৪. ৰেপচিত্তিসুত্তং

২৫০. সাৰত্থিনিদানং. ‘‘ভূতপুব্বং, ভিক্খৰে, দেৰাসুরসঙ্গামো সমুপব্যূল়্হো অহোসি. অথ খো, ভিক্খৰে, ৰেপচিত্তি অসুরিন্দো অসুরে আমন্তেসি – ‘সচে, মারিসা, দেৰানং অসুরসঙ্গামে সমুপব্যূল়্হে অসুরা জিনেয্যুং দেৰা পরাজিনেয্যুং [পরাজেয্যুং (সী. পী.)], যেন নং সক্কং দেৰানমিন্দং কণ্ঠপঞ্চমেহি বন্ধনেহি বন্ধিত্ৰা মম সন্তিকে আনেয্যাথ অসুরপুর’ন্তি. সক্কোপি খো, ভিক্খৰে, দেৰানমিন্দো দেৰে তাৰতিংসে আমন্তেসি – ‘সচে, মারিসা, দেৰানং অসুরসঙ্গামে সমুপব্যূল়্হে দেৰা জিনেয্যুং অসুরা পরাজিনেয্যুং, যেন নং ৰেপচিত্তিং অসুরিন্দং কণ্ঠপঞ্চমেহি বন্ধনেহি বন্ধিত্ৰা মম সন্তিকে আনেয্যাথ সুধম্মসভ’’’ন্তি. তস্মিং খো পন, ভিক্খৰে, সঙ্গামে দেৰা জিনিংসু, অসুরা পরাজিনিংসু [পরাজিংসু (সী. পী.)]. অথ খো, ভিক্খৰে, দেৰা তাৰতিংসা ৰেপচিত্তিং অসুরিন্দং কণ্ঠপঞ্চমেহি বন্ধনেহি বন্ধিত্ৰা সক্কস্স দেৰানমিন্দস্স সন্তিকে আনেসুং সুধম্মসভং. তত্র সুদং, ভিক্খৰে, ৰেপচিত্তি অসুরিন্দো কণ্ঠপঞ্চমেহি বন্ধনেহি বদ্ধো সক্কং দেৰানমিন্দং সুধম্মসভং পৰিসন্তঞ্চ নিক্খমন্তঞ্চ অসব্ভাহি ফরুসাহি ৰাচাহি অক্কোসতি পরিভাসতি. অথ খো, ভিক্খৰে, মাতলি সঙ্গাহকো সক্কং দেৰানমিন্দং গাথাহি অজ্ঝভাসি –

‘‘ভযা নু মঘৰা সক্ক, দুব্বল্যা নো তিতিক্খসি;

সুণন্তো ফরুসং ৰাচং, সম্মুখা ৰেপচিত্তিনো’’তি.

‘‘নাহং ভযা ন দুব্বল্যা, খমামি ৰেপচিত্তিনো;

কথঞ্হি মাদিসো ৰিঞ্ঞূ, বালেন পটিসংযুজে’’তি.

‘‘ভিয্যো বালা পভিজ্জেয্যুং, নো চস্স পটিসেধকো;

তস্মা ভুসেন দণ্ডেন, ধীরো বালং নিসেধযে’’তি.

‘‘এতদেৰ অহং মঞ্ঞে, বালস্স পটিসেধনং;

পরং সঙ্কুপিতং ঞত্ৰা, যো সতো উপসম্মতী’’তি.

‘‘এতদেৰ তিতিক্খায, ৰজ্জং পস্সামি ৰাসৰ;

যদা নং মঞ্ঞতি বালো, ভযা ম্যাযং তিতিক্খতি;

অজ্ঝারুহতি দুম্মেধো, গোৰ ভিয্যো পলাযিন’’ন্তি.

‘‘কামং মঞ্ঞতু ৰা মা ৰা, ভযা ম্যাযং তিতিক্খতি;

সদত্থপরমা অত্থা, খন্ত্যা ভিয্যো ন ৰিজ্জতি.

‘‘যো হৰে বলৰা সন্তো, দুব্বলস্স তিতিক্খতি;

তমাহু পরমং খন্তিং, নিচ্চং খমতি দুব্বলো.

‘‘অবলং তং বলং আহু, যস্স বালবলং বলং;

বলস্স ধম্মগুত্তস্স, পটিৰত্তা ন ৰিজ্জতি.

‘‘তস্সেৰ তেন পাপিযো, যো কুদ্ধং পটিকুজ্ঝতি;

কুদ্ধং অপ্পটিকুজ্ঝন্তো, সঙ্গামং জেতি দুজ্জযং.

‘‘উভিন্নমত্থং চরতি, অত্তনো চ পরস্স চ;

পরং সঙ্কুপিতং ঞত্ৰা, যো সতো উপসম্মতি.

‘‘উভিন্নং তিকিচ্ছন্তানং, অত্তনো চ পরস্স চ;

জনা মঞ্ঞন্তি বালোতি, যে ধম্মস্স অকোৰিদা’’তি.

‘‘সো হি নাম, ভিক্খৰে, সক্কো দেৰানমিন্দো সকং পুঞ্ঞফলং উপজীৰমানো দেৰানং তাৰতিংসানং ইস্সরিযাধিপচ্চং রজ্জং কারেন্তো খন্তিসোরচ্চস্স ৰণ্ণৰাদী ভৰিস্সতি. ইধ খো তং, ভিক্খৰে, সোভেথ যং তুম্হে এৰং স্ৰাক্খাতে ধম্মৰিনযে পব্বজিতা সমানা খমা চ ভৰেয্যাথ সোরতা চা’’তি.