১৪. এতদগ্গৰগ্গো

(১৪) ৭. সত্তমএতদগ্গৰগ্গৰণ্ণনা

সুজাতাৰত্থু

২৫৮. উপাসিকাপাল়িসংৰণ্ণনায পঠমং সুৰিঞ্ঞেয্যমেৰ.

ৰিসাখাৰত্থু

২৫৯. দুতিযে মহালতাপসাধনস্সাতি মহালতাপিল়ন্ধনস্স. তস্মিঞ্চ পিল়ন্ধনে চতস্সো ৰজিরনাল়িযো উপযোগং অগমংসু. মুত্তানং একাদস নাল়িযো, পৰাল়স্স দ্ৰাৰীসতি নাল়িযো, পদুমরাগমণীনং তেত্তিংস নাল়িযো. ইতি এতেহি চ অঞ্ঞেহি চ ইন্দনীলাদীহি নীলপীতলোহিতোদাতমঞ্জিট্ঠসামকবরৰণ্ণৰসেন সত্তৰণ্ণেহি ৰররতনেহি নিট্ঠানং অগমাসি, তং সীসে পটিমুক্কং যাৰ পাদপিট্ঠিযা ভস্সতি, পঞ্চন্নং হত্থীনং বলং ধারযমানাৰ নং ইত্থী ধারেতুং সক্কোতি. অন্তোঅগ্গি বহি ন নীহরিতব্বোতিআদীনং অত্থো উপরি আৰি ভৰিস্সতি. সেসমেত্থ সুৰিঞ্ঞেয্যমেৰ.

খুজ্জুত্তরা-সামাৰতীৰত্থু

২৬০-২৬১. ততিযচতুত্থেসু পাযাসস্সাতি বহলতরস্স পাযাসস্স. তং পাযাসং ভুঞ্জন্তেসূতি তং বহলতরং গরুসিনিদ্ধং পাযাসং ভুঞ্জন্তেসু. জীরাপেতুং অসক্কোন্তোতি অন্তরামগ্গে অপ্পাহারতায মন্দগহণিকত্তা জীরাপেতুং অসক্কোন্তো. ৰাল়মিগট্ঠানেতি ৰাল়মিগেহি অধিট্ঠিতট্ঠানে. অনুৰিজ্জন্তোতি ৰিচারেন্তো. সালাতি নল়কারসালা. মুধা ন করিস্সতীতি মূল্যং ৰিনা ন করিস্সতি. আলিম্পেসীতি অগ্গিং অদাসি, অগ্গিং জালেসীতি অত্থো. পেক্খাতি আগমেহি. উপধিসম্পদাতি সরীরসম্পত্তি. ৰটরুক্খং পত্ৰাতি নিগ্রোধরুক্খং পত্ৰা. সুৰণ্ণকটকেতি সুৰণ্ণৰলযে. অব্ভুং মেতি মে অৰড্ঢীতি অত্থো. অন্তো অসোধেত্ৰাতি পণ্ণসালায অন্তো কস্সচি অত্থিভাৰং ৰা নত্থিভাৰং ৰা অনুপধারেত্ৰা. সেসং সুৰিঞ্ঞেয্যমেৰ.

উত্তরানন্দমাতাৰত্থু

২৬২. পঞ্চমে উপনিস্সযং দিস্ৰাতি ইমিনা যথা ৰিসেসাধিগমস্স সতিপি পচ্চুপ্পন্নপচ্চযসমৰাযে অৰস্সং উপনিস্সযসম্পদা ইচ্ছিতব্বা, এৰং দিট্ঠধম্মৰেদনীযভাৰেন ৰিপচ্চনকস্স কম্মস্সপি পচ্চুপ্পন্নসমৰাযো ৰিয উপনিস্সযসম্পদাপি সৰিসেসা ইচ্ছিতব্বাতি দস্সেতি. তথা হি উক্কংসগতসপ্পুরিসূপনিস্সযযোনিসোমনসিকারেসু লব্ভমানেসুপি উপনিস্সযরহিতস্স ৰিসেসাধিগমো ন সম্পজ্জতেৰাতি. কপ্পিযং কত্ৰাতি যথা কপ্পিযং হোতি, তথা কত্ৰা. পত্তে পতিট্ঠপেয্যাতি আহারং দানমুখে ৰিস্সজ্জেয্য. তীহি চেতনাহীতি পুব্বভাগমুঞ্চঅনুমোদনাচেতনাহি. ৰুত্তঞ্হেতং –

‘‘পুব্বেৰ দানা সুমনো, দদং চিত্তং পসাদযে;

দত্ৰা অত্তমনো হোতি, এসা পুঞ্ঞস্স সম্পদা’’তি. (অ. নি. ৬.৩৭; পে. ৰ. ৩০৫);

তৰ মনং সন্ধারেহীতি ‘‘অজ্জ ভত্তং চিরাযিত’’ন্তি কোধতো তৰ চিত্তং সন্ধারেহি, মা কুজ্ঝীতি অত্থো. ওলোকিতোলোকিতট্ঠানং…পে… সম্পরিকিণ্ণং ৰিয অহোসীতি তেন কসিতট্ঠানং সব্বং সুৰণ্ণভাৰাপত্তিযা মহাকোসাতকিপুপ্ফেহি সঞ্ছন্নং ৰিয অহোসি. তাদিসেতি তযা সদিসে. ন কোপেমীতি ন ৰিনাসেমি, জাতিযা ন হীল়েমি. পূজং করোতীতি সম্মাসম্বুদ্ধস্স পূজং করোতি. অন্তরৰত্থুন্তি গেহঙ্গণং. ভোতি সম্বোধনে নিপাতো. জেতি অৰঞ্ঞালপনং. সযং অরিযসাৰিকাভাৰতো সত্থুৰসেন ‘‘সপিতিকা ধীতা’’তি ৰত্ৰা সত্থু সম্মুখা ধম্মস্সৰনেন তস্সা ৰিসেসাধিগমং পচ্চাসীসন্তী ‘‘দসবলে খমন্তেযেৰ খমিস্সামী’’তি আহ. কদরিযন্তি থদ্ধমচ্ছরিং.

সুপ্পৰাসাৰত্থু

২৬৩. ছট্ঠে পণীতদাযিকানন্তি পণীতরসৰত্থূনং দাযিকানং. আযুনো ঠিতিহেতুং ভোজনং দেন্তী আযুং দেতি নাম. এস নযো ৰণ্ণং দেতীতিআদীসু. তেনাহ – ‘‘পঞ্চ ঠানানী’’তি. কম্মসরিক্খকঞ্চেতং ফলন্তি দস্সেন্তো ‘‘আযুং খো পন দত্ৰা’’তিআদিমাহ. তত্থ দত্ৰাতি দানহেতু. ভাগিনীতি ভাগৰতী লদ্ধুং ভব্বা.

সুপ্পিযাৰত্থু

২৬৪. সত্তমে ঊরুমংসং ছিন্দিত্ৰা দাসিযা অদাসীতি আগতফলা ৰিঞ্ঞাতসাসনা অরিযসাৰিকা অত্তনো সরীরদুক্খং অচিন্তেত্ৰা তস্স ভিক্খুনো রোগৰূপসমমেৰ পচ্চাসীসন্তী অত্তনো ঊরুমংসং ছিন্দিত্ৰা দাসিযা অদাসি. সত্থাপি তস্সা তথাপৰত্তং অজ্ঝাসযসম্পত্তিং দিস্ৰা ‘‘মম সম্মুখীভাৰূপগমনেনেৰস্সা ৰণো রুহিত্ৰা সঞ্ছৰি জাযতি, ফাসুভাৰো হোতী’’তি চ দিস্ৰা ‘‘পক্কোসথ ন’’ন্তি আহ. সা চিন্তেসীতি ‘‘সব্বলোকস্স হিতানুকম্পকো সত্থা ন মং দুক্খাপেতুং পক্কোসতি, অত্থেত্থ কারণ’’ন্তি চিন্তেসি. অত্তনা কতকারণং সব্বং কথেসীতি বুদ্ধানুভাৰৰিভাৰনত্থং কথেসি, ন অত্তনো দল়্হজ্ঝাসযতায ৰিভাৰনত্থং. গিলানুপট্ঠাকীনং অগ্গট্ঠানে ঠপেসীতি অগণিতত্তদুক্খা গিলানানং ভিক্খূনং গেলঞ্ঞৰূপসমনে যুত্তপ্পযুত্তাতি গিলানুপট্ঠাকীনং অগ্গট্ঠানে ঠপেসীতি.

কাতিযানীৰত্থু

২৬৫. অট্ঠমে অৰেচ্চপ্পসন্নানন্তি রতনত্তযগুণে যাথাৰতো ঞত্ৰা পসন্নানং, সো পনস্স পসাদো মগ্গেনাগতত্তা কেনচি অকম্পনীযো. অধিগতেনাতি মগ্গাধিগমেনেৰ অধিগতেন. ‘‘অৰিগতেনা’’তি ৰা পাঠো, তস্সত্থো ‘‘কদাচি অৰিগচ্ছন্তেনা’’তি. সো অপ্পধংসিযো চ হোতি, তস্মা ৰুত্তং – ‘‘অধিগতেন অচলপ্পসাদেনা’’তি. তত্থ কাযসক্খিং কত্ৰাতি পমুখং কত্ৰা, ৰচনত্থতো পন নামকাযেন দেসনায সম্পটিচ্ছনৰসেন সক্খিভূতং কত্ৰাতি অত্থো. উম্মগ্গং খনিত্ৰাতি ঘরসন্ধিচ্ছেদনেন অন্তোপৰিসনমগ্গং খনিত্ৰা. দুল্লভস্সৰনন্তি দুল্লভসদ্ধম্মস্সৰনং. মহাপথৰী পৰিসিতব্বা ভৰেয্যাতি অৰীচিপ্পৰেসনং ৰদতি.

নকুলমাতাৰত্থু

২৬৬. নৰমে ৰিস্সাসকথনেনেৰ নকুলমাতা নকুলপিতা চ সত্থুৰিস্সাসিকা নাম জাতাতি ৰুত্তং – ‘‘ৰিস্সাসিকানন্তি ৰিস্সাসকথং কথেন্তীনং উপাসিকান’’ন্তি. গহপতানীতি গেহসামিনী. ৰুত্তমেৰাতি উপাসকপাল়িযং নকুলপিতুকথাযং ৰুত্তনযমেৰ.

কাল়ীকুররঘরিকাৰত্থু

২৬৭. দসমে অনুস্সৰেনেৰাতি পচ্চক্খতো রূপদস্সনেন সত্থু সম্মুখা ধম্মস্সৰনেন চ ৰিনা কেৰলং অনুস্সৰনেনেৰ পরস্স ৰচনং অনুগতস্সৰনেনেৰ উপ্পন্নেন পসাদেন. অনুস্সৰিকপ্পসাদন্তি অনুস্সৰতো আগতপ্পসাদং.

(সত্তমএতদগ্গৰগ্গৰণ্ণনা নিট্ঠিতা.)

উপাসিকাপাল়িসংৰণ্ণনা সমত্তা.

নিট্ঠিতা চ মনোরথপূরণিযা

অঙ্গুত্তরনিকায-অট্ঠকথায

এতদগ্গৰগ্গৰণ্ণনায অনুত্তানত্থদীপনা.