৫. কুসলরাসিসুত্তং

৪১১. ‘‘‘কুসলরাসী’তি, ভিক্খৰে, ৰদমানো চত্তারো সতিপট্ঠানে সম্মা ৰদমানো ৰদেয্য. কেৰলো হাযং, ভিক্খৰে, কুসলরাসি, যদিদং – চত্তারো সতিপট্ঠানা.

‘‘কতমে চত্তারো? ইধ, ভিক্খৰে, ভিক্খু কাযে কাযানুপস্সী ৰিহরতি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং; ৰেদনাসু…পে… চিত্তে…পে… চিত্তানুপস্সী…পে… ধম্মেসু ধম্মানুপস্সী ৰিহরতি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং. ‘কুসলরাসী’তি, ভিক্খৰে, ৰদমানো ইমে চত্তারো সতিপট্ঠানে সম্মা ৰদমানো ৰদেয্য. কেৰলো হাযং, ভিক্খৰে, কুসলরাসি, যদিদং – চত্তারো সতিপট্ঠানা’’তি. পঞ্চমং.