৫. দুতিযকণ্ডকীসুত্তং

৯০৩. সাকেতনিদানং. একমন্তং নিসিন্নো খো আযস্মা সারিপুত্তো আযস্মন্তং অনুরুদ্ধং এতদৰোচ – ‘‘অসেখেনাৰুসো অনুরুদ্ধ, ভিক্খুনা কতমে ধম্মা উপসম্পজ্জ ৰিহাতব্বা’’তি? ‘‘অসেখেনাৰুসো সারিপুত্ত, ভিক্খুনা চত্তারো সতিপট্ঠানা উপসম্পজ্জ ৰিহাতব্বা. কতমে চত্তারো? ইধাৰুসো, ভিক্খু কাযে কাযানুপস্সী ৰিহরতি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং; ৰেদনাসু…পে… চিত্তে…পে… ধম্মেসু ধম্মানুপস্সী ৰিহরতি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং – অসেখেনাৰুসো সারিপুত্ত, ভিক্খুনা ইমে চত্তারো সতিপট্ঠানা উপসম্পজ্জ ৰিহাতব্বা’’তি. পঞ্চমং.