৫. সক্কপঞ্হসুত্তং

১১৮. একং সমযং ভগৰা রাজগহে ৰিহরতি গিজ্ঝকূটে পব্বতে. অথ খো সক্কো দেৰানমিন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি. একমন্তং ঠিতো খো সক্কো দেৰানমিন্দো ভগৰন্তং এতদৰোচ – ‘‘কো নু খো, ভন্তে, হেতু, কো পচ্চযো যেন মিধেকচ্চে সত্তা দিট্ঠেৰ ধম্মে নো পরিনিব্বাযন্তি? কো পন, ভন্তে, হেতু, কো পচ্চযো যেন মিধেকচ্চে সত্তা দিট্ঠেৰ ধম্মে পরিনিব্বাযন্তী’’তি?

‘‘সন্তি খো, দেৰানমিন্দ, চক্খুৰিঞ্ঞেয্যা রূপা, ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি. তস্স তং অভিনন্দতো অভিৰদতো অজ্ঝোসায তিট্ঠতো তন্নিস্সিতং ৰিঞ্ঞাণং হোতি তদুপাদানং. সউপাদানো, দেৰানমিন্দ, ভিক্খু নো পরিনিব্বাযতি…পে….

‘‘সন্তি খো, দেৰানমিন্দ, জিৰ্হাৰিঞ্ঞেয্যা রসা…পে… সন্তি খো, দেৰানমিন্দ, মনোৰিঞ্ঞেয্যা ধম্মা, ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি. তস্স তং অভিনন্দতো অভিৰদতো অজ্ঝোসায তিট্ঠতো তন্নিস্সিতং ৰিঞ্ঞাণং হোতি তদুপাদানং. সউপাদানো, দেৰানমিন্দ, ভিক্খু নো পরিনিব্বাযতি. অযং খো, দেৰানমিন্দ, হেতু, অযং পচ্চযো যেন মিধেকচ্চে সত্তা দিট্ঠেৰ ধম্মে নো পরিনিব্বাযন্তি.

‘‘সন্তি চ খো, দেৰানমিন্দ, চক্খুৰিঞ্ঞেয্যা রূপা, ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি. তস্স তং অনভিনন্দতো অনভিৰদতো অনজ্ঝোসায তিট্ঠতো ন তন্নিস্সিতং ৰিঞ্ঞাণং হোতি, ন তদুপাদানং. অনুপাদানো, দেৰানমিন্দ, ভিক্খু পরিনিব্বাযতি…পে….

‘‘সন্তি খো, দেৰানমিন্দ, জিৰ্হাৰিঞ্ঞেয্যা রসা…পে… সন্তি খো, দেৰানমিন্দ, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা. তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি. তস্স তং অনভিনন্দতো অনভিৰদতো অনজ্ঝোসায তিট্ঠতো ন তন্নিস্সিতং ৰিঞ্ঞাণং হোতি ন তদুপাদানং. অনুপাদানো, দেৰানমিন্দ, ভিক্খু পরিনিব্বাযতি. অযং খো, দেৰানমিন্দ, হেতু, অযং পচ্চযো যেন মিধেকচ্চে সত্তা দিট্ঠেৰ ধম্মে পরিনিব্বাযন্তী’’তি. পঞ্চমং.