৮. দুতিযছিগ্গল়যুগসুত্তং

১১১৮. ‘‘সেয্যথাপি, ভিক্খৰে, অযং মহাপথৰী একোদকা অস্স. তত্র পুরিসো একচ্ছিগ্গল়ং যুগং পক্খিপেয্য. তমেনং পুরত্থিমো ৰাতো পচ্ছিমেন সংহরেয্য, পচ্ছিমো ৰাতো পুরত্থিমেন সংহরেয্য, উত্তরো ৰাতো দক্খিণেন সংহরেয্য, দক্খিণো ৰাতো উত্তরেন সংহরেয্য. তত্রস্স কাণো কচ্ছপো. সো ৰস্সসতস্স ৰস্সসতস্স অচ্চযেন সকিং সকিং উম্মুজ্জেয্য. তং কিং মঞ্ঞথ, ভিক্খৰে, অপি নু খো কাণো কচ্ছপো ৰস্সসতস্স ৰস্সসতস্স অচ্চযেন সকিং সকিং উম্মুজ্জন্তো অমুস্মিং একচ্ছিগ্গল়ে যুগে গীৰং পৰেসেয্যা’’তি? ‘‘অধিচ্চমিদং, ভন্তে, যং সো কাণো কচ্ছপো ৰস্সসতস্স ৰস্সসতস্স অচ্চযেন সকিং সকিং উম্মুজ্জন্তো অমুস্মিং একচ্ছিগ্গল়ে যুগে গীৰং পৰেসেয্যা’’তি.

‘‘এৰং অধিচ্চমিদং, ভিক্খৰে, যং মনুস্সত্তং লভতি. এৰং অধিচ্চমিদং, ভিক্খৰে, যং তথাগতো লোকে উপ্পজ্জতি অরহং সম্মাসম্বুদ্ধো. এৰং অধিচ্চমিদং, ভিক্খৰে, যং তথাগতপ্পৰেদিতো ধম্মৰিনযো লোকে দিব্বতি. তস্সিদং [তযিদং (?)], ভিক্খৰে, মনুস্সত্তং লদ্ধং, তথাগতো লোকে উপ্পন্নো অরহং সম্মাসম্বুদ্ধো, তথাগতপ্পৰেদিতো চ ধম্মৰিনযো লোকে দিব্বতি.

‘‘তস্মাতিহ, ভিক্খৰে, ‘ইদং দুক্খ’ন্তি যোগো করণীযো…পে… ‘অযং দুক্খনিরোধগামিনী পটিপদা’তি যোগো করণীযো’’তি. অট্ঠমং.