৩. ধজগ্গসুত্তং

২৪৯. সাৰত্থিযং. তত্র খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘ভূতপুব্বং, ভিক্খৰে, দেৰাসুরসঙ্গামো সমুপব্যূল়্হো অহোসি. অথ খো, ভিক্খৰে, সক্কো দেৰানমিন্দো দেৰে তাৰতিংসে আমন্তেসি –

‘সচে, মারিসা, দেৰানং সঙ্গামগতানং উপ্পজ্জেয্য ভযং ৰা ছম্ভিতত্তং ৰা লোমহংসো ৰা, মমেৰ তস্মিং সমযে ধজগ্গং উল্লোকেয্যাথ. মমঞ্হি ৰো ধজগ্গং উল্লোকযতং যং ভৰিস্সতি ভযং ৰা ছম্ভিতত্তং ৰা লোমহংসো ৰা, সো পহীযিস্সতি’.

‘নো চে মে ধজগ্গং উল্লোকেয্যাথ, অথ পজাপতিস্স দেৰরাজস্স ধজগ্গং উল্লোকেয্যাথ. পজাপতিস্স হি ৰো দেৰরাজস্স ধজগ্গং উল্লোকযতং যং ভৰিস্সতি ভযং ৰা ছম্ভিতত্তং ৰা লোমহংসো ৰা, সো পহীযিস্সতি’.

‘নো চে পজাপতিস্স দেৰরাজস্স ধজগ্গং উল্লোকেয্যাথ, অথ ৰরুণস্স দেৰরাজস্স ধজগ্গং উল্লোকেয্যাথ. ৰরুণস্স হি ৰো দেৰরাজস্স ধজগ্গং উল্লোকযতং যং ভৰিস্সতি ভযং ৰা ছম্ভিতত্তং ৰা লোমহংসো ৰা, সো পহীযিস্সতি’.

‘নো চে ৰরুণস্স দেৰরাজস্স ধজগ্গং উল্লোকেয্যাথ, অথ ঈসানস্স দেৰরাজস্স ধজগ্গং উল্লোকেয্যাথ. ঈসানস্স হি ৰো দেৰরাজস্স ধজগ্গং উল্লোকযতং যং ভৰিস্সতি ভযং ৰা ছম্ভিতত্তং ৰা লোমহংসো ৰা, সো পহীযিস্সতী’’’তি.

‘‘তং খো পন, ভিক্খৰে, সক্কস্স ৰা দেৰানমিন্দস্স ধজগ্গং উল্লোকযতং, পজাপতিস্স ৰা দেৰরাজস্স ধজগ্গং উল্লোকযতং, ৰরুণস্স ৰা দেৰরাজস্স ধজগ্গং উল্লোকযতং, ঈসানস্স ৰা দেৰরাজস্স ধজগ্গং উল্লোকযতং যং ভৰিস্সতি ভযং ৰা ছম্ভিতত্তং ৰা লোমহংসো ৰা, সো পহীযেথাপি নোপি পহীযেথ [নো পহীযেথ (ক.)].

‘‘তং কিস্স হেতু? সক্কো হি, ভিক্খৰে, দেৰানমিন্দো অৰীতরাগো অৰীতদোসো অৰীতমোহো ভীরু ছম্ভী উত্রাসী পলাযীতি.

‘‘অহঞ্চ খো, ভিক্খৰে, এৰং ৰদামি – ‘সচে তুম্হাকং, ভিক্খৰে, অরঞ্ঞগতানং ৰা রুক্খমূলগতানং ৰা সুঞ্ঞাগারগতানং ৰা উপ্পজ্জেয্য ভযং ৰা ছম্ভিতত্তং ৰা লোমহংসো ৰা, মমেৰ তস্মিং সমযে অনুস্সরেয্যাথ – ইতিপি সো ভগৰা অরহং সম্মাসম্বুদ্ধো ৰিজ্জাচরণসম্পন্নো সুগতো লোকৰিদূ অনুত্তরো পুরিসদম্মসারথি সত্থা দেৰমনুস্সানং বুদ্ধো ভগৰা’তি. মমঞ্হি ৰো, ভিক্খৰে, অনুস্সরতং যং ভৰিস্সতি ভযং ৰা ছম্ভিতত্তং ৰা লোমহংসো ৰা, সো পহীযিস্সতি.

‘‘নো চে মং অনুস্সরেয্যাথ, অথ ধম্মং অনুস্সরেয্যাথ – ‘স্ৰাক্খাতো ভগৰতা ধম্মো সন্দিট্ঠিকো অকালিকো এহিপস্সিকো ওপনেয্যিকো পচ্চত্তং ৰেদিতব্বো ৰিঞ্ঞূহী’তি. ধম্মঞ্হি ৰো, ভিক্খৰে, অনুস্সরতং যং ভৰিস্সতি ভযং ৰা ছম্ভিতত্তং ৰা লোমহংসো ৰা, সো পহীযিস্সতি.

‘‘নো চে ধম্মং অনুস্সরেয্যাথ, অথ সঙ্ঘং অনুস্সরেয্যাথ – ‘সুপ্পটিপন্নো ভগৰতো সাৰকসঙ্ঘো উজুপ্পটিপন্নো ভগৰতো সাৰকসঙ্ঘো ঞাযপ্পটিপন্নো ভগৰতো সাৰকসঙ্ঘো সামীচিপ্পটিপন্নো ভগৰতো সাৰকসঙ্ঘো, যদিদং চত্তারি পুরিসযুগানি অট্ঠ পুরিসপুগ্গলা এস ভগৰতো সাৰকসঙ্ঘো, আহুনেয্যো পাহুনেয্যো দক্খিণেয্যো অঞ্জলিকরণীযো অনুত্তরং পুঞ্ঞক্খেত্তং লোকস্সা’তি. সঙ্ঘঞ্হি ৰো, ভিক্খৰে, অনুস্সরতং যং ভৰিস্সতি ভযং ৰা ছম্ভিতত্তং ৰা লোমহংসো ৰা, সো পহীযিস্সতি.

‘‘তং কিস্স হেতু? তথাগতো হি, ভিক্খৰে, অরহং সম্মাসম্বুদ্ধো ৰীতরাগো ৰীতদোসো ৰীতমোহো অভীরু অচ্ছম্ভী অনুত্রাসী অপলাযী’’তি. ইদমৰোচ ভগৰা. ইদং ৰত্ৰান সুগতো অথাপরং এতদৰোচ সত্থা –

‘‘অরঞ্ঞে রুক্খমূলে ৰা, সুঞ্ঞাগারেৰ ভিক্খৰো;

অনুস্সরেথ [অনুস্সরেয্যাথ (ক.) পদসিদ্ধি পন চিন্তেতব্বা] সম্বুদ্ধং, ভযং তুম্হাক নো সিযা.

‘‘নো চে বুদ্ধং সরেয্যাথ, লোকজেট্ঠং নরাসভং;

অথ ধম্মং সরেয্যাথ, নিয্যানিকং সুদেসিতং.

‘‘নো চে ধম্মং সরেয্যাথ, নিয্যানিকং সুদেসিতং;

অথ সঙ্ঘং সরেয্যাথ, পুঞ্ঞক্খেত্তং অনুত্তরং.

‘‘এৰং বুদ্ধং সরন্তানং, ধম্মং সঙ্ঘঞ্চ ভিক্খৰো;

ভযং ৰা ছম্ভিতত্তং ৰা, লোমহংসো ন হেস্সতী’’তি.