৮. ততিযৰিভঙ্গসুত্তং

৫০৮. ‘‘পঞ্চিমানি, ভিক্খৰে, ইন্দ্রিযানি. কতমানি পঞ্চ? সুখিন্দ্রিযং, দুক্খিন্দ্রিযং, সোমনস্সিন্দ্রিযং, দোমনস্সিন্দ্রিযং, উপেক্খিন্দ্রিযং.

‘‘কতমঞ্চ, ভিক্খৰে, সুখিন্দ্রিযং? যং খো, ভিক্খৰে, কাযিকং সুখং, কাযিকং সাতং, কাযসম্ফস্সজং সুখং সাতং ৰেদযিতং – ইদং ৰুচ্চতি, ভিক্খৰে, সুখিন্দ্রিযং.

‘‘কতমঞ্চ, ভিক্খৰে, দুক্খিন্দ্রিযং? যং খো, ভিক্খৰে, কাযিকং দুক্খং, কাযিকং অসাতং, কাযসম্ফস্সজং দুক্খং অসাতং ৰেদযিতং – ইদং ৰুচ্চতি, ভিক্খৰে, দুক্খিন্দ্রিযং.

‘‘কতমঞ্চ, ভিক্খৰে, সোমনস্সিন্দ্রিযং? যং খো, ভিক্খৰে, চেতসিকং সুখং, চেতসিকং সাতং, মনোসম্ফস্সজং সুখং সাতং ৰেদযিতং – ইদং ৰুচ্চতি, ভিক্খৰে, সোমনস্সিন্দ্রিযং.

‘‘কতমঞ্চ, ভিক্খৰে, দোমনস্সিন্দ্রিযং? যং খো, ভিক্খৰে, চেতসিকং দুক্খং, চেতসিকং অসাতং, মনোসম্ফস্সজং দুক্খং অসাতং ৰেদযিতং – ইদং ৰুচ্চতি, ভিক্খৰে, দোমনস্সিন্দ্রিযং.

‘‘কতমঞ্চ, ভিক্খৰে, উপেক্খিন্দ্রিযং? যং খো, ভিক্খৰে, কাযিকং ৰা চেতসিকং ৰা নেৰ সাতং নাসাতং ৰেদযিতং – ইদং ৰুচ্চতি, ভিক্খৰে, উপেক্খিন্দ্রিযং.

‘‘তত্র, ভিক্খৰে, যঞ্চ সুখিন্দ্রিযং যঞ্চ সোমনস্সিন্দ্রিযং, সুখা সা ৰেদনা দট্ঠব্বা. তত্র, ভিক্খৰে, যঞ্চ দুক্খিন্দ্রিযং যঞ্চ দোমনস্সিন্দ্রিযং, দুক্খা সা ৰেদনা দট্ঠব্বা. তত্র, ভিক্খৰে, যদিদং উপেক্খিন্দ্রিযং, অদুক্খমসুখা সা ৰেদনা দট্ঠব্বা. ইতি খো, ভিক্খৰে, ইমানি পঞ্চিন্দ্রিযানি পঞ্চ হুত্ৰা তীণি হোন্তি, তীণি হুত্ৰা পঞ্চ হোন্তি পরিযাযেনা’’তি. অট্ঠমং.