৪. মধুরসুত্তং

৩১৭. এৰং মে সুতং – একং সমযং আযস্মা মহাকচ্চানো মধুরাযং ৰিহরতি গুন্দাৰনে. অস্সোসি খো রাজা মাধুরো অৰন্তিপুত্তো – ‘‘সমণো খলু, ভো, কচ্চানো মধুরাযং [মথুরাযং (টীকা)] ৰিহরতি গুন্দাৰনে. তং খো পন ভৰন্তং কচ্চানং এৰং কল্যাণো কিত্তিসদ্দো অব্ভুগ্গতো – ‘পণ্ডিতো ৰিযত্তো মেধাৰী বহুস্সুতো চিত্তকথী কল্যাণপটিভানো ৰুদ্ধো চেৰ অরহা চ’. সাধু খো পন তথারূপানং অরহতং দস্সনং হোতী’’তি. অথ খো রাজা মাধুরো অৰন্তিপুত্তো ভদ্রানি ভদ্রানি যানানি যোজাপেত্ৰা ভদ্রং যানং অভিরুহিত্ৰা ভদ্রেহি ভদ্রেহি যানেহি মধুরায নিয্যাসি মহচ্চরাজানুভাৰেন আযস্মন্তং মহাকচ্চানং দস্সনায. যাৰতিকা যানস্স ভূমি যানেন গন্ত্ৰা যানা পচ্চোরোহিত্ৰা পত্তিকোৰ যেনাযস্মা মহাকচ্চানো তেনুপসঙ্কমি; উপসঙ্কমিত্ৰা আযস্মতা মহাকচ্চানেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো রাজা মাধুরো অৰন্তিপুত্তো আযস্মন্তং মহাকচ্চানং এতদৰোচ – ‘‘ব্রাহ্মণা, ভো কচ্চান, এৰমাহংসু – ‘ব্রাহ্মণোৰ সেট্ঠো ৰণ্ণো, হীনো অঞ্ঞো ৰণ্ণো; ব্রাহ্মণোৰ সুক্কো ৰণ্ণো, কণ্হো অঞ্ঞো ৰণ্ণো; ব্রাহ্মণাৰ সুজ্ঝন্তি, নো অব্রাহ্মণা; ব্রাহ্মণাৰ ব্রহ্মুনো পুত্তা ওরসা মুখতো জাতা ব্রহ্মজা ব্রহ্মনিম্মিতা ব্রহ্মদাযাদা’তি. ইধ ভৰং কচ্চানো কিমক্খাযী’’তি? ‘‘ঘোসোযেৰ খো এসো, মহারাজ, লোকস্মিং – ‘ব্রাহ্মণোৰ সেট্ঠো ৰণ্ণো, হীনো অঞ্ঞো ৰণ্ণো; ব্রাহ্মণোৰ সুক্কো ৰণ্ণো, কণ্হো অঞ্ঞো ৰণ্ণো; ব্রাহ্মণাৰ সুজ্ঝন্তি, নো অব্রাহ্মণা; ব্রাহ্মণাৰ ব্রহ্মুনো পুত্তা ওরসা মুখতো জাতা ব্রহ্মজা ব্রহ্মনিম্মিতা ব্রহ্মদাযাদা’তি. তদমিনাপেতং, মহারাজ, পরিযাযেন ৰেদিতব্বং যথা ঘোসোযেৰেসো লোকস্মিং – ‘ব্রাহ্মণোৰ সেট্ঠো ৰণ্ণো, হীনো অঞ্ঞো ৰণ্ণো…পে… ব্রহ্মদাযাদা’’’তি.

৩১৮. ‘‘তং কিং মঞ্ঞসি, মহারাজ, খত্তিযস্স চেপি ইজ্ঝেয্য ধনেন ৰা ধঞ্ঞেন ৰা রজতেন ৰা জাতরূপেন ৰা খত্তিযোপিস্সাস্স পুব্বুট্ঠাযী পচ্ছানিপাতী কিংকারপটিস্সাৰী মনাপচারী পিযৰাদী… ব্রাহ্মণোপিস্সাস্স… ৰেস্সোপিস্সাস্স… সুদ্দোপিস্সাস্স পুব্বুট্ঠাযী পচ্ছানিপাতী কিংকারপটিস্সাৰী মনাপচারী পিযৰাদী’’তি? ‘‘খত্তিযস্স চেপি, ভো কচ্চান, ইজ্ঝেয্য ধনেন ৰা ধঞ্ঞেন ৰা রজতেন ৰা জাতরূপেন ৰা খত্তিযোপিস্সাস্স পুব্বুট্ঠাযী পচ্ছানিপাতী কিংকারপটিস্সাৰী মনাপচারী পিযৰাদী… ব্রাহ্মণোপিস্সাস্স… ৰেস্সোপিস্সাস্স… সুদ্দোপিস্সাস্স পুব্বুট্ঠাযী পচ্ছানিপাতী কিংকারপটিস্সাৰী মনাপচারী পিযৰাদী’’তি.

‘‘তং কিং মঞ্ঞসি, মহারাজ, ব্রাহ্মণস্স চেপি ইজ্ঝেয্য ধনেন ৰা ধঞ্ঞেন ৰা রজতেন ৰা জাতরূপেন ৰা ব্রাহ্মণোপিস্সাস্স পুব্বুট্ঠাযী পচ্ছানিপাতী কিংকারপটিস্সাৰী মনাপচারী পিযৰাদী… ৰেস্সোপিস্সাস্স… সুদ্দোপিস্সাস্স … খত্তিযোপিস্সাস্স পুব্বুট্ঠাযী পচ্ছানিপাতী কিংকারপটিস্সাৰী মনাপচারী পিযৰাদী’’তি? ‘‘ব্রাহ্মণস্স চেপি, ভো কচ্চান, ইজ্ঝেয্য ধনেন ৰা ধঞ্ঞেন ৰা রজতেন ৰা জাতরূপেন ৰা ব্রাহ্মণোপিস্সাস্স পুব্বুট্ঠাযী পচ্ছানিপাতী কিংকারপটিস্সাৰী মনাপচারী পিযৰাদী… ৰেস্সোপিস্সাস্স… সুদ্দোপিস্সাস্স … খত্তিযোপিস্সাস্স পুব্বুট্ঠাযী পচ্ছানিপাতী কিংকারপটিস্সাৰী মনাপচারী পিযৰাদী’’তি.

‘‘তং কিং মঞ্ঞসি, মহারাজ, ৰেস্সস্স চেপি ইজ্ঝেয্য ধনেন ৰা ধঞ্ঞেন ৰা রজতেন ৰা জাতরূপেন ৰা ৰেস্সোপিস্সাস্স পুব্বুট্ঠাযী পচ্ছানিপাতী কিংকারপটিস্সাৰী মনাপচারী পিযৰাদী… সুদ্দোপিস্সাস্স… খত্তিযোপিস্সাস্স… ব্রাহ্মণোপিস্সাস্স পুব্বুট্ঠাযী পচ্ছানিপাতী কিংকারপটিস্সাৰী মনাপচারী পিযৰাদী’’তি? ‘‘ৰেস্সস্স চেপি, ভো কচ্চান, ইজ্ঝেয্য ধনেন ৰা ধঞ্ঞেন ৰা রজতেন ৰা জাতরূপেন ৰা ৰেস্সোপিস্সাস্স পুব্বুট্ঠাযী পচ্ছানিপাতী কিংকারপটিস্সাৰী মনাপচারী পিযৰাদী… সুদ্দোপিস্সাস্স… খত্তিযোপিস্সাস্স… ব্রাহ্মণোপিস্সাস্স পুব্বুট্ঠাযী পচ্ছানিপাতী কিংকারপটিস্সাৰী মনাপচারী পিযৰাদী’’তি.

‘‘তং কিং মঞ্ঞসি, মহারাজ, সুদ্দস্স চেপি ইজ্ঝেয্য ধনেন ৰা ধঞ্ঞেন ৰা রজতেন ৰা জাতরূপেন ৰা সুদ্দোপিস্সাস্স পুব্বুট্ঠাযী পচ্ছানিপাতী কিংকারপটিস্সাৰী মনাপচারী পিযৰাদী… খত্তিযোপিস্সাস্স… ব্রাহ্মণোপিস্সাস্স… ৰেস্সোপিস্সাস্স পুব্বুট্ঠাযী পচ্ছানিপাতী কিংকারপটিস্সাৰী মনাপচারী পিযৰাদী’’তি? ‘‘সুদ্দস্স চেপি, ভো কচ্চান, ইজ্ঝেয্য ধনেন ৰা ধঞ্ঞেন ৰা রজতেন ৰা জাতরূপেন ৰা সুদ্দোপিস্সাস্স পুব্বুট্ঠাযী পচ্ছানিপাতী কিংকারপটিস্সাৰী মনাপচারী পিযৰাদীতি… খত্তিযোপিস্সাস্স… ব্রাহ্মণোপিস্সাস্স… ৰেস্সোপিস্সাস্স পুব্বুট্ঠাযী পচ্ছানিপাতী কিংকারপটিস্সাৰী মনাপচারী পিযৰাদী’’তি.

‘‘তং কিং মঞ্ঞসি, মহারাজ, যদি এৰং সন্তে, ইমে চত্তারো ৰণ্ণা সমসমা হোন্তি নো ৰা? কথং ৰা তে এত্থ হোতী’’তি? ‘‘অদ্ধা খো, ভো কচ্চান, এৰং সন্তে, ইমে চত্তারো ৰণ্ণা সমসমা হোন্তি. নেসং [নাসং (সী.), নাহং (স্যা. কং.)] এত্থ কিঞ্চি নানাকরণং সমনুপস্সামী’’তি. ‘‘ইমিনাপি খো এতং, মহারাজ, পরিযাযেন ৰেদিতব্বং যথা ঘোসো যেৰেসো লোকস্মিং – ‘ব্রাহ্মণোৰ সেট্ঠো ৰণ্ণো, হীনো অঞ্ঞো ৰণ্ণো…পে… ব্রহ্মদাযাদা’’’তি.

৩১৯. ‘‘তং কিং মঞ্ঞসি, মহারাজ, ইধস্স খত্তিযো পাণাতিপাতী অদিন্নাদাযী কামেসুমিচ্ছাচারী মুসাৰাদী পিসুণৰাচো ফরুসৰাচো সম্ফপ্পলাপী অভিজ্ঝালু ব্যাপন্নচিত্তো মিচ্ছাদিট্ঠি [মিচ্ছাদিট্ঠী (সব্বত্থ)] কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জেয্য নো ৰা? কথং ৰা তে এত্থ হোতী’’তি? ‘‘খত্তিযোপি হি, ভো কচ্চান, পাণাতিপাতী অদিন্নাদাযী কামেসুমিচ্ছাচারী মুসাৰাদী পিসুণৰাচো ফরুসৰাচো সম্ফপ্পলাপী অভিজ্ঝালু ব্যাপন্নচিত্তো মিচ্ছাদিট্ঠি কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জেয্য. এৰং মে এত্থ হোতি, এৰঞ্চ পন মে এতং অরহতং সুত’’ন্তি.

‘‘সাধু সাধু, মহারাজ! সাধু খো তে এতং, মহারাজ, এৰং হোতি, সাধু চ পন তে এতং অরহতং সুতং. তং কিং মঞ্ঞসি, মহারাজ, ইধস্স ব্রাহ্মণো…পে… ইধস্স ৰেস্সো…পে… ইধস্স সুদ্দো পাণাতিপাতী অদিন্নাদাযী…পে… মিচ্ছাদিট্ঠি কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জেয্য নো ৰা? কথং ৰা তে এত্থ হোতী’’তি? ‘‘সুদ্দোপি হি, ভো কচ্চান, পাণাতিপাতী অদিন্নাদাযী…পে… মিচ্ছাদিট্ঠি কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জেয্য. এৰং মে এত্থ হোতি, এৰঞ্চ পন মে এতং অরহতং সুত’’ন্তি.

‘‘সাধু সাধু, মহারাজ! সাধু খো তে এতং, মহারাজ, এৰং হোতি, সাধু চ পন তে এতং অরহতং সুতং. তং কিং মঞ্ঞসি, মহারাজ, যদি এৰং সন্তে, ইমে চত্তারো ৰণ্ণা সমসমা হোন্তি নো ৰা? কথং ৰা তে এত্থ হোতী’’তি? ‘‘অদ্ধা খো, ভো কচ্চান, এৰং সন্তে, ইমে চত্তারো ৰণ্ণা সমসমা হোন্তি. নেসং এত্থ কিঞ্চি নানাকরণং সমনুপস্সামী’’তি. ‘‘ইমিনাপি খো এতং, মহারাজ, পরিযাযেন ৰেদিতব্বং যথা ঘোসো যেৰেসো লোকস্মিং – ‘ব্রাহ্মণোৰ সেট্ঠো ৰণ্ণো, হীনো অঞ্ঞো ৰণ্ণো…পে… ব্রহ্মদাযাদা’’’তি.

৩২০. ‘‘তং কিং মঞ্ঞসি, মহারাজ, ইধস্স খত্তিযো পাণাতিপাতা পটিৰিরতো, অদিন্নাদানা পটিৰিরতো, কামেসুমিচ্ছাচারা পটিৰিরতো, মুসাৰাদা পটিৰিরতো, পিসুণায ৰাচায পটিৰিরতো, ফরুসায ৰাচায পটিৰিরতো, সম্ফপ্পলাপা পটিৰিরতো, অনভিজ্ঝালু অব্যাপন্নচিত্তো সম্মাদিট্ঠি [সম্মাদিট্ঠী (স্যা. কং. পী. ক.)] কাযস্স ভেদা পরং মরণা সুগতিং সগ্গং লোকং উপপজ্জেয্য নো ৰা? কথং ৰা তে এত্থ হোতী’’তি? ‘‘খত্তিযোপি হি, ভো কচ্চান, পাণাতিপাতা পটিৰিরতো, অদিন্নাদানা পটিৰিরতো, কামেসুমিচ্ছাচারা পটিৰিরতো, মুসাৰাদা পটিৰিরতো, পিসুণায ৰাচায পটিৰিরতো, ফরুসায ৰাচায পটিৰিরতো, সম্ফপ্পলাপা পটিৰিরতো, অনভিজ্ঝালু অব্যাপন্নচিত্তো সম্মাদিট্ঠি কাযস্স ভেদা পরং মরণা সুগতিং সগ্গং লোকং উপপজ্জেয্য. এৰং মে এত্থ হোতি, এৰঞ্চ পন মে এতং অরহতং সুত’’ন্তি.

‘‘সাধু সাধু, মহারাজ! সাধু খো তে এতং, মহারাজ, এৰং হোতি, সাধু চ পন তে এতং অরহতং সুতং. তং কিং মঞ্ঞসি, মহারাজ, ইধস্স ব্রাহ্মণো, ইধস্স ৰেস্সো, ইধস্স সুদ্দো পাণাতিপাতা পটিৰিরতো অদিন্নাদানা পটিৰিরতো…পে… সম্মাদিট্ঠি কাযস্স ভেদা পরং মরণা সুগতিং সগ্গং লোকং উপপজ্জেয্য নো ৰা? কথং ৰা তে এত্থ হোতী’’তি? ‘‘সুদ্দোপি হি, ভো কচ্চান, পাণাতিপাতা পটিৰিরতো, অদিন্নাদানা পটিৰিরতো…পে… সম্মাদিট্ঠি কাযস্স ভেদা পরং মরণা সুগতিং সগ্গং লোকং উপপজ্জেয্য. এৰং মে এত্থ হোতি, এৰঞ্চ পন মে এতং অরহতং সুত’’ন্তি.

‘‘সাধু সাধু, মহারাজ! সাধু খো তে এতং, মহারাজ, এৰং হোতি, সাধু চ পন তে এতং অরহতং সুতং. তং কিং মঞ্ঞসি, মহারাজ, যদি এৰং সন্তে, ইমে চত্তারো ৰণ্ণা সমসমা হোন্তি নো ৰা? কথং ৰা তে এত্থ হোতী’’তি? ‘‘অদ্ধা খো, ভো কচ্চান, এৰং সন্তে, ইমে চত্তারো ৰণ্ণা সমসমা হোন্তি. নেসং এত্থ কিঞ্চি নানাকরণং সমনুপস্সামী’’তি. ‘‘ইমিনাপি খো এতং, মহারাজ, পরিযাযেন ৰেদিতব্বং যথা ঘোসো যেৰেসো লোকস্মিং – ‘ব্রাহ্মণোৰ সেট্ঠো ৰণ্ণো, হীনো অঞ্ঞো ৰণ্ণো…পে… ব্রহ্মদাযাদা’’’তি.

৩২১. ‘‘তং কিং মঞ্ঞসি, মহারাজ, ইধ খত্তিযো সন্ধিং ৰা ছিন্দেয্য, নিল্লোপং ৰা হরেয্য, একাগারিকং ৰা করেয্য, পরিপন্থে ৰা তিট্ঠেয্য, পরদারং ৰা গচ্ছেয্য, তঞ্চে তে পুরিসা গহেত্ৰা দস্সেয্যুং – ‘অযং তে, দেৰ, চোরো আগুচারী. ইমস্স যং ইচ্ছসি তং দণ্ডং পণেহী’তি. কিন্তি নং করেয্যাসী’’তি? ‘‘ঘাতেয্যাম ৰা, ভো কচ্চান, জাপেয্যাম ৰা পব্বাজেয্যাম ৰা যথাপচ্চযং ৰা করেয্যাম. তং কিস্স হেতু? যা হিস্স, ভো কচ্চান, পুব্বে ‘খত্তিযো’তি সমঞ্ঞা সাস্স অন্তরহিতা; চোরোত্ৰেৰ সঙ্খ্যং [সঙ্খং (সী. স্যা. কং. পী.)] গচ্ছতী’’তি.

‘‘তং কিং মঞ্ঞসি, মহারাজ, ইধ ব্রাহ্মণো, ইধ ৰেস্সো, ইধ সুদ্দো সন্ধিং ৰা ছিন্দেয্য, নিল্লোপং ৰা হরেয্য, একাগারিকং ৰা করেয্য, পরিপন্থে ৰা তিট্ঠেয্য, পরদারং ৰা গচ্ছেয্য, তঞ্চে তে পুরিসা গহেত্ৰা দস্সেয্যুং – ‘অযং তে, দেৰ, চোরো আগুচারী. ইমস্স যং ইচ্ছসি তং দণ্ডং পণেহী’তি. কিন্তি নং করেয্যাসী’’তি? ‘‘ঘাতেয্যাম ৰা, ভো কচ্চান, জাপেয্যাম ৰা পব্বাজেয্যাম ৰা যথাপচ্চযং ৰা করেয্যাম. তং কিস্স হেতু? যা হিস্স, ভো কচ্চান, পুব্বে ‘সুদ্দো’তি সমঞ্ঞা সাস্স অন্তরহিতা; চোরোত্ৰেৰ সঙ্খ্যং গচ্ছতী’’তি.

‘‘তং কিং মঞ্ঞসি, মহারাজ, যদি এৰং সন্তে, ইমে চত্তারো ৰণ্ণা সমসমা হোন্তি নো ৰা? কথং ৰা তে এত্থ হোতী’’তি? ‘‘অদ্ধা খো, ভো কচ্চান, এৰং সন্তে, ইমে চত্তারো ৰণ্ণা সমসমা হোন্তি. নেসং এত্থ কিঞ্চি নানাকরণং সমনুপস্সামী’’তি. ‘‘ইমিনাপি খো এতং, মহারাজ, পরিযাযেন ৰেদিতব্বং যথা ঘোসো যেৰেসো লোকস্মিং – ‘ব্রাহ্মণোৰ সেট্ঠো ৰণ্ণো, হীনো অঞ্ঞো ৰণ্ণো…পে… ব্রহ্মদাযাদা’’’তি.

৩২২. ‘‘তং কিং মঞ্ঞসি, মহারাজ, ইধ খত্তিযো কেসমস্সুং ওহারেত্ৰা কাসাযানি ৰত্থানি অচ্ছাদেত্ৰা অগারস্মা অনগারিযং পব্বজিতো অস্স ৰিরতো পাণাতিপাতা, ৰিরতো অদিন্নাদানা, ৰিরতো মুসাৰাদা, রত্তূপরতো, একভত্তিকো, ব্রহ্মচারী, সীলৰা, কল্যাণধম্মো? কিন্তি নং করেয্যাসী’’তি? ‘‘অভিৰাদেয্যাম ৰা [পি (দী. নি. ১.১৮৪, ১৮৭ সামঞ্ঞফলে)], ভো কচ্চান, পচ্চুট্ঠেয্যাম ৰা আসনেন ৰা নিমন্তেয্যাম অভিনিমন্তেয্যাম ৰা নং চীৰরপিণ্ডপাতসেনাসনগিলানপ্পচ্চযভেসজ্জপরিক্খারেহি ধম্মিকং ৰা অস্স রক্খাৰরণগুত্তিং সংৰিদহেয্যাম. তং কিস্স হেতু? যা হিস্স, ভো কচ্চান, পুব্বে ‘খত্তিযো’তি সমঞ্ঞা সাস্স অন্তরহিতা; সমণোত্ৰেৰ সঙ্খ্যং গচ্ছতী’’তি.

‘‘তং কিং মঞ্ঞসি, মহারাজ, ইধ ব্রাহ্মণো, ইধ ৰেস্সো, ইধ সুদ্দো কেসমস্সুং ওহারেত্ৰা কাসাযানি ৰত্থানি অচ্ছাদেত্ৰা অগারস্মা অনগারিযং পব্বজিতো অস্স ৰিরতো পাণাতিপাতা, ৰিরতো অদিন্নাদানা ৰিরতো মুসাৰাদা, রত্তূপরতো, একভত্তিকো, ব্রহ্মচারী, সীলৰা, কল্যাণধম্মো? কিন্তি নং করেয্যাসী’’তি? ‘‘অভিৰাদেয্যাম ৰা, ভো কচ্চান, পচ্চুট্ঠেয্যাম ৰা আসনেন ৰা নিমন্তেয্যাম অভিনিমন্তেয্যাম ৰা নং চীৰরপিণ্ডপাতসেনাসনগিলানপ্পচ্চযভেসজ্জপরিক্খারেহি ধম্মিকং ৰা অস্স রক্খাৰরণগুত্তিং সংৰিদহেয্যাম. তং কিস্স হেতু? যা হিস্স, ভো কচ্চান, পুব্বে ‘সুদ্দো’তি সমঞ্ঞা সাস্স অন্তরহিতা; সমণোত্ৰেৰ সঙ্খ্যং গচ্ছতী’’তি.

‘‘তং কিং মঞ্ঞসি, মহারাজ, যদি এৰং সন্তে, ইমে চত্তারো ৰণ্ণা সমসমা হোন্তি নো ৰা? কথং ৰা তে এত্থ হোতী’’তি? ‘‘অদ্ধা খো, ভো কচ্চান, এৰং সন্তে, ইমে চত্তারো ৰণ্ণা সমসমা হোন্তি. নেসং এত্থ কিঞ্চি নানাকরণং সমনুপস্সামী’’তি. ‘‘ইমিনাপি খো এতং, মহারাজ, পরিযাযেন ৰেদিতব্বং যথা ঘোসো যেৰেসো লোকস্মিং – ‘ব্রাহ্মণোৰ সেট্ঠো ৰণ্ণো, হীনো অঞ্ঞো ৰণ্ণো; ব্রাহ্মণোৰ সুক্কো ৰণ্ণো, কণ্হো অঞ্ঞো ৰণ্ণো; ব্রাহ্মণাৰ সুজ্ঝন্তি, নো অব্রাহ্মণা; ব্রাহ্মণাৰ ব্রহ্মুনো পুত্তা ওরসা মুখতো জাতা ব্রহ্মজা ব্রহ্মনিম্মিতা ব্রহ্মদাযাদা’’’তি.

৩২৩. এৰং ৰুত্তে, রাজা মাধুরো অৰন্তিপুত্তো আযস্মন্তং মহাকচ্চানং এতদৰোচ – ‘‘অভিক্কন্তং, ভো কচ্চান, অভিক্কন্তং, ভো কচ্চান! সেয্যথাপি, ভো কচ্চান, নিক্কুজ্জিতং ৰা উক্কুজ্জেয্য, পটিচ্ছন্নং ৰা ৰিৰরেয্য, মূল়্হস্স ৰা মগ্গং আচিক্খেয্য, অন্ধকারে ৰা তেলপজ্জোতং ধারেয্য – ‘চক্খুমন্তো রূপানি দক্খন্তী’তি; এৰমেৰং ভোতা কচ্চানেন অনেকপরিযাযেন ধম্মো পকাসিতো. এসাহং ভৰন্তং কচ্চানং সরণং গচ্ছামি ধম্মঞ্চ ভিক্খুসঙ্ঘঞ্চ. উপাসকং মং ভৰং কচ্চানো ধারেতু অজ্জতগ্গে পাণুপেতং সরণং গত’’ন্তি. ‘‘মা খো মং ত্ৰং, মহারাজ, সরণং অগমাসি. তমেৰ ত্ৰং [তমেতং ত্ৰং (স্যা. কং.), তমেতং (ক.)] ভগৰন্তং সরণং গচ্ছ যমহং সরণং গতো’’তি. ‘‘কহং পন, ভো কচ্চান, এতরহি সো ভগৰা ৰিহরতি অরহং সম্মাসম্বুদ্ধো’’তি? ‘‘পরিনিব্বুতো খো, মহারাজ, এতরহি সো ভগৰা অরহং সম্মাসম্বুদ্ধো’’তি. ‘‘সচেপি মযং, ভো কচ্চান, সুণেয্যাম তং ভগৰন্তং দসসু যোজনেসু, দসপি মযং যোজনানি গচ্ছেয্যাম তং ভগৰন্তং দস্সনায অরহন্তং সম্মাসম্বুদ্ধং. সচেপি মযং, ভো কচ্চান, সুণেয্যাম তং ভগৰন্তং ৰীসতিযা যোজনেসু, তিংসায যোজনেসু, চত্তারীসায যোজনেসু, পঞ্ঞাসায যোজনেসু, পঞ্ঞাসম্পি মযং যোজনানি গচ্ছেয্যাম তং ভগৰন্তং দস্সনায অরহন্তং সম্মাসম্বুদ্ধং. যোজনসতে চেপি মযং ভো কচ্চান, সুণেয্যাম তং ভগৰন্তং, যোজনসতম্পি মযং গচ্ছেয্যাম তং ভগৰন্তং দস্সনায অরহন্তং সম্মাসম্বুদ্ধং. যতো চ, ভো কচ্চান, পরিনিব্বুতো সো ভগৰা, পরিনিব্বুতম্পি মযং ভগৰন্তং সরণং গচ্ছাম ধম্মঞ্চ ভিক্খুসঙ্ঘঞ্চ. উপাসকং মং ভৰং কচ্চানো ধারেতু অজ্জতগ্গে পাণুপেতং সরণং গত’’ন্তি.

মধুরসুত্তং নিট্ঠিতং চতুত্থং.