১০. মানদিন্নসুত্তং

৩৯৬. তংযেৰ নিদানং. তেন খো পন সমযেন মানদিন্নো গহপতি আবাধিকো হোতি দুক্খিতো বাল়্হগিলানো. অথ খো মানদিন্নো গহপতি অঞ্ঞতরং পুরিসং আমন্তেসি – ‘‘এহি ত্ৰং, অম্ভো পুরিস…পে… ন মে, ভন্তে, খমনীযং ন যাপনীযং. বাল়্হা মে দুক্খা ৰেদনা অভিক্কমন্তি, নো পটিক্কমন্তি; অভিক্কমোসানং পঞ্ঞাযতি, নো পটিক্কমোতি. এৰরূপায চাহং, ভন্তে, দুক্খায ৰেদনায ফুট্ঠো সমানো কাযে কাযানুপস্সী ৰিহরামি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং; ৰেদনাসু…পে… চিত্তে…পে… ধম্মেসু ধম্মানুপস্সী ৰিহরামি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং. যানি চিমানি, ভন্তে, ভগৰতা পঞ্চোরম্ভাগিযানি সংযোজনানি দেসিতানি, নাহং, ভন্তে, তেসং কিঞ্চি অত্তনি অপ্পহীনং সমনুপস্সামী’’তি. ‘‘লাভা তে, গহপতি, সুলদ্ধং তে, গহপতি! অনাগামিফলং তযা, গহপতি, ব্যাকত’’ন্তি. দসমং.

সীলট্ঠিতিৰগ্গো ততিযো.

তস্সুদ্দানং –

সীলং ঠিতি পরিহানং, সুদ্ধং ব্রাহ্মণপদেসং;

সমত্তং লোকো সিরিৰড্ঢো, মানদিন্নেন তে দসাতি.