৩. ততিযৰগ্গো

১. ছেত্ৰাসুত্তং

২৬৭. সাৰত্থিযং জেতৰনে. অথ খো সক্কো দেৰানমিন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি. একমন্তং ঠিতো খো সক্কো দেৰানমিন্দো ভগৰন্তং গাথায অজ্ঝভাসি –

‘‘কিংসু ছেত্ৰা সুখং সেতি, কিংসু ছেত্ৰা ন সোচতি;

কিস্সস্সু একধম্মস্স, ৰধং রোচেসি গোতমা’’তি.

‘‘কোধং ছেত্ৰা সুখং সেতি, কোধং ছেত্ৰা ন সোচতি;

কোধস্স ৰিসমূলস্স, মধুরগ্গস্স ৰাসৰ;

ৰধং অরিযা পসংসন্তি, তঞ্হি ছেত্ৰা ন সোচতী’’তি.

২. দুব্বণ্ণিযসুত্তং

২৬৮. সাৰত্থিযং জেতৰনে. তত্র খো…পে… এতদৰোচ – ‘‘ভূতপুব্বং, ভিক্খৰে, অঞ্ঞতরো যক্খো দুব্বণ্ণো ওকোটিমকো সক্কস্স দেৰানমিন্দস্স আসনে নিসিন্নো অহোসি. তত্র সুদং, ভিক্খৰে, দেৰা তাৰতিংসা উজ্ঝাযন্তি খিয্যন্তি ৰিপাচেন্তি – ‘অচ্ছরিযং ৰত ভো, অব্ভুতং ৰত, ভো! অযং যক্খো দুব্বণ্ণো ওকোটিমকো সক্কস্স দেৰানমিন্দস্স আসনে নিসিন্নো’’’তি! যথা যথা খো, ভিক্খৰে, দেৰা তাৰতিংসা উজ্ঝাযন্তি খিয্যন্তি ৰিপাচেন্তি, তথা তথা সো যক্খো অভিরূপতরো চেৰ হোতি দস্সনীযতরো চ পাসাদিকতরো চ.

‘‘অথ খো, ভিক্খৰে, দেৰা তাৰতিংসা যেন সক্কো দেৰানমিন্দো তেনুপসঙ্কমিংসু; উপসঙ্কমিত্ৰা সক্কং দেৰানমিন্দং এতদৰোচুং – ‘ইধ তে, মারিস, অঞ্ঞতরো যক্খো দুব্বণ্ণো ওকোটিমকো সক্কস্স দেৰানমিন্দস্স আসনে নিসিন্নো. তত্র সুদং, মারিস, দেৰা তাৰতিংসা উজ্ঝাযন্তি খিয্যন্তি ৰিপাচেন্তি – অচ্ছরিযং ৰত, ভো, অব্ভুতং ৰত, ভো! অযং যক্খো দুব্বণ্ণো ওকোটিমকো সক্কস্স দেৰানমিন্দস্স আসনে নিসিন্নোতি. যথা যথা খো, মারিস, দেৰা উজ্ঝাযন্তি খিয্যন্তি ৰিপাচেন্তি, তথা তথা সো যক্খো অভিরূপতরো চেৰ হোতি দস্সনীযতরো চ পাসাদিকতরো চাতি. সো হি নূন, মারিস, কোধভক্খো যক্খো ভৰিস্সতী’’’তি.

‘‘অথ খো, ভিক্খৰে, সক্কো দেৰানমিন্দো যেন সো কোধভক্খো যক্খো তেনুপসঙ্কমি; উপসঙ্কমিত্ৰা একংসং উত্তরাসঙ্গং করিত্ৰা দক্খিণজাণুমণ্ডলং পথৰিযং নিহন্ত্ৰা যেন সো কোধভক্খো যক্খো তেনঞ্জলিং পণামেত্ৰা তিক্খত্তুং নামং সাৰেতি – ‘সক্কোহং মারিস, দেৰানমিন্দো, সক্কোহং, মারিস, দেৰানমিন্দো’তি. যথা যথা খো, ভিক্খৰে, সক্কো দেৰানমিন্দো নামং সাৰেসি, তথা তথা সো যক্খো দুব্বণ্ণতরো চেৰ অহোসি ওকোটিমকতরো চ. দুব্বণ্ণতরো চেৰ হুত্ৰা ওকোটিমকতরো চ তত্থেৰন্তরধাযী’’তি. অথ খো, ভিক্খৰে, সক্কো দেৰানমিন্দো সকে আসনে নিসীদিত্ৰা দেৰে তাৰতিংসে অনুনযমানো তাযং ৰেলাযং ইমা গাথাযো অভাসি –

‘‘ন সূপহতচিত্তোম্হি, নাৰত্তেন সুৰানযো;

ন ৰো চিরাহং কুজ্ঝামি, কোধো মযি নাৰতিট্ঠতি.

‘‘কুদ্ধাহং ন ফরুসং ব্রূমি, ন চ ধম্মানি কিত্তযে;

সন্নিগ্গণ্হামি অত্তানং, সম্পস্সং অত্থমত্তনো’’তি.

৩. সম্বরিমাযাসুত্তং

২৬৯. সাৰত্থিযং…পে… ভগৰা এতদৰোচ – ‘‘ভূতপুব্বং, ভিক্খৰে, ৰেপচিত্তি অসুরিন্দো আবাধিকো অহোসি দুক্খিতো বাল়্হগিলানো. অথ খো ভিক্খৰে, সক্কো দেৰানমিন্দো যেন ৰেপচিত্তি অসুরিন্দো তেনুপসঙ্কমি গিলানপুচ্ছকো. অদ্দসা খো, ভিক্খৰে, ৰেপচিত্তি অসুরিন্দো সক্কং দেৰানমিন্দং দূরতোৰ আগচ্ছন্তং. দিস্ৰান সক্কং দেৰানমিন্দং এতদৰোচ – ‘তিকিচ্ছ মং দেৰানমিন্দা’তি. ‘ৰাচেহি মং, ৰেপচিত্তি, সম্বরিমায’ন্তি. ‘ন তাৰাহং ৰাচেমি, যাৰাহং, মারিস, অসুরে পটিপুচ্ছামী’’’তি. ‘‘অথ খো, ভিক্খৰে, ৰেপচিত্তি অসুরিন্দো অসুরে পটিপুচ্ছি – ‘ৰাচেমহং, মারিসা, সক্কং দেৰানমিন্দং সম্বরিমায’ন্তি? ‘মা খো ত্ৰং, মারিস, ৰাচেসি সক্কং দেৰানমিন্দং সম্বরিমায’’’ন্তি. অথ খো, ভিক্খৰে, ৰেপচিত্তি অসুরিন্দো সক্কং দেৰানমিন্দং গাথায অজ্ঝভাসি –

‘‘মাযাৰী মঘৰা সক্ক, দেৰরাজ সুজম্পতি;

উপেতি নিরযং ঘোরং, সম্বরোৰ সতং সম’’ন্তি.

৪. অচ্চযসুত্তং

২৭০. সাৰত্থিযং…পে… আরামে. তেন খো পন সমযেন দ্ৰে ভিক্খূ সম্পযোজেসুং. তত্রেকো ভিক্খু অচ্চসরা. অথ খো সো ভিক্খু তস্স ভিক্খুনো সন্তিকে অচ্চযং অচ্চযতো দেসেতি; সো ভিক্খু নপ্পটিগ্গণ্হাতি. অথ খো সম্বহুলা ভিক্খূ যেন ভগৰা তেনুপসঙ্কমিংসু; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদিংসু. একমন্তং নিসিন্না খো তে ভিক্খূ ভগৰন্তং এতদৰোচুং – ‘‘ইধ, ভন্তে, দ্ৰে ভিক্খূ সম্পযোজেসুং, তত্রেকো ভিক্খু অচ্চসরা. অথ খো সো, ভন্তে, ভিক্খু তস্স ভিক্খুনো সন্তিকে অচ্চযং অচ্চযতো দেসেতি, সো ভিক্খু নপ্পটিগ্গণ্হাতী’’তি.

‘‘দ্ৰেমে, ভিক্খৰে, বালা. যো চ অচ্চযং অচ্চযতো ন পস্সতি, যো চ অচ্চযং দেসেন্তস্স যথাধম্মং নপ্পটিগ্গণ্হা’’তি – ইমে খো, ভিক্খৰে, দ্ৰে বালা. ‘‘দ্ৰেমে, ভিক্খৰে, পণ্ডিতা. যো চ অচ্চযং অচ্চযতো পস্সতি, যো চ অচ্চযং দেসেন্তস্স যথাধম্মং পটিগ্গণ্হা’’তি – ইমে খো, ভিক্খৰে, দ্ৰে পণ্ডিতা.

‘‘ভূতপুব্বং, ভিক্খৰে, সক্কো দেৰানমিন্দো সুধম্মাযং সভাযং দেৰে তাৰতিংসে অনুনযমানো তাযং ৰেলাযং ইমং গাথং অভাসি –

‘‘কোধো ৰো ৰসমাযাতু, মা চ মিত্তেহি ৰো জরা;

অগরহিযং মা গরহিত্থ, মা চ ভাসিত্থ পেসুণং;

অথ পাপজনং কোধো, পব্বতোৰাভিমদ্দতী’’তি.

৫. অক্কোধসুত্তং

২৭১. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো ভগৰা ভিক্খূ…পে… ভগৰা এতদৰোচ – ‘‘ভূতপুব্বং, ভিক্খৰে, সক্কো দেৰানমিন্দো সুধম্মাযং সভাযং দেৰে তাৰতিংসে অনুনযমানো তাযং ৰেলাযং ইমং গাথং অভাসি –

‘‘মা ৰো কোধো অজ্ঝভৰি, মা চ কুজ্ঝিত্থ কুজ্ঝতং;

অক্কোধো অৰিহিংসা চ, অরিযেসু চ পটিপদা [ৰসতী সদা (সী. স্যা. কং. পী.)];

অথ পাপজনং কোধো, পব্বতোৰাভিমদ্দতী’’তি.

ততিযো ৰগ্গো.

তস্সুদ্দানং –

ছেত্ৰা দুব্বণ্ণিযমাযা, অচ্চযেন অকোধনো;

দেসিতং বুদ্ধসেট্ঠেন, ইদঞ্হি সক্কপঞ্চকন্তি.

সক্কসংযুত্তং সমত্তং.