৬. সূকরখতৰগ্গো

১. সালসুত্তং

৫২১. এৰং মে সুতং – একং সমযং ভগৰা কোসলেসু ৰিহরতি সালায ব্রাহ্মণগামে. তত্র খো ভগৰা ভিক্খূ আমন্তেসি – ‘‘সেয্যথাপি, ভিক্খৰে, যে কেচি তিরচ্ছানগতা পাণা, সীহো মিগরাজা তেসং অগ্গমক্খাযতি, যদিদং – থামেন জৰেন সূরেন [সূরিযেন (সী. স্যা. কং.)]; এৰমেৰ খো, ভিক্খৰে, যে কেচি বোধিপক্খিযা ধম্মা, পঞ্ঞিন্দ্রিযং তেসং অগ্গমক্খাযতি, যদিদং – বোধায’’.

‘‘কতমে চ, ভিক্খৰে, বোধিপক্খিযা ধম্মা? সদ্ধিন্দ্রিযং, ভিক্খৰে, বোধিপক্খিযো ধম্মো, তং বোধায সংৰত্ততি; ৰীরিযিন্দ্রিযং বোধিপক্খিযো ধম্মো, তং বোধায সংৰত্ততি; সতিন্দ্রিযং বোধিপক্খিযো ধম্মো, তং বোধায সংৰত্ততি; সমাধিন্দ্রিযং বোধিপক্খিযো ধম্মো, তং বোধায সংৰত্ততি; পঞ্ঞিন্দ্রিযং বোধিপক্খিযো ধম্মো, তং বোধায সংৰত্ততি. সেয্যথাপি, ভিক্খৰে, যে কেচি তিরচ্ছানগতা পাণা, সীহো মিগরাজা তেসং অগ্গমক্খাযতি, যদিদং – থামেন জৰেন সূরেন; এৰমেৰ খো, ভিক্খৰে, যে কেচি বোধিপক্খিযা ধম্মা, পঞ্ঞিন্দ্রিযং তেসং অগ্গমক্খাযতি, যদিদং – বোধাযা’’তি. পঠমং.

২. মল্লিকসুত্তং

৫২২. এৰং মে সুতং – একং সমযং ভগৰা মল্লেসু [মল্লকেসু (সী. স্যা. কং.), মল্লিকেসু (ক.)] ৰিহরতি উরুৰেলকপ্পং নাম মল্লানং নিগমো. তত্র খো ভগৰা ভিক্খূ আমন্তেসি – ‘‘যাৰকীৰঞ্চ, ভিক্খৰে, অরিযসাৰকস্স অরিযঞাণং ন উপ্পন্নং হোতি নেৰ তাৰ চতুন্নং ইন্দ্রিযানং সণ্ঠিতি হোতি, নেৰ তাৰ চতুন্নং ইন্দ্রিযানং অৰট্ঠিতি হোতি. যতো চ খো, ভিক্খৰে, অরিযসাৰকস্স অরিযঞাণং উপ্পন্নং হোতি, অথ চতুন্নং ইন্দ্রিযানং সণ্ঠিতি হোতি, অথ চতুন্নং ইন্দ্রিযানং অৰট্ঠিতি হোতি’’.

‘‘সেয্যথাপি, ভিক্খৰে, যাৰকীৰঞ্চ কূটাগারস্স কূটং ন উস্সিতং হোতি, নেৰ তাৰ গোপানসীনং সণ্ঠিতি হোতি, নেৰ তাৰ গোপানসীনং অৰট্ঠিতি হোতি. যতো চ খো, ভিক্খৰে, কূটাগারস্স কূটং উস্সিতং হোতি, অথ গোপানসীনং সণ্ঠিতি হোতি, অথ গোপানসীনং অৰট্ঠিতি হোতি. এৰমেৰ খো, ভিক্খৰে, যাৰকীৰঞ্চ অরিযসাৰকস্স অরিযঞাণং ন উপ্পন্নং হোতি, নেৰ তাৰ চতুন্নং ইন্দ্রিযানং সণ্ঠিতি হোতি, নেৰ তাৰ চতুন্নং ইন্দ্রিযানং অৰট্ঠিতি হোতি. যতো চ খো, ভিক্খৰে, অরিযসাৰকস্স অরিযঞাণং উপ্পন্নং হোতি, অথ চতুন্নং ইন্দ্রিযানং…পে… অৰট্ঠিতি হোতি.

‘‘কতমেসং চতুন্নং? সদ্ধিন্দ্রিযস্স, ৰীরিযিন্দ্রিযস্স, সতিন্দ্রিযস্স, সমাধিন্দ্রিযস্স. পঞ্ঞৰতো, ভিক্খৰে, অরিযসাৰকস্স তদন্ৰযা সদ্ধা সণ্ঠাতি, তদন্ৰযং ৰীরিযং সণ্ঠাতি, তদন্ৰযা সতি সণ্ঠাতি, তদন্ৰযো সমাধি সণ্ঠাতী’’তি. দুতিযং.

৩. সেখসুত্তং

৫২৩. এৰং মে সুতং – একং সমযং ভগৰা কোসম্বিযং ৰিহরতি ঘোসিতারামে. তত্র খো ভগৰা ভিক্খূ আমন্তেসি – ‘‘অত্থি নু খো, ভিক্খৰে, পরিযাযো যং পরিযাযং আগম্ম সেখো ভিক্খু সেখভূমিযং ঠিতো ‘সেখোস্মী’তি পজানেয্য, অসেখো ভিক্খু অসেখভূমিযং ঠিতো ‘অসেখোস্মী’তি পজানেয্যা’’তি?

ভগৰংমূলকা নো, ভন্তে, ধম্মা…পে… ‘‘অত্থি, ভিক্খৰে, পরিযাযো যং পরিযাযং আগম্ম সেখো ভিক্খু সেখভূমিযং ঠিতো ‘সেখোস্মী’তি পজানেয্য, অসেখো ভিক্খু অসেখভূমিযং ঠিতো ‘অসেখোস্মী’তি পজানেয্য’’.

‘‘কতমো চ, ভিক্খৰে, পরিযাযো যং পরিযাযং আগম্ম সেখো ভিক্খু সেখভূমিযং ঠিতো ‘সেখোস্মী’তি পজানাতি? ইধ, ভিক্খৰে, সেখো ভিক্খু ‘ইদং দুক্খ’ন্তি যথাভূতং পজানাতি, ‘অযং দুক্খসমুদযো’তি যথাভূতং পজানাতি, ‘অযং দুক্খনিরোধো’তি যথাভূতং পজানাতি, ‘অযং দুক্খনিরোধগামিনী পটিপদা’তি যথাভূতং পজানাতি – অযম্পি খো, ভিক্খৰে, পরিযাযো যং পরিযাযং আগম্ম সেখো ভিক্খু সেখভূমিযং ঠিতো ‘সেখোস্মী’তি পজানাতি’’.

‘‘পুন চপরং, ভিক্খৰে, সেখো ভিক্খু ইতি পটিসঞ্চিক্খতি – ‘অত্থি নু খো ইতো বহিদ্ধা অঞ্ঞো সমণো ৰা ব্রাহ্মণো ৰা যো এৰং ভূতং তচ্ছং তথং ধম্মং দেসেতি যথা ভগৰা’তি? সো এৰং পজানাতি – ‘নত্থি খো ইতো বহিদ্ধা অঞ্ঞো সমণো ৰা ব্রাহ্মণো ৰা যো এৰং ভূতং তচ্ছং তথং ধম্মং দেসেতি যথা ভগৰা’তি. অযম্পি খো, ভিক্খৰে, পরিযাযো যং পরিযাযং আগম্ম সেখো ভিক্খু সেখভূমিযং ঠিতো ‘সেখোস্মী’তি পজানাতি’’.

‘‘পুন চপরং, ভিক্খৰে, সেখো ভিক্খু পঞ্চিন্দ্রিযানি পজানাতি – সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং – যংগতিকানি যংপরমানি যংফলানি যংপরিযোসানানি. ন হেৰ খো কাযেন ফুসিত্ৰা ৰিহরতি; পঞ্ঞায চ অতিৰিজ্ঝ পস্সতি. অযম্পি খো, ভিক্খৰে, পরিযাযো যং পরিযাযং আগম্ম সেখো ভিক্খু সেখভূমিযং ঠিতো ‘সেখোস্মী’তি পজানাতি’’.

‘‘কতমো চ, ভিক্খৰে, পরিযাযো যং পরিযাযং আগম্ম অসেখো ভিক্খু অসেখভূমিযং ঠিতো ‘অসেখোস্মী’তি পজানাতি? ইধ, ভিক্খৰে, অসেখো ভিক্খু পঞ্চিন্দ্রিযানি পজানাতি – সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং – যংগতিকানি যংপরমানি যংফলানি যংপরিযোসানানি. কাযেন চ ফুসিত্ৰা ৰিহরতি; পঞ্ঞায চ অতিৰিজ্ঝ পস্সতি. অযম্পি খো, ভিক্খৰে, পরিযাযো যং পরিযাযং আগম্ম অসেখো ভিক্খু অসেখভূমিযং ঠিতো ‘অসেখোস্মী’তি পজানাতি’’.

‘‘পুন চপরং, ভিক্খৰে, অসেখো ভিক্খু ছ ইন্দ্রিযানি পজানাতি. ‘চক্খুন্দ্রিযং, সোতিন্দ্রিযং, ঘানিন্দ্রিযং, জিৰ্হিন্দ্রিযং, কাযিন্দ্রিযং, মনিন্দ্রিযং – ইমানি খো ছ ইন্দ্রিযানি সব্বেন সব্বং সব্বথা সব্বং অপরিসেসং নিরুজ্ঝিস্সন্তি, অঞ্ঞানি চ ছ ইন্দ্রিযানি ন কুহিঞ্চি কিস্মিঞ্চি উপ্পজ্জিস্সন্তী’তি পজানাতি. অযম্পি খো, ভিক্খৰে, পরিযাযো যং পরিযাযং আগম্ম অসেখো ভিক্খু অসেখভূমিযং ঠিতো ‘অসেখোস্মী’তি পজানাতী’’তি. ততিযং.

৪. পদসুত্তং

৫২৪. ‘‘সেয্যথাপি, ভিক্খৰে, যানি কানিচি জঙ্গলানং [জঙ্গমানং (সী. পী.)] পাণানং পদজাতানি সব্বানি তানি হত্থিপদে সমোধানং গচ্ছন্তি, হত্থিপদং তেসং অগ্গমক্খাযতি, যদিদং – মহন্তত্তেন; এৰমেৰ খো, ভিক্খৰে, যানি কানিচি পদানি বোধায সংৰত্তন্তি, পঞ্ঞিন্দ্রিযং পদং তেসং অগ্গমক্খাযতি, যদিদং – বোধায. কতমানি চ, ভিক্খৰে, পদানি বোধায সংৰত্তন্তি? সদ্ধিন্দ্রিযং, ভিক্খৰে, পদং, তং বোধায সংৰত্ততি; ৰীরিযিন্দ্রিযং পদং, তং বোধায সংৰত্ততি; সতিন্দ্রিযং পদং, তং বোধায সংৰত্ততি; সমাধিন্দ্রিযং পদং, তং বোধায সংৰত্ততি; পঞ্ঞিন্দ্রিযং পদং, তং বোধায সংৰত্ততি. সেয্যথাপি, ভিক্খৰে, যানি কানিচি জঙ্গলানং পাণানং পদজাতানি সব্বানি তানি হত্থিপদে সমোধানং গচ্ছন্তি, হত্থিপদং তেসং অগ্গমক্খাযতি, যদিদং – মহন্তত্তেন; এৰমেৰ খো, ভিক্খৰে, যানি কানিচি পদানি বোধায সংৰত্তন্তি, পঞ্ঞিন্দ্রিযং পদং তেসং অগ্গমক্খাযতি, যদিদং – বোধাযা’’তি. চতুত্থং.

৫. সারসুত্তং

৫২৫. ‘‘সেয্যথাপি, ভিক্খৰে, যে কেচি সারগন্ধা, লোহিতচন্দনং তেসং অগ্গমক্খাযতি; এৰমেৰ খো ভিক্খৰে, যে কেচি বোধিপক্খিযা ধম্মা, পঞ্ঞিন্দ্রিযং তেসং অগ্গমক্খাযতি, যদিদং – বোধায. কতমে চ, ভিক্খৰে, বোধিপক্খিযা ধম্মা? সদ্ধিন্দ্রিযং, ভিক্খৰে, বোধিপক্খিযো ধম্মো, তং বোধায সংৰত্ততি. ৰীরিযিন্দ্রিযং…পে… সতিন্দ্রিযং …পে… সমাধিন্দ্রিযং…পে… পঞ্ঞিন্দ্রিযং বোধিপক্খিযো ধম্মো, তং বোধায সংৰত্ততি. সেয্যথাপি, ভিক্খৰে, যে কেচি সারগন্ধা, লোহিতচন্দনং তেসং অগ্গমক্খাযতি; এৰমেৰ খো, ভিক্খৰে, যে কেচি বোধিপক্খিযা ধম্মা, পঞ্ঞিন্দ্রিযং তেসং অগ্গমক্খাযতি, যদিদং – বোধাযা’’তি. পঞ্চমং.

৬. পতিট্ঠিতসুত্তং

৫২৬. ‘‘একধম্মে পতিট্ঠিতস্স, ভিক্খৰে, ভিক্খুনো পঞ্চিন্দ্রিযানি ভাৰিতানি হোন্তি সুভাৰিতানি. কতমস্মিং একধম্মে? অপ্পমাদে. কতমো চ ভিক্খৰে, অপ্পমাদো? ইধ, ভিক্খৰে, ভিক্খু চিত্তং রক্খতি আসৰেসু চ সাসৰেসু চ ধম্মেসু. তস্স চিত্তং রক্খতো আসৰেসু চ সাসৰেসু চ ধম্মেসু সদ্ধিন্দ্রিযম্পি ভাৰনাপারিপূরিং গচ্ছতি. ৰীরিযিন্দ্রিযম্পি ভাৰনাপারিপূরিং গচ্ছতি. সতিন্দ্রিযম্পি ভাৰনাপারিপূরিং গচ্ছতি. সমাধিন্দ্রিযম্পি ভাৰনাপারিপূরিং গচ্ছতি. পঞ্ঞিন্দ্রিযম্পি ভাৰনাপারিপূরিং গচ্ছতি. এৰম্পি খো, ভিক্খৰে, একধম্মে পতিট্ঠিতস্স ভিক্খুনো পঞ্চিন্দ্রিযানি ভাৰিতানি হোন্তি সুভাৰিতানী’’তি. ছট্ঠং.

৭. সহম্পতিব্রহ্মসুত্তং

৫২৭. একং সমযং ভগৰা উরুৰেলাযং ৰিহরতি নজ্জা নেরঞ্জরায তীরে অজপালনিগ্রোধে পঠমাভিসম্বুদ্ধো. অথ খো ভগৰতো রহোগতস্স পটিসল্লীনস্স এৰং চেতসো পরিৰিতক্কো উদপাদি – ‘‘পঞ্চিন্দ্রিযানি ভাৰিতানি বহুলীকতানি অমতোগধানি হোন্তি অমতপরাযণানি অমতপরিযোসানানি. কতমানি পঞ্চ? সদ্ধিন্দ্রিযং ভাৰিতং বহুলীকতং অমতোগধং হোতি অমতপরাযণং অমতপরিযোসানং. ৰীরিযিন্দ্রিযং…পে… সতিন্দ্রিযং…পে… সমাধিন্দ্রিযং…পে… পঞ্ঞিন্দ্রিযং ভাৰিতং বহুলীকতং অমতোগধং হোতি অমতপরাযণং অমতপরিযোসানং. ইমানি পঞ্চিন্দ্রিযানি ভাৰিতানি বহুলীকতানি অমতোগধানি হোন্তি অমতপরাযণানি অমতপরিযোসানানী’’তি.

অথ খো ব্রহ্মা সহম্পতি ভগৰতো চেতসা চেতোপরিৰিতক্কমঞ্ঞায – সেয্যথাপি নাম বলৰা পুরিসো সমিঞ্জিতং ৰা বাহং পসারেয্য, পসারিতং ৰা বাহং সমিঞ্জেয্য; এৰমেৰ ব্রহ্মলোকে অন্তরহিতো ভগৰতো পুরতো পাতুরহোসি. অথ খো ব্রহ্মা সহম্পতি একংসং উত্তরাসঙ্গং করিত্ৰা যেন ভগৰা তেনঞ্জলিং পণামেত্ৰা ভগৰন্তং এতদৰোচ – ‘‘এৰমেতং, ভগৰা, এৰমেতং সুগত! পঞ্চিন্দ্রিযানি ভাৰিতানি বহুলীকতানি অমতোগধানি হোন্তি অমতপরাযণানি অমতপরিযোসানানি. কতমানি পঞ্চ? সদ্ধিন্দ্রিযং ভাৰিতং বহুলীকতং অমতোগধং হোতি অমতপরাযণং অমতপরিযোসানং…পে… পঞ্ঞিন্দ্রিযং ভাৰিতং বহুলীকতং অমতোগধং হোতি অমতপরাযণং অমতপরিযোসানং. ইমানি পঞ্চিন্দ্রিযানি ভাৰিতানি বহুলীকতানি অমতোগধানি হোন্তি অমতপরাযণানি অমতপরিযোসানানি’’.

‘‘ভূতপুব্বাহং, ভন্তে, কস্সপে সম্মাসম্বুদ্ধে ব্রহ্মচরিযং অচরিং. তত্রপি মং এৰং জানন্তি – ‘সহকো ভিক্খু, সহকো ভিক্খূ’তি. সো খ্ৰাহং, ভন্তে, ইমেসংযেৰ পঞ্চন্নং ইন্দ্রিযানং ভাৰিতত্তা বহুলীকতত্তা কামেসু কামচ্ছন্দং ৰিরাজেত্ৰা কাযস্স ভেদা পরং মরণা সুগতিং ব্রহ্মলোকং উপপন্নো. তত্রপি মং এৰং জানন্তি – ‘ব্রহ্মা সহম্পতি, ব্রহ্মা সহম্পতী’’’তি. ‘‘এৰমেতং, ভগৰা, এৰমেতং সুগত! অহমেতং জানামি, অহমেতং পস্সামি যথা ইমানি পঞ্চিন্দ্রিযানি ভাৰিতানি বহুলীকতানি অমতোগধানি হোন্তি অমতপরাযণানি অমতপরিযোসানানী’’তি. সত্তমং.

৮. সূকরখতসুত্তং

৫২৮. একং সমযং ভগৰা রাজগহে ৰিহরতি গিজ্ঝকূটে পব্বতে সূকরখতাযং. তত্র খো ভগৰা আযস্মন্তং সারিপুত্তং আমন্তেসি – ‘‘কিং নু খো, সারিপুত্ত, অত্থৰসং সম্পস্সমানো খীণাসৰো ভিক্খু তথাগতে ৰা তথাগতসাসনে ৰা পরমনিপচ্চকারং পৰত্তমানো পৰত্ততী’’তি [পৰত্তেতীতি (সী.)]? ‘‘অনুত্তরঞ্হি, ভন্তে, যোগক্খেমং সম্পস্সমানো খীণাসৰো ভিক্খু তথাগতে ৰা তথাগতসাসনে ৰা পরমনিপচ্চকারং পৰত্তমানো পৰত্ততী’’তি. ‘‘সাধু সাধু, সারিপুত্ত! অনুত্তরঞ্হি, সারিপুত্ত, যোগক্খেমং সম্পস্সমানো খীণাসৰো ভিক্খু তথাগতে ৰা তথাগতসাসনে ৰা পরমনিপচ্চকারং পৰত্তমানো পৰত্ততী’’তি.

‘‘কতমো চ, সারিপুত্ত, অনুত্তরো যোগক্খেমো যং সম্পস্সমানো খীণাসৰো ভিক্খু তথাগতে ৰা তথাগতসাসনে ৰা পরমনিপচ্চকারং পৰত্তমানো পৰত্ততী’’তি? ‘‘ইধ, ভন্তে, খীণাসৰো ভিক্খু সদ্ধিন্দ্রিযং ভাৰেতি উপসমগামিং সম্বোধগামিং, ৰীরিযিন্দ্রিযং ভাৰেতি…পে… সতিন্দ্রিযং ভাৰেতি…পে… সমাধিন্দ্রিযং ভাৰেতি…পে… পঞ্ঞিন্দ্রিযং ভাৰেতি উপসমগামিং সম্বোধগামিং. অযং খো, ভন্তে, অনুত্তরো যোগক্খেমো যং সম্পস্সমানো খীণাসৰো ভিক্খু তথাগতে ৰা তথাগতসাসনে ৰা পরমনিপচ্চকারং পৰত্তমানো পৰত্ততী’’তি. ‘‘সাধু সাধু, সারিপুত্ত! এসো হি, সারিপুত্ত, অনুত্তরো যোগক্খেমো যং সম্পস্সমানো খীণাসৰো ভিক্খু তথাগতে ৰা তথাগতসাসনে ৰা পরমনিপচ্চকারং পৰত্তমানো পৰত্ততী’’তি.

‘‘কতমো চ, সারিপুত্ত, পরমনিপচ্চকারো যং খীণাসৰো ভিক্খু তথাগতে ৰা তথাগতসাসনে ৰা পরমনিপচ্চকারং পৰত্তমানো পৰত্ততী’’তি? ‘‘ইধ, ভন্তে, খীণাসৰো ভিক্খু সত্থরি সগারৰো ৰিহরতি সপ্পতিস্সো [সপ্পটিস্সো (স্যা. কং. ক.)], ধম্মে সগারৰো ৰিহরতি সপ্পতিস্সো, সঙ্ঘে সগারৰো ৰিহরতি সপ্পতিস্সো, সিক্খায সগারৰো ৰিহরতি সপ্পতিস্সো, সমাধিস্মিং সগারৰো ৰিহরতি সপ্পতিস্সো. অযং খো, ভন্তে, পরমনিপচ্চকারো যং খীণাসৰো ভিক্খু তথাগতে ৰা তথাগতসাসনে ৰা পরমনিপচ্চকারং পৰত্তমানো পৰত্ততী’’তি. ‘‘সাধু সাধু, সারিপুত্ত! এসো হি, সারিপুত্ত, পরমনিপচ্চকারো যং খীণাসৰো ভিক্খু তথাগতে ৰা তথাগতসাসনে ৰা পরমনিপচ্চকারং পৰত্তমানো পৰত্ততী’’তি. অট্ঠমং.

৯. পঠমউপ্পাদসুত্তং

৫২৯. সাৰত্থিনিদানং. ‘‘পঞ্চিমানি, ভিক্খৰে, ইন্দ্রিযানি ভাৰিতানি বহুলীকতানি অনুপ্পন্নানি উপ্পজ্জন্তি, নাঞ্ঞত্র তথাগতস্স পাতুভাৰা অরহতো সম্মাসম্বুদ্ধস্স. কতমানি পঞ্চ? সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং – ইমানি খো, ভিক্খৰে, পঞ্চিন্দ্রিযানি ভাৰিতানি বহুলীকতানি অনুপ্পন্নানি উপ্পজ্জন্তি, নাঞ্ঞত্র তথাগতস্স পাতুভাৰা অরহতো সম্মাসম্বুদ্ধস্সা’’তি. নৰমং.

১০. দুতিযউপ্পাদসুত্তং

৫৩০. ‘‘পঞ্চিমানি, ভিক্খৰে, ইন্দ্রিযানি ভাৰিতানি বহুলীকতানি অনুপ্পন্নানি উপ্পজ্জন্তি, নাঞ্ঞত্র সুগতৰিনযা. কতমানি পঞ্চ? সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং – ইমানি খো, ভিক্খৰে, পঞ্চিন্দ্রিযানি ভাৰিতানি বহুলীকতানি অনুপ্পন্নানি উপ্পজ্জন্তি, নাঞ্ঞত্র সুগতৰিনযা’’তি. দসমং.

সূকরখতৰগ্গো ছট্ঠো.

তস্সুদ্দানং –

সালং মল্লিকং সেখো চ, পদং সারং পতিট্ঠিতং;

ব্রহ্মসূকরখতাযো, উপ্পাদা অপরে দুৰেতি.