১০. সমুদ্দকসুত্তং

২৫৬. সাৰত্থিযং. ‘‘ভূতপুব্বং, ভিক্খৰে, সম্বহুলা ইসযো সীলৰন্তো কল্যাণধম্মা সমুদ্দতীরে পণ্ণকুটীসু সম্মন্তি. তেন খো পন সমযেন দেৰাসুরসঙ্গামো সমুপব্যূল়্হো অহোসি. অথ খো, ভিক্খৰে, তেসং ইসীনং সীলৰন্তানং কল্যাণধম্মানং এতদহোসি – ‘ধম্মিকা খো দেৰা, অধম্মিকা অসুরা. সিযাপি নো অসুরতো ভযং. যংনূন মযং সম্বরং অসুরিন্দং উপসঙ্কমিত্ৰা অভযদক্খিণং যাচেয্যামা’’’তি. ‘‘অথ খো, ভিক্খৰে, তে ইসযো সীলৰন্তো কল্যাণধম্মা – সেয্যথাপি নাম বলৰা পুরিসো সমিঞ্জিতং ৰা বাহং পসারেয্য, পসারিতং ৰা বাহং সমিঞ্জেয্য এৰমেৰ – সমুদ্দতীরে পণ্ণকুটীসু অন্তরহিতা সম্বরস্স অসুরিন্দস্স সম্মুখে পাতুরহেসুং. অথ খো, ভিক্খৰে, তে ইসযো সীলৰন্তো কল্যাণধম্মা সম্বরং অসুরিন্দং গাথায অজ্ঝভাসিংসু –

‘‘ইসযো সম্বরং পত্তা, যাচন্তি অভযদক্খিণং;

কামংকরো হি তে দাতুং, ভযস্স অভযস্স ৰা’’তি.

‘‘ইসীনং অভযং নত্থি, দুট্ঠানং সক্কসেৰিনং;

অভযং যাচমানানং, ভযমেৰ দদামি ৰো’’তি.

‘‘অভযং যাচমানানং, ভযমেৰ দদাসি নো;

পটিগ্গণ্হাম তে এতং, অক্খযং হোতু তে ভযং.

‘‘যাদিসং ৰপতে বীজং, তাদিসং হরতে ফলং;

কল্যাণকারী কল্যাণং, পাপকারী চ পাপকং;

পৰুত্তং তাত তে বীজং, ফলং পচ্চনুভোস্সসী’’তি.

‘‘অথ খো, ভিক্খৰে, তে ইসযো সীলৰন্তো কল্যাণধম্মা সম্বরং অসুরিন্দং অভিসপিত্ৰা – সেয্যথাপি নাম বলৰা পুরিসো সমিঞ্জিতং ৰা বাহং পসারেয্য, পসারিতং ৰা বাহং সমিঞ্জেয্য এৰমেৰ – সম্বরস্স অসুরিন্দস্স সম্মুখে অন্তরহিতা সমুদ্দতীরে পণ্ণকুটীসু পাতুরহেসুং. অথ খো, ভিক্খৰে, সম্বরো অসুরিন্দো তেহি ইসীহি সীলৰন্তেহি কল্যাণধম্মেহি অভিসপিতো রত্তিযা সুদং তিক্খত্তুং উব্বিজ্জী’’তি.

পঠমো ৰগ্গো.

তস্সুদ্দানং –

সুৰীরং সুসীমঞ্চেৰ, ধজগ্গং ৰেপচিত্তিনো;

সুভাসিতং জযঞ্চেৰ, কুলাৰকং নদুব্ভিযং;

ৰেরোচন অসুরিন্দো, ইসযো অরঞ্ঞকঞ্চেৰ;

ইসযো চ সমুদ্দকাতি.