১০. বহুধীতরসুত্তং

১৯৬. একং সমযং ভগৰা কোসলেসু ৰিহরতি অঞ্ঞতরস্মিং ৰনসণ্ডে. তেন খো পন সমযেন অঞ্ঞতরস্স ভারদ্ৰাজগোত্তস্স ব্রাহ্মণস্স চতুদ্দস বলীবদ্দা নট্ঠা হোন্তি. অথ খো ভারদ্ৰাজগোত্তো ব্রাহ্মণো তে বলীবদ্দে গৰেসন্তো যেন সো ৰনসণ্ডো তেনুপসঙ্কমি; উপসঙ্কমিত্ৰা অদ্দস ভগৰন্তং তস্মিং ৰনসণ্ডে নিসিন্নং পল্লঙ্কং আভুজিত্ৰা উজুং কাযং পণিধায পরিমুখং সতিং উপট্ঠপেত্ৰা. দিস্ৰান যেন ভগৰা তেনুপসঙ্কমি; উপসঙ্কমিত্ৰা ভগৰতো সন্তিকে ইমা গাথাযো অভাসি –

‘‘ন হি নূনিমস্স [নহনূনিমস্স (সী. স্যা. কং.)] সমণস্স, বলীবদ্দা চতুদ্দস;

অজ্জসট্ঠিং ন দিস্সন্তি, তেনাযং সমণো সুখী.

‘‘ন হি নূনিমস্স সমণস্স, তিলাখেত্তস্মি পাপকা;

একপণ্ণা দুপণ্ণা [দ্ৰিপণ্ণা (সী. পী.)] চ, তেনাযং সমণো সুখী.

‘‘ন হি নূনিমস্স সমণস্স, তুচ্ছকোট্ঠস্মি মূসিকা;

উস্সোল়্হিকায নচ্চন্তি, তেনাযং সমণো সুখী.

‘‘ন হি নূনিমস্স সমণস্স, সন্থারো সত্তমাসিকো;

উপ্পাটকেহি সঞ্ছন্নো, তেনাযং সমণো সুখী.

‘‘ন হি নূনিমস্স সমণস্স, ৰিধৰা সত্ত ধীতরো;

একপুত্তা দুপুত্তা [দ্ৰিপুত্তা (সী. পী.)] চ, তেনাযং সমণো সুখী.

‘‘ন হি নূনিমস্স সমণস্স, পিঙ্গলা তিলকাহতা;

সোত্তং পাদেন বোধেতি, তেনাযং সমণো সুখী.

‘‘ন হি নূনিমস্স সমণস্স, পচ্চূসম্হি ইণাযিকা;

দেথ দেথাতি চোদেন্তি, তেনাযং সমণো সুখী’’তি.

‘‘ন হি ময্হং ব্রাহ্মণ, বলীবদ্দা চতুদ্দস;

অজ্জসট্ঠিং ন দিস্সন্তি, তেনাহং ব্রাহ্মণা সুখী.

‘‘ন হি ময্হং ব্রাহ্মণ, তিলাখেত্তস্মি পাপকা;

একপণ্ণা দুপণ্ণা চ, তেনাহং ব্রাহ্মণা সুখী.

‘‘ন হি ময্হং ব্রাহ্মণ, তুচ্ছকোট্ঠস্মি মূসিকা;

উস্সোল়্হিকায নচ্চন্তি, তেনাহং ব্রাহ্মণা সুখী.

‘‘ন হি ময্হং ব্রাহ্মণ, সন্থারো সত্তমাসিকো;

উপ্পাটকেহি সঞ্ছন্নো, তেনাহং ব্রাহ্মণা সুখী.

‘‘ন হি ময্হং ব্রাহ্মণ, ৰিধৰা সত্ত ধীতরো;

একপুত্তা দুপুত্তা চ, তেনাহং ব্রাহ্মণা সুখী.

‘‘ন হি ময্হং ব্রাহ্মণ, পিঙ্গলা তিলকাহতা;

সোত্তং পাদেন বোধেতি, তেনাহং ব্রাহ্মণা সুখী.

‘‘ন হি ময্হং ব্রাহ্মণ, পচ্চূসম্হি ইণাযিকা;

দেথ দেথাতি চোদেন্তি, তেনাহং ব্রাহ্মণা সুখী’’তি.

এৰং ৰুত্তে, ভারদ্ৰাজগোত্তো ব্রাহ্মণো ভগৰন্তং এতদৰোচ – ‘‘অভিক্কন্তং, ভো গোতম, অভিক্কন্তং, ভো গোতম! সেয্যথাপি, ভো গোতম, নিক্কুজ্জিতং ৰা উক্কুজ্জেয্য, পটিচ্ছন্নং ৰা ৰিৰরেয্য, মূল়্হস্স ৰা মগ্গং আচিক্খেয্য, অন্ধকারে ৰা তেলপজ্জোতং ধারেয্য – চক্খুমন্তো রূপানি দক্খন্তীতি; এৰমেৰ ভোতা গোতমেন অনেকপরিযাযেন ধম্মো পকাসিতো. এসাহং ভৰন্তং গোতমং সরণং গচ্ছামি ধম্মঞ্চ ভিক্খুসঙ্ঘঞ্চ. লভেয্যাহং ভোতো গোতমস্স সন্তিকে পব্বজ্জং, লভেয্যং উপসম্পদ’’ন্তি.

অলত্থ খো ভারদ্ৰাজগোত্তো ব্রাহ্মণো ভগৰতো সন্তিকে পব্বজ্জং, অলত্থ উপসম্পদং. অচিরূপসম্পন্নো পনাযস্মা ভারদ্ৰাজো একো ৰূপকট্ঠো অপ্পমত্তো আতাপী পহিতত্তো ৰিহরন্তো নচিরস্সেৰ – যস্সত্থায কুলপুত্তা সম্মদেৰ অগারস্মা অনগারিযং পব্বজন্তি, তদনুত্তরং – ব্রহ্মচরিযপরিযোসানং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহাসি. ‘‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’’তি অব্ভঞ্ঞাসি. অঞ্ঞতরো চ পনাযস্মা ভারদ্ৰাজো অরহতং অহোসীতি.

অরহন্তৰগ্গো পঠমো.

তস্সুদ্দানং –

ধনঞ্জানী চ অক্কোসং, অসুরিন্দং বিলঙ্গিকং;

অহিংসকং জটা চেৰ, সুদ্ধিকঞ্চেৰ অগ্গিকা;

সুন্দরিকং বহুধীতরেন চ তে দসাতি.