১০. ভিক্খকসুত্তং

২০৬. সাৰত্থিনিদানং. অথ খো ভিক্খকো ব্রাহ্মণো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো ভিক্খকো ব্রাহ্মণো ভগৰন্তং এতদৰোচ – ‘‘অহম্পি খো, ভো গোতম, ভিক্খকো, ভৰম্পি ভিক্খকো, ইধ নো কিং নানাকরণ’’ন্তি?

‘‘ন তেন ভিক্খকো হোতি, যাৰতা ভিক্খতে পরে;

ৰিস্সং ধম্মং সমাদায, ভিক্খু হোতি ন তাৰতা.

‘‘যোধ পুঞ্ঞঞ্চ পাপঞ্চ, বাহিত্ৰা ব্রহ্মচরিযং;

সঙ্খায লোকে চরতি, স ৰে ভিক্খূতি ৰুচ্চতী’’তি.

এৰং ৰুত্তে, ভিক্খকো ব্রাহ্মণো ভগৰন্তং এতদৰোচ – ‘‘অভিক্কন্তং, ভো গোতম, অভিক্কন্তং, ভো গোতম…পে… উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি.