১-১০. উদ্ধম্ভাগিযাদিসুত্তদসকং

৪৬১-৪৭০. ‘‘পঞ্চিমানি, ভিক্খৰে, উদ্ধম্ভাগিযানি সংযোজনানি. কতমানি পঞ্চ? রূপরাগো, অরূপরাগো, মানো, উদ্ধচ্চং, অৰিজ্জা – ইমানি খো, ভিক্খৰে, পঞ্চুদ্ধম্ভাগিযানি সংযোজনানি. ইমেসং খো, ভিক্খৰে, পঞ্চন্নং উদ্ধম্ভাগিযানং সংযোজনানং অভিঞ্ঞায পরিঞ্ঞায পরিক্খযায পহানায চত্তারো সতিপট্ঠানা ভাৰেতব্বা.

‘‘কতমে চত্তারো? ইধ, ভিক্খৰে, ভিক্খু কাযে কাযানুপস্সী ৰিহরতি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং; ৰেদনাসু…পে… চিত্তে…পে… ধম্মেসু ধম্মানুপস্সী ৰিহরতি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং. ইমেসং খো, ভিক্খৰে, পঞ্চন্নং উদ্ধম্ভাগিযানং সংযোজনানং অভিঞ্ঞায পরিঞ্ঞায পরিক্খযায পহানায ইমে চত্তারো সতিপট্ঠানা ভাৰেতব্বা’’তি.

(যথা মগ্গসংযুত্তং তথা সতিপট্ঠানসংযুত্তং ৰিত্থারেতব্বং).

ওঘৰগ্গো দসমো.

তস্সুদ্দানং –

ওঘো যোগো উপাদানং, গন্থা অনুসযেন চ;

কামগুণা নীৰরণা, খন্ধা ওরুদ্ধম্ভাগিযাতি.

সতিপট্ঠানসংযুত্তং ততিযং.