৩. মহাপরিল়াহসুত্তং

১১১৩. ‘‘অত্থি, ভিক্খৰে, মহাপরিল়াহো নাম নিরযো. তত্থ যং কিঞ্চি চক্খুনা রূপং পস্সতি, অনিট্ঠরূপঞ্ঞেৰ পস্সতি নো ইট্ঠরূপং; অকন্তরূপঞ্ঞেৰ পস্সতি নো কন্তরূপং; অমনাপরূপঞ্ঞেৰ পস্সতি নো মনাপরূপং. যং কিঞ্চি সোতেন সদ্দং সুণাতি…পে… যং কিঞ্চি কাযেন ফোট্ঠব্বং ফুসতি…পে… যং কিঞ্চি মনসা ধম্মং ৰিজানাতি, অনিট্ঠরূপঞ্ঞেৰ ৰিজানাতি নো ইট্ঠরূপং; অকন্তরূপঞ্ঞেৰ ৰিজানাতি নো কন্তরূপং; অমনাপরূপঞ্ঞেৰ ৰিজানাতি নো মনাপরূপ’’ন্তি.

এৰং ৰুত্তে অঞ্ঞতরো ভিক্খু ভগৰন্তং এতদৰোচ – ‘‘মহা ৰত সো, ভন্তে, পরিল়াহো, সুমহা ৰত সো, ভন্তে, পরিল়াহো! অত্থি নু খো, ভন্তে, এতম্হা পরিল়াহা অঞ্ঞো পরিল়াহো মহন্ততরো চেৰ ভযানকতরো চা’’তি? ‘‘অত্থি খো, ভিক্খু, এতম্হা পরিল়াহা অঞ্ঞো পরিল়াহো মহন্ততরো চ ভযানকতরো চা’’তি.

‘‘কতমো পন, ভন্তে, এতম্হা পরিল়াহা অঞ্ঞো পরিল়াহো মহন্ততরো চ ভযানকতরো চা’’তি? ‘‘যে হি কেচি, ভিক্খৰে, সমণা ৰা ব্রাহ্মণা ৰা ‘ইদং দুক্খ’ন্তি যথাভূতং নপ্পজানন্তি…পে… ‘অযং দুক্খনিরোধগামিনী পটিপদা’তি যথাভূতং নপ্পজানন্তি, তে জাতিসংৰত্তনিকেসু সঙ্খারেসু অভিরমন্তি…পে… অভিরতা…পে… অভিসঙ্খরোন্তি…পে… অভিসঙ্খরিত্ৰা জাতিপরিল়াহেনপি পরিডয্হন্তি, জরাপরিল়াহেনপি পরিডয্হন্তি, মরণপরিল়াহেনপি পরিডয্হন্তি, সোকপরিদেৰদুক্খদোমনস্সুপাযাসপরিল়াহেনপি পরিডয্হন্তি. তে ন পরিমুচ্চন্তি জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি. ‘ন পরিমুচ্চন্তি দুক্খস্মা’তি ৰদামি’’.

‘‘যে চ খো কেচি, ভিক্খৰে, সমণা ৰা ব্রাহ্মণা ৰা ‘ইদং দুক্খ’ন্তি যথাভূতং পজানন্তি…পে… ‘অযং দুক্খনিরোধগামিনী পটিপদা’তি যথাভূতং পজানন্তি. তে জাতিসংৰত্তনিকেসু সঙ্খারেসু নাভিরমন্তি…পে… অনভিরতা…পে… নাভিসঙ্খরোন্তি…পে… অনভিসঙ্খরিত্ৰা জাতিপরিল়াহেনপি ন পরিডয্হন্তি, জরাপরিল়াহেনপি ন পরিডয্হন্তি, মরণপরিল়াহেনপি ন পরিডয্হন্তি, সোকপরিদেৰদুক্খদোমনস্সুপাযাসপরিল়াহেনপি ন পরিডয্হন্তি. তে পরিমুচ্চন্তি জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি. ‘পরিমুচ্চন্তি দুক্খস্মা’তি ৰদামি’’.

‘‘তস্মাতিহ, ভিক্খৰে, ‘ইদং দুক্খ’ন্তি যোগো করণীযো…পে… ‘অযং দুক্খনিরোধগামিনী পটিপদা’তি যোগো করণীযো’’তি. ততিযং.