২. মুদুতরৰগ্গো

১. পটিলাভসুত্তং

৪৮১. ‘‘পঞ্চিমানি, ভিক্খৰে, ইন্দ্রিযানি. কতমানি পঞ্চ? সদ্ধিন্দ্রিযং…পে… পঞ্ঞিন্দ্রিযং…পে…. কতমঞ্চ, ভিক্খৰে, সদ্ধিন্দ্রিযং? ইধ, ভিক্খৰে, অরিযসাৰকো সদ্ধো হোতি, সদ্দহতি তথাগতস্স বোধিং – ‘ইতিপি সো ভগৰা অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি সত্থা দেৰমনুস্সানং বুদ্ধো ভগৰা’তি – ইদং ৰুচ্চতি, ভিক্খৰে, সদ্ধিন্দ্রিযং.

‘‘কতমঞ্চ, ভিক্খৰে, ৰীরিযিন্দ্রিযং? যং খো, ভিক্খৰে, চত্তারো সম্মপ্পধানে আরব্ভ ৰীরিযং পটিলভতি – ইদং ৰুচ্চতি, ভিক্খৰে, ৰীরিযিন্দ্রিযং.

‘‘কতমঞ্চ, ভিক্খৰে, সতিন্দ্রিযং? যং খো, ভিক্খৰে, চত্তারো সতিপট্ঠানে আরব্ভ সতিং পটিলভতি – ইদং ৰুচ্চতি, ভিক্খৰে, সতিন্দ্রিযং.

‘‘কতমঞ্চ, ভিক্খৰে, সমাধিন্দ্রিযং? ইধ, ভিক্খৰে, অরিযসাৰকো ৰোস্সগ্গারম্মণং করিত্ৰা লভতি সমাধিং, লভতি চিত্তস্স একগ্গতং – ইদং ৰুচ্চতি, ভিক্খৰে, সমাধিন্দ্রিযং.

‘‘কতমঞ্চ, ভিক্খৰে, পঞ্ঞিন্দ্রিযং? ইধ, ভিক্খৰে, অরিযসাৰকো পঞ্ঞৰা হোতি উদযত্থগামিনিযা পঞ্ঞায সমন্নাগতো অরিযায নিব্বেধিকায সম্মা দুক্খক্খযগামিনিযা – ইদং ৰুচ্চতি, ভিক্খৰে, পঞ্ঞিন্দ্রিযং. ইমানি খো, ভিক্খৰে, পঞ্চিন্দ্রিযানী’’তি. পঠমং.

২. পঠমসংখিত্তসুত্তং

৪৮২. ‘‘পঞ্চিমানি, ভিক্খৰে, ইন্দ্রিযানি. কতমানি পঞ্চ? সদ্ধিন্দ্রিযং…পে… পঞ্ঞিন্দ্রিযং – ইমানি খো, ভিক্খৰে, পঞ্চিন্দ্রিযানি. ইমেসং খো, ভিক্খৰে, পঞ্চন্নং ইন্দ্রিযানং সমত্তা পরিপূরত্তা অরহং হোতি, ততো মুদুতরেহি অনাগামী হোতি, ততো মুদুতরেহি সকদাগামী হোতি, ততো মুদুতরেহি সোতাপন্নো হোতি, ততো মুদুতরেহি ধম্মানুসারী হোতি, ততো মুদুতরেহি সদ্ধানুসারী হোতী’’তি. দুতিযং.

৩. দুতিযসংখিত্তসুত্তং

৪৮৩. ‘‘পঞ্চিমানি, ভিক্খৰে, ইন্দ্রিযানি. কতমানি পঞ্চ? সদ্ধিন্দ্রিযং…পে… পঞ্ঞিন্দ্রিযং – ইমানি খো, ভিক্খৰে, পঞ্চিন্দ্রিযানি. ইমেসং খো, ভিক্খৰে, পঞ্চন্নং ইন্দ্রিযানং সমত্তা পরিপূরত্তা অরহং হোতি, ততো মুদুতরেহি অনাগামী হোতি, ততো মুদুতরেহি সকদাগামী হোতি, ততো মুদুতরেহি সোতাপন্নো হোতি, ততো মুদুতরেহি ধম্মানুসারী হোতি, ততো মুদুতরেহি সদ্ধানুসারী হোতি. ইতি খো, ভিক্খৰে, ইন্দ্রিযৰেমত্ততা ফলৰেমত্ততা হোতি, ফলৰেমত্ততা পুগ্গলৰেমত্ততা’’তি. ততিযং.

৪. ততিযসংখিত্তসুত্তং

৪৮৪. ‘‘পঞ্চিমানি, ভিক্খৰে, ইন্দ্রিযানি. কতমানি পঞ্চ? সদ্ধিন্দ্রিযং…পে… পঞ্ঞিন্দ্রিযং – ইমানি খো, ভিক্খৰে, পঞ্চিন্দ্রিযানি. ইমেসং খো, ভিক্খৰে, পঞ্চন্নং ইন্দ্রিযানং সমত্তা পরিপূরত্তা অরহং হোতি, ততো মুদুতরেহি অনাগামী হোতি, ততো মুদুতরেহি সকদাগামী হোতি, ততো মুদুতরেহি সোতাপন্নো হোতি, ততো মুদুতরেহি ধম্মানুসারী হোতি, ততো মুদুতরেহি সদ্ধানুসারী হোতি. ইতি খো, ভিক্খৰে, পরিপূরং পরিপূরকারী আরাধেতি, পদেসং পদেসকারী আরাধেতি. ‘অৰঞ্ঝানি ত্ৰেৰাহং, ভিক্খৰে, পঞ্চিন্দ্রিযানী’তি ৰদামী’’তি. চতুত্থং.

৫. পঠমৰিত্থারসুত্তং

৪৮৫. ‘‘পঞ্চিমানি, ভিক্খৰে, ইন্দ্রিযানি. কতমানি পঞ্চ? সদ্ধিন্দ্রিযং…পে… পঞ্ঞিন্দ্রিযং – ইমানি খো, ভিক্খৰে, পঞ্চিন্দ্রিযানি. ইমেসং খো, ভিক্খৰে, পঞ্চন্নং ইন্দ্রিযানং সমত্তা পরিপূরত্তা অরহং হোতি, ততো মুদুতরেহি অন্তরাপরিনিব্বাযী হোতি, ততো মুদুতরেহি উপহচ্চপরিনিব্বাযী হোতি, ততো মুদুতরেহি অসঙ্খারপরিনিব্বাযী হোতি, ততো মুদুতরেহি সসঙ্খারপরিনিব্বাযী হোতি, ততো মুদুতরেহি উদ্ধংসোতো হোতি অকনিট্ঠগামী, ততো মুদুতরেহি সকদাগামী হোতি, ততো মুদুতরেহি সোতাপন্নো হোতি, ততো মুদুতরেহি ধম্মানুসারী হোতি, ততো মুদুতরেহি সদ্ধানুসারী হোতী’’তি. পঞ্চমং.

৬. দুতিযৰিত্থারসুত্তং

৪৮৬. ‘‘পঞ্চিমানি, ভিক্খৰে, ইন্দ্রিযানি. কতমানি পঞ্চ? সদ্ধিন্দ্রিযং…পে… পঞ্ঞিন্দ্রিযং – ইমানি খো, ভিক্খৰে, পঞ্চিন্দ্রিযানি. ইমেসং খো, ভিক্খৰে, পঞ্চন্নং ইন্দ্রিযানং সমত্তা পরিপূরত্তা অরহং হোতি, ততো মুদুতরেহি অন্তরাপরিনিব্বাযী হোতি, ততো মুদুতরেহি উপহচ্চপরিনিব্বাযী হোতি, ততো মুদুতরেহি অসঙ্খারপরিনিব্বাযী হোতি, ততো মুদুতরেহি সসঙ্খারপরিনিব্বাযী হোতি, ততো মুদুতরেহি উদ্ধংসোতো হোতি অকনিট্ঠগামী, ততো মুদুতরেহি সকদাগামী হোতি, ততো মুদুতরেহি সোতাপন্নো হোতি, ততো মুদুতরেহি ধম্মানুসারী হোতি, ততো মুদুতরেহি সদ্ধানুসারী হোতি. ইতি খো, ভিক্খৰে, ইন্দ্রিযৰেমত্ততা ফলৰেমত্ততা হোতি, ফলৰেমত্ততা পুগ্গলৰেমত্ততা হোতী’’তি. ছট্ঠং.

৭. ততিযৰিত্থারসুত্তং

৪৮৭. ‘‘পঞ্চিমানি, ভিক্খৰে, ইন্দ্রিযানি. কতমানি পঞ্চ? সদ্ধিন্দ্রিযং…পে… পঞ্ঞিন্দ্রিযং – ইমানি খো, ভিক্খৰে, পঞ্চিন্দ্রিযানি. ইমেসং খো, ভিক্খৰে, পঞ্চন্নং ইন্দ্রিযানং সমত্তা পরিপূরত্তা অরহং হোতি, ততো মুদুতরেহি অন্তরাপরিনিব্বাযী হোতি, ততো মুদুতরেহি উপহচ্চপরিনিব্বাযী হোতি, ততো মুদুতরেহি অসঙ্খারপরিনিব্বাযী হোতি, ততো মুদুতরেহি সসঙ্খারপরিনিব্বাযী হোতি, ততো মুদুতরেহি উদ্ধংসোতো হোতি অকনিট্ঠগামী, ততো মুদুতরেহি সকদাগামী হোতি, ততো মুদুতরেহি সোতাপন্নো হোতি, ততো মুদুতরেহি ধম্মানুসারী হোতি, ততো মুদুতরেহি সদ্ধানুসারী হোতি. ইতি খো, ভিক্খৰে, পরিপূরং পরিপূরকারী আরাধেতি, পদেসং পদেসকারী আরাধেতি. ‘অৰঞ্ঝানি ত্ৰেৰাহং, ভিক্খৰে, পঞ্চিন্দ্রিযানী’তি ৰদামী’’তি. সত্তমং.

৮. পটিপন্নসুত্তং

৪৮৮. ‘‘পঞ্চিমানি, ভিক্খৰে, ইন্দ্রিযানি. কতমানি পঞ্চ? সদ্ধিন্দ্রিযং…পে… পঞ্ঞিন্দ্রিযং – ইমানি খো, ভিক্খৰে, পঞ্চিন্দ্রিযানি. ইমেসং খো, ভিক্খৰে, পঞ্চন্নং ইন্দ্রিযানং সমত্তা পরিপূরত্তা অরহং হোতি, ততো মুদুতরেহি অরহত্তফলসচ্ছিকিরিযায পটিপন্নো হোতি, ততো মুদুতরেহি অনাগামী হোতি, ততো মুদুতরেহি অনাগামিফলসচ্ছিকিরিযায পটিপন্নো হোতি, ততো মুদুতরেহি সকদাগামী হোতি, ততো মুদুতরেহি সকদাগামিফলসচ্ছিকিরিযায পটিপন্নো হোতি, ততো মুদুতরেহি সোতাপন্নো হোতি, ততো মুদুতরেহি সোতাপত্তিফলসচ্ছিকিরিযায পটিপন্নো হোতি. যস্স খো, ভিক্খৰে, ইমানি পঞ্চিন্দ্রিযানি সব্বেন সব্বং সব্বথা সব্বং নত্থি, তমহং ‘বাহিরো পুথুজ্জনপক্খে ঠিতো’তি ৰদামী’’তি. অট্ঠমং.

৯. সম্পন্নসুত্তং

৪৮৯. অথ খো অঞ্ঞতরো ভিক্খু যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো সো ভিক্খু ভগৰন্তং এতদৰোচ –

‘‘‘ইন্দ্রিযসম্পন্নো, ইন্দ্রিযসম্পন্নো’তি, ভন্তে, ৰুচ্চতি. কিত্তাৰতা নু খো, ভন্তে, ইন্দ্রিযসম্পন্নো হোতী’’তি? ‘‘ইধ, ভিক্খু, ভিক্খু সদ্ধিন্দ্রিযং ভাৰেতি উপসমগামিং সম্বোধগামিং, ৰীরিযিন্দ্রিযং ভাৰেতি উপসমগামিং সম্বোধগামিং, সতিন্দ্রিযং ভাৰেতি উপসমগামিং সম্বোধগামিং, সমাধিন্দ্রিযং ভাৰেতি উপসমগামিং সম্বোধগামিং, পঞ্ঞিন্দ্রিযং ভাৰেতি উপসমগামিং সম্বোধগামিং. এত্তাৰতা খো, ভিক্খু, ভিক্খু ইন্দ্রিযসম্পন্নো হোতী’’তি. নৰমং.

১০. আসৰক্খযসুত্তং

৪৯০. ‘‘পঞ্চিমানি, ভিক্খৰে, ইন্দ্রিযানি. কতমানি পঞ্চ? সদ্ধিন্দ্রিযং…পে… পঞ্ঞিন্দ্রিযং – ইমানি খো, ভিক্খৰে, পঞ্চিন্দ্রিযানি. ইমেসং খো, ভিক্খৰে, পঞ্চন্নং ইন্দ্রিযানং ভাৰিতত্তা বহুলীকতত্তা ভিক্খু আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতী’’তি. দসমং.

মুদুতরৰগ্গো দুতিযো.

তস্সুদ্দানং –

পটিলাভো তযো সংখিত্তা, ৰিত্থারা অপরে তযো;

পটিপন্নো চ সম্পন্নো [পটিপন্নো চূপসমো (স্যা. কং. পী. ক.)], দসমং আসৰক্খযন্তি.