৬. ততিযকণ্ডকীসুত্তং

৯০৪. সাকেতনিদানং. একমন্তং নিসিন্নো খো আযস্মা সারিপুত্তো আযস্মন্তং অনুরুদ্ধং এতদৰোচ – ‘‘কতমেসং আযস্মা অনুরুদ্ধো ধম্মানং ভাৰিতত্তা বহুলীকতত্তা মহাভিঞ্ঞতং পত্তো’’তি? ‘‘চতুন্নং খ্ৰাহং, আৰুসো, সতিপট্ঠানানং ভাৰিতত্তা বহুলীকতত্তা মহাভিঞ্ঞতং পত্তো. কতমেসং চতুন্নং? ইধাহং, আৰুসো, কাযে কাযানুপস্সী ৰিহরামি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং; ৰেদনাসু…পে… চিত্তে…পে… ধম্মেসু ধম্মানুপস্সী ৰিহরামি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং – ইমেসং খ্ৰাহং, আৰুসো, চতুন্নং সতিপট্ঠানানং ভাৰিতত্তা বহুলীকতত্তা মহাভিঞ্ঞতং পত্তো. ইমেসঞ্চ পনাহং, আৰুসো, চতুন্নং সতিপট্ঠানানং ভাৰিতত্তা বহুলীকতত্তা সহস্সং লোকং অভিজানামী’’তি. ছট্ঠং.