৫. জরাৰগ্গো

১. জরাধম্মসুত্তং

৫১১. এৰং মে সুতং – একং সমযং ভগৰা সাৰত্থিযং ৰিহরতি পুব্বারামে মিগারমাতুপাসাদে. তেন খো পন সমযেন ভগৰা সাযন্হসমযং পটিসল্লানা ৰুট্ঠিতো পচ্ছাতপে নিসিন্নো হোতি পিট্ঠিং ওতাপযমানো.

অথ খো আযস্মা আনন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা ভগৰতো গত্তানি পাণিনা অনোমজ্জন্তো ভগৰন্তং এতদৰোচ – ‘‘অচ্ছরিযং, ভন্তে, অব্ভুতং, ভন্তে! ন চেৰং দানি, ভন্তে, ভগৰতো তাৰ পরিসুদ্ধো ছৰিৰণ্ণো পরিযোদাতো, সিথিলানি চ গত্তানি সব্বানি ৰলিযজাতানি, পুরতো পব্ভারো চ কাযো, দিস্সতি চ ইন্দ্রিযানং অঞ্ঞথত্তং – চক্খুন্দ্রিযস্স সোতিন্দ্রিযস্স ঘানিন্দ্রিযস্স জিৰ্হিন্দ্রিযস্স কাযিন্দ্রিযস্সা’’তি.

‘‘এৰঞ্হেতং, আনন্দ, হোতি – জরাধম্মো যোব্বঞ্ঞে, ব্যাধিধম্মো আরোগ্যে, মরণধম্মো জীৰিতে. ন চেৰ তাৰ পরিসুদ্ধো হোতি ছৰিৰণ্ণো পরিযোদাতো, সিথিলানি চ হোন্তি গত্তানি সব্বানি ৰলিযজাতানি, পুরতো পব্ভারো চ কাযো, দিস্সতি চ ইন্দ্রিযানং অঞ্ঞথত্তং – চক্খুন্দ্রিযস্স সোতিন্দ্রিযস্স ঘানিন্দ্রিযস্স জিৰ্হিন্দ্রিযস্স কাযিন্দ্রিযস্সা’’তি.

‘‘ইদমৰোচ ভগৰা. ইদং ৰত্ৰা চ সুগতো অথাপরং এতদৰোচ সত্থা –

‘‘ধী তং জম্মি জরে অত্থু, দুব্বণ্ণকরণী জরে;

তাৰ মনোরমং বিম্বং, জরায অভিমদ্দিতং.

‘‘যোপি ৰস্সসতং জীৰে, সোপি মচ্চুপরাযণো [সব্বে মচ্চুপরাযনা (স্যা. কং. ক.)];

ন কিঞ্চি পরিৰজ্জেতি, সব্বমেৰাভিমদ্দতী’’তি. পঠমং;

২. উণ্ণাভব্রাহ্মণসুত্তং

৫১২. সাৰত্থিনিদানং. অথ খো উণ্ণাভো ব্রাহ্মণো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো উণ্ণাভো ব্রাহ্মণো ভগৰন্তং এতদৰোচ –

‘‘পঞ্চিমানি, ভো গোতম, ইন্দ্রিযানি নানাৰিসযানি নানাগোচরানি, ন অঞ্ঞমঞ্ঞস্স গোচরৰিসযং পচ্চনুভোন্তি. কতমানি পঞ্চ? চক্খুন্দ্রিযং, সোতিন্দ্রিযং, ঘানিন্দ্রিযং, জিৰ্হিন্দ্রিযং, কাযিন্দ্রিযং. ইমেসং নু খো, ভো গোতম, পঞ্চন্নং ইন্দ্রিযানং নানাৰিসযানং নানাগোচরানং ন অঞ্ঞমঞ্ঞস্স গোচরৰিসযং পচ্চনুভোন্তানং কিং পটিসরণং, কো চ নেসং গোচরৰিসযং পচ্চনুভোতী’’তি?

‘‘পঞ্চিমানি, ব্রাহ্মণ, ইন্দ্রিযানি নানাৰিসযানি নানাগোচরানি ন অঞ্ঞমঞ্ঞস্স গোচরৰিসযং পচ্চনুভোন্তি. কতমানি পঞ্চ? চক্খুন্দ্রিযং, সোতিন্দ্রিযং, ঘানিন্দ্রিযং, জিৰ্হিন্দ্রিযং, কাযিন্দ্রিযং. ইমেসং খো, ব্রাহ্মণ, পঞ্চন্নং ইন্দ্রিযানং নানাৰিসযানং নানাগোচরানং ন অঞ্ঞমঞ্ঞস্স গোচরৰিসযং পচ্চনুভোন্তানং মনো পটিসরণং, মনোৰ নেসং গোচরৰিসযং পচ্চনুভোতী’’তি.

‘‘মনস্স পন, ভো গোতম, কিং পটিসরণ’’ন্তি? ‘‘মনস্স খো, ব্রাহ্মণ, সতি পটিসরণ’’ন্তি. ‘‘সতিযা পন, ভো গোতম, কিং পটিসরণ’’ন্তি? ‘‘সতিযা খো, ব্রাহ্মণ, ৰিমুত্তি পটিসরণ’’ন্তি. ‘‘ৰিমুত্তিযা পন, ভো গোতম, কিং পটিসরণ’’ন্তি? ‘‘ৰিমুত্তিযা খো, ব্রাহ্মণ, নিব্বানং পটিসরণ’’ন্তি. ‘‘নিব্বানস্স পন, ভো গোতম, কিং পটিসরণ’’ন্তি? ‘‘অচ্চযাসি [অচ্চসরা (সী. স্যা. কং.), অজ্ঝপরং (পী. ক.)], ব্রাহ্মণ, পঞ্হং, নাসক্খি পঞ্হস্স পরিযন্তং গহেতুং. নিব্বানোগধঞ্হি, ব্রাহ্মণ, ব্রহ্মচরিযং ৰুস্সতি নিব্বানপরাযণং নিব্বানপরিযোসান’’ন্তি.

অথ খো উণ্ণাভো ব্রাহ্মণো ভগৰতো ভাসিতং অভিনন্দিত্ৰা অনুমোদিত্ৰা উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামি.

অথ খো ভগৰা অচিরপক্কন্তে উণ্ণাভে ব্রাহ্মণে ভিক্খূ আমন্তেসি – ‘‘সেয্যথাপি, ভিক্খৰে, কূটাগারে ৰা কূটাগারসালাযং ৰা [রস্মিযো (স্যা. ক.)] পাচীনৰাতপানা সূরিযে উগ্গচ্ছন্তে ৰাতপানেন রস্মি [কূটাগারং ৰা কূটাগারসালং ৰা উত্তরায (ক. সী.)] পৰিসিত্ৰা ক্ৰাস্স [কায (স্যা. ক.)] পতিট্ঠিতা’’তি? ‘‘পচ্ছিমাযং, ভন্তে, ভিত্তিয’’ন্তি. ‘‘এৰমেৰ খো, ভিক্খৰে, উণ্ণাভস্স ব্রাহ্মণস্স তথাগতে সদ্ধা নিৰিট্ঠা মূলজাতা পতিট্ঠিতা দল়্হা অসংহারিযা সমণেন ৰা ব্রাহ্মণেন ৰা দেৰেন ৰা মারেন ৰা ব্রহ্মুনা ৰা কেনচি ৰা লোকস্মিং. ইমম্হি চে, ভিক্খৰে, সমযে উণ্ণাভো ব্রাহ্মণো কালঙ্করেয্য, নত্থি সংযোজনং যেন সংযোজনেন সংযুত্তো উণ্ণাভো ব্রাহ্মণো পুন ইমং লোকং আগচ্ছেয্যা’’তি. দুতিযং.

৩. সাকেতসুত্তং

৫১৩. এৰং মে সুতং – একং সমযং ভগৰা সাকেতে ৰিহরতি অঞ্জনৰনে মিগদাযে. তত্র খো ভগৰা ভিক্খূ আমন্তেসি – ‘‘অত্থি নু খো, ভিক্খৰে, পরিযাযো যং পরিযাযং আগম্ম যানি পঞ্চিন্দ্রিযানি তানি পঞ্চ বলানি হোন্তি, যানি পঞ্চ বলানি তানি পঞ্চিন্দ্রিযানি হোন্তী’’তি?

‘‘ভগৰংমূলকা নো, ভন্তে, ধম্মা ভগৰংনেত্তিকা ভগৰংপটিসরণা. সাধু ৰত, ভন্তে, ভগৰন্তংযেৰ পটিভাতু এতস্স ভাসিতস্স অত্থো. ভগৰতো সুত্ৰা ভিক্খূ ধারেস্সন্তী’’তি. ‘‘অত্থি, ভিক্খৰে, পরিযাযো যং পরিযাযং আগম্ম যানি পঞ্চিন্দ্রিযানি তানি পঞ্চ বলানি হোন্তি, যানি পঞ্চ বলানি তানি পঞ্চিন্দ্রিযানি হোন্তি’’.

‘‘কতমো চ, ভিক্খৰে, পরিযাযো যং পরিযাযং আগম্ম যানি পঞ্চিন্দ্রিযানি তানি পঞ্চ বলানি হোন্তি, যানি পঞ্চ বলানি তানি পঞ্চিন্দ্রিযানি হোন্তি? যং, ভিক্খৰে, সদ্ধিন্দ্রিযং তং সদ্ধাবলং, যং সদ্ধাবলং তং সদ্ধিন্দ্রিযং; যং ৰীরিযিন্দ্রিযং তং ৰীরিযবলং, যং ৰীরিযবলং তং ৰীরিযিন্দ্রিযং; যং সতিন্দ্রিযং তং সতিবলং, যং সতিবলং তং সতিন্দ্রিযং; যং সমাধিন্দ্রিযং তং সমাধিবলং, যং সমাধিবলং তং সমাধিন্দ্রিযং; যং পঞ্ঞিন্দ্রিযং তং পঞ্ঞাবলং, যং পঞ্ঞাবলং তং পঞ্ঞিন্দ্রিযং. সেয্যথাপি, ভিক্খৰে, নদী পাচীননিন্না পাচীনপোণা পাচীনপব্ভারা, তস্স মজ্ঝে দীপো. অত্থি, ভিক্খৰে, পরিযাযো যং পরিযাযং আগম্ম তস্সা নদিযা একো সোতো ত্ৰেৰ সঙ্খ্যং গচ্ছতি [সঙ্খং (সী. স্যা. কং.)]. অত্থি পন, ভিক্খৰে, পরিযাযো যং পরিযাযং আগম্ম তস্সা নদিযা দ্ৰে সোতানি ত্ৰেৰ সঙ্খ্যং গচ্ছন্তি.

‘‘কতমো চ, ভিক্খৰে, পরিযাযো যং পরিযাযং আগম্ম তস্সা নদিযা একো সোতো ত্ৰেৰ সঙ্খ্যং গচ্ছতি? যঞ্চ, ভিক্খৰে, তস্স দীপস্স পুরিমন্তে [পুরত্থিমন্তে (সী. স্যা. কং. পী.)] উদকং, যঞ্চ পচ্ছিমন্তে উদকং – অযং খো, ভিক্খৰে, পরিযাযো যং পরিযাযং আগম্ম তস্সা নদিযা একো সোতো ত্ৰেৰ সঙ্খ্যং গচ্ছতি.

‘‘কতমো চ, ভিক্খৰে, পরিযাযো যং পরিযাযং আগম্ম তস্সা নদিযা দ্ৰে সোতানি ত্ৰেৰ সঙ্খ্যং গচ্ছন্তি? যঞ্চ, ভিক্খৰে, তস্স দীপস্স উত্তরন্তে উদকং, যঞ্চ দক্খিণন্তে উদকং – অযং খো, ভিক্খৰে, পরিযাযো যং পরিযাযং আগম্ম তস্সা নদিযা দ্ৰে সোতানি ত্ৰেৰ সঙ্খ্যং গচ্ছন্তি. এৰমেৰ খো, ভিক্খৰে, যং সদ্ধিন্দ্রিযং তং সদ্ধাবলং, যং সদ্ধাবলং তং সদ্ধিন্দ্রিযং; যং ৰীরিযিন্দ্রিযং তং ৰীরিযবলং, যং ৰীরিযবলং তং ৰীরিযিন্দ্রিযং; যং সতিন্দ্রিযং তং সতিবলং, যং সতিবলং তং সতিন্দ্রিযং; যং সমাধিন্দ্রিযং তং সমাধিবলং, যং সমাধিবলং তং সমাধিন্দ্রিযং; যং পঞ্ঞিন্দ্রিযং তং পঞ্ঞাবলং, যং পঞ্ঞাবলং তং পঞ্ঞিন্দ্রিযং. পঞ্চন্নং, ভিক্খৰে, ইন্দ্রিযানং ভাৰিতত্তা বহুলীকতত্তা ভিক্খু আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতী’’তি. ততিযং.

৪. পুব্বকোট্ঠকসুত্তং

৫১৪. এৰং মে সুতং – একং সমযং ভগৰা সাৰত্থিযং ৰিহরতি পুব্বকোট্ঠকে. তত্র খো ভগৰা আযস্মন্তং সারিপুত্তং আমন্তেসি – ‘‘সদ্দহসি [সদ্দহাসি (সী. পী.)] ত্ৰং, সারিপুত্ত – সদ্ধিন্দ্রিযং ভাৰিতং বহুলীকতং অমতোগধং হোতি অমতপরাযণং অমতপরিযোসানং…পে… পঞ্ঞিন্দ্রিযং ভাৰিতং বহুলীকতং অমতোগধং হোতি অমতপরাযণং অমতপরিযোসান’’ন্তি?

‘‘ন খ্ৰাহং এত্থ, ভন্তে, ভগৰতো সদ্ধায গচ্ছামি – সদ্ধিন্দ্রিযং…পে… পঞ্ঞিন্দ্রিযং ভাৰিতং বহুলীকতং অমতোগধং হোতি অমতপরাযণং অমতপরিযোসানং. যেসঞ্হেতং, ভন্তে, অঞ্ঞাতং অস্স অদিট্ঠং অৰিদিতং অসচ্ছিকতং অফস্সিতং [অপস্সিতং (সী. স্যা. কং. ক.), অফুসিতং (পী.)] পঞ্ঞায, তে তত্থ পরেসং সদ্ধায গচ্ছেয্যুং – সদ্ধিন্দ্রিযং…পে… পঞ্ঞিন্দ্রিযং ভাৰিতং বহুলীকতং অমতোগধং হোতি অমতপরাযণং অমতপরিযোসানং. যেসঞ্চ খো এতং, ভন্তে, ঞাতং দিট্ঠং ৰিদিতং সচ্ছিকতং ফস্সিতং পঞ্ঞায, নিক্কঙ্খা তে তত্থ নিব্বিচিকিচ্ছা – সদ্ধিন্দ্রিযং…পে… পঞ্ঞিন্দ্রিযং ভাৰিতং বহুলীকতং অমতোগধং হোতি অমতপরাযণং অমতপরিযোসানং. ময্হঞ্চ খো এতং, ভন্তে, ঞাতং দিট্ঠং ৰিদিতং সচ্ছিকতং ফস্সিতং পঞ্ঞায. নিক্কঙ্খৰাহং তত্থ নিব্বিচিকিচ্ছো সদ্ধিন্দ্রিযং…পে… পঞ্ঞিন্দ্রিযং ভাৰিতং বহুলীকতং অমতোগধং হোতি অমতপরাযণং অমতপরিযোসান’’ন্তি.

‘‘সাধু সাধু, সারিপুত্ত! যেসঞ্হেতং, সারিপুত্ত, অঞ্ঞাতং অস্স অদিট্ঠং অৰিদিতং অসচ্ছিকতং অফস্সিতং পঞ্ঞায, তে তত্থ পরেসং সদ্ধায গচ্ছেয্যুং – সদ্ধিন্দ্রিযং ভাৰিতং বহুলীকতং অমতোগধং হোতি অমতপরাযণং অমতপরিযোসানং…পে… পঞ্ঞিন্দ্রিযং ভাৰিতং বহুলীকতং অমতোগধং হোতি অমতপরাযণং অমতপরিযোসানং. যেসঞ্চ খো এতং, সারিপুত্ত, ঞাতং দিট্ঠং ৰিদিতং সচ্ছিকতং ফস্সিতং পঞ্ঞায, নিক্কঙ্খা তে তত্থ নিব্বিচিকিচ্ছা – সদ্ধিন্দ্রিযং ভাৰিতং বহুলীকতং অমতোগধং হোতি অমতপরাযণং অমতপরিযোসানং…পে… পঞ্ঞিন্দ্রিযং ভাৰিতং বহুলীকতং অমতোগধং হোতি অমতপরাযণং অমতপরিযোসান’’ন্তি. চতুত্থং.

৫. পঠমপুব্বারামসুত্তং

৫১৫. এৰং মে সুতং – একং সমযং ভগৰা সাৰত্থিযং ৰিহরতি পুব্বারামে মিগারমাতুপাসাদে. তত্র খো ভগৰা ভিক্খূ আমন্তেসি – ‘‘কতিনং নু খো, ভিক্খৰে, ইন্দ্রিযানং ভাৰিতত্তা বহুলীকতত্তা খীণাসৰো ভিক্খু অঞ্ঞং ব্যাকরোতি – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামী’’তি?

ভগৰংমূলকা নো, ভন্তে, ধম্মা…পে… ‘‘একস্স খো, ভিক্খৰে, ইন্দ্রিযস্স ভাৰিতত্তা বহুলীকতত্তা খীণাসৰো ভিক্খু অঞ্ঞং ব্যাকরোতি – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামীতি. কতমস্স একস্স পঞ্ঞিন্দ্রিযস্স পঞ্ঞৰতো, ভিক্খৰে, অরিযসাৰকস্স তদন্ৰযা সদ্ধা সণ্ঠাতি, তদন্ৰযং ৰীরিযং সণ্ঠাতি, তদন্ৰযা সতি সণ্ঠাতি, তদন্ৰযো সমাধি সণ্ঠাতি. ইমস্স খো, ভিক্খৰে, একস্স ইন্দ্রিযস্স ভাৰিতত্তা বহুলীকতত্তা খীণাসৰো ভিক্খু অঞ্ঞং ব্যাকরোতি – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামী’’তি. পঞ্চমং.

৬. দুতিযপুব্বারামসুত্তং

৫১৬. তংযেৰ নিদানং. ‘‘কতিনং নু খো, ভিক্খৰে, ইন্দ্রিযানং ভাৰিতত্তা বহুলীকতত্তা খীণাসৰো ভিক্খু অঞ্ঞং ব্যাকরোতি – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামী’’তি? ভগৰংমূলকা নো, ভন্তে, ধম্মা…পে… ‘‘দ্ৰিন্নং খো, ভিক্খৰে, ইন্দ্রিযানং ভাৰিতত্তা বহুলীকতত্তা খীণাসৰো ভিক্খু অঞ্ঞং ব্যাকরোতি – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামীতি. কতমেসং দ্ৰিন্নং? অরিযায চ পঞ্ঞায, অরিযায চ ৰিমুত্তিযা. যা হিস্স, ভিক্খৰে, অরিযা পঞ্ঞা তদস্স পঞ্ঞিন্দ্রিযং. যা হিস্স, ভিক্খৰে, অরিযা ৰিমুত্তি তদস্স সমাধিন্দ্রিযং. ইমেসং খো, ভিক্খৰে, দ্ৰিন্নং ইন্দ্রিযানং ভাৰিতত্তা বহুলীকতত্তা খীণাসৰো ভিক্খু অঞ্ঞং ব্যাকরোতি – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামী’’তি. ছট্ঠং.

৭. ততিযপুব্বারামসুত্তং

৫১৭. তংযেৰ নিদানং. ‘‘কতিনং নু খো, ভিক্খৰে, ইন্দ্রিযানং ভাৰিতত্তা বহুলীকতত্তা খীণাসৰো ভিক্খু অঞ্ঞং ব্যাকরোতি – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামী’’তি? ভগৰংমূলকা নো, ভন্তে, ধম্মা…পে… ‘‘চতুন্নং খো, ভিক্খৰে, ইন্দ্রিযানং ভাৰিতত্তা বহুলীকতত্তা খীণাসৰো ভিক্খু অঞ্ঞং ব্যাকরোতি – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামীতি. কতমেসং চতুন্নং? ৰীরিযিন্দ্রিযস্স, সতিন্দ্রিযস্স, সমাধিন্দ্রিযস্স, পঞ্ঞিন্দ্রিযস্স – ইমেসং খো, ভিক্খৰে, চতুন্নং ইন্দ্রিযানং ভাৰিতত্তা বহুলীকতত্তা খীণাসৰো ভিক্খু অঞ্ঞং ব্যাকরোতি – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামী’’তি. সত্তমং.

৮. চতুত্থপুব্বারামসুত্তং

৫১৮. তংযেৰ নিদানং. ‘‘কতিনং নু খো, ভিক্খৰে, ইন্দ্রিযানং ভাৰিতত্তা বহুলীকতত্তা খীণাসৰো ভিক্খু অঞ্ঞং ব্যাকরোতি – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামী’’তি? ভগৰংমূলকা নো, ভন্তে, ধম্মা…পে… ‘‘পঞ্চন্নং খো, ভিক্খৰে, ইন্দ্রিযানং ভাৰিতত্তা বহুলীকতত্তা খীণাসৰো ভিক্খু অঞ্ঞং ব্যাকরোতি – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামীতি. কতমেসং পঞ্চন্নং? সদ্ধিন্দ্রিযস্স, ৰীরিযিন্দ্রিযস্স, সতিন্দ্রিযস্স, সমাধিন্দ্রিযস্স, পঞ্ঞিন্দ্রিযস্স – ইমেসং খো, ভিক্খৰে, পঞ্চন্নং ইন্দ্রিযানং ভাৰিতত্তা বহুলীকতত্তা খীণাসৰো ভিক্খু অঞ্ঞং ব্যাকরোতি – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামী’’তি. অট্ঠমং.

৯. পিণ্ডোলভারদ্ৰাজসুত্তং

৫১৯. এৰং মে সুতং – একং সমযং ভগৰা কোসম্বিযং ৰিহরতি ঘোসিতারামে. তেন খো পন সমযেন আযস্মতা পিণ্ডোলভারদ্ৰাজেন অঞ্ঞা ব্যাকতা হোতি – ‘‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযাতি পজানামী’’তি. অথ খো সম্বহুলা ভিক্খূ যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্না খো তে ভিক্খূ ভগৰন্তং এতদৰোচুং –

‘‘আযস্মতা, ভন্তে, পিণ্ডোলভারদ্ৰাজেন অঞ্ঞা ব্যাকতা – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামীতি. কিং নু খো, ভন্তে, অত্থৰসং সম্পস্সমানেন আযস্মতা পিণ্ডোলভারদ্ৰাজেন অঞ্ঞা ব্যাকতা – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামী’’তি?

‘‘তিণ্ণন্নং খো, ভিক্খৰে, ইন্দ্রিযানং ভাৰিতত্তা বহুলীকতত্তা পিণ্ডোলভারদ্ৰাজেন ভিক্খুনা অঞ্ঞা ব্যাকতা – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামীতি. কতমেসং তিণ্ণন্নং? সতিন্দ্রিযস্স, সমাধিন্দ্রিযস্স, পঞ্ঞিন্দ্রিযস্স – ইমেসং খো, ভিক্খৰে, তিণ্ণন্নং ইন্দ্রিযানং ভাৰিতত্তা বহুলীকতত্তা পিণ্ডোলভারদ্ৰাজেন ভিক্খুনা অঞ্ঞা ব্যাকতা – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামীতি. ইমানি চ, ভিক্খৰে, তীণিন্দ্রিযানি কিমন্তানি? খযন্তানি. কিস্স খযন্তানি? জাতিজরামরণস্স. ‘জাতিজরামরণং খয’ন্তি খো, ভিক্খৰে, সম্পস্সমানেন পিণ্ডোলভারদ্ৰাজেন ভিক্খুনা অঞ্ঞা ব্যাকতা – ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানামী’’তি. নৰমং.

১০. আপণসুত্তং

৫২০. এৰং মে সুতং – একং সমযং ভগৰা অঙ্গেসু ৰিহরতি আপণং নাম অঙ্গানং নিগমো. তত্র খো ভগৰা আযস্মন্তং সারিপুত্তং আমন্তেসি – ‘‘যো সো, সারিপুত্ত, অরিযসাৰকো তথাগতে একন্তগতো [একন্তিগতো (সী.)] অভিপ্পসন্নো, ন সো তথাগতে ৰা তথাগতসাসনে ৰা কঙ্খেয্য ৰা ৰিচিকিচ্ছেয্য ৰা’’তি?

‘‘যো সো, ভন্তে, অরিযসাৰকো তথাগতে একন্তগতো অভিপ্পসন্নো, ন সো তথাগতে ৰা তথাগতসাসনে ৰা কঙ্খেয্য ৰা ৰিচিকিচ্ছেয্য ৰা. সদ্ধস্স হি, ভন্তে, অরিযসাৰকস্স এৰং পাটিকঙ্খং যং আরদ্ধৰীরিযো ৰিহরিস্সতি – অকুসলানং ধম্মানং পহানায, কুসলানং ধম্মানং উপসম্পদায, থামৰা দল়্হপরক্কমো অনিক্খিত্তধুরো কুসলেসু ধম্মেসু. যং হিস্স, ভন্তে, ৰীরিযং তদস্স ৰীরিযিন্দ্রিযং.

‘‘সদ্ধস্স হি, ভন্তে, অরিযসাৰকস্স আরদ্ধৰীরিযস্স এতং পাটিকঙ্খং যং সতিমা ভৰিস্সতি, পরমেন সতিনেপক্কেন সমন্নাগতো, চিরকতম্পি চিরভাসিতম্পি সরিতা অনুস্সরিতা. যা হিস্স, ভন্তে, সতি তদস্স সতিন্দ্রিযং.

‘‘সদ্ধস্স হি, ভন্তে, অরিযসাৰকস্স আরদ্ধৰীরিযস্স উপট্ঠিতস্সতিনো এতং পাটিকঙ্খং যং ৰোস্সগ্গারম্মণং করিত্ৰা লভিস্সতি সমাধিং, লভিস্সতি চিত্তস্স একগ্গতং. যো হিস্স, ভন্তে, সমাধি তদস্স সমাধিন্দ্রিযং.

‘‘সদ্ধস্স হি, ভন্তে, অরিযসাৰকস্স আরদ্ধৰীরিযস্স উপট্ঠিতস্সতিনো সমাহিতচিত্তস্স এতং পাটিকঙ্খং যং এৰং পজানিস্সতি – অনমতগ্গো খো সংসারো. পুব্বা কোটি ন পঞ্ঞাযতি অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরতং. অৰিজ্জায ত্ৰেৰ তমোকাযস্স অসেসৰিরাগনিরোধো সন্তমেতং পদং পণীতমেতং পদং, যদিদং – সব্বসঙ্খারসমথো সব্বূপধিপটিনিস্সগ্গো তণ্হাক্খযো ৰিরাগো নিরোধো নিব্বানং [নিব্বানন্তি (?)]. যা হিস্স, ভন্তে, পঞ্ঞা তদস্স পঞ্ঞিন্দ্রিযং.

‘‘সদ্ধো সো [স খো সো (সী. স্যা. কং.)], ভন্তে, অরিযসাৰকো এৰং পদহিত্ৰা পদহিত্ৰা এৰং সরিত্ৰা সরিত্ৰা এৰং সমাদহিত্ৰা সমাদহিত্ৰা এৰং পজানিত্ৰা পজানিত্ৰা এৰং অভিসদ্দহতি – ‘ইমে খো তে ধম্মা যে মে পুব্বে সুতৰা অহেসুং. তেনাহং এতরহি কাযেন চ ফুসিত্ৰা ৰিহরামি, পঞ্ঞায চ অতিৰিজ্ঝ [পটিৰিজ্ঝ (সী. ক.) তদট্ঠকথাসু পন অতিৰিজ্ঝিত্ৰাতি ৰণ্ণিতং] পস্সামী’তি. যা হিস্স, ভন্তে, সদ্ধা তদস্স সদ্ধিন্দ্রিয’’ন্তি.

‘‘সাধু সাধু, সারিপুত্ত! যো সো, সারিপুত্ত, অরিযসাৰকো তথাগতে একন্তগতো অভিপ্পসন্নো, ন সো তথাগতে ৰা তথাগতসাসনে ৰা কঙ্খেয্য ৰা ৰিচিকিচ্ছেয্য ৰা. সদ্ধস্স হি, সারিপুত্ত, অরিযসাৰকস্স এতং পাটিকঙ্খং যং আরদ্ধৰীরিযো ৰিহরিস্সতি – অকুসলানং ধম্মানং পহানায, কুসলানং ধম্মানং উপসম্পদায, থামৰা দল়্হপরক্কমো অনিক্খিত্তধুরো কুসলেসু ধম্মেসু. যং হিস্স, সারিপুত্ত, ৰীরিযং তদস্স ৰীরিযিন্দ্রিযং.

‘‘সদ্ধস্স হি, সারিপুত্ত, অরিযসাৰকস্স আরদ্ধৰীরিযস্স এতং পাটিকঙ্খং যং সতিমা ভৰিস্সতি, পরমেন সতিনেপক্কেন সমন্নাগতো, চিরকতম্পি চিরভাসিতম্পি সরিতা অনুস্সরিতা. যা হিস্স, সারিপুত্ত, সতি তদস্স সতিন্দ্রিযং.

‘‘সদ্ধস্স হি, সারিপুত্ত, অরিযসাৰকস্স আরদ্ধৰীরিযস্স উপট্ঠিতস্সতিনো এতং পাটিকঙ্খং যং ৰোস্সগ্গারম্মণং করিত্ৰা লভিস্সতি সমাধিং, লভিস্সতি চিত্তস্স একগ্গতং. যো হিস্স, সারিপুত্ত, সমাধি তদস্স সমাধিন্দ্রিযং.

‘‘সদ্ধস্স হি, সারিপুত্ত, অরিযসাৰকস্স আরদ্ধৰীরিযস্স উপট্ঠিতস্সতিনো সমাহিতচিত্তস্স এতং পাটিকঙ্খং যং এৰং পজানিস্সতি – অনমতগ্গো খো সংসারো. পুব্বা কোটি ন পঞ্ঞাযতি অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরতং. অৰিজ্জায ত্ৰেৰ তমোকাযস্স অসেসৰিরাগনিরোধো সন্তমেতং পদং পণীতমেতং পদং, যদিদং – সব্বসঙ্খারসমথো সব্বূপধিপটিনিস্সগ্গো তণ্হাক্খযো ৰিরাগো নিরোধো নিব্বানং. যা হিস্স, সারিপুত্ত, পঞ্ঞা তদস্স পঞ্ঞিন্দ্রিযং.

‘‘সদ্ধো সো [স খো সো (সী. স্যা. কং. পী.)], সারিপুত্ত, অরিযসাৰকো এৰং পদহিত্ৰা পদহিত্ৰা এৰং সরিত্ৰা সরিত্ৰা এৰং সমাদহিত্ৰা সমাদহিত্ৰা এৰং পজানিত্ৰা পজানিত্ৰা এৰং অভিসদ্দহতি – ‘ইমে খো তে ধম্মা যে মে পুব্বে সুতৰা অহেসুং. তেনাহং এতরহি কাযেন চ ফুসিত্ৰা ৰিহরামি, পঞ্ঞায চ অতিৰিজ্ঝ [পটিৰিজ্ঝ (ক. সী. ক.)] পস্সামী’তি. যা হিস্স, সারিপুত্ত, সদ্ধা তদস্স সদ্ধিন্দ্রিয’’ন্তি. দসমং.

জরাৰগ্গো পঞ্চমো.

তস্সুদ্দানং –

জরা উণ্ণাভো ব্রাহ্মণো, সাকেতো পুব্বকোট্ঠকো;

পুব্বারামে চ চত্তারি, পিণ্ডোলো আপণেন চাতি [সদ্ধেন তে দসাতি (স্যা. কং. ক.)].