৩. ৰিরদ্ধসুত্তং

৩৯৯. ‘‘যেসং কেসঞ্চি, ভিক্খৰে, চত্তারো সতিপট্ঠানা ৰিরদ্ধা, ৰিরদ্ধো তেসং অরিযো মগ্গো [অরিযো অট্ঠঙ্কিকো মগ্গো (ক.) ইমস্মিং যেৰ সুত্তে দিস্সতি অট্ঠঙ্গিকোতিপদং, ন পনাঞ্ঞত্থ ইদ্ধিপাদ অনুরুদ্ধাদীসু] সম্মা দুক্খক্খযগামী. যেসং কেসঞ্চি, ভিক্খৰে, চত্তারো সতিপট্ঠানা আরদ্ধা, আরদ্ধো তেসং অরিযো মগ্গো সম্মা দুক্খক্খযগামী.

‘‘কতমে চত্তারো? ইধ, ভিক্খৰে, ভিক্খু কাযে কাযানুপস্সী ৰিহরতি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং; ৰেদনাসু…পে… চিত্তে…পে… ধম্মেসু ধম্মানুপস্সী ৰিহরতি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং. যেসং কেসঞ্চি, ভিক্খৰে, ইমে চত্তারো সতিপট্ঠানা ৰিরদ্ধা, ৰিরদ্ধো তেসং অরিযো মগ্গো সম্মা দুক্খক্খযগামী. যেসং কেসঞ্চি, ভিক্খৰে, ইমে চত্তারো সতিপট্ঠানা আরদ্ধা, আরদ্ধো তেসং অরিযো মগ্গো সম্মা দুক্খক্খযগামী’’তি. ততিযং.