২. সুসীমসুত্তং

২৪৮. সাৰত্থিযং. তত্র খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘ভূতপুব্বং, ভিক্খৰে, অসুরা দেৰে অভিযংসু. অথ খো, ভিক্খৰে, সক্কো দেৰানমিন্দো সুসীমং [সুসিমং (স্যা. কং. ক.)] দেৰপুত্তং আমন্তেসি – ‘এতে, তাত সুসীম, অসুরা দেৰে অভিযন্তি. গচ্ছ, তাত সুসীম, অসুরে পচ্চুয্যাহী’তি. ‘এৰং ভদ্দন্তৰা’তি খো, ভিক্খৰে, সুসীমো দেৰপুত্তো সক্কস্স দেৰানমিন্দস্স পটিস্সুত্ৰা পমাদং আপাদেসি. দুতিযম্পি খো, ভিক্খৰে, সক্কো দেৰানমিন্দো সুসীমং দেৰপুত্তং আমন্তেসি…পে… দুতিযম্পি পমাদং আপাদেসি. ততিযম্পি খো, ভিক্খৰে, সক্কো দেৰানমিন্দো সুসীমং দেৰপুত্তং আমন্তেসি…পে… ততিযম্পি পমাদং আপাদেসি. অথ খো, ভিক্খৰে, সক্কো দেৰানমিন্দো সুসীমং দেৰপুত্তং গাথায অজ্ঝভাসি –

‘‘অনুট্ঠহং অৰাযামং, সুখং যত্রাধিগচ্ছতি;

সুসীম তত্থ গচ্ছাহি, মঞ্চ তত্থেৰ পাপযা’’তি.

‘‘অলস্ৰস্স অনুট্ঠাতা, ন চ কিচ্চানি কারযে;

সব্বকামসমিদ্ধস্স, তং মে সক্ক ৰরং দিসা’’তি.

‘‘যত্থালসো অনুট্ঠাতা, অচ্চন্তং সুখমেধতি;

সুসীম তত্থ গচ্ছাহি, মঞ্চ তত্থেৰ পাপযা’’তি.

‘‘অকম্মুনা দেৰসেট্ঠ, সক্ক ৰিন্দেমু যং সুখং;

অসোকং অনুপাযাসং, তং মে সক্ক ৰরং দিসা’’তি.

‘‘সচে অত্থি অকম্মেন, কোচি ক্ৰচি ন জীৰতি;

নিব্বানস্স হি সো মগ্গো, সুসীম তত্থ গচ্ছাহি;

মঞ্চ তত্থেৰ পাপযা’’তি.

‘‘সো হি নাম, ভিক্খৰে, সক্কো দেৰানমিন্দো সকং পুঞ্ঞফলং উপজীৰমানো দেৰানং তাৰতিংসানং ইস্সরিযাধিপচ্চং রজ্জং কারেন্তো উট্ঠানৰীরিযস্স ৰণ্ণৰাদী ভৰিস্সতি. ইধ খো তং, ভিক্খৰে, সোভেথ, যং তুম্হে এৰং স্ৰাক্খাতে ধম্মৰিনযে পব্বজিতা সমানা উট্ঠহেয্যাথ ঘটেয্যাথ ৰাযমেয্যাথ অপ্পত্তস্স পত্তিযা, অনধিগতস্স অধিগমায, অসচ্ছিকতস্স সচ্ছিকিরিযাযা’’তি.