৯. সুন্দরিকসুত্তং

১৯৫. একং সমযং ভগৰা কোসলেসু ৰিহরতি সুন্দরিকায নদিযা তীরে. তেন খো পন সমযেন সুন্দরিকভারদ্ৰাজো ব্রাহ্মণো সুন্দরিকায নদিযা তীরে অগ্গিং জুহতি, অগ্গিহুত্তং পরিচরতি. অথ খো সুন্দরিকভারদ্ৰাজো ব্রাহ্মণো অগ্গিং জুহিত্ৰা অগ্গিহুত্তং পরিচরিত্ৰা উট্ঠাযাসনা সমন্তা চতুদ্দিসা অনুৰিলোকেসি – ‘‘কো নু খো ইমং হব্যসেসং ভুঞ্জেয্যা’’তি? অদ্দসা খো সুন্দরিকভারদ্ৰাজো ব্রাহ্মণো ভগৰন্তং অঞ্ঞতরস্মিং রুক্খমূলে সসীসং পারুতং নিসিন্নং. দিস্ৰান ৰামেন হত্থেন হব্যসেসং গহেত্ৰা দক্খিণেন হত্থেন কমণ্ডলুং গহেত্ৰা যেন ভগৰা তেনুপসঙ্কমি. অথ খো ভগৰা সুন্দরিকভারদ্ৰাজস্স ব্রাহ্মণস্স পদসদ্দেন সীসং ৰিৰরি. অথ খো সুন্দরিকভারদ্ৰাজো ব্রাহ্মণো ‘মুণ্ডো অযং ভৰং, মুণ্ডকো অযং ভৰ’ন্তি ততোৰ পুন নিৰত্তিতুকামো অহোসি. অথ খো সুন্দরিকভারদ্ৰাজস্স ব্রাহ্মণস্স এতদহোসি – ‘মুণ্ডাপি হি ইধেকচ্চে ব্রাহ্মণা ভৰন্তি; যংনূনাহং তং উপসঙ্কমিত্ৰা জাতিং পুচ্ছেয্য’ন্তি.

অথ খো সুন্দরিকভারদ্ৰাজো ব্রাহ্মণো যেন ভগৰা তেনুপসঙ্কমি; উপসঙ্কমিত্ৰা ভগৰন্তং এতদৰোচ – ‘কিংজচ্চো ভৰ’ন্তি?

‘‘মা জাতিং পুচ্ছ চরণঞ্চ পুচ্ছ,

কট্ঠা হৰে জাযতি জাতৰেদো;

নীচাকুলীনোপি মুনি ধিতিমা,

আজানীযো হোতি হিরীনিসেধো.

‘‘সচ্চেন দন্তো দমসা উপেতো,

ৰেদন্তগূ ৰুসিতব্রহ্মচরিযো;

যঞ্ঞোপনীতো তমুপৰ্হযেথ,

কালেন সো জুহতি দক্খিণেয্যে’’তি.

‘‘অদ্ধা সুযিট্ঠং সুহুতং মম যিদং,

যং তাদিসং ৰেদগুমদ্দসামি;

তুম্হাদিসানঞ্হি অদস্সনেন,

অঞ্ঞো জনো ভুঞ্জতি হব্যসেস’’ন্তি.

‘‘ভুঞ্জতু ভৰং গোতমো. ব্রাহ্মণো ভৰ’’ন্তি.

‘‘গাথাভিগীতং মে অভোজনেয্যং,

সম্পস্সতং ব্রাহ্মণ নেস ধম্মো;

গাথাভিগীতং পনুদন্তি বুদ্ধা,

ধম্মে সতি ব্রাহ্মণ ৰুত্তিরেসা.

‘‘অঞ্ঞেন চ কেৰলিনং মহেসিং,

খীণাসৰং কুক্কুচ্চৰূপসন্তং;

অন্নেন পানেন উপট্ঠহস্সু,

খেত্তঞ্হি তং পুঞ্ঞপেক্খস্স হোতী’’তি.

‘‘অথ কস্স চাহং, ভো গোতম, ইমং হব্যসেসং দম্মী’’তি? ‘‘ন খ্ৰাহং, ব্রাহ্মণ, পস্সামি সদেৰকে লোকে সমারকে সব্রহ্মকে সস্সমণব্রাহ্মণিযা পজায সদেৰমনুস্সায যস্সেসো হব্যসেসো ভুত্তো সম্মা পরিণামং গচ্ছেয্য অঞ্ঞত্র, ব্রাহ্মণ, তথাগতস্স ৰা তথাগতসাৰকস্স ৰা. তেন হি ত্ৰং, ব্রাহ্মণ, তং হব্যসেসং অপ্পহরিতে ৰা ছড্ডেহি অপ্পাণকে ৰা উদকে ওপিলাপেহী’’তি.

অথ খো সুন্দরিকভারদ্ৰাজো ব্রাহ্মণো তং হব্যসেসং অপ্পাণকে উদকে ওপিলাপেসি. অথ খো সো হব্যসেসো উদকে পক্খিত্তো চিচ্চিটাযতি চিটিচিটাযতি সন্ধূপাযতি সম্পধূপাযতি. সেয্যথাপি নাম ফালো [লোহো (ক.)] দিৰসংসন্তত্তো [দিৰসসন্তত্তো (সী. স্যা. কং. পী.)] উদকে পক্খিত্তো চিচ্চিটাযতি চিটিচিটাযতি সন্ধূপাযতি সম্পধূপাযতি; এৰমেৰ সো হব্যসেসো উদকে পক্খিত্তো চিচ্চিটাযতি চিটিচিটাযতি সন্ধূপাযতি সম্পধূপাযতি.

অথ খো সুন্দরিকভারদ্ৰাজো ব্রাহ্মণো সংৰিগ্গো লোমহট্ঠজাতো যেন ভগৰা তেনুপসঙ্কমি; উপসঙ্কমিত্ৰা একমন্তং অট্ঠাসি. একমন্তং ঠিতং খো সুন্দরিকভারদ্ৰাজং ব্রাহ্মণং ভগৰা গাথাহি অজ্ঝভাসি –

‘‘মা ব্রাহ্মণ দারু সমাদহানো,

সুদ্ধিং অমঞ্ঞি বহিদ্ধা হি এতং;

ন হি তেন সুদ্ধিং কুসলা ৰদন্তি,

যো বাহিরেন পরিসুদ্ধিমিচ্ছে.

‘‘হিত্ৰা অহং ব্রাহ্মণ দারুদাহং

অজ্ঝত্তমেৰুজ্জলযামি [অজ্ঝত্তমেৰ জলযামি (সী. স্যা. কং. পী.)] জোতিং;

নিচ্চগ্গিনী নিচ্চসমাহিতত্তো,

অরহং অহং ব্রহ্মচরিযং চরামি.

‘‘মানো হি তে ব্রাহ্মণ খারিভারো,

কোধো ধুমো ভস্মনি মোসৰজ্জং;

জিৰ্হা সুজা হদযং জোতিঠানং,

অত্তা সুদন্তো পুরিসস্স জোতি.

‘‘ধম্মো রহদো ব্রাহ্মণ সীলতিত্থো,

অনাৰিলো সব্ভি সতং পসত্থো;

যত্থ হৰে ৰেদগুনো সিনাতা,

অনল্লগত্তাৰ [অনল্লীনগত্তাৰ (সী. পী. ক.)] তরন্তি পারং.

‘‘সচ্চং ধম্মো সংযমো ব্রহ্মচরিযং,

মজ্ঝে সিতা ব্রাহ্মণ ব্রহ্মপত্তি;

স তুজ্জুভূতেসু নমো করোহি,

তমহং নরং ধম্মসারীতি ব্রূমী’’তি.

এৰং ৰুত্তে, সুন্দরিকভারদ্ৰাজো ব্রাহ্মণো ভগৰন্তং এতদৰোচ – ‘‘অভিক্কন্তং, ভো গোতম…পে… অঞ্ঞতরো চ পনাযস্মা ভারদ্ৰাজো অরহতং অহোসী’’তি.