৫. ৰালসুত্তং

১১১৫. একং সমযং ভগৰা ৰেসালিযং ৰিহরতি মহাৰনে কূটাগারসালাযং. অথ খো আযস্মা আনন্দো পুব্বণ্হসমযং নিৰাসেত্ৰা পত্তচীৰরমাদায ৰেসালিং পিণ্ডায পাৰিসি. অদ্দসা খো আযস্মা আনন্দো সম্বহুলে লিচ্ছৰিকুমারকে সন্থাগারে উপাসনং করোন্তে, দূরতোৰ সুখুমেন তাল়চ্ছিগ্গল়েন অসনং অতিপাতেন্তে, পোঙ্খানুপোঙ্খং [পোখানুপোখং (স্যা. কং.)] অৰিরাধিতং. দিস্ৰানস্স এতদহোসি – ‘‘সিক্খিতা ৰতিমে লিচ্ছৰিকুমারকা, সুসিক্খিতা ৰতিমে লিচ্ছৰিকুমারকা; যত্র হি নাম দূরতোৰ সুখুমেন তাল়চ্ছিগ্গল়েন অসনং অতিপাতেস্সন্তি পোঙ্খানুপোঙ্খং অৰিরাধিত’’ন্তি.

অথ খো আযস্মা আনন্দো ৰেসালিং পিণ্ডায চরিত্ৰা পচ্ছাভত্তং পিণ্ডপাতপটিক্কন্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা আনন্দো ভগৰন্তং এতদৰোচ – ‘‘ইধাহং, ভন্তে, পুব্বণ্হসমযং নিৰাসেত্ৰা পত্তচীৰরমাদায ৰেসালিং পিণ্ডায পাৰিসিং. অদ্দসং খ্ৰাহং, ভন্তে সম্বহুলে লিচ্ছৰিকুমারকে সন্থাগারে উপাসনং করোন্তে দূরতোৰ সুখুমেন তাল়চ্ছিগ্গল়েন অসনং অতিপাতেন্তে পোঙ্খানুপোঙ্খং অৰিরাধিতং’. দিস্ৰান মে এতদহোসি – ‘‘সিক্খিতা ৰতিমে লিচ্ছৰিকুমারকা, সুসিক্খিতা ৰতিমে লিচ্ছৰিকুমারকা; যত্র হি নাম দূরতোৰ সুখুমেন তাল়চ্ছিগ্গল়েন অসনং অতিপাতেস্সন্তি পোঙ্খানুপোঙ্খং অৰিরাধিত’’ন্তি.

‘‘তং কিং মঞ্ঞসি, আনন্দ, কতমং নু খো দুক্করতরং ৰা দুরভিসম্ভৰতরং ৰা – যো দূরতোৰ সুখুমেন তাল়চ্ছিগ্গল়েন অসনং অতিপাতেয্য পোঙ্খানুপোঙ্খং অৰিরাধিতং, যো ৰা সত্তধা ভিন্নস্স ৰালস্স কোটিযা কোটিং পটিৰিজ্ঝেয্যা’’তি? ‘‘এতদেৰ, ভন্তে, দুক্করতরঞ্চেৰ দুরভিসম্ভৰতরঞ্চ যো ৰা [যো (সী.)] সত্তধা ভিন্নস্স ৰালস্স কোটিযা কোটিং পটিৰিজ্ঝেয্যা’’তি. ‘‘অথ খো [অথ খো তে (স্যা. কং.)], আনন্দ, দুপ্পটিৰিজ্ঝতরং পটিৰিজ্ঝন্তি, যে ‘ইদং দুক্খ’ন্তি যথাভূতং পটিৰিজ্ঝন্তি…পে… ‘অযং দুক্খনিরোধগামিনী পটিপদা’তি যথাভূতং পটিৰিজ্ঝন্তি’’.

‘‘তস্মাতিহানন্দ, ‘ইদং দুক্খ’ন্তি যোগো করণীযো…পে… ‘অযং দুক্খনিরোধগামিনী পটিপদা’তি যোগো করণীযো’’তি. পঞ্চমং.