৬. পঞ্চসিখসুত্তং

১১৯. একং সমযং ভগৰা রাজগহে ৰিহরতি গিজ্ঝকূটে পব্বতে. অথ খো পঞ্চসিখো গন্ধব্বদেৰপুত্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি. একমন্তং ঠিতো খো পঞ্চসিখো গন্ধব্বদেৰপুত্তো ভগৰন্তং এতদৰোচ – ‘‘কো নু খো, ভন্তে, হেতু, কো পচ্চযো যেন মিধেকচ্চে সত্তা দিট্ঠেৰ ধম্মে নো পরিনিব্বাযন্তি? কো পন, ভন্তে, হেতু, কো পচ্চযো যেন মিধেকচ্চে সত্তা দিট্ঠেৰ ধম্মে পরিনিব্বাযন্তী’’তি? ‘‘সন্তি খো, পঞ্চসিখ, চক্খুৰিঞ্ঞেয্যা রূপা…পে… সন্তি খো, পঞ্চসিখ, মনোৰিঞ্ঞেয্যা ধম্মা, ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি. তস্স তং অভিনন্দতো অভিৰদতো অজ্ঝোসায তিট্ঠতো তন্নিস্সিতং ৰিঞ্ঞাণং হোতি তদুপাদানং. সউপাদানো, পঞ্চসিখ, ভিক্খু নো পরিনিব্বাযতি. অযং খো, পঞ্চসিখ, হেতু, অযং পচ্চযো যেন মিধেকচ্চে সত্তা দিট্ঠেৰ ধম্মে নো পরিনিব্বাযন্তি’’.

‘‘সন্তি চ খো, পঞ্চসিখ, চক্খুৰিঞ্ঞেয্যা রূপা ইট্ঠা কন্তা মনাপা…পে… সন্তি খো, পঞ্চসিখ, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি, তস্স তং অনভিনন্দতো অনভিৰদতো অনজ্ঝোসায তিট্ঠতো ন তন্নিস্সিতং ৰিঞ্ঞাণং হোতি, ন তদুপাদানং. অনুপাদানো, পঞ্চসিখ, ভিক্খু পরিনিব্বাযতি. অযং খো, পঞ্চসিখ, হেতু, অযং পচ্চযো যেন মিধেকচ্চে সত্তা দিট্ঠেৰ ধম্মে পরিনিব্বাযন্তী’’তি. ছট্ঠং.