১. ঘটিকারসুত্তং

২৮২. এৰং মে সুতং – একং সমযং ভগৰা কোসলেসু চারিকং চরতি মহতা ভিক্খুসঙ্ঘেন সদ্ধিং. অথ খো ভগৰা মগ্গা ওক্কম্ম অঞ্ঞতরস্মিং পদেসে সিতং পাত্ৰাকাসি. অথ খো আযস্মতো আনন্দস্স এতদহোসি – ‘‘কো নু খো হেতু, কো পচ্চযো ভগৰতো সিতস্স পাতুকম্মায? ন অকারণেন [ন অকারণে (সী.)] তথাগতা সিতং পাতুকরোন্তী’’তি. অথ খো আযস্মা আনন্দো একংসং চীৰরং [উত্তরাসঙ্গ (স্যা. কং.)] কত্ৰা যেন ভগৰা তেনঞ্জলিং পণামেত্ৰা ভগৰন্তং এতদৰোচ – ‘‘কো নু খো, ভন্তে, হেতু, কো পচ্চযো ভগৰতো সিতস্স পাতুকম্মায? ন অকারণেন তথাগতা সিতং পাতুকরোন্তী’’তি. ‘‘ভূতপুব্বং, আনন্দ, ইমস্মিং পদেসে ৰেগল়িঙ্গং [ৰেহলিঙ্গং (সী.), ৰেভলিগং (স্যা. কং.), ৰেভলিঙ্গং (পী.)] নাম গামনিগমো অহোসি ইদ্ধো চেৰ ফীতো চ বহুজনো আকিণ্ণমনুস্সো. ৰেগল়িঙ্গং খো, আনন্দ, গামনিগমং কস্সপো ভগৰা অরহং সম্মাসম্বুদ্ধো উপনিস্সায ৰিহাসি. ইধ সুদং, আনন্দ, কস্সপস্স ভগৰতো অরহতো সম্মাসম্বুদ্ধস্স আরামো অহোসি. ইধ সুদং, আনন্দ, কস্সপো ভগৰা অরহং সম্মাসম্বুদ্ধো নিসিন্নকো ভিক্খুসঙ্ঘং ওৰদতী’’তি. অথ খো আযস্মা আনন্দো চতুগ্গুণং সঙ্ঘাটিং পঞ্ঞপেত্ৰা ভগৰন্তং এতদৰোচ – ‘‘তেন হি, ভন্তে, ভগৰা নিসীদতু এত্থ. অযং ভূমিপদেসো দ্ৰীহি অরহন্তেহি সম্মাসম্বুদ্ধেহি পরিভুত্তো ভৰিস্সতী’’তি. নিসীদি ভগৰা পঞ্ঞত্তে আসনে. নিসজ্জ খো ভগৰা আযস্মন্তং আনন্দং আমন্তেসি –

‘‘ভূতপুব্বং, আনন্দ, ইমস্মিং পদেসে ৰেগল়িঙ্গং নাম গামনিগমো অহোসি ইদ্ধো চেৰ ফীতো চ বহুজনো আকিণ্ণমনুস্সো. ৰেগল়িঙ্গং খো, আনন্দ, গামনিগমং কস্সপো ভগৰা অরহং সম্মাসম্বুদ্ধো উপনিস্সায ৰিহাসি. ইধ সুদং, আনন্দ, কস্সপস্স ভগৰতো অরহতো সম্মাসম্বুদ্ধস্স আরামো অহোসি. ইধ সুদং, আনন্দ, কস্সপো ভগৰা অরহং সম্মাসম্বুদ্ধো নিসিন্নকো ভিক্খুসঙ্ঘং ওৰদতি.

২৮৩. ‘‘ৰেগল়িঙ্গে খো, আনন্দ, গামনিগমে ঘটিকারো [ঘটীকারো (সী. পী.)] নাম কুম্ভকারো কস্সপস্স ভগৰতো অরহতো সম্মাসম্বুদ্ধস্স উপট্ঠাকো অহোসি অগ্গুপট্ঠাকো. ঘটিকারস্স খো, আনন্দ, কুম্ভকারস্স জোতিপালো নাম মাণৰো সহাযো অহোসি পিযসহাযো. অথ খো, আনন্দ, ঘটিকারো কুম্ভকারো জোতিপালং মাণৰং আমন্তেসি – ‘আযাম, সম্ম জোতিপাল, কস্সপং ভগৰন্তং অরহন্তং সম্মাসম্বুদ্ধং দস্সনায উপসঙ্কমিস্সাম. সাধুসম্মতঞ্হি মে তস্স ভগৰতো দস্সনং অরহতো সম্মাসম্বুদ্ধস্সা’তি. এৰং ৰুত্তে, আনন্দ, জোতিপালো মাণৰো ঘটিকারং কুম্ভকারং এতদৰোচ – ‘অলং, সম্ম ঘটিকার. কিং পন তেন মুণ্ডকেন সমণকেন দিট্ঠেনা’তি? দুতিযম্পি খো, আনন্দ…পে… ততিযম্পি খো, আনন্দ, ঘটিকারো কুম্ভকারো জোতিপালং মাণৰং এতদৰোচ – ‘আযাম, সম্ম জোতিপাল, কস্সপং ভগৰন্তং অরহন্তং সম্মাসম্বুদ্ধং দস্সনায উপসঙ্কমিস্সাম. সাধুসম্মতঞ্হি মে তস্স ভগৰতো দস্সনং অরহতো সম্মাসম্বুদ্ধস্সা’তি. ততিযম্পি খো, আনন্দ, জোতিপালো মাণৰো ঘটিকারং কুম্ভকারং এতদৰোচ – ‘অলং, সম্ম ঘটিকার. কিং পন তেন মুণ্ডকেন সমণকেন দিট্ঠেনা’তি? ‘তেন হি, সম্ম জোতিপাল, সোত্তিসিনানিং [সোত্তিং সিনানিং (সী. পী.), সোত্তিসিনানং (স্যা. কং. ক.)] আদায [আহর (ক.)] নদিং গমিস্সাম সিনাযিতু’ন্তি. ‘এৰং সম্মা’তি খো, আনন্দ, জোতিপালো মাণৰো ঘটিকারস্স কুম্ভকারস্স পচ্চস্সোসি. অথ খো, আনন্দ, ঘটিকারো চ কুম্ভকারো জোতিপালো চ মাণৰো সোত্তিসিনানিং আদায নদিং অগমংসু সিনাযিতুং’.

২৮৪. ‘‘অথ খো, আনন্দ, ঘটিকারো কুম্ভকারো জোতিপালং মাণৰং আমন্তেসি – ‘অযং, সম্ম জোতিপাল, কস্সপস্স ভগৰতো অরহতো সম্মাসম্বুদ্ধস্স অৰিদূরে আরামো. আযাম, সম্ম জোতিপাল, কস্সপং ভগৰন্তং অরহন্তং সম্মাসম্বুদ্ধং দস্সনায উপসঙ্কমিস্সাম. সাধুসম্মতঞ্হি মে তস্স ভগৰতো দস্সনং অরহতো সম্মাসম্বুদ্ধস্সা’তি. এৰং ৰুত্তে, আনন্দ, জোতিপালো মাণৰো ঘটিকারং কুম্ভকারং এতদৰোচ – ‘অলং, সম্ম ঘটিকার. কিং পন তেন মুণ্ডকেন সমণকেন দিট্ঠেনা’তি? দুতিযম্পি খো, আনন্দ…পে… ততিযম্পি খো, আনন্দ, ঘটিকারো কুম্ভকারো জোতিপালং মাণৰং এতদৰোচ – ‘অযং, সম্ম জোতিপাল, কস্সপস্স ভগৰতো অরহতো সম্মাসম্বুদ্ধস্স অৰিদূরে আরামো. আযাম, সম্ম জোতিপাল, কস্সপং ভগৰন্তং অরহন্তং সম্মাসম্বুদ্ধং দস্সনায উপসঙ্কমিস্সাম. সাধুসম্মতঞ্হি মে তস্স ভগৰতো দস্সনং অরহতো সম্মাসম্বুদ্ধস্সা’তি. ততিযম্পি খো, আনন্দ, জোতিপালো মাণৰো ঘটিকারং কুম্ভকারং এতদৰোচ – ‘অলং, সম্ম ঘটিকার. কিং পন তেন মুণ্ডকেন সমণকেন দিট্ঠেনা’তি? অথ খো, আনন্দ, ঘটিকারো কুম্ভকারো জোতিপালং মাণৰং ওৰট্টিকাযং পরামসিত্ৰা এতদৰোচ – ‘অযং, সম্ম জোতিপাল, কস্সপস্স ভগৰতো অরহতো সম্মাসম্বুদ্ধস্স অৰিদূরে আরামো. আযাম, সম্ম জোতিপাল, কস্সপং ভগৰন্তং অরহন্তং সম্মাসম্বুদ্ধং দস্সনায উপসঙ্কমিস্সাম. সাধুসম্মতঞ্হি মে তস্স ভগৰতো দস্সনং অরহতো সম্মাসম্বুদ্ধস্সা’তি. অথ খো, আনন্দ, জোতিপালো মাণৰো ওৰট্টিকং ৰিনিৰট্টেত্ৰা [ৰিনিৰেঠেত্ৰা (সী. স্যা. কং. পী.)] ঘটিকারং কুম্ভকারং এতদৰোচ – ‘অলং, সম্ম ঘটিকার. কিং পন তেন মুণ্ডকেন সমণকেন দিট্ঠেনা’তি? অথ খো, আনন্দ, ঘটিকারো কুম্ভকারো জোতিপালং মাণৰং সীসংন্হাতং [সসীসং নহাতং (সী.), সীসন্হাতং (স্যা. কং.)] কেসেসু পরামসিত্ৰা এতদৰোচ – ‘অযং, সম্ম জোতিপাল, কস্সপস্স ভগৰতো অরহতো সম্মাসম্বুদ্ধস্স অৰিদূরে আরামো. আযাম, সম্ম জোতিপাল, কস্সপং ভগৰন্তং অরহন্তং সম্মাসম্বুদ্ধং দস্সনায উপসঙ্কমিস্সাম. সাধুসম্মতঞ্হি মে তস্স ভগৰতো দস্সনং অরহতো সম্মাসম্বুদ্ধস্সা’তি. অথ খো, আনন্দ, জোতিপালস্স মাণৰস্স এতদহোসি – ‘অচ্ছরিযং ৰত, ভো, অব্ভুতং ৰত, ভো! যত্র হি নামাযং ঘটিকারো কুম্ভকারো ইত্তরজচ্চো সমানো অম্হাকং সীসংন্হাতানং কেসেসু পরামসিতব্বং মঞ্ঞিস্সতি; ন ৰতিদং কির ওরকং মঞ্ঞে ভৰিস্সতী’তি; ঘটিকারং কুম্ভকারং এতদৰোচ – ‘যাৰতাদোহিপি [যাৰেতদোহিপি (সী. স্যা. কং. পী.)], সম্ম ঘটিকারা’তি? ‘যাৰতাদোহিপি, সম্ম জোতিপাল. তথা হি পন মে সাধুসম্মতং তস্স ভগৰতো দস্সনং অরহতো সম্মাসম্বুদ্ধস্সা’তি. ‘তেন হি, সম্ম ঘটিকার, মুঞ্চ; গমিস্সামা’তি.

২৮৫. ‘‘অথ খো, আনন্দ, ঘটিকারো চ কুম্ভকারো জোতিপালো চ মাণৰো যেন কস্সপো ভগৰা অরহং সম্মাসম্বুদ্ধো তেনুপসঙ্কমিংসু; উপসঙ্কমিত্ৰা ঘটিকারো কুম্ভকারো কস্সপং ভগৰন্তং অরহন্তং সম্মাসম্বুদ্ধং অভিৰাদেত্ৰা একমন্তং নিসীদি. জোতিপালো পন মাণৰো কস্সপেন ভগৰতা অরহতা সম্মাসম্বুদ্ধেন সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নো খো, আনন্দ, ঘটিকারো কুম্ভকারো কস্সপং ভগৰন্তং অরহন্তং সম্মাসম্বুদ্ধং এতদৰোচ – ‘অযং মে, ভন্তে, জোতিপালো মাণৰো সহাযো পিযসহাযো. ইমস্স ভগৰা ধম্মং দেসেতূ’তি. অথ খো, আনন্দ, কস্সপো ভগৰা অরহং সম্মাসম্বুদ্ধো ঘটিকারঞ্চ কুম্ভকারং জোতিপালঞ্চ মাণৰং ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি. অথ খো, আনন্দ, ঘটিকারো চ কুম্ভকারো জোতিপালো চ মাণৰো কস্সপেন ভগৰতা অরহতা সম্মাসম্বুদ্ধেন ধম্মিযা কথায সন্দস্সিতা সমাদপিতা সমুত্তেজিতা সম্পহংসিতা কস্সপস্স ভগৰতো অরহতো সম্মাসম্বুদ্ধস্স ভাসিতং অভিনন্দিত্ৰা অনুমোদিত্ৰা উট্ঠাযাসনা কস্সপং ভগৰন্তং অরহন্তং সম্মাসম্বুদ্ধং অভিৰাদেত্ৰা পদক্খিণং কত্ৰা পক্কমিংসু.

২৮৬. ‘‘অথ খো, আনন্দ, জোতিপালো মাণৰো ঘটিকারং কুম্ভকারং এতদৰোচ – ‘ইমং নু ত্ৰং, সম্ম ঘটিকার, ধম্মং সুণন্তো অথ চ পন অগারস্মা অনগারিযং ন পব্বজিস্সসী’তি? ‘ননু মং, সম্ম জোতিপাল, জানাসি, অন্ধে জিণ্ণে মাতাপিতরো পোসেমী’তি? ‘তেন হি, সম্ম ঘটিকার, অহং অগারস্মা অনগারিযং পব্বজিস্সামী’তি. অথ খো, আনন্দ, ঘটিকারো চ কুম্ভকারো জোতিপালো চ মাণৰো যেন কস্সপো ভগৰা অরহং সম্মাসম্বুদ্ধো তেনুপসঙ্কমিংসু; উপসঙ্কমিত্ৰা কস্সপং ভগৰন্তং অরহন্তং সম্মাসম্বুদ্ধং অভিৰাদেত্ৰা একমন্তং নিসীদিংসু. একমন্তং নিসিন্নো খো, আনন্দ, ঘটিকারো কুম্ভকারো কস্সপং ভগৰন্তং অরহন্তং সম্মাসম্বুদ্ধং এতদৰোচ – ‘অযং মে, ভন্তে, জোতিপালো মাণৰো সহাযো পিযসহাযো. ইমং ভগৰা পব্বাজেতূ’তি. অলত্থ খো, আনন্দ, জোতিপালো মাণৰো কস্সপস্স ভগৰতো অরহতো সম্মাসম্বুদ্ধস্স সন্তিকে পব্বজ্জং, অলত্থ উপসম্পদং.

২৮৭. ‘‘অথ খো, আনন্দ, কস্সপো ভগৰা অরহং সম্মাসম্বুদ্ধো অচিরূপসম্পন্নে জোতিপালে মাণৰে অড্ঢমাসুপসম্পন্নে ৰেগল়িঙ্গে যথাভিরন্তং ৰিহরিত্ৰা যেন বারাণসী তেন চারিকং পক্কামি. অনুপুব্বেন চারিকং চরমানো যেন বারাণসী তদৰসরি. তত্র সুদং, আনন্দ, কস্সপো ভগৰা অরহং সম্মাসম্বুদ্ধো বারাণসিযং ৰিহরতি ইসিপতনে মিগদাযে. অস্সোসি খো, আনন্দ, কিকী কাসিরাজা – ‘কস্সপো কির ভগৰা অরহং সম্মাসম্বুদ্ধো বারাণসিং অনুপ্পত্তো বারাণসিযং ৰিহরতি ইসিপতনে মিগদাযে’তি. অথ খো, আনন্দ, কিকী কাসিরাজা ভদ্রানি ভদ্রানি যানানি যোজাপেত্ৰা ভদ্রং [ভদ্রং ভদ্রং (ক.)] যানং অভিরুহিত্ৰা ভদ্রেহি ভদ্রেহি যানেহি বারাণসিযা নিয্যাসি মহচ্চরাজানুভাৰেন [মহচ্চা রাজানুভাৰেন (সী.), মহতা রাজানুভাৰেন (পী.)] কস্সপং ভগৰন্তং অরহন্তং সম্মাসম্বুদ্ধং দস্সনায. যাৰতিকা যানস্স ভূমি যানেন গন্ত্ৰা যানা পচ্চোরোহিত্ৰা পত্তিকোৰ যেন কস্সপো ভগৰা অরহং সম্মাসম্বুদ্ধো তেনুপসঙ্কমি; উপসঙ্কমিত্ৰা কস্সপং ভগৰন্তং অরহন্তং সম্মাসম্বুদ্ধং অভিৰাদেত্ৰা একমন্তং নিসীদি. একমন্তং নিসিন্নং খো, আনন্দ, কিকিং কাসিরাজানং কস্সপো ভগৰা অরহং সম্মাসম্বুদ্ধো ধম্মিযা কথায সন্দস্সেসি সমাদপেসি সমুত্তেজেসি সম্পহংসেসি. অথ খো, আনন্দ, কিকী কাসিরাজা কস্সপেন ভগৰতা অরহতা সম্মাসম্বুদ্ধেন ধম্মিযা কথায সন্দস্সিতো সমাদপিতো সমুত্তেজিতো সম্পহংসিতো কস্সপং ভগৰন্তং অরহন্তং সম্মাসম্বুদ্ধং এতদৰোচ – ‘অধিৰাসেতু মে, ভন্তে, ভগৰা স্ৰাতনায ভত্তং সদ্ধিং ভিক্খুসঙ্ঘেনা’তি. অধিৰাসেসি খো, আনন্দ, কস্সপো ভগৰা অরহং সম্মাসম্বুদ্ধো তুণ্হীভাৰেন. অথ খো, আনন্দ, কিকী কাসিরাজা কস্সপস্স ভগৰতো সম্মাসম্বুদ্ধস্স অধিৰাসনং ৰিদিত্ৰা উট্ঠাযাসনা কস্সপং ভগৰন্তং অরহন্তং সম্মাসম্বুদ্ধং অভিৰাদেত্ৰা পদক্খিণং কত্ৰা পক্কামি. অথ খো, আনন্দ, কিকী কাসিরাজা তস্সা রত্তিযা অচ্চযেন সকে নিৰেসনে পণীতং খাদনীযং ভোজনীযং পটিযাদাপেত্ৰা পণ্ডুপুটকস্স [পণ্ডুমুটীকস্স (সী. পী.), পণ্ডুমুদিকস্স (স্যা. কং.)] সালিনো ৰিগতকাল়কং অনেকসূপং অনেকব্যঞ্জনং, কস্সপস্স ভগৰতো অরহতো সম্মাসম্বুদ্ধস্স কালং আরোচাপেসি – ‘কালো, ভন্তে, নিট্ঠিতং ভত্ত’ন্তি.

২৮৮. ‘‘অথ খো, আনন্দ, কস্সপো ভগৰা অরহং সম্মাসম্বুদ্ধো পুব্বণ্হসমযং নিৰাসেত্ৰা পত্তচীৰরমাদায যেন কিকিস্স কাসিরঞ্ঞো নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি সদ্ধিং ভিক্খুসঙ্ঘেন. অথ খো, আনন্দ, কিকী কাসিরাজা বুদ্ধপ্পমুখং ভিক্খুসঙ্ঘং পণীতেন খাদনীযেন ভোজনীযেন সহত্থা সন্তপ্পেসি সম্পৰারেসি. অথ খো, আনন্দ, কিকী কাসিরাজা কস্সপং ভগৰন্তং অরহন্তং সম্মাসম্বুদ্ধং ভুত্তাৰিং ওনীতপত্তপাণিং অঞ্ঞতরং নীচং আসনং গহেত্ৰা একমন্তং নিসীদি. একমন্তং নিসিন্নো খো, আনন্দ, কিকী কাসিরাজা কস্সপং ভগৰন্তং অরহন্তং সম্মাসম্বুদ্ধং এতদৰোচ – ‘অধিৰাসেতু মে, ভন্তে, ভগৰা বারাণসিযং ৰস্সাৰাসং; এৰরূপং সঙ্ঘস্স উপট্ঠানং ভৰিস্সতী’তি. ‘অলং, মহারাজ. অধিৰুত্থো মে ৰস্সাৰাসো’তি. দুতিযম্পি খো, আনন্দ… ততিযম্পি খো, আনন্দ, কিকী কাসিরাজা কস্সপং ভগৰন্তং অরহন্তং সম্মাসম্বুদ্ধং এতদৰোচ – ‘অধিৰাসেতু মে, ভন্তে, ভগৰা বারাণসিযং ৰস্সাৰাসং; এৰরূপং সঙ্ঘস্স উপট্ঠানং ভৰিস্সতী’তি. ‘অলং, মহারাজ. অধিৰুত্থো মে ৰস্সাৰাসো’তি. অথ খো, আনন্দ, কিকিস্স কাসিরঞ্ঞো ‘ন মে কস্সপো ভগৰা অরহং সম্মাসম্বুদ্ধো অধিৰাসেতি বারাণসিযং ৰস্সাৰাস’ন্তি অহুদেৰ অঞ্ঞথত্তং, অহু দোমনস্সং. অথ খো, আনন্দ, কিকী কাসিরাজা কস্সপং ভগৰন্তং অরহন্তং সম্মাসম্বুদ্ধং এতদৰোচ – ‘অত্থি নু খো, ভন্তে, অঞ্ঞো কোচি মযা উপট্ঠাকতরো’তি?

‘‘‘অত্থি, মহারাজ, ৰেগল়িঙ্গং নাম গামনিগমো. তত্থ ঘটিকারো নাম কুম্ভকারো; সো মে উপট্ঠাকো অগ্গুপট্ঠাকো. তুয্হং খো পন, মহারাজ, ন মে কস্সপো ভগৰা অরহং সম্মাসম্বুদ্ধো অধিৰাসেতি বারাণসিযং ৰস্সাৰাসন্তি অত্থেৰ [অত্থি (সী. পী.)] অঞ্ঞথত্তং, অত্থি দোমনস্সং. তযিদং ঘটিকারস্স কুম্ভকারস্স [ঘটিকারে কুম্ভকারে (সী. স্যা. কং. পী.)] নত্থি চ ন চ ভৰিস্সতি. ঘটিকারো খো, মহারাজ, কুম্ভকারো বুদ্ধং সরণং গতো, ধম্মং সরণং গতো, সঙ্ঘং সরণং গতো. ঘটিকারো খো, মহারাজ, কুম্ভকারো পাণাতিপাতা পটিৰিরতো, অদিন্নাদানা পটিৰিরতো, কামেসুমিচ্ছাচারা পটিৰিরতো, মুসাৰাদা পটিৰিরতো, সুরামেরযমজ্জপমাদট্ঠানা পটিৰিরতো. ঘটিকারো খো, মহারাজ, কুম্ভকারো বুদ্ধে অৰেচ্চপ্পসাদেন সমন্নাগতো, ধম্মে অৰেচ্চপ্পসাদেন সমন্নাগতো, সঙ্ঘে অৰেচ্চপ্পসাদেন সমন্নাগতো, অরিযকন্তেহি সীলেহি সমন্নাগতো. ঘটিকারো খো, মহারাজ, কুম্ভকারো দুক্খে নিক্কঙ্খো, দুক্খসমুদযে নিক্কঙ্খো, দুক্খনিরোধে নিক্কঙ্খো, দুক্খনিরোধগামিনিযা পটিপদায নিক্কঙ্খো. ঘটিকারো খো, মহারাজ, কুম্ভকারো একভত্তিকো ব্রহ্মচারী সীলৰা কল্যাণধম্মো. ঘটিকারো খো, মহারাজ, কুম্ভকারো নিক্খিত্তমণিসুৰণ্ণো অপেতজাতরূপরজতো. ঘটিকারো খো, মহারাজ, কুম্ভকারো পন্নমুসলো ন সহত্থা পথৰিং খণতি [কুম্ভকারো ন মুসলেন ন সহত্থা পঠৰিং খণতি (স্যা. কং. পী.), কুম্ভকারো ন মুসলেন সহত্থা পথৰিঞ্চ খণতি (ক.)]. যং হোতি কূলপলুগ্গং ৰা মূসিকুক্করো [মূসিকুক্কুরো (সী. স্যা. কং. পী.)] ৰা তং কাজেন আহরিত্ৰা ভাজনং করিত্ৰা এৰমাহ – ‘‘এত্থ যো ইচ্ছতি তণ্ডুলপটিভস্তানি [তণ্ডুল পভিৰত্তানি (সী. পী.)] ৰা মুগ্গপটিভস্তানি ৰা কল়াযপটিভস্তানি ৰা নিক্খিপিত্ৰা যং ইচ্ছতি তং হরতূ’’তি. ঘটিকারো খো, মহারাজ, কুম্ভকারো অন্ধে জিণ্ণে মাতাপিতরো পোসেতি. ঘটিকারো খো, মহারাজ, কুম্ভকারো পঞ্চন্নং ওরম্ভাগিযানং সংযোজনানং পরিক্খযা ওপপাতিকো তত্থ পরিনিব্বাযী অনাৰত্তিধম্মো তস্মা লোকা.

২৮৯. ‘‘‘একমিদাহং, মহারাজ, সমযং ৰেগল়িঙ্গে নাম গামনিগমে ৰিহরামি. অথ খ্ৰাহং, মহারাজ, পুব্বণ্হসমযং নিৰাসেত্ৰা পত্তচীৰরমাদায যেন ঘটিকারস্স কুম্ভকারস্স মাতাপিতরো তেনুপসঙ্কমিং; উপসঙ্কমিত্ৰা ঘটিকারস্স কুম্ভকারস্স মাতাপিতরো এতদৰোচং – ‘‘হন্দ, কো নু খো অযং ভগ্গৰো গতো’’তি? ‘‘নিক্খন্তো খো তে, ভন্তে, উপট্ঠাকো অন্তোকুম্ভিযা ওদনং গহেত্ৰা পরিযোগা সূপং গহেত্ৰা পরিভুঞ্জা’’তি. অথ খ্ৰাহং, মহারাজ, কুম্ভিযা ওদনং গহেত্ৰা পরিযোগা সূপং গহেত্ৰা পরিভুঞ্জিত্ৰা উট্ঠাযাসনা পক্কমিং [পক্কামিং (স্যা. কং. পী.)]. অথ খো, মহারাজ, ঘটিকারো কুম্ভকারো যেন মাতাপিতরো তেনুপসঙ্কমি; উপসঙ্কমিত্ৰা মাতাপিতরো এতদৰোচ – ‘‘কো কুম্ভিযা ওদনং গহেত্ৰা পরিযোগা সূপং গহেত্ৰা পরিভুঞ্জিত্ৰা উট্ঠাযাসনা পক্কন্তো’’তি? ‘‘কস্সপো, তাত, ভগৰা অরহং সম্মাসম্বুদ্ধো কুম্ভিযা ওদনং গহেত্ৰা পরিযোগা সূপং গহেত্ৰা পরিভুঞ্জিত্ৰা উট্ঠাযাসনা পক্কন্তো’’তি? অথ খো, মহারাজ, ঘটিকারস্স কুম্ভকারস্স এতদহোসি – ‘‘লাভা ৰত মে, সুলদ্ধং ৰত মে, যস্স মে কস্সপো ভগৰা অরহং সম্মাসম্বুদ্ধো এৰং অভিৰিস্সত্থো’’তি. অথ খো, মহারাজ, ঘটিকারং কুম্ভকারং অড্ঢমাসং পীতিসুখং ন ৰিজহতি [ন ৰিজহি (সী. স্যা. কং. পী.)], সত্তাহং মাতাপিতূনং.

২৯০. ‘‘‘একমিদাহং, মহারাজ, সমযং তত্থেৰ ৰেগল়িঙ্গে নাম গামনিগমে ৰিহরামি. অথ খ্ৰাহং, মহারাজ, পুব্বণ্হসমযং নিৰাসেত্ৰা পত্তচীৰরমাদায যেন ঘটিকারস্স কুম্ভকারস্স মাতাপিতরো তেনুপসঙ্কমিং; উপসঙ্কমিত্ৰা ঘটিকারস্স কুম্ভকারস্স মাতাপিতরো এতদৰোচং – ‘‘হন্দ, কো নু খো অযং ভগ্গৰো গতো’’তি? ‘‘নিক্খন্তো খো তে, ভন্তে, উপট্ঠাকো অন্তো কল়োপিযা কুম্মাসং গহেত্ৰা পরিযোগা সূপং গহেত্ৰা পরিভুঞ্জা’’তি. অথ খ্ৰাহং, মহারাজ, কল়োপিযা কুম্মাসং গহেত্ৰা পরিযোগা সূপং গহেত্ৰা পরিভুঞ্জিত্ৰা উট্ঠাযাসনা পক্কমিং. অথ খো, মহারাজ, ঘটিকারো কুম্ভকারো যেন মাতাপিতরো তেনুপসঙ্কমি; উপসঙ্কমিত্ৰা মাতাপিতরো এতদৰোচ – ‘‘কো কল়োপিযা কুম্মাসং গহেত্ৰা পরিযোগা সূপং গহেত্ৰা পরিভুঞ্জিত্ৰা উট্ঠাযাসনা পক্কন্তো’’তি? ‘‘কস্সপো, তাত, ভগৰা অরহং সম্মাসম্বুদ্ধো কল়োপিযা কুম্মাসং গহেত্ৰা পরিযোগা সূপং গহেত্ৰা পরিভুঞ্জিত্ৰা উট্ঠাযাসনা পক্কন্তো’’তি. অথ খো, মহারাজ, ঘটিকারস্স কুম্ভকারস্স এতদহোসি – ‘‘লাভা ৰত মে, সুলদ্ধং ৰত মে, যস্স মে কস্সপো ভগৰা অরহং সম্মাসম্বুদ্ধো এৰং অভিৰিস্সত্থো’’তি. অথ খো, মহারাজ, ঘটিকারং কুম্ভকারং অড্ঢমাসং পীতিসুখং ন ৰিজহতি, সত্তাহং মাতাপিতূনং.

২৯১. ‘‘‘একমিদাহং, মহারাজ, সমযং তত্থেৰ ৰেগল়িঙ্গে নাম গামনিগমে ৰিহরামি. তেন খো পন সমযেন কুটি [গন্ধকুটি (সী.)] ওৰস্সতি. অথ খ্ৰাহং, মহারাজ, ভিক্খূ আমন্তেসিং – ‘‘গচ্ছথ, ভিক্খৰে, ঘটিকারস্স কুম্ভকারস্স নিৰেসনে তিণং জানাথা’’তি. এৰং ৰুত্তে, মহারাজ, তে ভিক্খূ মং এতদৰোচুং – ‘‘নত্থি খো, ভন্তে, ঘটিকারস্স কুম্ভকারস্স নিৰেসনে তিণং, অত্থি চ খ্ৰাস্স আৰেসনে [আৰেসনং (সী. স্যা. কং. পী.)] তিণচ্ছদন’’ [নৰচ্ছদনং (সী.)] ন্তি. ‘‘গচ্ছথ, ভিক্খৰে, ঘটিকারস্স কুম্ভকারস্স আৰেসনং উত্তিণং করোথা’’তি. অথ খো তে, মহারাজ, ভিক্খূ ঘটিকারস্স কুম্ভকারস্স আৰেসনং উত্তিণমকংসু. অথ খো, মহারাজ, ঘটিকারস্স কুম্ভকারস্স মাতাপিতরো তে ভিক্খূ এতদৰোচুং – ‘‘কে আৰেসনং উত্তিণং করোন্তী’’তি? ‘‘ভিক্খূ, ভগিনি, কস্সপস্স ভগৰতো অরহতো সম্মাসম্বুদ্ধস্স কুটি ওৰস্সতী’’তি. ‘‘হরথ, ভন্তে, হরথ, ভদ্রমুখা’’তি. অথ খো, মহারাজ, ঘটিকারো কুম্ভকারো যেন মাতাপিতরো তেনুপসঙ্কমি; উপসঙ্কমিত্ৰা মাতাপিতরো এতদৰোচ – ‘‘কে আৰেসনং উত্তিণমকংসূ’’তি? ‘‘ভিক্খূ, তাত, কস্সপস্স কির ভগৰতো অরহতো সম্মাসম্বুদ্ধস্স কুটি ওৰস্সতী’’তি. অথ খো, মহারাজ, ঘটিকারস্স কুম্ভকারস্স এতদহোসি – ‘‘লাভা ৰত মে, সুলদ্ধং ৰত মে, যস্স মে কস্সপো ভগৰা অরহং সম্মাসম্বুদ্ধো এৰং অভিৰিস্সত্থো’’তি. অথ খো, মহারাজ ঘটিকারং কুম্ভকারং অড্ঢমাসং পীতিসুখং ন ৰিজহতি, সত্তাহং মাতাপিতূনং. অথ খো, মহারাজ, আৰেসনং সব্বন্তং তেমাসং আকাসচ্ছদনং অট্ঠাসি, ন দেৰোতিৰস্সি [ন চাতিৰস্সি (সী. স্যা. কং. পী.)]. এৰরূপো চ, মহারাজ, ঘটিকারো কুম্ভকারো’তি. ‘লাভা, ভন্তে, ঘটিকারস্স কুম্ভকারস্স, সুলদ্ধা, ভন্তে, ঘটিকারস্স কুম্ভকারস্স যস্স ভগৰা এৰং অভিৰিস্সত্থো’’’তি.

২৯২. ‘‘অথ খো, আনন্দ, কিকী কাসিরাজা ঘটিকারস্স কুম্ভকারস্স পঞ্চমত্তানি তণ্ডুলৰাহসতানি পাহেসি পণ্ডুপুটকস্স সালিনো তদুপিযঞ্চ সূপেয্যং. অথ খো তে, আনন্দ, রাজপুরিসা ঘটিকারং কুম্ভকারং উপসঙ্কমিত্ৰা এতদৰোচুং – ‘ইমানি খো, ভন্তে, পঞ্চমত্তানি তণ্ডুলৰাহসতানি কিকিনা কাসিরাজেন পহিতানি পণ্ডুপুটকস্স সালিনো তদুপিযঞ্চ সূপেয্যং. তানি, ভন্তে, পটিগ্গণ্হথা’তি [পতিগ্গণ্হাতূতি (সী. পী.), পটিগ্গণ্হাতূতি (স্যা. কং.)]. ‘রাজা খো বহুকিচ্চো বহুকরণীযো. অলং মে! রঞ্ঞোৰ হোতূ’তি. সিযা খো পন তে, আনন্দ, এৰমস্স – ‘অঞ্ঞো নূন তেন সমযেন জোতিপালো মাণৰো অহোসী’তি. ন খো পনেতং, আনন্দ, এৰং দট্ঠব্বং. অহং তেন সমযেন জোতিপালো মাণৰো অহোসি’’ন্তি.

ইদমৰোচ ভগৰা. অত্তমনো আযস্মা আনন্দো ভগৰতো ভাসিতং অভিনন্দীতি.

ঘটিকারসুত্তং নিট্ঠিতং পঠমং.