৮. ককুধসুত্তং

৯৯. এৰং মে সুতং – একং সমযং ভগৰা সাকেতে ৰিহরতি অঞ্জনৰনে মিগদাযে. অথ খো ককুধো দেৰপুত্তো অভিক্কন্তায রত্তিযা অভিক্কন্তৰণ্ণো কেৰলকপ্পং অঞ্জনৰনং ওভাসেত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি. একমন্তং ঠিতো খো ককুধো দেৰপুত্তো ভগৰন্তং এতদৰোচ – ‘‘নন্দসি, সমণা’’তি? ‘‘কিং লদ্ধা, আৰুসো’’তি? ‘‘তেন হি, সমণ, সোচসী’’তি? ‘‘কিং জীযিত্থ, আৰুসো’’তি? ‘‘তেন হি, সমণ, নেৰ নন্দসি ন চ [নেৰ (সী. স্যা. কং.)] সোচসী’’তি? ‘‘এৰমাৰুসো’’তি.

‘‘কচ্চি ত্ৰং অনঘো [অনিঘো (সব্বত্থ)] ভিক্খু, কচ্চি নন্দী [নন্দি (সী. স্যা. কং.)] ন ৰিজ্জতি;

কচ্চি তং একমাসীনং, অরতী নাভিকীরতী’’তি.

‘‘অনঘো ৰে অহং যক্খ, অথো নন্দী ন ৰিজ্জতি;

অথো মং একমাসীনং, অরতী নাভিকীরতী’’তি.

‘‘কথং ত্ৰং অনঘো ভিক্খু, কথং নন্দী ন ৰিজ্জতি;

কথং তং একমাসীনং, অরতী নাভিকীরতী’’তি.

‘‘অঘজাতস্স ৰে নন্দী, নন্দীজাতস্স ৰে অঘং;

অনন্দী অনঘো ভিক্খু, এৰং জানাহি আৰুসো’’তি.

‘‘চিরস্সং ৰত পস্সামি, ব্রাহ্মণং পরিনিব্বুতং;

অনন্দিং অনঘং ভিক্খুং, তিণ্ণং লোকে ৰিসত্তিক’’ন্তি.