২. দুতিযৰগ্গো

১. ৰতপদসুত্তং

২৫৭. সাৰত্থিযং. ‘‘সক্কস্স, ভিক্খৰে, দেৰানমিন্দস্স পুব্বে মনুস্সভূতস্স সত্ত ৰতপদানি [ৰত্তপদানি (ক.)] সমত্তানি সমাদিন্নানি অহেসুং, যেসং সমাদিন্নত্তা সক্কো সক্কত্তং অজ্ঝগা. কতমানি সত্ত ৰতপদানি? যাৰজীৰং মাতাপেত্তিভরো অস্সং, যাৰজীৰং কুলে জেট্ঠাপচাযী অস্সং, যাৰজীৰং সণ্হৰাচো অস্সং, যাৰজীৰং অপিসুণৰাচো অস্সং, যাৰজীৰং ৰিগতমলমচ্ছেরেন চেতসা অগারং অজ্ঝাৰসেয্যং মুত্তচাগো পযতপাণি ৰোস্সগ্গরতো যাচযোগো দানসংৰিভাগরতো, যাৰজীৰং সচ্চৰাচো অস্সং, যাৰজীৰং অক্কোধনো অস্সং – সচেপি মে কোধো উপ্পজ্জেয্য, খিপ্পমেৰ নং পটিৰিনেয্য’’ন্তি. ‘‘সক্কস্স, ভিক্খৰে, দেৰানমিন্দস্স পুব্বে মনুস্সভূতস্স ইমানি সত্ত ৰতপদানি সমত্তানি সমাদিন্নানি অহেসুং, যেসং সমাদিন্নত্তা সক্কো সক্কত্তং অজ্ঝগা’’তি.

‘‘মাতাপেত্তিভরং জন্তুং, কুলে জেট্ঠাপচাযিনং;

সণ্হং সখিলসম্ভাসং, পেসুণেয্যপ্পহাযিনং.

‘‘মচ্ছেরৰিনযে যুত্তং, সচ্চং কোধাভিভুং নরং;

তং ৰে দেৰা তাৰতিংসা, আহু সপ্পুরিসো ইতী’’তি.

২. সক্কনামসুত্তং

২৫৮. সাৰত্থিযং জেতৰনে. তত্র খো ভগৰা ভিক্খূ এতদৰোচ – ‘‘সক্কো, ভিক্খৰে, দেৰানমিন্দো পুব্বে মনুস্সভূতো সমানো মঘো নাম মাণৰো অহোসি, তস্মা মঘৰাতি ৰুচ্চতি.

‘‘সক্কো, ভিক্খৰে, দেৰানমিন্দো পুব্বে মনুস্সভূতো সমানো পুরে [পুরে পুরে (সী. পী.)] দানং অদাসি, তস্মা পুরিন্দদোতি ৰুচ্চতি.

‘‘সক্কো, ভিক্খৰে, দেৰানমিন্দো পুব্বে মনুস্সভূতো সমানো সক্কচ্চং দানং অদাসি, তস্মা সক্কোতি ৰুচ্চতি.

‘‘সক্কো, ভিক্খৰে, দেৰানমিন্দো পুব্বে মনুস্সভূতো সমানো আৰসথং অদাসি, তস্মা ৰাসৰোতি ৰুচ্চতি.

‘‘সক্কো, ভিক্খৰে, দেৰানমিন্দো সহস্সম্পি অত্থানং মুহুত্তেন চিন্তেতি, তস্মা সহস্সক্খোতি ৰুচ্চতি.

‘‘সক্কস্স, ভিক্খৰে, দেৰানমিন্দস্স সুজা নাম অসুরকঞ্ঞা পজাপতি, তস্মা সুজম্পতীতি ৰুচ্চতি.

‘‘সক্কো, ভিক্খৰে, দেৰানমিন্দো দেৰানং তাৰতিংসানং ইস্সরিযাধিপচ্চং রজ্জং কারেতি, তস্মা দেৰানমিন্দোতি ৰুচ্চতি.

‘‘সক্কস্স, ভিক্খৰে দেৰানমিন্দস্স পুব্বে মনুস্সভূতস্স সত্ত ৰতপদানি সমত্তানি সমাদিন্নানি অহেসুং, যেসং সমাদিন্নত্তা সক্কো সক্কত্তং অজ্ঝগা. কতমানি সত্ত ৰতপদানি? যাৰজীৰং মাতাপেত্তিভরো অস্সং, যাৰজীৰং কুলে জেট্ঠাপচাযী অস্সং, যাৰজীৰং সণ্হৰাচো অস্সং, যাৰজীৰং অপিসুণৰাচো অস্সং, যাৰজীৰং ৰিগতমলমচ্ছেরেন চেতসা অগারং অজ্ঝাৰসেয্যং মুত্তচাগো পযতপাণি ৰোস্সগ্গরতো যাচযোগো দানসংৰিভাগরতো, যাৰজীৰং সচ্চৰাচো অস্সং, যাৰজীৰং অক্কোধনো অস্সং – সচেপি মে কোধো উপ্পজ্জেয্য, খিপ্পমেৰ নং পটিৰিনেয্য’’ন্তি. ‘‘সক্কস্স, ভিক্খৰে, দেৰানমিন্দস্স পুব্বে মনুস্সভূতস্স ইমানি সত্ত ৰতপদানি সমত্তানি সমাদিন্নানি অহেসুং, যেসং সমাদিন্নত্তা সক্কো সক্কত্তং অজ্ঝগা’’তি.

‘‘মাতাপেত্তিভরং জন্তুং, কুলে জেট্ঠাপচাযিনং;

সণ্হং সখিলসম্ভাসং, পেসুণেয্যপ্পহাযিনং.

‘‘মচ্ছেরৰিনযে যুত্তং, সচ্চং কোধাভিভুং নরং;

তং ৰে দেৰা তাৰতিংসা, আহু সপ্পুরিসো ইতী’’তি.

৩. মহালিসুত্তং

২৫৯. এৰং মে সুতং – একং সমযং ভগৰা ৰেসালিযং ৰিহরতি মহাৰনে কূটাগারসালাযং. অথ খো মহালি লিচ্ছৰী যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো মহালি লিচ্ছৰী ভগৰন্তং এতদৰোচ –

‘‘দিট্ঠো খো, ভন্তে, ভগৰতা সক্কো দেৰানমিন্দো’’তি?

‘‘দিট্ঠো খো মে, মহালি, সক্কো দেৰানমিন্দো’’তি.

‘‘সো হি নূন, ভন্তে, সক্কপতিরূপকো ভৰিস্সতি. দুদ্দসো হি, ভন্তে, সক্কো দেৰানমিন্দো’’তি.

‘‘সক্কঞ্চ খ্ৰাহং, মহালি, পজানামি সক্ককরণে চ ধম্মে, যেসং ধম্মানং সমাদিন্নত্তা সক্কো সক্কত্তং অজ্ঝগা, তঞ্চ পজানামি.

‘‘সক্কো, মহালি, দেৰানমিন্দো পুব্বে মনুস্সভূতো সমানো মঘো নাম মাণৰো অহোসি, তস্মা মঘৰাতি ৰুচ্চতি.

‘‘সক্কো, মহালি, দেৰানমিন্দো পুব্বে মনুস্সভূতো সমানো সক্কচ্চং দানং অদাসি, তস্মা সক্কোতি ৰুচ্চতি.

‘‘সক্কো, মহালি, দেৰানমিন্দো পুব্বে মনুস্সভূতো সমানো পুরে দানং অদাসি, তস্মা পুরিন্দদোতি ৰুচ্চতি.

‘‘সক্কো, মহালি, দেৰানমিন্দো পুব্বে মনুস্সভূতো সমানো আৰসথং অদাসি, তস্মা ৰাসৰোতি ৰুচ্চতি.

‘‘সক্কো, মহালি, দেৰানমিন্দো সহস্সম্পি অত্থানং মুহুত্তেন চিন্তেতি, তস্মা সহস্সক্খোতি ৰুচ্চতি.

‘‘সক্কস্স, মহালি, দেৰানমিন্দস্স সুজা নাম অসুরকঞ্ঞা পজাপতি, তস্মা সুজম্পতীতি ৰুচ্চতি.

‘‘সক্কো, মহালি, দেৰানমিন্দো দেৰানং তাৰতিংসানং ইস্সরিযাধিপচ্চং রজ্জং কারেতি, তস্মা দেৰানমিন্দোতি ৰুচ্চতি.

‘‘সক্কস্স, মহালি, দেৰানমিন্দস্স পুব্বে মনুস্সভূতস্স সত্ত ৰতপদানি সমত্তানি সমাদিন্নানি অহেসুং, যেসং সমাদিন্নত্তা সক্কো সক্কত্তং অজ্ঝগা. কতমানি সত্ত ৰতপদানি? যাৰজীৰং মাতাপেত্তিভরো অস্সং, যাৰজীৰং কুলে জেট্ঠাপচাযী অস্সং, যাৰজীৰং সণ্হৰাচো অস্সং, যাৰজীৰং অপিসুণৰাচো অস্সং, যাৰজীৰং ৰিগতমলমচ্ছেরেন চেতসা অগারং অজ্ঝাৰসেয্যং মুত্তচাগো পযতপাণি ৰোস্সগ্গরতো যাচযোগো দানসংৰিভাগরতো, যাৰজীৰং সচ্চৰাচো অস্সং, যাৰজীৰং অক্কোধনো অস্সং – সচেপি মে কোধো উপ্পজেয্য, খিপ্পমেৰ নং পটিৰিনেয্য’’ন্তি. ‘‘সক্কস্স, মহালি, দেৰানমিন্দস্স পুব্বে মনুস্সভূতস্স ইমানি সত্ত ৰতপদানি সমত্তানি সমাদিন্নানি অহেসুং, যেসং সমাদিন্নত্তা সক্কো সক্কত্তং অজ্ঝগা’’তি.

‘‘মাতাপেত্তিভরং জন্তুং, কুলে জেট্ঠাপচাযিনং;

সণ্হং সখিলসম্ভাসং, পেসুণেয্যপ্পহাযিনং.

‘‘মচ্ছেরৰিনযে যুত্তং, সচ্চং কোধাভিভুং নরং;

তং ৰে দেৰা তাৰতিংসা, আহু সপ্পুরিসো ইতী’’তি.

৪. দলিদ্দসুত্তং

২৬০. একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে. তত্র খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ –

‘‘ভূতপুব্বং, ভিক্খৰে, অঞ্ঞতরো পুরিসো ইমস্মিংযেৰ রাজগহে মনুস্সদলিদ্দো [মনুস্সদল়িদ্দো (সী. স্যা. কং.)] অহোসি মনুস্সকপণো মনুস্সৰরাকো. সো তথাগতপ্পৰেদিতে ধম্মৰিনযে সদ্ধং সমাদিযি, সীলং সমাদিযি, সুতং সমাদিযি, চাগং সমাদিযি, পঞ্ঞং সমাদিযি. সো তথাগতপ্পৰেদিতে ধম্মৰিনযে সদ্ধং সমাদিযিত্ৰা সীলং সমাদিযিত্ৰা সুতং সমাদিযিত্ৰা চাগং সমাদিযিত্ৰা পঞ্ঞং সমাদিযিত্ৰা কাযস্স ভেদা পরং মরণা সুগতিং সগ্গং লোকং উপপজ্জি দেৰানং তাৰতিংসানং সহব্যতং. সো অঞ্ঞে দেৰে অতিরোচতি ৰণ্ণেন চেৰ যসসা চ. তত্র সুদং, ভিক্খৰে, দেৰা তাৰতিংসা উজ্ঝাযন্তি খিয্যন্তি ৰিপাচেন্তি – ‘অচ্ছরিযং ৰত ভো, অব্ভুতং ৰত ভো! অযঞ্হি দেৰপুত্তো পুব্বে মনুস্সভূতো সমানো মনুস্সদলিদ্দো অহোসি মনুস্সকপণো মনুস্সৰরাকো; সো কাযস্স ভেদা পরং মরণা সুগতিং সগ্গং লোকং উপপন্নো দেৰানং তাৰতিংসানং সহব্যতং. সো অঞ্ঞে দেৰে অতিরোচতি ৰণ্ণেন চেৰ যসসা চা’’’তি.

‘‘অথ খো, ভিক্খৰে, সক্কো দেৰানমিন্দো দেৰে তাৰতিংসে আমন্তেসি – ‘মা খো তুম্হে, মারিসা, এতস্স দেৰপুত্তস্স উজ্ঝাযিত্থ. এসো খো, মারিসা, দেৰপুত্তো পুব্বে মনুস্সভূতো সমানো তথাগতপ্পৰেদিতে ধম্মৰিনযে সদ্ধং সমাদিযি, সীলং সমাদিযি, সুতং সমাদিযি, চাগং সমাদিযি, পঞ্ঞং সমাদিযি. সো তথাগতপ্পৰেদিতে ধম্মৰিনযে সদ্ধং সমাদিযিত্ৰা সীলং সমাদিযিত্ৰা সুতং সমাদিযিত্ৰা চাগং সমাদিযিত্ৰা পঞ্ঞং সমাদিযিত্ৰা কাযস্স ভেদা পরং মরণা সুগতিং সগ্গং লোকং উপপন্নো দেৰানং তাৰতিংসানং সহব্যতং. সো অঞ্ঞে দেৰে অতিরোচতি ৰণ্ণেন চেৰ যসসা চা’’’তি. অথ খো, ভিক্খৰে, সক্কো দেৰানমিন্দো দেৰে তাৰতিংসে অনুনযমানো তাযং ৰেলাযং ইমা গাথাযো অভাসি –

‘‘যস্স সদ্ধা তথাগতে, অচলা সুপ্পতিট্ঠিতা;

সীলঞ্চ যস্স কল্যাণং, অরিযকন্তং পসংসিতং.

‘‘সঙ্ঘে পসাদো যস্সত্থি, উজুভূতঞ্চ দস্সনং;

অদলিদ্দোতি তং আহু, অমোঘং তস্স জীৰিতং.

‘‘তস্মা সদ্ধঞ্চ সীলঞ্চ, পসাদং ধম্মদস্সনং;

অনুযুঞ্জেথ মেধাৰী, সরং বুদ্ধান সাসন’’ন্তি.

৫. রামণেয্যকসুত্তং

২৬১. সাৰত্থিযং জেতৰনে. অথ খো সক্কো দেৰানমিন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি. একমন্তং ঠিতো খো সক্কো দেৰানমিন্দো ভগৰন্তং এতদৰোচ – ‘‘কিং নু খো, ভন্তে, ভূমিরামণেয্যক’’ন্তি?

‘‘আরামচেত্যা ৰনচেত্যা, পোক্খরঞ্ঞো সুনিম্মিতা;

মনুস্সরামণেয্যস্স, কলং নাগ্ঘন্তি সোল়সিং.

‘‘গামে ৰা যদি ৰারঞ্ঞে, নিন্নে ৰা যদি ৰা থলে;

যত্থ অরহন্তো ৰিহরন্তি, তং ভূমিরামণেয্যক’’ন্তি.

৬. যজমানসুত্তং

২৬২. একং সমযং ভগৰা রাজগহে ৰিহরতি গিজ্ঝকূটে পব্বতে. অথ খো সক্কো দেৰানমিন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি. একমন্তং ঠিতো খো সক্কো দেৰানমিন্দো ভগৰন্তং গাথায অজ্ঝভাসি –

‘‘যজমানানং মনুস্সানং, পুঞ্ঞপেক্খান পাণিনং;

করোতং ওপধিকং পুঞ্ঞং, কত্থ দিন্নং মহপ্ফল’’ন্তি.

‘‘চত্তারো চ পটিপন্না, চত্তারো চ ফলে ঠিতা;

এস সঙ্ঘো উজুভূতো, পঞ্ঞাসীলসমাহিতো.

‘‘যজমানানং মনুস্সানং, পুঞ্ঞপেক্খান পাণিনং;

করোতং ওপধিকং পুঞ্ঞং, সঙ্ঘে দিন্নং মহপ্ফল’’ন্তি.

৭. বুদ্ধৰন্দনাসুত্তং

২৬৩. সাৰত্থিযং জেতৰনে. তেন খো পন সমযেন ভগৰা দিৰাৰিহারগতো হোতি পটিসল্লীনো. অথ খো সক্কো চ দেৰানমিন্দো ব্রহ্মা চ সহম্পতি যেন ভগৰা তেনুপসঙ্কমিংসু; উপসঙ্কমিত্ৰা পচ্চেকং দ্ৰারবাহং নিস্সায অট্ঠংসু. অথ খো সক্কো দেৰানমিন্দো ভগৰতো সন্তিকে ইমং গাথং অভাসি –

‘‘উট্ঠেহি ৰীর ৰিজিতসঙ্গাম,

পন্নভার অনণ ৰিচর লোকে;

চিত্তঞ্চ তে সুৰিমুত্তং,

চন্দো যথা পন্নরসায রত্তি’’ন্তি.

‘‘ন খো, দেৰানমিন্দ, তথাগতা এৰং ৰন্দিতব্বা. এৰঞ্চ খো, দেৰানমিন্দ, তথাগতা ৰন্দিতব্বা –

‘‘উট্ঠেহি ৰীর ৰিজিতসঙ্গাম,

সত্থৰাহ অনণ ৰিচর লোকে;

দেসস্সু ভগৰা ধম্মং,

অঞ্ঞাতারো ভৰিস্সন্তী’’তি.

৮. গহট্ঠৰন্দনাসুত্তং

২৬৪. সাৰত্থিযং. তত্র…পে… এতদৰোচ – ‘‘ভূতপুব্বং, ভিক্খৰে, সক্কো দেৰানমিন্দো মাতলিং সঙ্গাহকং আমন্তেসি – ‘যোজেহি, সম্ম মাতলি, সহস্সযুত্তং আজঞ্ঞরথং. উয্যানভূমিং গচ্ছাম সুভূমিং দস্সনাযা’তি. ‘এৰং ভদ্দন্তৰা’তি খো, ভিক্খৰে, মাতলি সঙ্গাহকো সক্কস্স দেৰানমিন্দস্স পটিস্সুত্ৰা সহস্সযুত্তং আজঞ্ঞরথং যোজেত্ৰা সক্কস্স দেৰানমিন্দস্স পটিৰেদেসি – ‘যুত্তো খো তে, মারিস, সহস্সযুত্তো আজঞ্ঞরথো. যস্স দানি কালং মঞ্ঞসী’’’তি. অথ খো, ভিক্খৰে, সক্কো দেৰানমিন্দো ৰেজযন্তপাসাদা ওরোহন্তো অঞ্জলিং কত্ৰা [পঞ্জলিকো (পী.), পঞ্জলিং কত্ৰা (ক.)] সুদং পুথুদ্দিসা নমস্সতি. অথ খো, ভিক্খৰে, মাতলি সঙ্গাহকো সক্কং দেৰানমিন্দং গাথায অজ্ঝভাসি –

‘‘তং নমস্সন্তি তেৰিজ্জা, সব্বে ভুম্মা চ খত্তিযা;

চত্তারো চ মহারাজা, তিদসা চ যসস্সিনো;

অথ কো নাম সো যক্খো, যং ত্ৰং সক্ক নমস্সসী’’তি.

‘‘মং নমস্সন্তি তেৰিজ্জা, সব্বে ভুম্মা চ খত্তিযা;

চত্তারো চ মহারাজা, তিদসা চ যসস্সিনো.

‘‘অহঞ্চ সীলসম্পন্নে, চিররত্তসমাহিতে;

সম্মাপব্বজিতে ৰন্দে, ব্রহ্মচরিযপরাযনে.

‘‘যে গহট্ঠা পুঞ্ঞকরা, সীলৰন্তো উপাসকা;

ধম্মেন দারং পোসেন্তি, তে নমস্সামি মাতলী’’তি.

‘‘সেট্ঠা হি কির লোকস্মিং, যে ত্ৰং সক্ক নমস্সসি;

অহম্পি তে নমস্সামি, যে নমস্সসি ৰাসৰা’’তি.

‘‘ইদং ৰত্ৰান মঘৰা, দেৰরাজা সুজম্পতি;

পুথুদ্দিসা নমস্সিত্ৰা, পমুখো রথমারুহী’’তি.

৯. সত্থারৰন্দনাসুত্তং

২৬৫. সাৰত্থিযং জেতৰনে. ‘‘ভূতপুব্বং, ভিক্খৰে, সক্কো দেৰানমিন্দো মাতলিং সঙ্গাহকং আমন্তেসি – ‘যোজেহি, সম্ম মাতলি, সহস্সযুত্তং আজঞ্ঞরথং, উয্যানভূমিং গচ্ছাম সুভূমিং দস্সনাযা’তি. ‘এৰং ভদ্দন্তৰা’তি খো, ভিক্খৰে, মাতলি সঙ্গাহকো সক্কস্স দেৰানমিন্দস্স পটিস্সুত্ৰা সহস্সযুত্তং আজঞ্ঞরথং যোজেত্ৰা সক্কস্স দেৰানমিন্দস্স পটিৰেদেসি – ‘যুত্তো খো তে, মারিস, সহস্সযুত্তো আজঞ্ঞরথো. যস্স দানি কালং মঞ্ঞসী’’’তি. অথ খো, ভিক্খৰে, সক্কো দেৰানমিন্দো ৰেজযন্তপাসাদা ওরোহন্তো অঞ্জলিং কত্ৰা সুদং ভগৰন্তং নমস্সতি. অথ খো, ভিক্খৰে, মাতলি সঙ্গাহকো সক্কং দেৰানমিন্দং গাথায অজ্ঝভাসি –

‘‘যঞ্হি দেৰা মনুস্সা চ, তং নমস্সন্তি ৰাসৰ;

অথ কো নাম সো যক্খো, যং ত্ৰং সক্ক নমস্সসী’’তি.

‘‘যো ইধ সম্মাসম্বুদ্ধো, অস্মিং লোকে সদেৰকে;

অনোমনামং সত্থারং, তং নমস্সামি মাতলি.

‘‘যেসং রাগো চ দোসো চ, অৰিজ্জা চ ৰিরাজিতা;

খীণাসৰা অরহন্তো, তে নমস্সামি মাতলি.

‘‘যে রাগদোসৰিনযা, অৰিজ্জাসমতিক্কমা;

সেক্খা অপচযারামা, অপ্পমত্তানুসিক্খরে;

তে নমস্সামি মাতলী’’তি.

‘‘সেট্ঠা হি কির লোকস্মিং, যে ত্ৰং সক্ক নমস্সসি;

অহম্পি তে নমস্সামি, যে নমস্সসি ৰাসৰা’’তি.

‘‘ইদং ৰত্ৰান মঘৰা, দেৰরাজা সুজম্পতি;

ভগৰন্তং নমস্সিত্ৰা, পমুখো রথমারুহী’’তি.

১০. সঙ্ঘৰন্দনাসুত্তং

২৬৬. সাৰত্থিযং জেতৰনে. তত্র খো…পে… এতদৰোচ – ‘‘ভূতপুব্বং, ভিক্খৰে, সক্কো দেৰানমিন্দো মাতলিং সঙ্গাহকং আমন্তেসি – ‘যোজেহি, সম্ম মাতলি, সহস্সযুত্তং আজঞ্ঞরথং, উয্যানভূমিং গচ্ছাম সুভূমিং দস্সনাযা’তি. ‘এৰং ভদ্দন্তৰা’তি খো, ভিক্খৰে, মাতলি সঙ্গাহকো সক্কস্স দেৰানমিন্দস্স পটিস্সুত্ৰা, সহস্সযুত্তং আজঞ্ঞরথং যোজেত্ৰা সক্কস্স দেৰানমিন্দস্স পটিৰেদেসি – ‘যুত্তো খো তে, মারিস, সহস্সযুত্তো আজঞ্ঞরথো, যস্স দানি কালং মঞ্ঞসী’’’তি. অথ খো, ভিক্খৰে, সক্কো দেৰানমিন্দো ৰেজযন্তপাসাদা ওরোহন্তো অঞ্জলিং কত্ৰা সুদং ভিক্খুসঙ্ঘং নমস্সতি. অথ খো, ভিক্খৰে, মাতলি সঙ্গাহকো সক্কং দেৰানমিন্দং গাথায অজ্ঝভাসি –

‘‘তঞ্হি এতে নমস্সেয্যুং, পূতিদেহসযা নরা;

নিমুগ্গা কুণপম্হেতে, খুপ্পিপাসসমপ্পিতা.

‘‘কিং নু তেসং পিহযসি, অনাগারান ৰাসৰ;

আচারং ইসিনং ব্রূহি, তং সুণোম ৰচো তৰা’’তি.

‘‘এতং তেসং পিহযামি, অনাগারান মাতলি;

যম্হা গামা পক্কমন্তি, অনপেক্খা ৰজন্তি তে.

‘‘ন তেসং কোট্ঠে ওপেন্তি, ন কুম্ভি [ন কুম্ভা (স্যা. কং. পী. ক.)] ন কল়োপিযং [খল়োপিযং (সী.)];

পরনিট্ঠিতমেসানা [পরনিট্ঠিতমেসনা (স্যা. কং. ক.)], তেন যাপেন্তি সুব্বতা.

‘‘সুমন্তমন্তিনো ধীরা, তুণ্হীভূতা সমঞ্চরা;

দেৰা ৰিরুদ্ধা অসুরেহি, পুথু মচ্চা চ মাতলি.

‘‘অৰিরুদ্ধা ৰিরুদ্ধেসু, অত্তদণ্ডেসু নিব্বুতা;

সাদানেসু অনাদানা, তে নমস্সামি মাতলী’’তি.

‘‘সেট্ঠা হি কির লোকস্মিং, যে ত্ৰং সক্ক নমস্সসি;

অহম্পি তে নমস্সামি, যে নমস্সসি ৰাসৰা’’তি.

‘‘ইদং ৰত্ৰান মঘৰা, দেৰরাজা সুজম্পতি;

ভিক্খুসঙ্ঘং নমস্সিত্ৰা, পমুখো রথমারুহী’’তি.

দুতিযো ৰগ্গো.

তস্সুদ্দানং –

দেৰা পন [ৰ তপদেন (সী. স্যা. কং.)] তযো ৰুত্তা, দলিদ্দঞ্চ রামণেয্যকং;

যজমানঞ্চ ৰন্দনা, তযো সক্কনমস্সনাতি.