১. অদন্তঅগুত্তসুত্তং

৯৪. সাৰত্থিনিদানং. ‘‘ছযিমে, ভিক্খৰে, ফস্সাযতনা অদন্তা অগুত্তা অরক্খিতা অসংৰুতা দুক্খাধিৰাহা হোন্তি. কতমে ছ? চক্খু, ভিক্খৰে, ফস্সাযতনং অদন্তং অগুত্তং অরক্খিতং অসংৰুতং দুক্খাধিৰাহং হোতি…পে… জিৰ্হা, ভিক্খৰে, ফস্সাযতনং অদন্তং অগুত্তং অরক্খিতং অসংৰুতং দুক্খাধিৰাহং হোতি…পে… মনো, ভিক্খৰে, ফস্সাযতনং অদন্তং অগুত্তং অরক্খিতং অসংৰুতং দুক্খাধিৰাহং হোতি. ইমে খো, ভিক্খৰে, ছ ফস্সাযতনা অদন্তা অগুত্তা অরক্খিতা অসংৰুতা দুক্খাধিৰাহা হোন্তি’’.

‘‘ছযিমে, ভিক্খৰে, ফস্সাযতনা সুদন্তা সুগুত্তা সুরক্খিতা সুসংৰুতা সুখাধিৰাহা হোন্তি. কতমে ছ? চক্খু, ভিক্খৰে, ফস্সাযতনং সুদন্তং সুগুত্তং সুরক্খিতং সুসংৰুতং সুখাধিৰাহং হোতি…পে… জিৰ্হা, ভিক্খৰে, ফস্সাযতনং সুদন্তং সুগুত্তং সুরক্খিতং সুসংৰুতং সুখাধিৰাহং হোতি…পে… মনো, ভিক্খৰে, ফস্সাযতনং সুদন্তং সুগুত্তং সুরক্খিতং সুসংৰুতং সুখাধিৰাহং হোতি. ইমে খো, ভিক্খৰে, ছ ফস্সাযতনা সুদন্তা সুগুত্তা সুরক্খিতা সুসংৰুতা সুখাধিৰাহা হোন্তী’’তি. ইদমৰোচ ভগৰা…পে… এতদৰোচ সত্থা –

‘‘সল়েৰ [ছল়েৰ (ক.)] ফস্সাযতনানি ভিক্খৰো,

অসংৰুতো যত্থ দুক্খং নিগচ্ছতি;

তেসঞ্চ যে সংৰরণং অৰেদিসুং,

সদ্ধাদুতিযা ৰিহরন্তানৰস্সুতা.

‘‘দিস্ৰান রূপানি মনোরমানি,

অথোপি দিস্ৰান অমনোরমানি;

মনোরমে রাগপথং ৰিনোদযে,

ন চাপ্পিযং মেতি মনং পদোসযে.

‘‘সদ্দঞ্চ সুত্ৰা দুভযং পিযাপ্পিযং,

পিযম্হি সদ্দে ন সমুচ্ছিতো সিযা;

অথোপ্পিযে দোসগতং ৰিনোদযে,

ন চাপ্পিযং মেতি মনং পদোসযে.

‘‘গন্ধঞ্চ ঘত্ৰা সুরভিং মনোরমং,

অথোপি ঘত্ৰা অসুচিং অকন্তিযং;

অকন্তিযস্মিং পটিঘং ৰিনোদযে,

ছন্দানুনীতো ন চ কন্তিযে সিযা.

‘‘রসঞ্চ ভোত্ৰান অসাদিতঞ্চ সাদুং,

অথোপি ভোত্ৰান অসাদুমেকদা;

সাদুং রসং নাজ্ঝোসায ভুঞ্জে,

ৰিরোধমাসাদুসু নোপদংসযে.

‘‘ফস্সেন ফুট্ঠো ন সুখেন মজ্জে [মজ্ঝে (স্যা. কং. পী.)],

দুক্খেন ফুট্ঠোপি ন সম্পৰেধে;

ফস্সদ্ৰযং সুখদুক্খে উপেক্খে,

অনানুরুদ্ধো অৰিরুদ্ধ কেনচি.

‘‘পপঞ্চসঞ্ঞা ইতরীতরা নরা,

পপঞ্চযন্তা উপযন্তি সঞ্ঞিনো;

মনোমযং গেহসিতঞ্চ সব্বং,

পনুজ্জ নেক্খম্মসিতং ইরীযতি.

‘‘এৰং মনো ছস্সু যদা সুভাৰিতো,

ফুট্ঠস্স চিত্তং ন ৰিকম্পতে ক্ৰচি;

তে রাগদোসে অভিভুয্য ভিক্খৰো,

ভৰত্থ [ভৰথ (সী. স্যা. কং.)] জাতিমরণস্স পারগা’’তি. পঠমং;