৬. দেৰসভাগসুত্তং

১০৩২. ‘‘চতূহি, ভিক্খৰে, ধম্মেহি সমন্নাগতং অত্তমনা দেৰা সভাগতং কথেন্তি. কতমেহি চতূহি? ইধ, ভিক্খৰে, অরিযসাৰকো বুদ্ধে অৰেচ্চপ্পসাদেন সমন্নাগতো হোতি – ইতিপি সো ভগৰা…পে… সত্থা দেৰমনুস্সানং বুদ্ধো ভগৰাতি. যা তা দেৰতা বুদ্ধে অৰেচ্চপ্পসাদেন সমন্নাগতা ইতো চুতা তত্রূপপন্না তাসং এৰং হোতি – ‘যথারূপেন খো মযং বুদ্ধে অৰেচ্চপ্পসাদেন সমন্নাগতা ততো চুতা ইধূপপন্না, অরিযসাৰকোপি তথারূপেন বুদ্ধে অৰেচ্চপ্পসাদেন সমন্নাগতো এহীতি দেৰানং সন্তিকে’’’তি.

‘‘পুন চপরং, ভিক্খৰে, অরিযসাৰকো ধম্মে…পে… সঙ্ঘে…পে… অরিযকন্তেহি সীলেহি সমন্নাগতো হোতি অখণ্ডেহি…পে… সমাধিসংৰত্তনিকেহি. যা তা দেৰতা অরিযকন্তেহি সীলেহি সমন্নাগতা ইতো চুতা তত্রূপপন্না তাসং এৰং হোতি – ‘যথারূপেহি খো মযং অরিযকন্তেহি সীলেহি সমন্নাগতা ততো চুতা ইধূপপন্না, অরিযসাৰকোপি তথারূপেহি অরিযকন্তেহি সীলেহি সমন্নাগতো এহীতি দেৰানং সন্তিকে’তি. ইমেহি খো, ভিক্খৰে, চতূহি ধম্মেহি সমন্নাগতং অত্তমনা দেৰা সভাগতং কথেন্তী’’তি. ছট্ঠং.