেসনা ৰিয পঞ্ঞাপধানা, অথ খো করুণাপঞ্ঞাপধানাতি তদুভযপ্পধানমেৰ তাৰ সম্মাসম্বুদ্ধস্স থোমনং কাতুং ‘‘করুণাসীতলহদযং, পঞ্ঞাপজ্জোতৰিহতমোহতম’’ন্তি ৰুত্তং. তত্থ কিরতীতি করুণা, পরদুক্খং ৰিক্খিপতি অপনেতীতি অত্থো. অথ ৰা কিণাতীতি করুণা, পরদুক্খে সতি কারুণিকং হিংসতি ৰিবাধতীতি অত্থো. পরদুক্খে সতি সাধূনং কম্পনং হদযখেদং করোতীতি ৰা করুণা. অথ ৰা কমিতি সুখং, তং রুন্ধতীতি করুণা. এসা হি পরদুক্খাপনযনকামতালক্খণা অত্তসুখনিরপেক্খতায কারুণিকানং সুখং রুন্ধতি ৰিবন্ধতীতি অত্থো. করুণায সীতলং করুণাসীতলং, করুণাসীতলং হদযং অস্সাতি করুণাসীতলহদযো, তং করুণাসীতলহদযং.

তত্থ কিঞ্চাপি পরেসং হিতোপসংহারসুখাদিঅপরিহানিচ্ছনসভাৰতায, ব্যাপাদারতীনং উজুৰিপচ্চনীকতায চ সত্তসন্তানগতসন্তাপৰিচ্ছেদনাকারপ্পৰত্তিযা মেত্তামুদিতানম্পি চিত্তসীতলভাৰকারণতা উপলব্ভতি, তথাপি দুক্খাপনযনাকারপ্পৰত্তিযা পরূপতাপাসহনরসা অৰিহিংসভূতা করুণা ৰিসেসেন ভগৰতো চিত্তস্স চিত্তপ্পস্সদ্ধি ৰিয সীতিভাৰনিমিত্তন্তি ৰুত্তং – ‘‘করুণাসীতলহদয’’ন্তি. করুণামুখেন ৰা মেত্তামুদিতানম্পি হদযসীতলভাৰকারণতা ৰুত্তাতি দট্ঠব্বং. অথ ৰা অসাধারণঞাণৰিসেসনিবন্ধনভূতা সাতিসযং নিরৰসেসঞ্চ সব্বঞ্ঞুতঞ্ঞাণং ৰিয সৰিসযব্যাপিতায মহাকরুণাভাৰং উপগতা করুণাৰ ভগৰতো অতিসযেন হদযসীতলভাৰহেতূতি আহ – ‘‘করুণাসীতলহদয’’ন্তি. অথ ৰা সতিপি মেত্তামুদিতানং সাতিসযে হদযসীতিভাৰনিবন্ধনত্তে সকলবুদ্ধগুণৰিসেসকারণতায তাসম্পি কারণন্তি করুণাৰ ভগৰতো ‘‘হদযসীতলভাৰকারণ’’ন্তি ৰুত্তা. করুণানিদানা হি সব্বেপি বুদ্ধগুণা. করুণানুভাৰনিব্বাপিযমানসংসারদুক্খসন্তাপস্স হি ভগৰতো পরদুক্খাপনযনকামতায অনেকানিপি অসঙ্খ্যেয্যানি কপ্পানং অকিলন্তরূপস্সেৰ নিরৰসেসবুদ্ধকরধম্মসম্ভরণনিরতস্স সমধিগতধম্মাধিপতেয্যস্স চ সন্নিহিতেসুপি সত্তসঙ্খারসমুপনীতহদযূপতাপনিমিত্তেসু ন ঈসকম্পি চিত্তসীতিভাৰস্স অঞ্ঞথত্তমহোসীতি. এতস্মিঞ্চ অত্থৰিকপ্পে তীসুপি অৰত্থাসু ভগৰতো করুণা সঙ্গহিতাতি দট্ঠব্বং.

পজানাতীতি পঞ্ঞা, যথাসভাৰং পকারেহি পটিৰিজ্ঝতীতি অত্থো. পঞ্ঞাৰ ঞেয্যাৰরণপ্পহানতো পকারেহি ধম্মসভাৰাৰজোতনট্ঠেন পজ্জোতোতি পঞ্ঞাপজ্জোতো. সৰাসনপ্পহানতো ৰিসেসেন হতং সমুগ্ঘাতিতং ৰিহতং. পঞ্ঞাপজ্জোতেন ৰিহতং পঞ্ঞাপজ্জোতৰিহতং, মুয্হন্তি তেন, সযং ৰা মুয্হতি, মোহনমত্তমেৰ ৰা তন্তি মোহো, অৰিজ্জা. স্ৰেৰ ৰিসযসভাৰপ্পটিচ্ছাদনতো অন্ধকারসরিক্খতায তমো ৰিযাতি মোহতমো, পঞ্ঞাপজ্জোতৰিহতো মোহতমো এতস্সাতি পঞ্ঞাপজ্জোতৰিহতমোহতমো, তং পঞ্ঞাপজ্জোতৰিহতমোহতমং. সব্বেসম্পি হি খীণাসৰানং সতিপি পঞ্ঞাপজ্জোতেন অৰিজ্জন্ধকারস্স ৰিহতভাৰে সদ্ধাধিমুত্তেহি ৰিয দিট্ঠিপ্পত্তানং সাৰকেহি পচ্চেকসম্বুদ্ধেহি চ সৰাসনপ্পহানেন সম্মাসম্বুদ্ধানং কিলেসপ্পহানস্স ৰিসেসো ৰিজ্জতীতি সাতিসযেন অৰিজ্জাপহানেন ভগৰন্তং থোমেন্তো আহ – ‘‘পঞ্ঞাপজ্জোতৰিহতমোহতম’’ন্তি.

অথ ৰা অন্তরেন পরোপদেসং অত্তনো সন্তানে অচ্চন্তং অৰিজ্জন্ধকারৰিগমস্স নিব্বত্তিতত্তা, তত্থ চ সব্বঞ্ঞুতায বলেসু চ ৰসীভাৰস্স সমধিগতত্তা, পরসন্ততিযঞ্চ ধম্মদেসনাতিসযানুভাৰেন সম্মদেৰ তস্স পৰত্তিতত্তা ভগৰাৰ ৰিসেসতো মোহতমৰিগমেন থোমেতব্বোতি আহ – ‘‘পঞ্ঞাপজ্জোতৰিহতমোহতম’’ন্তি. ইমস্মিঞ্চ অত্থৰিকপ্পে ‘‘পঞ্ঞাপজ্জোতো’’তি পদেন ভগৰতো পটিৰেধপঞ্ঞা ৰিয দেসনাপঞ্ঞাপি সামঞ্ঞনিদ্দেসেন, একসেসনযেন ৰা সঙ্গহিতাতি দট্ঠব্বং.

অথ ৰা ভগৰতো ঞাণস্স ঞেয্যপরিযন্তিকত্তা সকলঞেয্যধম্মসভাৰাৰবোধনসমত্থেন অনাৰরণঞাণসঙ্খাতেন পঞ্ঞাপজ্জোতেন সব্বঞেয্যধম্মসভাৰচ্ছাদকস্স মোহন্ধকারস্স ৰিধমিতত্তা অনঞ্ঞসাধারণো ভগৰতো মোহতমৰিনাসোতি কত্ৰা ৰুত্তং – ‘‘পঞ্ঞাপজ্জোতৰিহতমোহতম’’ন্তি. এত্থ চ মোহতমৰিধমনন্তে অধিগতত্তা অনাৰরণঞাণং কারণোপচারেন সসন্তানমোহতমৰিধমনং দট্ঠব্বং. অভিনীহারসম্পত্তিযা সৰাসনপ্পহানমেৰ হি কিলেসানং ঞেয্যাৰরণপ্পহানন্তি, পরসন্তানে পন মোহতমৰিধমনস্স কারণভাৰতো অনাৰরণঞাণং ‘‘মোহতমৰিধমন’’ন্তি ৰুচ্চতীতি.

কিং পন কারণং অৰিজ্জাসমুগ্ঘাতোযেৰেকো পহানসম্পত্তিৰসেন ভগৰতো থোমনানিমিত্তং গয্হতি, ন পন সাতিসযনিরৰসেসকিলেসপ্পহানন্তি? তপ্পহানৰচনেনেৰ তদেকট্ঠতায সকলসংকিলেসগণসমুগ্ঘাতস্স ৰুত্তত্তা. ন হি সো তাদিসো কিলেসো অত্থি, যো নিরৰসেসঅৰিজ্জাপহানেন ন পহীযতীতি.

অথ ৰা ৰিজ্জা ৰিয সকলকুসলধম্মসমুপ্পত্তিযা, নিরৰসেসাকুসলধম্মনিব্বত্তিযা সংসারপ্পৰত্তিযা চ অৰিজ্জা পধানকারণন্তি তব্বিঘাতৰচনেন সকলসংকিলেসগণসমুগ্ঘাতো ৰুত্তো এৰ হোতীতি ৰুত্তং – ‘‘পঞ্ঞাপজ্জোতৰিহতমোহতম’’ন্তি.

নরা চ অমরা চ নরামরা, সহ নরামরেহীতি সনরামরো, সনরামরো চ সো লোকো চাতি সনরামরলোকো, তস্স গরূতি সনরামরলোকগরু, তং সনরামরলোকগরুং. এতেন দেৰমনুস্সানং ৰিয তদৰসিট্ঠসত্তানম্পি যথারহং গুণৰিসেসাৰহতায ভগৰতো উপকারতং দস্সেতি. ন চেত্থ পধানপ্পধানভাৰো চোদেতব্বো. অঞ্ঞো হি সদ্দক্কমো, অঞ্ঞো অত্থক্কমো. ঈদিসেসু হি সমাসপদেসু পধানম্পি অপ্পধানং ৰিয নিদ্দিসীযতি যথা ‘‘সরাজিকায পরিসাযা’’তি (চূল়ৰ. ৩৩৬). কামঞ্চেত্থ সত্তসঙ্খারভাজনৰসেন তিৰিধো লোকো, গরুভাৰস্স পন অধিপ্পেতত্তা গরুকরণসমত্থস্সেৰ যুজ্জনতো সত্তলোকস্স ৰসেন অত্থো গহেতব্বো. সো হি লোকীযন্তি এত্থ পুঞ্ঞপাপানি তব্বিপাকো চাতি ‘‘লোকো’’তি ৰুচ্চতি. অমরগ্গহণেন চেত্থ উপপত্তিদেৰা অধিপ্পেতা.

অথ ৰা সমূহত্থো লোকসদ্দো সমুদাযৰসেন লোকীযতি পঞ্ঞাপীযতীতি. সহ নরেহীতি সনরা, সনরা চ তে অমরা চাতি সনরামরা, তেসং লোকোতি সনরামরলোকোতি পুরিমনযেনেৰ যোজেতব্বং. অমরসদ্দেন চেত্থ ৰিসুদ্ধিদেৰাপি সঙ্গয্হন্তি. তেপি হি মরণাভাৰতো পরমত্থতো অমরা. নরামরানংযেৰ চ গহণং উক্কট্ঠনিদ্দেসৰসেন যথা ‘‘সত্থা দেৰমনুস্সান’’ন্তি (দী. নি. ১.১৫৭). তথা হি সব্বানত্থপরিহরণপুব্বঙ্গমায নিরৰসেসহিতসুখৰিধানতপ্পরায নিরতিসযায পযোগসম্পত্তিযা সদেৰমনুস্সায পজায অচ্চন্তূপকারিতায অপরিমিতনিরুপমপ্পভাৰগুণৰিসেসসমঙ্গিতায চ সব্বসত্তুত্তমো ভগৰা অপরিমাণাসু লোকধাতূসু অপরিমাণানং সত্তানং উত্তমগারৰট্ঠানং. তেন ৰুত্তং – ‘‘সনরামরলোকগরু’’ন্তি.

সোভনং গতং গমনং এতস্সাতি সুগতো. ভগৰতো হি ৰেনেয্যজনূপসঙ্কমনং একন্তেন তেসং হিতসুখনিপ্ফাদনতো সোভনং, তথা লক্খণানুব্যঞ্জনপ্পটিমণ্ডিতরূপকাযতায দুতৰিলম্বিতখলিতানুকড্ঢননিপ্পীল়নুক্কুটিককুটিলাকুটিলতাদি- দোসরহিতমৰহসিতরাজহংসৰসভৰারণমিগরাজগমনং কাযগমনং ঞাণগমনঞ্চ ৰিপুলনিম্মলকরুণাসতিৰীরিযাদিগুণৰিসেসসহিতমভিনীহারতো যাৰ মহাবোধি অনৰজ্জতায সোভনমেৰাতি. অথ ৰা সযম্ভুঞাণেন সকলম্পি লোকং পরিঞ্ঞাভিসমযৰসেন পরিজানন্তো ঞাণেন সম্মা গতো অৰগতোতি সুগতো, তথা লোকসমুদযং পহানাভিসমযৰসেন পজহন্তো অনুপ্পত্তিধম্মতং আপাদেন্তো সম্মা গতো অতীতোতি সুগতো, লোকনিরোধং নিব্বানং সচ্ছিকিরিযাভিসমযৰসেন সম্মা গতো অধিগতোতি সুগতো, লোকনিরোধগামিনিপটিপদং ভাৰনাভিসমযৰসেন সম্মা গতো পটিপন্নোতি সুগতো. ‘‘সোতাপত্তিমগ্গেন যে কিলেসা পহীনা, তে কিলেসে ন পুনেতি ন পচ্চেতি ন পচ্চাগচ্ছতীতি সুগতো’’তিআদিনা (চূল়নি. মেত্তগূমাণৰপুচ্ছানিদ্দেসো ২৭) নযেন অযমত্থো ৰিভাৰেতব্বো. অথ ৰা সুন্দরং ঠানং সম্মাসম্বোধিং, নিব্বানমেৰ ৰা গতো অধিগতোতি সুগতো, যস্মা ৰা ভূতং তচ্ছং অত্থসংহিতং ৰেনেয্যানং যথারহং কালযুত্তমেৰ চ ধম্মং ভাসতি, তস্মা সম্মা গদতীতি সুগতো, দ-কারস্স ত-কারং কত্ৰা. ইতি সোভনগমনতাদীহি সুগতো, তং সুগতং.

পুঞ্ঞপাপকম্মেহি উপপজ্জনৰসেন গন্তব্বতো গতিযো, উপপত্তিভৰৰিসেসা. তা পন নিরযাদিৰসেন পঞ্চৰিধা. তাহি সকলস্সপি ভৰগামিকম্মস্স অরিযমগ্গাধিগমেন অৰিপাকারহভাৰকরণেন নিৰত্তিতত্তা ভগৰা পঞ্চহিপি গতীহি সুট্ঠু মুত্তো ৰিসংযুত্তোতি আহ – ‘‘গতিৰিমুত্ত’’ন্তি. এতেন ভগৰতো কত্থচিপি গতিযা অপরিযাপন্নতং দস্সেতি, যতো ভগৰা ‘‘দেৰাতিদেৰো’’তি ৰুচ্চতি. তেনেৰাহ –

‘‘যেন দেৰূপপত্যস্স, গন্ধব্বো ৰা ৰিহঙ্গমো;

যক্খত্তং যেন গচ্ছেয্যং, মনুস্সত্তঞ্চ অব্বজে;

তে ময্হং আসৰা খীণা, ৰিদ্ধস্তা ৰিনল়ীকতা’’তি. (অ. নি. ৪.৩৬);

তংতংগতিসংৰত্তনিকানঞ্হি কম্মকিলেসানং অগ্গমগ্গেন বোধিমূলেযেৰ সুপ্পহীনত্তা নত্থি ভগৰতো গতিপরিযাপন্নতাতি অচ্চন্তমেৰ ভগৰা সব্বভৰযোনিগতিৰিঞ্ঞাণট্ঠিতিসত্তাৰাসসত্তনিকাযেহি সুপরিমুত্তো, তং গতিৰিমুত্তং. ৰন্দেতি নমামি, থোমেমীতি ৰা অত্থো.

অথ ৰা গতিৰিমুত্তন্তি অনুপাদিসেসনিব্বানধাতুপ্পত্তিযা ভগৰন্তং থোমেতি. এত্থ হি দ্ৰীহি আকারেহি ভগৰতো থোমনা ৰেদিতব্বা অত্তহিতসম্পত্তিতো পরহিতপ্পটিপত্তিতো চ. তেসু অত্তহিতসম্পত্তি অনাৰরণঞাণাধিগমতো সৰাসনানং সব্বেসং কিলেসানং অচ্চন্তপ্পহানতো অনুপাদিসেসনিব্বানপ্পত্তিতো চ ৰেদিতব্বা, পরহিতপ্পটিপত্তি লাভসক্কারাদিনিরপেক্খচিত্তস্স সব্বদুক্খনিয্যানিকধম্মদেসনতো ৰিরুদ্ধেসুপি নিচ্চং হিতজ্ঝাসযতো ঞাণপরিপাককালাগমনতো চ. সা পনেত্থ আসযতো পযোগতো চ দুৰিধা, পরহিতপ্পটিপত্তি তিৰিধা চ, অত্তহিতসম্পত্তি পকাসিতা হোতি. কথং? ‘‘করুণাসীতলহদয’’ন্তি এতেন আসযতো পরহিতপ্পটিপত্তি, সম্মাগদনত্থেন সুগতসদ্দেন পযোগতো পরহিতপ্পটিপত্তি, ‘‘পঞ্ঞাপজ্জোতৰিহতমোহতমং গতিৰিমুত্ত’’ন্তি এতেহি চতুসচ্চসম্পটিৰেধনত্থেন চ সুগতসদ্দেন তিৰিধাপি অত্তহিতসম্পত্তি, অৰসিট্ঠেন ‘‘পঞ্ঞাপজ্জোতৰিহতমোহতম’’ন্তি এতেন চাপি অত্তহিতসম্পত্তি পরহিতপ্পটিপত্তি পকাসিতা হোতীতি.

অথ ৰা তীহি আকারেহি ভগৰতো থোমনা ৰেদিতব্বা হেতুতো, ফলতো, উপকারতো চ. তত্থ হেতু মহাকরুণা, সা পঠমপদেন দস্সিতা. ফলং চতুব্বিধং ঞাণসম্পদা, পহানসম্পদা, আনুভাৰসম্পদা, রূপকাযসম্পদা চাতি. তাসু ঞাণপ্পহানসম্পদা দুতিযপদেন সচ্চপ্পটিৰেধনত্থেন চ সুগতসদ্দেন পকাসিতা হোন্তি, আনুভাৰসম্পদা ততিযপদেন, রূপকাযসম্পদা যথাৰুত্তকাযগমনসোভনত্থেন সুগতসদ্দেন লক্খণানুব্যঞ্জনপারিপূরিযা ৰিনা তদভাৰতো. উপকারো অনন্তরং অবাহিরং করিত্ৰা তিৰিধযানমুখেন ৰিমুত্তিধম্মদেসনা. সো সম্মাগদনত্থেন সুগতসদ্দেন পকাসিতো হোতীতি ৰেদিতব্বং.

তত্থ ‘‘করুণাসীতলহদয’’ন্তি এতেন সম্মাসম্বোধিযা মূলং দস্সেতি. মহাকরুণাসঞ্চোদিতমানসো হি ভগৰা সংসারপঙ্কতো সত্তানং সমুদ্ধরণত্থং কতাভিনীহারো অনুপুব্বেন পারমিযো পূরেত্ৰা অনুত্তরং সম্মাসম্বোধিং অধিগতোতি করুণা সম্মাসম্বোধিযা মূলং. ‘‘পঞ্ঞাপজ্জোতৰিহতমোহতম’’ন্তি এতেন সম্মাসম্বোধিং দস্সেতি. অনাৰরণঞাণপদট্ঠানঞ্হি মগ্গঞাণং, মগ্গঞাণপদট্ঠানঞ্চ অনাৰরণঞাণং ‘‘সম্মাসম্বোধী’’তি ৰুচ্চতীতি. সম্মাগমনত্থেন সুগতসদ্দেন সম্মাসম্বোধিযা পটিপত্তিং দস্সেতি লীনুদ্ধচ্চপতিট্ঠানাযূহনকামসুখল্লিকত্তকিলমথানুযোগসস্সতুচ্ছেদাভিনিৰেসাদিঅন্তদ্ৰযরহিতায করুণাপঞ্ঞাপরিগ্গহিতায মজ্ঝিমায পটিপত্তিযা পকাসনতো সুগতসদ্দস্স. ইতরেহি সম্মাসম্বোধিযা পধানপ্পধানভেদং পযোজনং দস্সেতি. সংসারমহোঘতো সত্তসন্তারণঞ্হেত্থ পধানং পযোজনং, তদঞ্ঞমপ্পধানং. তেসু পধানেন পরহিতপ্পটিপত্তিং দস্সেতি, ইতরেন অত্তহিতসম্পত্তিং. তদুভযেন অত্তহিতায পটিপন্নাদীসু চতূসু পুগ্গলেসু ভগৰতো চতুত্থপুগ্গলভাৰং দস্সেতি. তেন চ অনুত্তরদক্খিণেয্যভাৰং উত্তমৰন্দনেয্যভাৰং অত্তনো চ ৰন্দনকিরিযায খেত্তঙ্গতভাৰং দস্সেতি.

এত্থ চ করুণাগহণেন লোকিযেসু মহগ্গতভাৰপ্পত্তাসাধারণগুণদীপনতো ভগৰতো সব্বলোকিযগুণসম্পত্তি দস্সিতা হোতি, পঞ্ঞাগহণেন সব্বঞ্ঞুতঞ্ঞাণপদট্ঠানমগ্গঞাণদীপনতো সব্বলোকুত্তরগুণসম্পত্তি. তদুভযগ্গহণসিদ্ধো হি অত্থো ‘‘সনরামরলোকগরু’’ন্তিআদিনা পপঞ্চীযতীতি. করুণাগহণেন চ উপগমনং নিরুপক্কিলেসং দস্সেতি, পঞ্ঞাগহণেন অপগমনং. তথা করুণাগহণেন লোকসমঞ্ঞানুরূপং ভগৰতো পৰত্তিং দস্সেতি লোকৰোহারৰিসযত্তা করুণায, পঞ্ঞাগহণেন সমঞ্ঞায অনতিধাৰনং. সভাৰানৰবোধেন হি ধম্মানং সমঞ্ঞং অতিধাৰিত্ৰা সত্তাদিপরামসনং হোতীতি. তথা করুণাগহণেন মহাকরুণাসমাপত্তিৰিহারং দস্সেতি, পঞ্ঞাগহণেন তীসু কালেসু অপ্পটিহতঞাণং চতুসচ্চঞাণং, চতুপটিসম্ভিদাঞাণং, চতুৰেসারজ্জঞাণং. করুণাগহণেন মহাকরুণাসমাপত্তিঞাণস্স গহিতত্তা সেসাসাধারণঞাণানি, ছ অভিঞ্ঞা, অট্ঠসু পরিসাসু অকম্পনঞাণানি, দস বলানি, চুদ্দস বুদ্ধঞাণানি, সোল়স ঞাণচরিযা, অট্ঠারস বুদ্ধধম্মা, চতুচত্তালীস ঞাণৰত্থূনি, সত্তসত্ততি ঞাণৰত্থূনীতি এৰমাদীনং অনেকেসং পঞ্ঞাপভেদানং ৰসেন ঞাণচারং দস্সেতি. তথা করুণাগহণেন চরণসম্পত্তিং, পঞ্ঞাগহণেন ৰিজ্জাসম্পত্তিং. করুণাগহণেন অত্তাধিপতিতা, পঞ্ঞাগহণেন ধম্মাধিপতিতা. করুণাগহণেন লোকনাথভাৰো, পঞ্ঞাগহণেন অত্তনাথভাৰো. তথা করুণাগহণেন পুব্বকারিভাৰো, পঞ্ঞাগহণেন কতঞ্ঞুতা. তথা করুণাগহণেন অপরন্তপতা, পঞ্ঞাগহণেন অনত্তন্তপতা. করুণাগহণেন ৰা বুদ্ধকরধম্মসিদ্ধি, পঞ্ঞাগহণেন বুদ্ধভাৰসিদ্ধি. তথা করুণাগহণেন পরেসং তারণং, পঞ্ঞাগহণেন সযংতরণং. তথা করুণাগহণেন সব্বসত্তেসু অনুগ্গহচিত্ততা, পঞ্ঞাগহণেন সব্বধম্মেসু ৰিরত্তচিত্ততা দস্সিতা হোতি.

সব্বেসঞ্চ বুদ্ধগুণানং করুণা আদি তন্নিদানভাৰতো, পঞ্ঞা পরিযোসানং ততো উত্তরিকরণীযাভাৰতো. ইতি আদিপরিযোসানদস্সনেন সব্বে বুদ্ধগুণা দস্সিতা হোন্তি. তথা করুণাগহণেন সীলক্খন্ধপুব্বঙ্গমো সমাধিক্খন্ধো দস্সিতো হোতি. করুণানিদানঞ্হি সীলং ততো পাণাতিপাতাদিৰিরতিপ্পৰত্তিতো, সা চ ঝানত্তযসম্পযোগিনীতি. পঞ্ঞাৰচনেন পঞ্ঞাক্খন্ধো. সীলঞ্চ সব্বেসং বুদ্ধগুণানং আদি, সমাধি মজ্ঝে, পঞ্ঞা পরিযোসানন্তি এৰম্পি আদিমজ্ঝপরিযোসানকল্যাণা সব্বে বুদ্ধগুণা দস্সিতা হোন্তি নযতো দস্সিতত্তা. এসো এৰ হি নিরৰসেসতো বুদ্ধগুণানং দস্সনুপাযো, যদিদং নযগ্গহণং, অঞ্ঞথা কো নাম সমত্থো ভগৰতো গুণে অনুপদং নিরৰসেসতো দস্সেতুং? তেনেৰাহ –

‘‘বুদ্ধোপি বুদ্ধস্স ভণেয্য ৰণ্ণং,

কপ্পম্পি চে অঞ্ঞমভাসমানো;

খীযেথ কপ্পো চিরদীঘমন্তরে,

ৰণ্ণো ন খীযেথ তথাগতস্সা’’তি. (দী. নি. অট্ঠ. ১.৩০৪; ৩.১৪১; ম. নি. অট্ঠ. ২.৪২৫; উদা. অট্ঠ. ৫৩; বু. ৰং. অট্ঠ. ৪.৪; অপ. অট্ঠ. ২.৭.পরপ্পসাদকত্থেরঅপদানৰণ্ণনা);

তেনেৰ চ আযস্মতা সারিপুত্তত্থেরেনপি বুদ্ধগুণপরিচ্ছেদনং পতি অনুযুত্তেন ‘‘নো হেতং, ভন্তে’’তি পটিক্খিপিত্ৰা ‘‘অপিচ মে, ভন্তে, ধম্মন্ৰযো ৰিদিতো’’তি ৰুত্তং.

২. এৰং সঙ্খেপেন সকলসব্বঞ্ঞুগুণেহি ভগৰন্তং অভিত্থৰিত্ৰা ইদানি সদ্ধম্মং থোমেতুং ‘‘বুদ্ধোপী’’তিআদিমাহ. তত্থ বুদ্ধোতি কত্তুনিদ্দেসো. বুদ্ধভাৰন্তি কম্মনিদ্দেসো. ভাৰেত্ৰা সচ্ছিকত্ৰাতি চ পুব্বকালকিরিযানিদ্দেসো. যন্তি অনিযমতো কম্মনিদ্দেসো. উপগতোতি অপরকালকিরিযানিদ্দেসো. ৰন্দেতি কিরিযানিদ্দেসো. তন্তি নিযমনং. ধম্মন্তি ৰন্দনকিরিযায কম্মনিদ্দেসো. গতমলং অনুত্তরন্তি চ তব্বিসেসনং.

তত্থ বুদ্ধসদ্দস্স তাৰ ‘‘বুজ্ঝিতা সচ্চানীতি বুদ্ধো, বোধেতা পজাযাতি বুদ্ধো’’তিআদিনা (মহানি. ১৯২; চূল়নি. পারাযনত্থুতিগাথানিদ্দেসো ৯৭; পটি. ম. ১.১৬২) নিদ্দেসনযেন অত্থো ৰেদিতব্বো. অথ ৰা সৰাসনায অঞ্ঞাণনিদ্দায অচ্চন্তৰিগমতো, বুদ্ধিযা ৰা ৰিকসিতভাৰতো বুদ্ধৰাতি বুদ্ধো জাগরণৰিকসনত্থৰসেন. অথ ৰা কস্সচিপি ঞেয্যধম্মস্স অনৰবুদ্ধস্স অভাৰেন ঞেয্যৰিসেসস্স কম্মভাৰেন অগ্গহণতো কম্মৰচনিচ্ছায অভাৰেন অৰগমনত্থৰসেনেৰ কত্তুনিদ্দেসো লব্ভতীতি বুদ্ধৰাতি বুদ্ধো যথা ‘‘দিক্খিতো ন দদাতী’’তি. অত্থতো পন পারমিতাপরিভাৰিতো সযম্ভুঞাণেন সহ ৰাসনায ৰিহতৰিদ্ধংসিতনিরৰসেসকিলেসো মহাকরুণাসব্বঞ্ঞুতঞ্ঞাণাদিঅপরিমেয্যগুণগণাধারো খন্ধসন্তানো বুদ্ধো. যথাহ –

‘‘বুদ্ধোতি যো সো ভগৰা সযম্ভূ অনাচরিযকো পুব্বে অননুস্সুতেসু ধম্মেসু সামং সচ্চানি অভিসম্বুজ্ঝি, তত্থ চ সব্বঞ্ঞুতং পত্তো বলেসু চ ৰসীভাৰ’’ন্তি (মহানি. ১৯২; চূল়নি. পারাযনত্থুতিগাথানিদ্দেসো ৯৭; পটি. ম. ১.১৬১).

অপি-সদ্দো সম্ভাৰনে. তেন ‘‘এৰং গুণৰিসেসযুত্তো সোপি নাম ভগৰা’’তি ৰক্খমানগুণধম্মে সম্ভাৰনং দীপেতি. বুদ্ধভাৰন্তি সম্মাসম্বোধিং. ভাৰেত্ৰাতি উপ্পাদেত্ৰা ৰড্ঢেত্ৰা চ. সচ্ছিকত্ৰাতি পচ্চক্খং কত্ৰা. উপগতোতি পত্তো, অধিগতোতি অত্থো. এতস্স বুদ্ধভাৰন্তি এতেন সম্বন্ধো. গতমলন্তি ৰিগতমলং, নিদ্দোসন্তি অত্থো. ৰন্দেতি পণমামি, থোমেমি ৰা. অনুত্তরন্তি উত্তররহিতং, লোকুত্তরন্তি অত্থো. ধম্মন্তি যথানুসিট্ঠং পটিপজ্জমানে অপাযতো চ সংসারতো চ অপতমানে কত্ৰা ধারেতীতি ধম্মো. অযঞ্হেত্থ সঙ্খেপত্থো – এৰং ৰিৰিধগুণগণসমন্নাগতো বুদ্ধোপি ভগৰা যং অরিযমগ্গসঙ্খাতং ধম্মং ভাৰেত্ৰা, ফলনিব্বানং পন সচ্ছিকত্ৰা অনুত্তরং সম্মাসম্বোধিং অধিগতো, তমেৰং বুদ্ধানম্পি বুদ্ধভাৰহেতুভূতং সব্বদোসমলরহিতং অত্তনো উত্তরিতরাভাৰেন অনুত্তরং পটিৰেধসদ্ধম্মং নমামীতি. পরিযত্তিসদ্ধম্মস্সপি তপ্পকাসনত্তা ইধ সঙ্গহো দট্ঠব্বো.

অথ ৰা ‘‘অভিধম্মনযসমুদ্দং অধিগঞ্ছি, তীণি পিটকানি সম্মসী’’তি চ অট্ঠকথাযং ৰুত্তত্তা পরিযত্তিধম্মস্সপি সচ্ছিকিরিযাসম্মসনপরিযাযো লব্ভতীতি সোপি ইধ ৰুত্তো এৰাতি দট্ঠব্বং. তথা ‘‘যং ধম্মং ভাৰেত্ৰা সচ্ছিকত্ৰা’’তি চ ৰুত্তত্তা বুদ্ধকরধম্মভূতাহি পারমিতাহি সহ পুব্বভাগে অধিসীলসিক্খাদযোপি ইধ ধম্মসদ্দেন সঙ্গহিতাতি ৰেদিতব্বা. তাপি হি ৰিগতপ্পটিপক্খতায গতমলা, অনঞ্ঞসাধারণতায অনুত্তরা চাতি. তথা হি সত্তানং সকলৰট্টদুক্খনিস্সরণায কতমহাভিনীহারো মহাকরুণাধিৰাসনপেসলজ্ঝাসযো পঞ্ঞাৰিসেসপরিযোদাতনিম্মলানং দানদমসঞ্ঞমাদীনং উত্তমধম্মানং সতসহস্সাধিকানি কপ্পানং চত্তারি অসঙ্খ্যেয্যানি সক্কচ্চং নিরন্তরং নিরৰসেসানং ভাৰনাপচ্চক্খকরণেহি কম্মাদীসু অধিগতৰসীভাৰো অচ্ছরিযাচিন্তেয্যমহানুভাৰো অধিসীলঅধিচিত্তানং পরমুক্কংসপারমিপ্পত্তো ভগৰা পচ্চযাকারে চতুৰীসতিকোটিসতসহস্সমুখেন মহাৰজিরঞাণং পেসেত্ৰা অনুত্তরং সম্মাসম্বোধিং অভিসম্বুদ্ধোতি.

এত্থ চ ‘‘ভাৰেত্ৰা’’তি এতেন ৰিজ্জাসম্পদায ধম্মং থোমেতি, ‘‘সচ্ছিকত্ৰা’’তি এতেন ৰিমুত্তিসম্পদায. তথা পঠমেন ঝানসম্পদায, দুতিযেন ৰিমোক্খসম্পদায. পঠমেন ৰা সমাধিসম্পদায, দুতিযেন সমাপত্তিসম্পদায. অথ ৰা পঠমেন খযঞাণভাৰেন, দুতিযেন অনুপ্পাদঞাণভাৰেন. পঠমেন ৰা ৰিজ্জূপমতায, দুতিযেন ৰজিরূপমতায. পুরিমেন ৰা ৰিরাগসম্পত্তিযা, দুতিযেন নিরোধসম্পত্তিযা. তথা পঠমেন নিয্যানভাৰেন, দুতিযেন নিস্সরণভাৰেন. পঠমেন ৰা হেতুভাৰেন, দুতিযেন অসঙ্খতভাৰেন. পঠমেন ৰা দস্সনভাৰেন, দুতিযেন ৰিৰেকভাৰেন. পঠমেন ৰা অধিপতিভাৰেন, দুতিযেন অমতভাৰেন ধম্মং থোমেতি. অথ ৰা ‘‘যং ধম্মং ভাৰেত্ৰা বুদ্ধভাৰং উপগতো’’তি এতেন স্ৰাক্খাততায ধম্মং থোমেতি, ‘‘সচ্ছিকত্ৰা’’তি এতেন সন্দিট্ঠিকতায. তথা পুরিমেন অকালিকতায, পচ্ছিমেন এহিপস্সিকতায. পুরিমেন ৰা ওপনেয্যিকতায, পচ্ছিমেন পচ্চত্তং ৰেদিতব্বতায ধম্মং থোমেতি. ‘‘গতমল’’ন্তি ইমিনা সংকিলেসাভাৰদীপনেন ধম্মস্স পরিসুদ্ধতং দস্সেতি, ‘‘অনুত্তর’’ন্তি এতেন অঞ্ঞস্স ৰিসিট্ঠস্স অভাৰদীপনেন ৰিপুলপরিপুণ্ণতং. পঠমেন ৰা পহানসম্পদং ধম্মস্স দস্সেতি, দুতিযেন পভৰসম্পদং. ভাৰেতব্বতায ৰা ধম্মস্স গতমলভাৰো যোজেতব্বো. ভাৰনাগুণেন হি সো দোসানং সমুগ্ঘাতকো হোতীতি. সচ্ছিকাতব্বভাৰেন অনুত্তরভাৰো যোজেতব্বো. সচ্ছিকিরিযানিব্বত্তিতো হি তদুত্তরিকরণীযাভাৰতো অনঞ্ঞসাধারণতায অনুত্তরোতি. তথা ‘‘ভাৰেত্ৰা’’তি এতেন সহ পুব্বভাগসীলাদীহি সেক্খা সীলসমাধিপঞ্ঞাক্খন্ধা দস্সিতা হোন্তি. ‘‘সচ্ছিকত্ৰা’’তি এতেন সহ অসঙ্খতায ধাতুযা অসেক্খা সীলসমাধিপঞ্ঞাক্খন্ধা দস্সিতা হোন্তীতি.

৩. এৰং সঙ্খেপেনেৰ সব্বধম্মগুণেহি সদ্ধম্মং অভিত্থৰিত্ৰা ইদানি অরিযসঙ্ঘং থোমেতুং ‘‘সুগতস্সা’’তিআদিমাহ. তত্থ সুগতস্সাতি সম্বন্ধনিদ্দেসো. ‘‘তস্স পুত্তান’’ন্তি এতেন সম্বন্ধো. ওরসানন্তি পুত্তৰিসেসনং. মারসেনমথনানন্তি ওরসপুত্তভাৰে কারণনিদ্দেসো তেন কিলেসপ্পহানমেৰ ভগৰতো ওরসপুত্তভাৰে কারণং অনুজানাতীতি দস্সেতি. অট্ঠন্নন্তি গণনপরিচ্ছেদনিদ্দেসো. তেন চ সতিপি তেসং সত্তৰিসেসভাৰেন অনেকসতসহস্সভাৰে ইমং গণনপরিচ্ছেদং নাতিৰত্তন্তীতি দস্সেতি মগ্গট্ঠফলট্ঠভাৰানতিৰত্তনতো. সমূহন্তি সমুদাযনিদ্দেসো. অরিযসঙ্ঘন্তি গুণৰিসিট্ঠসংহতভাৰনিদ্দেসো. তেন অসতিপি অরিযপুগ্গলানং কাযসামগ্গিযং অরিযসঙ্ঘভাৰং দস্সেতি দিট্ঠিসীলসামঞ্ঞেন সংহতভাৰতো.

তত্থ উরসি ভৰা জাতা সংবদ্ধা চ ওরসা. যথা হি সত্তানং ওরসপুত্তা অত্তজতায পিতু সন্তকস্স দাযজ্জস্স ৰিসেসেন ভাগিনো হোন্তি, এৰমেতেপি অরিযপুগ্গলা সম্মাসম্বুদ্ধস্স সৰনন্তে অরিযায জাতিযা জাততায ভগৰতো সন্তকস্স ৰিমুত্তিসুখস্স অরিযধম্মরতনস্স একন্তেন ভাগিনোতি ওরসা ৰিয ওরসা. অথ ৰা ভগৰতো ধম্মদেসনানুভাৰেন অরিযভূমিং ওক্কমমানা ওক্কন্তা চ অরিযসাৰকা ভগৰতো উরে ৰাযামজনিতাভিজাতিতায নিপ্পরিযাযেন ওরসপুত্তাতি ৰত্তব্বতং অরহন্তি. সাৰকেহি পৰত্তিযমানাপি হি ধম্মদেসনা ‘‘ভগৰতো ধম্মদেসনা’’ইচ্চেৰ ৰুচ্চতি তংমূলকত্তা লক্খণাদিৰিসেসাভাৰতো চ.

যদিপি অরিযসাৰকানং অরিযমগ্গাধিগমসমযে ভগৰতো ৰিয তদন্তরাযকরণত্থং দেৰপুত্তমারো, মারৰাহিনী ৰা ন একন্তেন অপসাদেতি, তেহি পন অপসাদেতব্বতায কারণে ৰিমথিতে তেপি ৰিমথিতা এৰ নাম হোন্তীতি আহ – ‘‘মারসেনমথনান’’ন্তি. ইমস্মিং পনত্থে ‘‘মারমারসেনমথনান’’ন্তি ৰত্তব্বে ‘‘মারসেনমথনান’’ন্তি একদেসসরূপেকসেসো কতোতি দট্ঠব্বং. অথ ৰা খন্ধাভিসঙ্খারমারানং ৰিয দেৰপুত্তমারস্সপি গুণমারণে সহাযভাৰূপগমনতো কিলেসবলকাযো ‘‘সেনা’’তি ৰুচ্চতি. যথাহ – ‘‘কামা তে পঠমা সেনা’’তিআদি (সু. নি. ৪৩৮; মহানি. ২৮, ৬৮, ১৪৯). সা চ তেহি দিযড্ঢসহস্সভেদা, অনন্তভেদা ৰা কিলেসৰাহিনী সতিধম্মৰিচযৰীরিযসমথাদিগুণপ্পহরণেহি ওধিসো ৰিমথিতা ৰিহতা ৰিদ্ধস্তা চাতি মারসেনমথনা, অরিযসাৰকা. এতেন তেসং ভগৰতো অনুজাতপুত্ততং দস্সেতি.

আরকত্তা কিলেসেহি, অনযে ন ইরিযনতো, অযে চ ইরিযনতো অরিযা নিরুত্তিনযেন. অথ ৰা সদেৰকেন লোকেন সরণন্তি অরণীযতো উপগন্তব্বতো, উপগতানঞ্চ তদত্থসিদ্ধিতো অরিযা, অরিযানং সঙ্ঘোতি অরিযসঙ্ঘো, অরিযো চ সো সঙ্ঘো চাতি ৰা অরিযসঙ্ঘো, তং অরিযসঙ্ঘং. ভগৰতো অপরভাগে বুদ্ধধম্মরতনানম্পি সমধিগমো সঙ্ঘরতনাধীনোতি অস্স অরিযসঙ্ঘস্স বহূপকারতং দস্সেতুং ইধেৰ ‘‘সিরসা ৰন্দে’’তি ৰুত্তন্তি দট্ঠব্বং.

এত্থ চ ‘‘সুগতস্স ওরসানং পুত্তান’’ন্তি এতেন অরিযসঙ্ঘস্স পভৰসম্পদং দস্সেতি, ‘‘মারসেনমথনান’’ন্তি এতেন পহানসম্পদং সকলসংকিলেসপ্পহানদীপনতো. ‘‘অট্ঠন্নম্পি সমূহ’’ন্তি এতেন ঞাণসম্পদং মগ্গট্ঠফলট্ঠভাৰদীপনতো. ‘‘অরিযসঙ্ঘ’’ন্তি এতেন পভৰসম্পদং দস্সেতি সব্বসঙ্ঘানং অগ্গভাৰদীপনতো. অথ ৰা ‘‘সুগতস্স ওরসানং পুত্তান’’ন্তি অরিযসঙ্ঘস্স ৰিসুদ্ধনিস্সযভাৰদীপনং, ‘‘মারসেনমথনান’’ন্তি সম্মাউজুঞাযসামীচিপ্পটিপন্নভাৰদীপনং, ‘‘অট্ঠন্নম্পি সমূহ’’ন্তি আহুনেয্যাদিভাৰদীপনং, ‘‘অরিযসঙ্ঘ’’ন্তি অনুত্তরপুঞ্ঞক্খেত্তভাৰদীপনং. তথা ‘‘সুগতস্স ওরসানং পুত্তান’’ন্তি এতেন অরিযসঙ্ঘস্স লোকুত্তরসরণগমনসব্ভাৰং দীপেতি. লোকুত্তরসরণগমনেন হি তে ভগৰতো ওরসপুত্তা জাতা. ‘‘মারসেনমথনান’’ন্তি এতেন অভিনীহারসম্পদাসিদ্ধং পুব্বভাগে সম্মাপটিপত্তিং দস্সেতি. কতাভিনীহারা হি সম্মাপটিপন্না মারং মারপরিসং ৰা অভিৰিজিনন্তি. ‘‘অট্ঠন্নম্পি সমূহ’’ন্তি এতেন ৰিদ্ধস্তৰিপক্খে সেক্খাসেক্খধম্মে দস্সেতি পুগ্গলাধিট্ঠানেন মগ্গফলধম্মানং পকাসিতত্তা. ‘‘অরিযসঙ্ঘ’’ন্তি অগ্গদক্খিণেয্যভাৰং দস্সেতি. সরণগমনঞ্চ সাৰকানং সব্বগুণানং আদি, সপুব্বভাগপ্পটিপদা সেক্খা সীলক্খন্ধাদযো মজ্ঝে, অসেক্খা সীলক্খন্ধাদযো পরিযোসানন্তি আদিমজ্ঝপরিযোসানকল্যাণা সঙ্খেপতো সব্বে অরিযসঙ্ঘগুণা পকাসিতা হোন্তি.

৪. এৰং গাথাত্তযেন সঙ্খেপতো সকলগুণসংকিত্তনমুখেন রতনত্তযস্স পণামং কত্ৰা ইদানি তংনিপচ্চকারং যথাধিপ্পেতে পযোজনে পরিণামেন্তো ‘‘ইতি মে’’তিআদিমাহ. তত্থ রতিজননট্ঠেন রতনং, বুদ্ধধম্মসঙ্ঘা. তেসঞ্হি ‘‘ইতিপি সো ভগৰা’’তিআদিনা যথাভূতগুণে আৰজ্জেন্তস্স অমতাধিগমহেতুভূতং অনপ্পকং পীতিপামোজ্জং উপ্পজ্জতি. যথাহ –

‘‘যস্মিং, মহানাম, সমযে অরিযসাৰকো তথাগতং অনুস্সরতি, নেৰস্স তস্মিং সমযে রাগপরিযুট্ঠিতং চিত্তং হোতি, ন দোস…পে… ন মোহপরিযুট্ঠিতং চিত্তং হোতি, উজুগতমেৰস্স তস্মিং সমযে চিত্তং হোতি তথাগতং আরব্ভ. উজুগতচিত্তো খো পন, মহানাম, অরিযসাৰকো লভতি অত্থৰেদং, লভতি ধম্মৰেদং, লভতি ধম্মূপসংহিতং পামোজ্জং, পমুদিতস্স পীতি জাযতী’’তিআদি (অ. নি. ৬.১০; ১১.১১).

চিত্তীকতাদিভাৰো ৰা রতনট্ঠো. ৰুত্তঞ্হেতং –

‘‘চিত্তীকতং মহগ্ঘঞ্চ, অতুলং দুল্লভদস্সনং;

অনোমসত্তপরিভোগং, রতনং তেন ৰুচ্চতী’’তি. (দী. নি. অট্ঠ. ২.৩৩; সং. নি. অট্ঠ. ৩.৫.২২৩; খু. পা. অট্ঠ. ৬.৩; সু. নি. অট্ঠ. ১.২২৬);

চিত্তীকতভাৰাদযো চ অনঞ্ঞসাধারণা বুদ্ধাদীসু এৰ লব্ভন্তীতি.

ৰন্দনাৰ ৰন্দনামযং যথা ‘‘দানমযং, সীলময’’ন্তি (দী. নি. ৩.৩০৫; ইতিৰু. ৬০). ৰন্দনা চেত্থ কাযৰাচাচিত্তেহি তিণ্ণং রতনানং গুণনিন্নতা, থোমনা ৰা. পুজ্জভাৰফলনিব্বত্তনতো পুঞ্ঞং, অত্তনো সন্তানং পুনাতীতি ৰা. সুৰিহতন্তরাযোতি সুট্ঠু ৰিহতন্তরাযো. এতেন অত্তনো পসাদসম্পত্তিযা, রতনত্তযস্স চ খেত্তভাৰসম্পত্তিযা তং পুঞ্ঞং অত্থপ্পকাসনস্স উপঘাতকউপদ্দৰানং ৰিহননে সমত্থন্তি দস্সেতি. হুত্ৰাতি পুব্বকালকিরিযা. তস্স ‘‘অত্থং পকাসযিস্সামী’’তি এতেন সম্বন্ধো. তস্সাতি যং রতনত্তযৰন্দনামযং পুঞ্ঞং, তস্স. আনুভাৰেনাতি বলেন.

৫. এৰং রতনত্তযস্স নিপচ্চকারকরণে পযোজনং দস্সেত্ৰা ইদানি যস্সা ধম্মদেসনায অত্থং সংৰণ্ণেতুকামো, তস্সা তাৰ গুণাভিত্থৰনৰসেন উপঞ্ঞাপনত্থং ‘‘এককদুকাদিপটিমণ্ডিতস্সা’’তিআদিমাহ, এককাদীনি অঙ্গানি উপরূপরি ৰড্ঢেত্ৰা দেসিতেহি সুত্তন্তেহি পটিমণ্ডিতস্স ৰিসিট্ঠস্সাতি অত্থো. এতেন ‘‘অঙ্গুত্তরো’’তি অযং ইমস্স আগমস্স অত্থানুগতা সমঞ্ঞাতি দস্সেতি. ননু চ এককাদিৰসেন দেসিতানি সুত্তানিযেৰ আগমো. কস্স পন এককদুকাদীহি পটিমণ্ডিতভাৰোতি? সচ্চমেতং পরমত্থতো, সুত্তানি পন উপাদায পঞ্ঞত্তো আগমো. যথেৰ হি অত্থব্যঞ্জনসমুদাযে সুত্তন্তি ৰোহারো, এৰং সুত্তসমুদাযে আগমোতি ৰোহারো. এককাদীহি অঙ্গেহি উপরূপরি উত্তরো অধিকোতি অঙ্গুত্তরো, আগমিস্সন্তি এত্থ, এতেন, এতস্মা ৰা অত্তত্থপরত্থাদযোতি আগমো, আদিকল্যাণাদিগুণসম্পত্তিযা উত্তমট্ঠেন তংতংঅভিপত্থিতসমিদ্ধিহেতুতায পণ্ডিতেহি ৰরিতব্বতো ৰরো, আগমো চ সো ৰরো চ সেট্ঠট্ঠেনাতি আগমৰরো, আগমসম্মতেহি ৰা ৰরোতি আগমৰরো. অঙ্গুত্তরো চ সো আগমৰরো চাতি অঙ্গুত্তরাগমৰরো, তস্স.

পুঙ্গৰা ৰুচ্চন্তি উসভা, অসন্তসনপরিস্সযসহনস্স পরিপালনাদিগুণেহি তংসদিসতায ধম্মকথিকা এৰ পুঙ্গৰাতি ধম্মকথিকপুঙ্গৰা, তেসং. হেতূপমাদিপ্পটিমণ্ডিতনানাৰিধদেসনানযৰিচিত্ততায ৰিচিত্তপটিভানজননস্স. সুমঙ্গলৰিলাসিনীআদীসু (দী. নি. অট্ঠ. ১.গন্থারম্ভকথা; ম. নি. অট্ঠ. ১.গন্থারম্ভকথা; সং. নি. অট্ঠ. ১.১.গন্থারম্ভকথা) পন ‘‘বুদ্ধানুবুদ্ধসংৰণ্ণিতস্সা’’তি ৰুত্তং. বুদ্ধানঞ্হি সচ্চপ্পটিৰেধং অনুগম্ম পটিৰিদ্ধসচ্চা অগ্গসাৰকাদযো অরিযা বুদ্ধানুবুদ্ধা. অযম্পি আগমো তেহি অত্থসংৰণ্ণনাৰসেন গুণসংৰণ্ণনাৰসেন চ সংৰণ্ণিতো এৰ. অথ ৰা বুদ্ধা চ অনুবুদ্ধা চ বুদ্ধানুবুদ্ধাতি যোজেতব্বং. সম্মাসম্বুদ্ধেনেৰ হি তিণ্ণং পিটকানং অত্থৰণ্ণনাক্কমো ভাসিতো, যা ‘‘পকিণ্ণকদেসনা’’তি ৰুচ্চতি. ততো সঙ্গাযনাদিৰসেনেৰ সাৰকেহীতি আচরিযা ৰদন্তি. ইধ পন ‘‘ধম্মকথিকপুঙ্গৰানং ৰিচিত্তপটিভানজননস্স’’ইচ্চেৰ থোমনা কতা. সংৰণ্ণনাসু চাযং আচরিযস্স পকতি, যা তংতংসংৰণ্ণনাসু আদিতো তস্স তস্স সংৰণ্ণেতব্বস্স ধম্মস্স ৰিসেসগুণকিত্তনেন থোমনা. তথা হি সুমঙ্গলৰিলাসিনীপপঞ্চসূদনীসারত্থপ্পকাসনীসু অট্ঠসালিনীআদীসু চ যথাক্কমং ‘‘সদ্ধাৰহগুণস্স, পরৰাদমথনস্স, ঞাণপ্পভেদজননস্স, তস্স গম্ভীরঞাণেহি ওগাল়্হস্স অভিণ্হসো নানানযৰিচিত্তস্সা’’তিআদিনা থোমনা কতা.

৬. অত্থো কথীযতি এতাযাতি অত্থকথা, সা এৰ অট্ঠকথা, ত্থ-কারস্স ট্ঠ-কারং কত্ৰা যথা ‘‘দুক্খস্স পীল়নট্ঠো’’তি (পটি. ম. ১.১৭; ২.৮). আদিতোতিআদিম্হি পঠমসঙ্গীতিযং. ছল়ভিঞ্ঞতায পরমেন চিত্তৰসীভাৰেন সমন্নাগতত্তা ঝানাদীসু পঞ্চৰিধৰসিতাসব্ভাৰতো চ ৰসিনো, থেরা মহাকস্সপাদযো, তেসং সতেহি পঞ্চহি. যাতি যা অট্ঠকথা. সঙ্গীতাতি অত্থং পকাসেতুং যুত্তট্ঠানে ‘‘অযং এতস্স অত্থো, অযং এতস্স অত্থো’’তি সঙ্গহেত্ৰা ৰুত্তা. অনুসঙ্গীতা চ যসত্থেরাদীহি পচ্ছাপি দুতিযততিযসঙ্গীতীসু. ইমিনা অত্তনো সংৰণ্ণনায আগমনৰিসুদ্ধিং দস্সেতি.

৭. সীহস্স লানতো গহণতো সীহল়ো, সীহকুমারো. তংৰংসজাততায তম্বপণ্ণিদীপে খত্তিযানং, তেসং নিৰাসতায তম্বপণ্ণিদীপস্স চ সীহল়ভাৰো ৰেদিতব্বো. আভতাতি জম্বুদীপতো আনীতা. অথাতি পচ্ছা. অপরভাগে হি অসঙ্করত্থং সীহল়ভাসায অট্ঠকথা ঠপিতাতি. তেন সা মূলট্ঠকথা সব্বসাধারণা ন হোতীতি ইদং অত্থপ্পকাসনং একন্তেন করণীযন্তি দস্সেতি. তেনেৰাহ – ‘‘দীপৰাসীনমত্থাযা’’তি. তত্থ দীপৰাসীনন্তি জম্বুদীপৰাসীনং, দীপৰাসীনন্তি ৰা সীহল়দীপৰাসীনং অত্থায সীহল়ভাসায ঠপিতাতি যোজনা.

৮. অপনেত্ৰানাতি কঞ্চুকসদিসং সীহল়ভাসংঅপনেত্ৰান. ততোতি অট্ঠকথাতো. অহন্তি অত্তানং নিদ্দিসতি. মনোরমং ভাসন্তি মাগধভাসং. সা হি সভাৰনিরুত্তিভূতা পণ্ডিতানং মনং রমযতীতি. তেনেৰাহ – ‘‘তন্তিনযানুচ্ছৰিক’’ন্তি, পাল়িগতিযা অনুলোমিকং পাল়িচ্ছাযানুৰিধাযিনিন্তি অত্থো. ৰিগতদোসন্তি অসভাৰনিরুত্তিভাসন্তররহিতং.

৯. সমযং অৰিলোমেন্তোতি সিদ্ধন্তং অৰিরোধেন্তো. এতেন অত্থদোসাভাৰমাহ. অৰিরুদ্ধত্তা এৰ হি থেরৰাদাপি ইধ পকাসীযিস্সন্তি. থেরৰংসদীপানন্তি থিরেহি সীলক্খন্ধাদীহি সমন্নাগতত্তা থেরা, মহাকস্সপাদযো, তেহি আগতা আচরিযপরম্পরা থেরৰংসো. তপ্পরিযাপন্না হুত্ৰা আগমাধিগমসম্পন্নত্তা পঞ্ঞাপজ্জোতেন তস্স সমুজ্জলনতো থেরৰংসদীপা, মহাৰিহারৰাসিনো থেরা, তেসং. ৰিৰিধেহি আকারেহি নিচ্ছীযতীতি ৰিনিচ্ছযো, গণ্ঠিট্ঠানেসু খীলমদ্দনাকারেন পৰত্তা ৰিমতিচ্ছেদকথা. সুট্ঠু নিপুণো সণ্হো ৰিনিচ্ছযো এতেসন্তি সুনিপুণৰিনিচ্ছযা. অথ ৰা ৰিনিচ্ছিনোতীতি ৰিনিচ্ছযো, যথাৰুত্তত্থৰিসযং ঞাণং. সুট্ঠু নিপুণো ছেকো ৰিনিচ্ছযো এতেসন্তি সুনিপুণৰিনিচ্ছযা. এতেন মহাকস্সপাদিত্থেরপরম্পরাভতো, ততোযেৰ চ অৰিপরীতো সণ্হসুখুমো মহাৰিহারৰাসীনং ৰিনিচ্ছযোতি তস্স পমাণভূততং দস্সেতি.

১০. সুজনস্স চাতি চ-সদ্দো সম্পিণ্ডনত্থো. তেন ‘‘ন কেৰলং জম্বুদীপৰাসীনংযেৰ অত্থায, অথ খো সাধুজনানং তোসনত্থঞ্চা’’তি দস্সেতি. তেন চ ‘‘তম্বপণ্ণিদীপৰাসীনম্পি অত্থাযা’’তি অযমত্থো সিদ্ধো হোতি উগ্গহণাদিসুকরতায তেসম্পি বহূপকারত্তা. চিরট্ঠিতত্থন্তি চিরট্ঠিতিঅত্থং, চিরকালাৰট্ঠানাযাতি অত্থো. ইদঞ্হি অত্থপ্পকাসনং অৰিপরীতব্যঞ্জনসুনিক্খেপস্স অত্থসুনীতস্স চ উপাযভাৰতো সদ্ধম্মস্স চিরট্ঠিতিযা সংৰত্ততি. ৰুত্তঞ্হেতং ভগৰতা –

‘‘দ্ৰেমে, ভিক্খৰে, ধম্মা সদ্ধম্মস্স ঠিতিযা অসম্মোসায অনন্তরধানায সংৰত্তন্তি. কতমে দ্ৰে? সুনিক্খিত্তঞ্চ পদব্যঞ্জনং, অত্থো চ সুনীতো’’তি (অ. নি. ২.২১).

১১-১২. যং অত্থৰণ্ণনং কত্থুকামো, তস্সা মহন্তত্তং পরিহরিতুং ‘‘সাৰত্থিপভূতীন’’ন্তিআদিমাহ. তেনাহ – ‘‘ন ইধ ৰিত্থারকথং করিস্সামি, ন তং ইধ ৰিচারযিস্সামী’’তি চ. তত্থ দীঘস্সাতি দীঘনিকাযস্স. মজ্ঝিমস্সাতি মজ্ঝিমনিকাযস্স. ‘‘সঙ্গীতীনং দ্ৰিন্নং যা মে অত্থং ৰদন্তেনা’’তিপি পাঠো. তত্থপি সঙ্গীতীনং দ্ৰিন্নন্তি দীঘমজ্ঝিমনিকাযানন্তি অত্থো গহেতব্বো. মেতি করণত্থে সামিৰচনং, মযাতি অত্থো. সুদন্তি নিপাতমত্তং. হেট্ঠা দীঘস্স মজ্ঝিমস্স চ অত্থং ৰদন্তেন সাৰত্থিপভুতীনং নগরানং যা ৰণ্ণনা কতা, তস্সা ৰিত্থারকথং ন ইধ ভিয্যো করিস্সামীতি যোজেতব্বং. যানি চ তত্থ ৰত্থূনি ৰিত্থারৰসেন ৰুত্তানি, তেসম্পি ৰিত্থারকথং ন ইধ ভিয্যো করিস্সামীতি সম্বন্ধো.

১৩. ইদানি ‘‘ন ইধ ৰিত্থারকথং করিস্সামী’’তি সামঞ্ঞতো ৰুত্তস্স অত্থস্স পৰরং দস্সেতুং – ‘‘সুত্তানং পনা’’তিআদি ৰুত্তং. সুত্তানং যে অত্থা ৰত্থূহি ৰিনা ন পকাসন্তীতি যোজেতব্বং.

১৪. যং অট্ঠকথং কত্তুকামো, তদেকদেসভাৰেন ৰিসুদ্ধিমগ্গো চ গহেতব্বোতি কথিকানং উপদেসং করোন্তো তত্থ ৰিচারিতধম্মে উদ্দেসৰসেন দস্সেতি – ‘‘সীলকথা’’তিআদিনা. তত্থ সীলকথাতি চারিত্তৰারিত্তাদিৰসেন সীলস্স ৰিত্থারকথা. ধুতধম্মাতি পিণ্ডপাতিকঙ্গাদযো তেরস কিলেসধুননকধম্মা. কম্মট্ঠানানি সব্বানীতি পাল়িযং আগতানি অট্ঠতিংস, অট্ঠকথাযং দ্ৰেতি নিরৰসেসানি যোগকম্মস্স ভাৰনায পৰত্তিট্ঠানানি. চরিযাৰিধানসহিতোতি রাগচরিতাদীনং সভাৰাদিৰিধানেন সহিতো. ঝানানি চত্তারি রূপাৰচরজ্ঝানানি, সমাপত্তিযো চতস্সো আরুপ্পসমাপত্তিযো. অট্ঠপি ৰা পটিলদ্ধমত্তানি ঝানানি সমাপজ্জনৰসীভাৰপ্পত্তিযা সমাপত্তিযো. ঝানানি ৰা রূপারূপাৰচরজ্ঝানানি, সমাপত্তিযো ফলসমাপত্তিনিরোধসমাপত্তিযো.

১৫. লোকিযলোকুত্তরভেদা ছ অভিঞ্ঞাযো সব্বা অভিঞ্ঞাযো. ঞাণৰিভঙ্গাদীসু আগতনযেন একৰিধাদিনা পঞ্ঞায সংকলেত্ৰা সম্পিণ্ডেত্ৰা নিচ্ছযো পঞ্ঞাসঙ্কলননিচ্ছযো.

১৬. পচ্চযধম্মানং হেতুআদীনং পচ্চযুপ্পন্নধম্মানং হেতুপচ্চযাদিভাৰো পচ্চযাকারো, তস্স দেসনা পচ্চযাকারদেসনা, পটিচ্চসমুপ্পাদকথাতি অত্থো. সা পন ঘনৰিনিব্ভোগস্স সুদুক্করতায সণ্হসুখুমা, নিকাযন্তরলদ্ধিসঙ্কররহিতা, একত্তনযাদিসহিতা চ তত্থ ৰিচারিতাতি আহ – ‘‘সুপরিসুদ্ধনিপুণনযা’’তি. পটিসম্ভিদাদীসু আগতনযং অৰিস্সজ্জেত্ৰাৰ ৰিচারিতত্তা অৰিমুত্ততন্তিমগ্গা.

১৭. ইতি পন সব্বন্তি ইতি-সদ্দো পরিসমাপনে, পন-সদ্দো ৰচনালঙ্কারে, এতং সব্বন্তি অত্থো. ইধাতি ইমিস্সা অট্ঠকথায ন ৰিচারযিস্সামি পুনরুত্তিভাৰতোতি অধিপ্পাযো.

১৮. ইদানি তস্সেৰ অৰিচারণস্স একন্তকারণং নিদ্ধারেন্তো ‘‘মজ্ঝে ৰিসুদ্ধিমগ্গো’’তিআদিমাহ. তত্থ ‘‘মজ্ঝে ঠত্ৰা’’তি এতেন মজ্ঝভাৰদীপনেন ৰিসেসতো চতুন্নং আগমানং সাধারণট্ঠকথা ৰিসুদ্ধিমগ্গো, ন সুমঙ্গলৰিলাসিনীআদযো ৰিয অসাধারণট্ঠকথাতি দস্সেতি. ‘‘ৰিসেসতো’’তি চ ইদং ৰিনযাভিধম্মানম্পি ৰিসুদ্ধিমগ্গো যথারহং অত্থৰণ্ণনা হোতি এৰাতি কত্ৰা ৰুত্তং.

১৯. ইচ্চেৰাতি ইতি এৰ. তম্পীতি ৰিসুদ্ধিমগ্গম্পি. এতাযাতি মনোরথপূরণিযা. এত্থ চ ‘‘সীহল়দীপং আভতা’’তিআদিনা অত্থপ্পকাসনস্স নিমিত্তং দস্সেতি, ‘‘দীপৰাসীনমত্থায সুজনস্স চ তুট্ঠত্থং চিরট্ঠিতত্থঞ্চ ধম্মস্সা’’তি এতেন পযোজনং, অপনেত্ৰান ততোহং, সীহল়ভাস’’ন্তিআদিনা. ‘‘সাৰত্থিপভুতীন’’ন্তিআদিনা চ করণপ্পকারং. হেট্ঠিমনিকাযেসু ৰিসুদ্ধিমগ্গে চ ৰিচারিতানং অত্থানং অৰিচারণম্পি হি ইধ করণপ্পকারো এৰাতি.

গন্থারম্ভকথাৰণ্ণনা নিট্ঠিতা.

১. রূপাদিৰগ্গৰণ্ণনা

নিদানৰণ্ণনা

ৰিভাগৰন্তানং সভাৰৰিভাৰনং ৰিভাগদস্সনৰসেনেৰ হোতীতি পঠমং তাৰ নিপাতসুত্তৰসেন ৰিভাগং দস্সেতুং ‘‘তত্থ অঙ্গুত্তরাগমো নামা’’তিআদিমাহ. তত্থ তত্থাতি ‘‘অঙ্গুত্তরাগমস্স অত্থং পকাসযিস্সামী’’তি যদিদং ৰুত্তং, তস্মিং ৰচনে, ‘‘যস্স অত্থং পকাসযিস্সামী’’তি পটিঞ্ঞাতং, সো অঙ্গুত্তরাগমো নাম নিপাতসুত্তৰসেন এৰং ৰিভাগোতি অত্থো. অথ ৰা তত্থাতি ‘‘অঙ্গুত্তরনিস্সিতং অত্থ’’ন্তি এতস্মিং ৰচনে যো অঙ্গুত্তরাগমো ৰুত্তো, সো নিপাতসুত্তাদিৰসেন এদিসোতি অত্থো.

ইদানি তং আদিতো পট্ঠায সংৰণ্ণিতুকামো অত্তনো সংৰণ্ণনায পঠমমহাসঙ্গীতিযং নিক্খিত্তানুক্কমেন পৰত্তভাৰদস্সনত্থং ‘‘তস্স নিপাতেসু…পে… ৰুত্তং নিদানমাদী’’তিআদিমাহ. তত্থ যথাপচ্চযং তত্থ তত্থ দেসিতত্তা পঞ্ঞত্তত্তা চ ৰিপ্পকিণ্ণানং ধম্মৰিনযানং সঙ্গহেত্ৰা গাযনং কথনং সঙ্গীতি. এতেন তংতংসিক্খাপদানং সুত্তানঞ্চ আদিপরিযোসানেসু অন্তরন্তরা চ সম্বন্ধৰসেন ঠপিতং সঙ্গীতিকারৰচনং সঙ্গহিতং হোতি. সঙ্গীযমানস্স অত্থস্স মহন্ততায পূজনীযতায চ মহতী সঙ্গীতি মহাসঙ্গীতি, পঠমা মহাসঙ্গীতি পঠমমহাসঙ্গীতি, তস্সা পৰত্তিকালো পঠমমহাসঙ্গীতিকালো, তস্মিং পঠমমহাসঙ্গীতিকালে. নিদদাতি দেসনং দেসকালাদিৰসেন অৰিদিতং ৰিদিতং কত্ৰা নিদস্সেতীতি নিদানং. যো লোকিযেহি উপোগ্ঘাতোতি ৰুচ্চতি, স্ৰাযমেত্থ ‘‘এৰং মে সুত’’ন্তিআদিকো গন্থো ৰেদিতব্বো. ন ‘‘সনিদানাহং, ভিক্খৰে, ধম্মং দেসেমী’’তিআদীসু (অ. নি. ৩.১২৬) ৰিয অজ্ঝাসযাদিদেসনুপ্পত্তিহেতু. তেনেৰাহ – ‘‘এৰং মে সুতন্তিআদিকং আযস্মতা আনন্দেন পঠমমহাসঙ্গীতিকালে ৰুত্তং নিদানমাদী’’তি.

১. ‘‘সা পনেসা’’তিআদিনা বাহিরনিদানে ৰত্তব্বং অতিদিসিত্ৰা ইদানি অব্ভন্তরনিদানং আদিতো পট্ঠায সংৰণ্ণিতুং ‘‘যং পনেত’’ন্তি ৰুত্তং. তত্থ যস্মা সংৰণ্ণনং করোন্তেন সংৰণ্ণেতব্বে ধম্মে পদানি পদৰিভাগং তদত্থঞ্চ দস্সেত্ৰা ততো পরং পিণ্ডত্থাদিনিদস্সনৰসেন চ সংৰণ্ণনা কাতব্বা, তস্মা পদানি তাৰ দস্সেন্তো ‘‘এৰন্তি নিপাতপদ’’ন্তিআদিমাহ. তত্থ পদৰিভাগোতি পদানং ৰিসেসো, ন পদৰিগ্গহো. অথ ৰা পদানি চ পদৰিভাগো চ পদৰিভাগো, পদৰিগ্গহো চ পদৰিভাগো চ পদৰিভাগোতি ৰা একসেসৰসেন পদপদৰিগ্গহা পদৰিভাগসদ্দেন ৰুত্তাতি ৰেদিতব্বং. তত্থ পদৰিগ্গহো ‘‘জেতস্স ৰনং জেতৰন’’ন্তিআদিনা সমাসপদেসু দট্ঠব্বো.

অত্থতোতি পদত্থতো. তং পন পদত্থং অত্থুদ্ধারক্কমেন পঠমং এৰং-সদ্দস্স দস্সেন্তো ‘‘এৰং-সদ্দো তাৰা’’তিআদিমাহ. অৰধারণাদীতি এত্থ আদি-সদ্দেন ইদমত্থপুচ্ছাপরিমাণাদিঅত্থানং সঙ্গহো দট্ঠব্বো. তথা হি ‘‘এৰংগতানি পুথুসিপ্পাযতনানি, এৰমাদীনী’’তিআদীসু ইদং-সদ্দস্স অত্থে এৰং-সদ্দো. গত-সদ্দো হি পকারপরিযাযো, তথা ৰিধাকার-সদ্দা চ. তথা হি ৰিধযুত্তগতসদ্দে লোকিযা পকারত্থে ৰদন্তি. ‘‘এৰং সু তে সুন্হাতা সুৰিলিত্তা কপ্পিতকেসমস্সূ আমুক্কমণিকুণ্ডলাভরণা ওদাতৰত্থৰসনা পঞ্চহি কামগুণেহি সমপ্পিতা সমঙ্গীভূতা পরিচারেন্তি সেয্যথাপি ত্ৰং এতরহি সাচরিযকোতি. নো হিদং, ভো গোতমা’’তিআদীসু (দী. নি. ১.২৮৬) পুচ্ছাযং. ‘‘এৰং লহুপরিৰত্তং (অ. নি. ১.৪৮), এৰমাযুপরিযন্তো’’তি (দী. নি. ১.২৪৪; পারা. ১২) চ আদীসু পরিমাণে.

ননু চ ‘‘এৰং সু তে সুন্হাতা সুৰিলিত্তা এৰমাযুপরিযন্তো’’তি এত্থ এৰং-সদ্দেন পুচ্ছনাকারপরিমাণাকারানং ৰুত্তত্তা আকারত্থো এৰ এৰং-সদ্দোতি? ন, ৰিসেসসব্ভাৰতো. আকারমত্তৰাচকো হি এৰং-সদ্দো আকারত্থোতি অধিপ্পেতো যথা ‘‘এৰং ব্যাখো’’তিআদীসু (ম. নি. ১.২৩৪; পাচি. ৪১৭; চূল়ৰ. ৬৫), ন পন আকারৰিসেসৰাচকো. এৰঞ্চ কত্ৰা ‘‘এৰং জাতেন মচ্চেনা’’তিআদীনি (ধ. প. ৫৩) উপমাদিউদাহরণানি উপপন্নানি হোন্তি. তথা হি ‘‘যথা হি…পে… বহু’’ন্তি (ধ. প. ৫৩) এত্থ পুপ্ফরাসিট্ঠানিযতো মনুস্সূপপত্তিসপ্পুরিসূপনিস্সযসদ্ধম্মস্সৰনযোনিসোমনসিকারভোগসম্পত্তি- আদিদানাদিপুঞ্ঞকিরিযাহেতুসমুদাযতো সোভাসুগন্ধতাদিগুণযোগতো মালাগুণসদিসিযো পহূতা পুঞ্ঞকিরিযা মরিতব্বসভাৰতায মচ্চেন সত্তেন কত্তব্বাতি জোতিতত্তা পুপ্ফরাসিমালাগুণাৰ উপমা. তেসং উপমাকারো যথা-সদ্দেন অনিযমতো ৰুত্তোতি ‘‘এৰং-সদ্দো উপমাকারনিগমনত্থো’’তি ৰত্তুং যুত্তং, সো পন উপমাকারো নিযমিযমানো অত্থতো উপমাৰ হোতীতি আহ – ‘‘উপমাযং আগতো’’তি. তথা ‘‘এৰং ইমিনা আকারেন অভিক্কমিতব্ব’’ন্তিআদিনা উপদিসিযমানায সমণসারুপ্পায আকপ্পসম্পত্তিযা যো তত্থ উপদিসনাকারো, সো অত্থতো উপদেসো এৰাতি ৰুত্তং – ‘‘এৰং তে…পে… উপদেসে’’তি. তথা এৰমেতং ভগৰা, এৰমেতং সুগতাতি এত্থ ভগৰতা যথাৰুত্তমত্থং অৰিপরীততো জানন্তেহি কতং তত্থ সংৰিজ্জমানগুণানং পকারেহি হংসনং উদগ্গতাকরণং সম্পহংসনং, যো তত্থ সম্পহংসনাকারোতি যোজেতব্বং.

এৰমেৰং পনাযন্তি এত্থ গরহণাকারোতি যোজেতব্বং, সো চ গরহণাকারো ‘‘ৰসলী’’তিআদিখুংসনসদ্দসন্নিধানতো ইধ এৰং-সদ্দেন পকাসিতোতি ৰিঞ্ঞাযতি. যথা চেত্থ, এৰং উপমাকারাদযোপি উপমাদিৰসেন ৰুত্তানং পুপ্ফরাসিআদিসদ্দানং সন্নিধানতোতি দট্ঠব্বং. এৰং, ভন্তেতি খোতিআদীসু পন ধম্মস্স সাধুকং সৰনমনসিকারেন নিযোজিতেহি ভিক্খূহি অত্তনো তত্থ ঠিতভাৰস্স পটিজাননৰসেন ৰুত্তত্তা এত্থ এৰং-সদ্দো ৰচনসম্পটিচ্ছনত্থো ৰুত্তো, তেন ‘‘এৰং, ভন্তে, সাধু ভন্তে, সুট্ঠু ভন্তে’’তি ৰুত্তং হোতি. এৰঞ্চ ৰদেহীতি ‘‘যথাহং ৰদামি, এৰং সমণং আনন্দং ৰদেহী’’তি ৰদনাকারো ইদানি ৰত্তব্বো এৰং-সদ্দেন নিদস্সীযতীতি নিদস্সনত্থো ৰুত্তো. এৰং নোতি এত্থাপি তেসং যথাৰুত্তধম্মানং অহিতদুক্খাৰহভাৰে সন্নিট্ঠানজননত্থং অনুমতিগ্গহণৰসেন ‘‘নো ৰা, কথং ৰো এত্থ হোতী’’তি পুচ্ছায কতায ‘‘এৰং নো এত্থ হোতী’’তি ৰুত্তত্তা তদাকারসন্নিট্ঠানং এৰং-সদ্দেন ৰিভাৰিতন্তি ৰিঞ্ঞাযতি. সো পন তেসং ধম্মানং অহিতায দুক্খায সংৰত্তনাকারো নিযমিযমানো অৰধারণত্থো হোতীতি আহ – ‘‘এৰং নো এত্থ হোতীতিআদীসু অৰধারণে’’তি.

নানানযনিপুণন্তি একত্তনানত্তঅব্যাপারএৰংধম্মতাসঙ্খাতা, নন্দিযাৰট্টতিপুক্খলসীহৰিক্কীল়িতঅঙ্কুসদিসালোচনসঙ্খাতা ৰা আধারাদিভেদৰসেন নানাৰিধা নযা নানানযা. নযা ৰা পাল়িগতিযো, তা চ পঞ্ঞত্তিআদিৰসেন সংকিলেসভাগিযাদিলোকিযাদিতদুভযৰোমিস্সকতাদিৰসেন কুসলাদিৰসেন খন্ধাদিৰসেন সঙ্গহাদিৰসেন সমযৰিমুত্তাদিৰসেন পধানাদিৰসেন কুসলমূলাদিৰসেন তিকপট্ঠানাদিৰসেন চ নানপ্পকারাতি নানানযা, তেহি নিপুণং সণ্হং সুখুমন্তি নানানযনিপুণং. আসযোৰ অজ্ঝাসযো, তে চ সস্সতাদিভেদেন তত্থ চ অপ্পরজক্খতাদিভেদেন চ অনেকে, অত্তজ্ঝাসযাদযো এৰ ৰা সমুট্ঠানং উপ্পত্তিহেতু এতস্সাতি অনেকজ্ঝাসযসমুট্ঠানং. অত্থব্যঞ্জনসম্পন্নন্তি অত্থব্যঞ্জনপরিপুণ্ণং উপনেতব্বাভাৰতো. সঙ্কাসনপকাসনৰিৰরণৰিভজনউত্তানীকরণপঞ্ঞত্তিৰসেন ছহি অত্থপদেহি অক্খরপদব্যঞ্জনাকারনিরুত্তিনিদ্দেসৰসেন ছহি ব্যঞ্জনপদেহি চ সমন্নাগতন্তি ৰা অত্থো দট্ঠব্বো.

ৰিৰিধপাটিহারিযন্তি এত্থ পাটিহারিযপদস্স ৰচনত্থং ‘‘পটিপক্খহরণতো রাগাদিকিলেসাপনযনতো চ পাটিহারিয’’ন্তি ৰদন্তি. ভগৰতো পন পটিপক্খা রাগাদযো ন সন্তি, যে হরিতব্বা. পুথুজ্জনানম্পি ৰিগতূপক্কিলেসে অট্ঠগুণসমন্নাগতে চিত্তে হতপটিপক্খে ইদ্ধিৰিধং পৰত্ততি, তস্মা তত্থ পৰত্তৰোহারেন চ ন সক্কা ইধ ‘‘পাটিহারিয’’ন্তি ৰত্থুং. সচে পন মহাকারুণিকস্স ভগৰতো ৰেনেয্যগতা চ কিলেসা পটিপক্খা, তেসং হরণতো ‘‘পাটিহারিয’’ন্তি ৰুত্তং, এৰং সতি যুত্তমেতং. অথ ৰা ভগৰতো চ সাসনস্স চ পটিপক্খা তিত্থিযা, তেসং হরণতো পাটিহারিযং. তে হি দিট্ঠিহরণৰসেন চ দিট্ঠিপ্পকাসনে অসমত্থভাৰেন চ ইদ্ধিআদেসনানুসাসনীহি হরিতা অপনীতা হোন্তীতি. ‘‘পটী’’তি ৰা অযং সদ্দো ‘‘পচ্ছা’’তি এতস্স অত্থং বোধেতি ‘‘তস্মিং পটিপৰিট্ঠম্হি, অঞ্ঞো আগঞ্ছি ব্রাহ্মণো’’তিআদীসু (সু. নি. ৯৮৫; চূল়নি. পারাযনৰগ্গো, ৰত্থুগাথা ৪) ৰিয, তস্মা সমাহিতে চিত্তে ৰিগতূপক্কিলেসে কতকিচ্চেন পচ্ছা হরিতব্বং পৰত্তেতব্বন্তি পটিহারিযং, অত্তনো ৰা উপক্কিলেসেসু চতুত্থজ্ঝানমগ্গেহি হরিতেসু পচ্ছা হরণং পটিহারিযং, ইদ্ধিআদেসনানুসাসনিযো চ ৰিগতূপক্কিলেসেন কতকিচ্চেন চ সত্তহিতত্থং পুন পৰত্তেতব্বা, হরিতেসু চ অত্তনো উপক্কিলেসেসু পরসত্তানং উপক্কিলেসহরণানি হোন্তীতি পটিহারিযানি ভৰন্তি. পটিহারিযমেৰ পাটিহারিযং, পটিহারিযে ৰা ইদ্ধিআদেসনানুসাসনিসমুদাযে ভৰং একমেকং পাটিহারিযন্তি ৰুচ্চতি. পটিহারিযং ৰা চতুত্থজ্ঝানং মগ্গো চ পটিপক্খহরণতো, তত্থ জাতং, তস্মিং ৰা নিমিত্তভূতে, ততো ৰা আগতন্তি পাটিহারিযং. তস্স পন ইদ্ধিআদিভেদেন ৰিসযভেদেন চ বহুৰিধস্স ভগৰতো দেসনাযং লব্ভমানত্তা আহ – ‘‘ৰিৰিধপাটিহারিয’’ন্তি.

ন অঞ্ঞথাতি ভগৰতো সম্মুখা সুতাকারতো ন অঞ্ঞথাতি অত্থো, ন পন ভগৰতো দেসিতাকারতো. অচিন্তেয্যানুভাৰা হি ভগৰতো দেসনা. এৰঞ্চ কত্ৰা ‘‘সব্বপ্পকারেন কো সমত্থো ৰিঞ্ঞাতু’’ন্তি ইদং ৰচনং সমত্থিতং ভৰতি, ধারণবলদস্সনঞ্চ ন ৰিরুজ্ঝতি সুতাকারাৰিরুজ্ঝনস্স অধিপ্পেতত্তা. ন হেত্থ অত্থন্তরতাপরিহারো দ্ৰিন্নং অত্থানং একৰিসযত্তা, ইতরথা থেরো ভগৰতো দেসনায সব্বথা পটিগ্গহণে সমত্থো অসমত্থো চাতি আপজ্জেয্যাতি.

‘‘যো পরো ন হোতি, সো অত্তা’’তি এৰং ৰুত্তায নিযকজ্ঝত্তসঙ্খাতায সসন্ততিযং ৰত্তনতো তিৰিধোপি মে-সদ্দো কিঞ্চাপি একস্মিংযেৰ অত্থে দিস্সতি, করণসম্পদানসামিনিদ্দেসৰসেন পন ৰিজ্জমানভেদং সন্ধাযাহ – ‘‘মে-সদ্দো তীসু অত্থেসু দিস্সতী’’তি.

কিঞ্চাপি উপসগ্গো কিরিযং ৰিসেসেতি, জোতকভাৰতো পন সতিপি তস্মিং সুত-সদ্দো এৰ তং তমত্থং ৰদতীতি অনুপসগ্গস্স সুত-সদ্দস্স অত্থুদ্ধারে সউপসগ্গস্স গহণং ন ৰিরুজ্ঝতীতি দস্সেন্তো ‘‘সউপসগ্গো চ অনুপসগ্গো চা’’তি আহ. অস্সাতি সুতসদ্দস্স. কম্মভাৰসাধনানি ইধ সুতসদ্দে সম্ভৰন্তীতি ৰুত্তং – ‘‘উপধারিতন্তি ৰা উপধারণন্তি ৰা অত্থো’’তি. মযাতি অত্থে সতীতি যদা মে-সদ্দস্স কত্তুৰসেন করণনিদ্দেসো, তদাতি অত্থো. মমাতি অত্থে সতীতি যদা সম্বন্ধৰসেন সামিনিদ্দেসো, তদা.

সুতসদ্দসন্নিট্ঠানে পযুত্তেন এৰং-সদ্দেন সৰনকিরিযাজোতকেন ভৰিতব্বন্তি ৰুত্তং – ‘‘এৰন্তি সোতৰিঞ্ঞাণাদিৰিঞ্ঞাণকিচ্চনিদস্সন’’ন্তি. আদি-সদ্দেন সম্পটিচ্ছনাদীনং সোতদ্ৰারিকৰিঞ্ঞাণানং তদভিনীহটানঞ্চ মনোদ্ৰারিকৰিঞ্ঞাণানং গহণং ৰেদিতব্বং. সব্বেসম্পি ৰাক্যানং এৰকারত্থসহিতত্তা ‘‘সুত’’ন্তি এতস্স সুতমেৰাতি অযমত্থো লব্ভতীতি আহ – ‘‘অস্সৰনভাৰপ্পটিক্খেপতো’’তি. এতেন অৰধারণেন নিযামতং দস্সেতি. যথা চ সুতং সুতমেৰাতি নিযামেতব্বং, তং সম্মা সুতং হোতীতি আহ – ‘‘অনূনাধিকাৰিপরীতগ্গহণনিদস্সন’’ন্তি. অথ ৰা সদ্দন্তরত্থাপোহনৰসেন সদ্দো অত্থং ৰদতীতি সুতন্তি অস্সুতং ন হোতীতি অযমেতস্স অত্থোতি ৰুত্তং – ‘‘অস্সৰনভাৰপ্পটিক্খেপতো’’তি. ইমিনা দিট্ঠাদিৰিনিৰত্তনং করোতি. ইদং ৰুত্তং হোতি – ন ইদং মযা দিট্ঠং, ন সযম্ভুঞাণেন সচ্ছিকতং, অথ খো সুতং, তঞ্চ সম্মদেৰাতি. তেনেৰাহ – ‘‘অনূনাধিকাৰিপরীতগ্গহণনিদস্সন’’ন্তি. অৰধারণত্থে ৰা এৰং-সদ্দে অযমত্থযোজনা – ‘‘করীযতী’’তি তদপেক্খস্স সুত-সদ্দস্স অযমত্থো ৰুত্তো ‘‘অস্সৰনভাৰপ্পটিক্খেপতো’’তি. তেনেৰাহ – ‘‘অনূনাধিকাৰিপরীতগ্গহণনিদস্সন’’ন্তি. সৰন-সদ্দো চেত্থ কম্মত্থো ৰেদিতব্বো ‘‘সুয্যতী’’তি.

এৰং সৰনহেতুসৰনৰিসেসৰসেন পদত্তযস্স একেন পকারেন অত্থযোজনং দস্সেত্ৰা ইদানি পকারন্তরেহি তং দস্সেতুং – ‘‘তথা এৰ’’ন্তিআদি ৰুত্তং. তত্থ তস্সাতি যা সা ভগৰতো সম্মুখা ধম্মস্সৰনাকারেন পৰত্তা মনোদ্ৰারৰিঞ্ঞাণৰীথি, তস্সা. সা হি নানপ্পকারেন আরম্মণে পৰত্তিতুং সমত্থা. তথা চ ৰুত্তং – ‘‘সোতদ্ৰারানুসারেনা’’তি. নানপ্পকারেনাতি ৰক্খমানানং অনেকৰিহিতানং ব্যঞ্জনত্থগ্গহণানং নানাকারেন. এতেন ইমিস্সা যোজনায আকারত্থো এৰং-সদ্দো গহিতোতি দীপেতি. পৰত্তিভাৰপ্পকাসনন্তি পৰত্তিযা অত্থিভাৰপ্পকাসনং. সুতন্তি ধম্মপ্পকাসনন্তি যস্মিং আরম্মণে ৰুত্তপ্পকারা ৰিঞ্ঞাণৰীথি নানপ্পকারেন পৰত্তা, তস্স ধম্মত্তা ৰুত্তং, ন সুতসদ্দস্স ধম্মত্থত্তা. ৰুত্তস্সেৰত্থস্স পাকটীকরণং ‘‘অযঞ্হেত্থা’’তিআদি. তত্থ ৰিঞ্ঞাণৰীথিযাতি করণত্থে করণৰচনং, মযাতি কত্তুঅত্থে.

এৰন্তি নিদ্দিসিতব্বপ্পকাসনন্তি নিদস্সনত্থং এৰং-সদ্দং গহেত্ৰা ৰুত্তং নিদস্সেতব্বস্স নিদস্সিতব্বত্তাভাৰাভাৰতো. তেন এৰং-সদ্দেন সকলম্পি সুত্তং পচ্চামট্ঠন্তি দস্সেতি. সুতসদ্দস্স কিরিযাসদ্দত্তা সৰনকিরিযায চ সাধারণৰিঞ্ঞাণপ্পবন্ধপ্পটিবদ্ধত্তা তত্থ চ পুগ্গলৰোহারোতি ৰুত্তং – ‘‘সুতন্তি পুগ্গলকিচ্চপ্পকাসন’’ন্তি. ন হি পুগ্গলৰোহাররহিতে ধম্মপ্পবন্ধে সৰনকিরিযা লব্ভতীতি.