৫. সুভাসিতজযসুত্তং

২৫১. সাৰত্থিনিদানং. ‘‘ভূতপুব্বং, ভিক্খৰে, দেৰাসুরসঙ্গামো সমুপব্যূল়্হো অহোসি. অথ খো, ভিক্খৰে, ৰেপচিত্তি অসুরিন্দো সক্কং দেৰানমিন্দং এতদৰোচ – ‘হোতু, দেৰানমিন্দ, সুভাসিতেন জযো’তি. ‘হোতু, ৰেপচিত্তি, সুভাসিতেন জযো’তি. অথ খো, ভিক্খৰে, দেৰা চ অসুরা চ পারিসজ্জে ঠপেসুং – ‘ইমে নো সুভাসিতদুব্ভাসিতং আজানিস্সন্তী’তি. অথ খো, ভিক্খৰে, ৰেপচিত্তিং অসুরিন্দো সক্কং দেৰানমিন্দং এতদৰোচ – ‘ভণ, দেৰানমিন্দ, গাথ’ন্তি. এৰং ৰুত্তে, ভিক্খৰে, সক্কো দেৰানমিন্দো ৰেপচিত্তি অসুরিন্দং এতদৰোচ – ‘তুম্হে খ্ৰেত্থ, ৰেপচিত্তি, পুব্বদেৰা. ভণ, ৰেপচিত্তি, গাথ’ন্তি. এৰং ৰুত্তে, ভিক্খৰে, ৰেপচিত্তি অসুরিন্দো ইমং গাথং অভাসি –

‘‘ভিয্যো বালা পভিজ্জেয্যুং, নো চস্স পটিসেধকো;

তস্মা ভুসেন দণ্ডেন, ধীরো বালং নিসেধযে’’তি.

‘‘ভাসিতায খো পন, ভিক্খৰে, ৰেপচিত্তিনা অসুরিন্দেন গাথায অসুরা অনুমোদিংসু, দেৰা তুণ্হী অহেসুং. অথ খো, ভিক্খৰে, ৰেপচিত্তি অসুরিন্দো সক্কং দেৰানমিন্দং এতদৰোচ – ‘ভণ, দেৰানমিন্দ, গাথ’ন্তি. এৰং ৰুত্তে, ভিক্খৰে, সক্কো দেৰানমিন্দো ইমং গাথং অভাসি –

‘‘এতদেৰ অহং মঞ্ঞে, বালস্স পটিসেধনং;

পরং সঙ্কুপিতং ঞত্ৰা, যো সতো উপসম্মতী’’তি.

‘‘ভাসিতায খো পন, ভিক্খৰে, সক্কেন দেৰানমিন্দেন গাথায, দেৰা অনুমোদিংসু, অসুরা তুণ্হী অহেসুং. অথ খো, ভিক্খৰে, সক্কো দেৰানমিন্দো ৰেপচিত্তিং অসুরিন্দং এতদৰোচ – ‘ভণ, ৰেপচিত্তি, গাথ’ন্তি. এৰং ৰুত্তে, ভিক্খৰে, ৰেপচিত্তি অসুরিন্দো ইমং গাথং অভাসি –

‘‘এতদেৰ তিতিক্খায, ৰজ্জং পস্সামি ৰাসৰ;

যদা নং মঞ্ঞতি বালো, ভযা ম্যাযং তিতিক্খতি;

অজ্ঝারুহতি দুম্মেধো, গোৰ ভিয্যো পলাযিন’’ন্তি.

‘‘ভাসিতায খো পন, ভিক্খৰে, ৰেপচিত্তিনা অসুরিন্দেন গাথায অসুরা অনুমোদিংসু, দেৰা তুণ্হী অহেসুং. অথ খো, ভিক্খৰে, ৰেপচিত্তি অসুরিন্দো সক্কং দেৰানমিন্দং এতদৰোচ – ‘ভণ, দেৰানমিন্দ, গাথ’ন্তি. এৰং ৰুত্তে, ভিক্খৰে, সক্কো দেৰানমিন্দো ইমা গাথাযো অভাসি –

‘‘কামং মঞ্ঞতু ৰা মা ৰা, ভযা ম্যাযং তিতিক্খতি;

সদত্থপরমা অত্থা, খন্ত্যা ভিয্যো ন ৰিজ্জতি.

‘‘যো হৰে বলৰা সন্তো, দুব্বলস্স তিতিক্খতি;

তমাহু পরমং খন্তিং, নিচ্চং খমতি দুব্বলো.

‘‘অবলং তং বলং আহু, যস্স বালবলং বলং;

বলস্স ধম্মগুত্তস্স, পটিৰত্তা ন ৰিজ্জতি.

‘‘তস্সেৰ তেন পাপিযো, যো কুদ্ধং পটিকুজ্ঝতি;

কুদ্ধং অপ্পটিকুজ্ঝন্তো, সঙ্গামং জেতি দুজ্জযং.

‘‘উভিন্নমত্থং চরতি, অত্তনো চ পরস্স চ;

পরং সঙ্কুপিতং ঞত্ৰা, যো সতো উপসম্মতি.

‘‘উভিন্নং তিকিচ্ছন্তানং, অত্তনো চ পরস্স চ;

জনা মঞ্ঞন্তি বালোতি, যে ধম্মস্স অকোৰিদা’’তি.

‘‘ভাসিতাসু খো পন, ভিক্খৰে, সক্কেন দেৰানমিন্দেন গাথাসু, দেৰা অনুমোদিংসু, অসুরা তুণ্হী অহেসুং. অথ খো, ভিক্খৰে, দেৰানঞ্চ অসুরানঞ্চ পারিসজ্জা এতদৰোচুং – ‘ভাসিতা খো ৰেপচিত্তিনা অসুরিন্দেন গাথাযো. তা চ খো সদণ্ডাৰচরা সসত্থাৰচরা, ইতি ভণ্ডনং ইতি ৰিগ্গহো ইতি কলহো. ভাসিতা খো [ভাসিতা খো পন (সী.)] সক্কেন দেৰানমিন্দেন গাথাযো. তা চ খো অদণ্ডাৰচরা অসত্থাৰচরা, ইতি অভণ্ডনং ইতি অৰিগ্গহো ইতি অকলহো. সক্কস্স দেৰানমিন্দস্স সুভাসিতেন জযো’তি. ইতি খো, ভিক্খৰে সক্কস্স দেৰানমিন্দস্স সুভাসিতেন জযো অহোসী’’তি.