৪. নন্দনসুত্তং

৯৫. একমন্তং ঠিতো খো নন্দনো দেৰপুত্তো ভগৰন্তং গাথায অজ্ঝভাসি –

‘‘পুচ্ছামি তং গোতম ভূরিপঞ্ঞ,

অনাৰটং ভগৰতো ঞাণদস্সনং;

কথংৰিধং সীলৰন্তং ৰদন্তি,

কথংৰিধং পঞ্ঞৰন্তং ৰদন্তি;

কথংৰিধো দুক্খমতিচ্চ ইরিযতি,

কথংৰিধং দেৰতা পূজযন্তী’’তি.

‘‘যো সীলৰা পঞ্ঞৰা ভাৰিতত্তো,

সমাহিতো ঝানরতো সতীমা;

সব্বস্স সোকা ৰিগতা পহীনা,

খীণাসৰো অন্তিমদেহধারী.

‘‘তথাৰিধং সীলৰন্তং ৰদন্তি,

তথাৰিধং পঞ্ঞৰন্তং ৰদন্তি;

তথাৰিধো দুক্খমতিচ্চ ইরিযতি,

তথাৰিধং দেৰতা পূজযন্তী’’তি.