৬. সপ্পসুত্তং

১৪২. এৰং মে সুতং – একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে. তেন খো পন সমযেন ভগৰা রত্তন্ধকারতিমিসাযং অব্ভোকাসে নিসিন্নো হোতি, দেৰো চ একমেকং ফুসাযতি.

অথ খো মারো পাপিমা ভগৰতো ভযং ছম্ভিতত্তং লোমহংসং উপ্পাদেতুকামো মহন্তং সপ্পরাজৰণ্ণং অভিনিম্মিনিত্ৰা যেন ভগৰা তেনুপসঙ্কমি. সেয্যথাপি নাম মহতী একরুক্খিকা নাৰা, এৰমস্স কাযো হোতি. সেয্যথাপি নাম মহন্তং সোণ্ডিকাকিল়ঞ্জং, এৰমস্স ফণো হোতি. সেয্যথাপি নাম মহতী কোসলিকা কংসপাতি, এৰমস্স অক্খীনি ভৰন্তি. সেয্যথাপি নাম দেৰে গল়গল়াযন্তে ৰিজ্জুল্লতা নিচ্ছরন্তি, এৰমস্স মুখতো জিৰ্হা নিচ্ছরতি. সেয্যথাপি নাম কম্মারগগ্গরিযা ধমমানায সদ্দো হোতি, এৰমস্স অস্সাসপস্সাসানং সদ্দো হোতি.

অথ খো ভগৰা ‘‘মারো অযং পাপিমা’’ ইতি ৰিদিত্ৰা মারং পাপিমন্তং গাথাহি অজ্ঝভাসি –

‘‘যো সুঞ্ঞগেহানি সেৰতি,

সেয্যো সো মুনি অত্তসঞ্ঞতো;

ৰোস্সজ্জ চরেয্য তত্থ সো,

পতিরূপঞ্হি তথাৰিধস্স তং.

‘‘চরকা বহূ ভেরৰা বহূ,

অথো ডংসসরীসপা [ডংস সিরিংসপা (সী. স্যা. কং. পী.)] বহূ;

লোমম্পি ন তত্থ ইঞ্জযে,

সুঞ্ঞাগারগতো মহামুনি.

‘‘নভং ফলেয্য পথৰী চলেয্য,

সব্বেপি পাণা উদ সন্তসেয্যুং;

সল্লম্পি চে উরসি পকপ্পযেয্যুং,

উপধীসু তাণং ন করোন্তি বুদ্ধা’’তি.

অথ খো মারো পাপিমা ‘‘জানাতি মং ভগৰা, জানাতি মং সুগতো’’তি দুক্খী দুম্মনো তত্থেৰন্তরধাযীতি.