৮. অগ্গিকসুত্তং

১৯৪. একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে. তেন খো পন সমযেন অগ্গিকভারদ্ৰাজস্স ব্রাহ্মণস্স সপ্পিনা পাযসো সন্নিহিতো হোতি – ‘‘অগ্গিং জুহিস্সামি, অগ্গিহুত্তং পরিচরিস্সামী’’তি.

অথ খো ভগৰা পুব্বণ্হসমযং নিৰাসেত্ৰা পত্তচীৰরমাদায রাজগহং পিণ্ডায পাৰিসি. রাজগহে সপদানং পিণ্ডায চরমানো যেন অগ্গিকভারদ্ৰাজস্স ব্রাহ্মণস্স নিৰেসনং তেনুপসঙ্কমি; উপসঙ্কমিত্ৰা একমন্তং অট্ঠাসি. অদ্দসা খো অগ্গিকভারদ্ৰাজো ব্রাহ্মণো ভগৰন্তং পিণ্ডায ঠিতং. দিস্ৰান ভগৰন্তং গাথায অজ্ঝভাসি –

‘‘তীহি ৰিজ্জাহি সম্পন্নো, জাতিমা সুতৰা বহূ;

ৰিজ্জাচরণসম্পন্নো, সোমং ভুঞ্জেয্য পাযস’’ন্তি.

‘‘বহুম্পি পলপং জপ্পং, ন জচ্চা হোতি ব্রাহ্মণো;

অন্তোকসম্বু সংকিলিট্ঠো, কুহনাপরিৰারিতো.

‘‘পুব্বেনিৰাসং যো ৰেদী, সগ্গাপাযঞ্চ পস্সতি;

অথো জাতিক্খযং পত্তো, অভিঞ্ঞাৰোসিতো মুনি.

‘‘এতাহি তীহি ৰিজ্জাহি, তেৰিজ্জো হোতি ব্রাহ্মণো;

ৰিজ্জাচরণসম্পন্নো, সোমং ভুঞ্জেয্য পাযস’’ন্তি.

‘‘ভুঞ্জতু ভৰং গোতমো. ব্রাহ্মণো ভৰ’’ন্তি.

‘‘গাথাভিগীতং মে অভোজনেয্যং,

সম্পস্সতং ব্রাহ্মণ নেস ধম্মো;

গাথাভিগীতং পনুদন্তি বুদ্ধা,

ধম্মে সতি ব্রাহ্মণ ৰুত্তিরেসা.

‘‘অঞ্ঞেন চ কেৰলিনং মহেসিং,

খীণাসৰং কুক্কুচ্চৰূপসন্তং;

অন্নেন পানেন উপট্ঠহস্সু,

খেত্তঞ্হি তং পুঞ্ঞপেক্খস্স হোতী’’তি.

এৰং ৰুত্তে, অগ্গিকভারদ্ৰাজো ব্রাহ্মণো ভগৰন্তং এতদৰোচ – ‘‘অভিক্কন্তং, ভো গোতম…পে… অঞ্ঞতরো চ পনাযস্মা অগ্গিকভারদ্ৰাজো অরহতং অহোসী’’তি.