৭. সারিপুত্তসদ্ধিৰিহারিকসুত্তং

১২০. একং সমযং আযস্মা সারিপুত্তো সাৰত্থিযং ৰিহরতি জেতৰনে অনাথপিণ্ডিকস্স আরামে. অথ খো অঞ্ঞতরো ভিক্খু যেনাযস্মা সারিপুত্তো তেনুপসঙ্কমি; উপসঙ্কমিত্ৰা আযস্মতা সারিপুত্তেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো সো ভিক্খু আযস্মন্তং সারিপুত্তং এতদৰোচ – ‘‘সদ্ধিৰিহারিকো, আৰুসো সারিপুত্ত, ভিক্খু সিক্খং পচ্চক্খায হীনাযাৰত্তো’’তি.

‘‘এৰমেতং, আৰুসো, হোতি ইন্দ্রিযেসু অগুত্তদ্ৰারস্স, ভোজনে অমত্তঞ্ঞুনো, জাগরিযং অননুযুত্তস্স. ‘সো ৰতাৰুসো, ভিক্খু ইন্দ্রিযেসু অগুত্তদ্ৰারো ভোজনে অমত্তঞ্ঞূ জাগরিযং অননুযুত্তো যাৰজীৰং পরিপুণ্ণং পরিসুদ্ধং ব্রহ্মচরিযং সন্তানেস্সতী’তি নেতং ঠানং ৰিজ্জতি. ‘সো ৰতাৰুসো, ভিক্খু ইন্দ্রিযেসু গুত্তদ্ৰারো, ভোজনে মত্তঞ্ঞূ, জাগরিযং অনুযুত্তো যাৰজীৰং পরিপুণ্ণং পরিসুদ্ধং ব্রহ্মচরিযং সন্তানেস্সতী’তি ঠানমেতং ৰিজ্জতি.

‘‘কথঞ্চাৰুসো, ইন্দ্রিযেসু গুত্তদ্ৰারো হোতি? ইধাৰুসো, ভিক্খু চক্খুনা রূপং দিস্ৰা ন নিমিত্তগ্গাহী হোতি নানুব্যঞ্জনগ্গাহী. যত্ৰাধিকরণমেনং চক্খুন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং তস্স সংৰরায পটিপজ্জতি, রক্খতি চক্খুন্দ্রিযং, চক্খুন্দ্রিযে সংৰরং আপজ্জতি. সোতেন সদ্দং সুত্ৰা… ঘানেন গন্ধং ঘাযিত্ৰা… জিৰ্হায রসং সাযিত্ৰা… কাযেন ফোট্ঠব্বং ফুসিত্ৰা… মনসা ধম্মং ৰিঞ্ঞায ন নিমিত্তগ্গাহী হোতি নানুব্যঞ্জনগ্গাহী. যত্ৰাধিকরণমেনং মনিন্দ্রিযং অসংৰুতং ৰিহরন্তং অভিজ্ঝাদোমনস্সা পাপকা অকুসলা ধম্মা অন্ৰাস্সৰেয্যুং, তস্স সংৰরায পটিপজ্জতি, রক্খতি মনিন্দ্রিযং, মনিন্দ্রিযে সংৰরং আপজ্জতি. এৰং খো, আৰুসো, ইন্দ্রিযেসু গুত্তদ্ৰারো হোতি.

‘‘কথঞ্চাৰুসো, ভোজনে মত্তঞ্ঞূ হোতি? ইধাৰুসো, ভিক্খু পটিসঙ্খা যোনিসো আহারং আহারেতি – ‘নেৰ দৰায, ন মদায, ন মণ্ডনায, ন ৰিভূসনায, যাৰদেৰ ইমস্স কাযস্স ঠিতিযা যাপনায, ৰিহিংসূপরতিযা, ব্রহ্মচরিযানুগ্গহায. ইতি পুরাণঞ্চ ৰেদনং পটিহঙ্খামি, নৰঞ্চ ৰেদনং ন উপ্পাদেস্সামি, যাত্রা চ মে ভৰিস্সতি, অনৰজ্জতা চ ফাসুৰিহারো চা’তি. এৰং খো, আৰুসো, ভোজনে মত্তঞ্ঞূ হোতি.

‘‘কথঞ্চাৰুসো, জাগরিযং অনুযুত্তো হোতি? ইধাৰুসো, ভিক্খু দিৰসং চঙ্কমেন নিসজ্জায আৰরণীযেহি ধম্মেহি চিত্তং পরিসোধেতি. রত্তিযা পঠমং যামং চঙ্কমেন নিসজ্জায আৰরণীযেহি ধম্মেহি চিত্তং পরিসোধেতি. রত্তিযা মজ্ঝিমং যামং দক্খিণেন পস্সেন সীহসেয্যং কপ্পেতি পাদে পাদং অচ্চাধায সতো সম্পজানো, উট্ঠানসঞ্ঞং মনসি করিত্ৰা. রত্তিযা পচ্ছিমং যামং পচ্চুট্ঠায চঙ্কমেন নিসজ্জায আৰরণীযেহি ধম্মেহি চিত্তং পরিসোধেতি. এৰং খো, আৰুসো, জাগরিযং অনুযুত্তো হোতি. তস্মাতিহাৰুসো, এৰং সিক্খিতব্বং – ‘ইন্দ্রিযেসু গুত্তদ্ৰারা ভৰিস্সাম, ভোজনে মত্তঞ্ঞুনো, জাগরিযং অনুযুত্তা’তি. এৰঞ্হি ৰো, আৰুসো, সিক্খিতব্ব’’ন্তি. সত্তমং.