৮. নল়কপানসুত্তং

১৬৬. এৰং মে সুতং – একং সমযং ভগৰা কোসলেসু ৰিহরতি নল়কপানে পলাসৰনে. তেন খো পন সমযেন সম্বহুলা অভিঞ্ঞাতা অভিঞ্ঞাতা কুলপুত্তা ভগৰন্তং উদ্দিস্স সদ্ধা অগারস্মা অনগারিযং পব্বজিতা হোন্তি – আযস্মা চ অনুরুদ্ধো, আযস্মা চ ভদ্দিযো [নন্দিযো (সী. পী.) ৰিনযে চ ম. নি. ১ চূল়গোসিঙ্গে চ], আযস্মা চ কিমিলো [কিম্বিলো (সী. স্যা. কং. পী.)], আযস্মা চ ভগু, আযস্মা চ কোণ্ডঞ্ঞো [কুণ্ডধানো (সী. পী.)], আযস্মা চ রেৰতো, আযস্মা চ আনন্দো, অঞ্ঞে চ অভিঞ্ঞাতা অভিঞ্ঞাতা কুলপুত্তা. তেন খো পন সমযেন ভগৰা ভিক্খুসঙ্ঘপরিৰুতো অব্ভোকাসে নিসিন্নো হোতি. অথ খো ভগৰা তে কুলপুত্তে আরব্ভ ভিক্খূ আমন্তেসি – ‘‘যে তে, ভিক্খৰে, কুলপুত্তা মমং উদ্দিস্স সদ্ধা অগারস্মা অনগারিযং পব্বজিতা, কচ্চি তে, ভিক্খৰে, ভিক্খূ অভিরতা ব্রহ্মচরিযে’’তি? এৰং ৰুত্তে, তে ভিক্খূ তুণ্হী অহেসুং. দুতিযম্পি খো ভগৰা তে কুলপুত্তে আরব্ভ ভিক্খূ আমন্তেসি – ‘‘যে তে, ভিক্খৰে, কুলপুত্তা মমং উদ্দিস্স সদ্ধা অগারস্মা অনগারিযং পব্বজিতা, কচ্চি তে, ভিক্খৰে, ভিক্খূ অভিরতা ব্রহ্মচরিযে’’তি? দুতিযম্পি খো তে ভিক্খূ তুণ্হী অহেসুং. ততিযম্পি খো ভগৰা তে কুলপুত্তে আরব্ভ ভিক্খূ আমন্তেসি – ‘‘যে তে, ভিক্খৰে, কুলপুত্তা মমং উদ্দিস্স সদ্ধা অগারস্মা অনগারিযং পব্বজিতা, কচ্চি তে, ভিক্খৰে, ভিক্খূ অভিরতা ব্রহ্মচরিযে’’তি? ততিযম্পি খো তে ভিক্খূ তুণ্হী অহেসুং.

১৬৭. অথ খো ভগৰতো এতদহোসি – ‘‘যংনূনাহং তে কুলপুত্তে পুচ্ছেয্য’’ন্তি! অথ খো ভগৰা আযস্মন্তং অনুরুদ্ধং আমন্তেসি – ‘‘কচ্চি তুম্হে, অনুরুদ্ধা, অভিরতা ব্রহ্মচরিযে’’তি? ‘‘তগ্ঘ মযং, ভন্তে, অভিরতা ব্রহ্মচরিযে’’তি. ‘‘সাধু সাধু, অনুরুদ্ধা! এতং খো, অনুরুদ্ধা, তুম্হাকং পতিরূপং কুলপুত্তানং সদ্ধা অগারস্মা অনগারিযং পব্বজিতানং যং তুম্হে অভিরমেয্যাথ ব্রহ্মচরিযে. যেন তুম্হে অনুরুদ্ধা, ভদ্রেন যোব্বনেন সমন্নাগতা পঠমেন ৰযসা সুসুকাল়কেসা কামে পরিভুঞ্জেয্যাথ তেন তুম্হে, অনুরুদ্ধা, ভদ্রেনপি যোব্বনেন সমন্নাগতা পঠমেন ৰযসা সুসুকাল়কেসা অগারস্মা অনগারিযং পব্বজিতা. তে চ খো পন তুম্হে, অনুরুদ্ধা, নেৰ রাজাভিনীতা অগারস্মা অনগারিযং পব্বজিতা, ন চোরাভিনীতা অগারস্মা অনগারিযং পব্বজিতা, ন ইণট্টা অগারস্মা অনগারিযং পব্বজিতা, ন ভযট্টা অগারস্মা অনগারিযং পব্বজিতা, নাজীৰিকাপকতা অগারস্মা অনগারিযং পব্বজিতা. অপি চ খোম্হি ওতিণ্ণো জাতিযা জরায মরণেন সোকেহি পরিদেৰেহি দুক্খেহি দোমনস্সেহি উপাযাসেহি, দুক্খোতিণ্ণো দুক্খপরেতো; অপ্পেৰ নাম ইমস্স কেৰলস্স দুক্খক্খন্ধস্স অন্তকিরিযা পঞ্ঞাযেথাতি – ননু তুম্হে, অনুরুদ্ধা, এৰং সদ্ধা অগারস্মা অনগারিযং পব্বজিতা’’তি? ‘‘এৰং, ভন্তে’’. ‘‘এৰং পব্বজিতেন চ পন, অনুরুদ্ধা, কুলপুত্তেন কিমস্স করণীযং? ৰিৰেকং, অনুরুদ্ধা, কামেহি ৰিৰেকং অকুসলেহি ধম্মেহি পীতিসুখং নাধিগচ্ছতি অঞ্ঞং ৰা [অঞ্ঞং চ (ক.)] ততো সন্ততরং, তস্স অভিজ্ঝাপি চিত্তং পরিযাদায তিট্ঠতি, ব্যাপাদোপি চিত্তং পরিযাদায তিট্ঠতি, থীনমিদ্ধম্পি [থীনমিদ্ধম্পি (সী. স্যা. কং. পী.)] চিত্তং পরিযাদায তিট্ঠতি উদ্ধচ্চকুক্কুচ্চম্পি চিত্তং পরিযাদায তিট্ঠতি, ৰিচিকিচ্ছাপি চিত্তং পরিযাদায তিট্ঠতি, অরতীপি চিত্তং পরিযাদায তিট্ঠতি, তন্দীপি চিত্তং পরিযাদায তিট্ঠতি. ৰিৰেকং, অনুরুদ্ধা, কামেহি ৰিৰেকং অকুসলেহি ধম্মেহি পীতিসুখং নাধিগচ্ছতি অঞ্ঞং ৰা ততো সন্ততরং’’.

‘‘ৰিৰেকং, অনুরুদ্ধা, কামেহি ৰিৰেকং অকুসলেহি ধম্মেহি পীতিসুখং অধিগচ্ছতি অঞ্ঞং ৰা ততো সন্ততরং, তস্স অভিজ্ঝাপি চিত্তং ন পরিযাদায তিট্ঠতি, ব্যাপাদোপি চিত্তং ন পরিযাদায তিট্ঠতি, থীনমিদ্ধম্পি চিত্তং ন পরিযাদায তিট্ঠতি, উদ্ধচ্চকুক্কুচ্চম্পি চিত্তং ন পরিযাদায তিট্ঠতি, ৰিচিকিচ্ছাপি চিত্তং ন পরিযাদায তিট্ঠতি, অরতীপি চিত্তং ন পরিযাদায তিট্ঠতি, তন্দীপি চিত্তং ন পরিযাদায তিট্ঠতি. ৰিৰেকং, অনুরুদ্ধা, কামেহি ৰিৰেকং অকুসলেহি ধম্মেহি পীতিসুখং অধিগচ্ছতি অঞ্ঞং ৰা ততো সন্ততরং.

১৬৮. ‘‘কিন্তি ৰো, অনুরুদ্ধা, মযি হোতি – ‘যে আসৰা সংকিলেসিকা পোনোব্ভৰিকা [পোনোভৰিকা (সী. পী.)] সদরা দুক্খৰিপাকা আযতিং জাতিজরামরণিযা, অপ্পহীনা তে তথাগতস্স; তস্মা তথাগতো সঙ্খাযেকং পটিসেৰতি, সঙ্খাযেকং অধিৰাসেতি, সঙ্খাযেকং পরিৰজ্জেতি, সঙ্খাযেকং ৰিনোদেতী’’’তি? ‘‘ন খো নো, ভন্তে, ভগৰতি এৰং হোতি – ‘যে আসৰা সংকিলেসিকা পোনোব্ভৰিকা সদরা দুক্খৰিপাকা আযতিং জাতিজরামরণিযা, অপ্পহীনা তে তথাগতস্স; তস্মা তথাগতো সঙ্খাযেকং পটিসেৰতি, সঙ্খাযেকং অধিৰাসেতি, সঙ্খাযেকং পরিৰজ্জেতি, সঙ্খাযেকং ৰিনোদেতী’তি. এৰং খো নো, ভন্তে, ভগৰতি হোতি – ‘যে আসৰা সংকিলেসিকা পোনোব্ভৰিকা সদরা দুক্খৰিপাকা আযতিং জাতিজরামরণিযা, পহীনা তে তথাগতস্স; তস্মা তথাগতো সঙ্খাযেকং পটিসেৰতি, সঙ্খাযেকং অধিৰাসেতি, সঙ্খাযেকং পরিৰজ্জেতি, সঙ্খাযেকং ৰিনোদেতী’’’তি. ‘‘সাধু সাধু, অনুরুদ্ধা! তথাগতস্স, অনুরুদ্ধা, যে আসৰা সংকিলেসিকা পোনোব্ভৰিকা সদরা দুক্খৰিপাকা আযতিং জাতিজরামরণিযা, পহীনা তে উচ্ছিন্নমূলা তালাৰত্থুকতা অনভাৰংকতা আযতিং অনুপ্পাদধম্মা. সেয্যথাপি, অনুরুদ্ধা, তালো মত্থকচ্ছিন্নো অভব্বো পুনৰিরূল়্হিযা; এৰমেৰ খো, অনুরুদ্ধা, তথাগতস্স যে আসৰা সংকিলেসিকা পোনোব্ভৰিকা সদরা দুক্খৰিপাকা আযতিং জাতিজরামরণিযা, পহীনা তে উচ্ছিন্নমূলা তালাৰত্থুকতা অনভাৰংকতা আযতিং অনুপ্পাদধম্মা; তস্মা তথাগতো সঙ্খাযেকং পটিসেৰতি, সঙ্খাযেকং অধিৰাসেতি, সঙ্খাযেকং পরিৰজ্জেতি, সঙ্খাযেকং ৰিনোদেতি’’.

‘‘তং কিং মঞ্ঞসি, অনুরুদ্ধা, কং অত্থৰসং সম্পস্সমানো তথাগতো সাৰকে অব্ভতীতে কালঙ্কতে উপপত্তীসু ব্যাকরোতি – ‘অসু অমুত্র উপপন্নো; অসু অমুত্র উপপন্নো’’’তি? ‘‘ভগৰংমূলকা নো, ভন্তে, ধম্মা ভগৰংনেত্তিকা ভগৰংপটিসরণা. সাধু ৰত, ভন্তে, ভগৰন্তংযেৰ পটিভাতু এতস্স ভাসিতস্স অত্থো. ভগৰতো সুত্ৰা ভিক্খূ ধারেস্সন্তী’’তি. ‘‘ন খো, অনুরুদ্ধা, তথাগতো জনকুহনত্থং ন জনলপনত্থং ন লাভসক্কারসিলোকানিসংসত্থং ন ‘ইতি মং জনো জানাতূ’তি সাৰকে অব্ভতীতে কালঙ্কতে উপপত্তীসু ব্যাকরোতি – ‘অসু অমুত্র উপপন্নো, অসু অমুত্র উপপন্নো’তি. সন্তি চ খো, অনুরুদ্ধা, কুলপুত্তা সদ্ধা উল়ারৰেদা উল়ারপামোজ্জা. তে তং সুত্ৰা তদত্থায চিত্তং উপসংহরন্তি. তেসং তং, অনুরুদ্ধা, হোতি দীঘরত্তং হিতায সুখায’’.

১৬৯. ‘‘ইধানুরুদ্ধা, ভিক্খু সুণাতি – ‘ইত্থন্নামো ভিক্খু কালঙ্কতো [কালকতো (সী. স্যা. কং. পী.)]; সো ভগৰতা ব্যাকতো – অঞ্ঞায সণ্ঠহী’তি. সো খো পনস্স আযস্মা সামং দিট্ঠো ৰা হোতি অনুস্সৰস্সুতো ৰা – ‘এৰংসীলো সো আযস্মা অহোসি ইতিপি, এৰংধম্মো সো আযস্মা অহোসি ইতিপি, এৰংপঞ্ঞো সো আযস্মা অহোসি ইতিপি, এৰংৰিহারী সো আযস্মা অহোসি ইতিপি, এৰংৰিমুত্তো সো আযস্মা অহোসি ইতিপী’তি. সো তস্স সদ্ধঞ্চ সীলঞ্চ সুতঞ্চ চাগঞ্চ পঞ্ঞঞ্চ অনুস্সরন্তো তদত্থায চিত্তং উপসংহরতি. এৰম্পি খো, অনুরুদ্ধা, ভিক্খুনো ফাসুৰিহারো হোতি.

‘‘ইধানুরুদ্ধা, ভিক্খু সুণাতি – ‘ইত্থন্নামো ভিক্খু কালঙ্কতো; সো ভগৰতা ব্যাকতো – পঞ্চন্নং ওরম্ভাগিযানং সংযোজনানং পরিক্খযা ওপপাতিকো তত্থ পরিনিব্বাযী অনাৰত্তিধম্মো তস্মা লোকা’তি. সো খো পনস্স আযস্মা সামং দিট্ঠো ৰা হোতি অনুস্সৰস্সুতো ৰা – ‘এৰংসীলো সো আযস্মা অহোসি ইতিপি, এৰংধম্মো…পে… এৰংপঞ্ঞো… এৰংৰিহারী… এৰংৰিমুত্তো সো আযস্মা অহোসি ইতিপী’তি. সো তস্স সদ্ধঞ্চ সীলঞ্চ সুতঞ্চ চাগঞ্চ পঞ্ঞঞ্চ অনুস্সরন্তো তদত্থায চিত্তং উপসংহরতি. এৰম্পি খো, অনুরুদ্ধা, ভিক্খুনো ফাসুৰিহারো হোতি.

‘‘ইধানুরুদ্ধা, ভিক্খু সুণাতি – ‘ইত্থন্নামো ভিক্খু কালঙ্কতো; সো ভগৰতা ব্যাকতো – তিণ্ণং সংযোজনানং পরিক্খযা রাগদোসমোহানং তনুত্তা সকদাগামী সকিদেৰ ইমং লোকং আগন্ত্ৰা দুক্খস্সন্তং করিস্সতী’তি. সো খো পনস্স আযস্মা সামং দিট্ঠো ৰা হোতি অনুস্সৰস্সুতো ৰা – ‘এৰংসীলো সো আযস্মা অহোসি ইতিপি, এৰংধম্মো…পে… এৰংপঞ্ঞো… এৰংৰিহারী… এৰংৰিমুত্তো সো আযস্মা অহোসি ইতিপী’তি. সো তস্স সদ্ধঞ্চ সীলঞ্চ সুতঞ্চ চাগঞ্চ পঞ্ঞঞ্চ অনুস্সরন্তো তদত্থায চিত্তং উপসংহরতি. এৰম্পি খো, অনুরুদ্ধা, ভিক্খুনো ফাসুৰিহারো হোতি.

‘‘ইধানুরুদ্ধা, ভিক্খু সুণাতি – ‘ইত্থন্নামো ভিক্খু কালঙ্কতো; সো ভগৰতা ব্যাকতো – তিণ্ণং সংযোজনানং পরিক্খযা সোতাপন্নো অৰিনিপাতধম্মো নিযতো সম্বোধিপরাযণো’তি. সো খো পনস্স আযস্মা সামং দিট্ঠো ৰা হোতি অনুস্সৰস্সুতো ৰা – ‘এৰংসীলো সো আযস্মা অহোসি ইতিপি, এৰংধম্মো…পে… এৰংপঞ্ঞো… এৰংৰিহারী… এৰংৰিমুত্তো সো আযস্মা অহোসি ইতিপী’তি. সো তস্স সদ্ধঞ্চ সীলঞ্চ সুতঞ্চ চাগঞ্চ পঞ্ঞঞ্চ অনুস্সরন্তো তদত্থায চিত্তং উপসংহরতি. এৰম্পি খো, অনুরুদ্ধা, ভিক্খুনো ফাসুৰিহারো হোতি.

১৭০. ‘‘ইধানুরুদ্ধা, ভিক্খুনী সুণাতি – ‘ইত্থন্নামা ভিক্খুনী কালঙ্কতা; সা ভগৰতা ব্যাকতা – অঞ্ঞায সণ্ঠহী’তি. সা খো পনস্সা ভগিনী সামং দিট্ঠা ৰা হোতি অনুস্সৰস্সুতা ৰা – ‘এৰংসীলা সা ভগিনী অহোসি ইতিপি, এৰংধম্মা সা ভগিনী অহোসি ইতিপি, এৰংপঞ্ঞা সা ভগিনী অহোসি ইতিপি, এৰংৰিহারিনী সা ভগিনী অহোসি ইতিপি, এৰংৰিমুত্তা সা ভগিনী অহোসি ইতিপী’তি. সা তস্সা সদ্ধঞ্চ সীলঞ্চ সুতঞ্চ চাগঞ্চ পঞ্ঞঞ্চ অনুস্সরন্তী তদত্থায চিত্তং উপসংহরতি. এৰম্পি খো, অনুরুদ্ধা, ভিক্খুনিযা ফাসুৰিহারো হোতি.

‘‘ইধানুরুদ্ধা, ভিক্খুনী সুণাতি – ‘ইত্থন্নামা ভিক্খুনী কালঙ্কতা; সা ভগৰতা ব্যাকতা – পঞ্চন্নং ওরম্ভাগিযানং সংযোজনানং পরিক্খযা ওপপাতিকা তত্থ পরিনিব্বাযিনী অনাৰত্তিধম্মা তস্মা লোকা’তি. সা খো পনস্সা ভগিনী সামং দিট্ঠা ৰা হোতি অনুস্সৰস্সুতা ৰা – ‘এৰংসীলা সা ভগিনী অহোসি ইতিপি, এৰংধম্মা…পে… এৰংপঞ্ঞা… এৰংৰিহারিনী… এৰংৰিমুত্তা সা ভগিনী অহোসি ইতিপী’তি. সা তস্সা সদ্ধঞ্চ সীলঞ্চ সুতঞ্চ চাগঞ্চ পঞ্ঞঞ্চ অনুস্সরন্তী তদত্থায চিত্তং উপসংহরতি. এৰম্পি খো, অনুরুদ্ধা, ভিক্খুনিযা ফাসুৰিহারো হোতি.

‘‘ইধানুরুদ্ধা, ভিক্খুনী সুণাতি – ‘ইত্থন্নামা ভিক্খুনী কালঙ্কতা; সা ভগৰতা ব্যাকতা – তিণ্ণং সংযোজনানং পরিক্খযা রাগদোসমোহানং তনুত্তা সকদাগামিনী সকিদেৰ ইমং লোকং আগন্ত্ৰা দুক্খস্সন্তং করিস্সতী’তি. সা খো পনস্সা ভগিনী সামং দিট্ঠা ৰা হোতি অনুস্সৰস্সুতা ৰা – ‘এৰংসীলা সা ভগিনী অহোসি ইতিপি, এৰংধম্মা…পে… এৰংপঞ্ঞা… এৰংৰিহারিনী… এৰংৰিমুত্তা সা ভগিনী অহোসি ইতিপী’তি. সা তস্সা সদ্ধঞ্চ সীলঞ্চ সুতঞ্চ চাগঞ্চ পঞ্ঞঞ্চ অনুস্সরন্তী তদত্থায চিত্তং উপসংহরতি. এৰম্পি খো, অনুরুদ্ধা, ভিক্খুনিযা ফাসুৰিহারো হোতি.

‘‘ইধানুরুদ্ধা, ভিক্খুনী সুণাতি – ‘ইত্থন্নামা ভিক্খুনী কালঙ্কতা; সা ভগৰতা ব্যাকতা – তিণ্ণং সংযোজনানং পরিক্খযা সোতাপন্না অৰিনিপাতধম্মা নিযতা সম্বোধিপরাযণা’তি. সা খো পনস্সা ভগিনী সামং দিট্ঠা ৰা হোতি অনুস্সৰস্সুতা ৰা – ‘এৰংসীলা সা ভগিনী অহোসি ইতিপি, এৰংধম্মা… এৰংপঞ্ঞা… এৰংৰিহারিনী… এৰংৰিমুত্তা সা ভগিনী অহোসি ইতিপী’তি. সা তস্সা সদ্ধঞ্চ সীলঞ্চ সুতঞ্চ চাগঞ্চ পঞ্ঞঞ্চ অনুস্সরন্তী তদত্থায চিত্তং উপসংহরতি. এৰম্পি খো, অনুরুদ্ধা, ভিক্খুনিযা ফাসুৰিহারো হোতি.

১৭১. ‘‘ইধানুরুদ্ধা, উপাসকো সুণাতি – ‘ইত্থন্নামো উপাসকো কালঙ্কতো; সো ভগৰতা ব্যাকতো – পঞ্চন্নং ওরম্ভাগিযানং সংযোজনানং পরিক্খযা ওপপাতিকো তত্থ পরিনিব্বাযী অনাৰত্তিধম্মো তস্মা লোকা’তি. সো খো পনস্স আযস্মা সামং দিট্ঠো ৰা হোতি অনুস্সৰস্সুতো ৰা – ‘এৰংসীলো সো আযস্মা অহোসি ইতিপি, এৰংধম্মো সো আযস্মা অহোসি ইতিপি, এৰংপঞ্ঞো সো আযস্মা অহোসি ইতিপি, এৰংৰিহারী সো আযস্মা অহোসি ইতিপি, এৰংৰিমুত্তো সো আযস্মা অহোসি ইতিপী’তি. সো তস্স সদ্ধঞ্চ সুতঞ্চ চাগঞ্চ পঞ্ঞঞ্চ অনুস্সরন্তো তদত্থায চিত্তং উপসংহরতি. এৰম্পি খো, অনুরুদ্ধা, উপাসকস্স ফাসুৰিহারো হোতি.

‘‘ইধানুরুদ্ধা, উপাসকো সুণাতি – ‘ইত্থন্নামো উপাসকো কালঙ্কতো; সো ভগৰতা ব্যাকতো – তিণ্ণং সংযোজনানং পরিক্খযা রাগদোসমোহানং তনুত্তা সকদাগামী সকিদেৰ ইমং লোকং আগন্ত্ৰা দুক্খস্সন্তং করিস্সতী’তি. সো খো পনস্স আযস্মা সামং দিট্ঠো ৰা হোতি অনুস্সৰস্সুতো ৰা – ‘এৰংসীলো সো আযস্মা অহোসি ইতিপি, এৰংধম্মো… এৰংপঞ্ঞো… এৰংৰিহারী… এৰংৰিমুত্তো সো আযস্মা অহোসি ইতিপী’তি. সো তস্স সদ্ধঞ্চ সীলঞ্চ সুতঞ্চ চাগঞ্চ পঞ্ঞঞ্চ অনুস্সরন্তো তদত্থায চিত্তং উপসংহরতি. এৰম্পি খো, অনুরুদ্ধা, উপাসকস্স ফাসুৰিহারো হোতি.

‘‘ইধানুরুদ্ধা, উপাসকো সুণাতি – ‘ইত্থন্নামো উপাসকো কালঙ্কতো; সো ভগৰতা ব্যাকতো – তিণ্ণং সংযোজনানং পরিক্খযা সোতাপন্নো অৰিনিপাতধম্মো নিযতো সম্বোধিপরাযণো’তি. সো খো পনস্স আযস্মা সামং দিট্ঠো ৰা হোতি অনুস্সৰস্সুতো ৰা – ‘এৰংসীলো সো আযস্মা অহোসি ইতিপি, এৰংধম্মো…পে… এৰংপঞ্ঞো… এৰংৰিহারী… এৰংৰিমুত্তো সো আযস্মা অহোসি ইতিপী’তি. সো তস্স সদ্ধঞ্চ সীলঞ্চ সুতঞ্চ চাগঞ্চ পঞ্ঞঞ্চ অনুস্সরন্তো তদত্থায চিত্তং উপসংহরতি. এৰম্পি খো, অনুরুদ্ধা উপাসকস্স ফাসুৰিহারো হোতি.

১৭২. ‘‘ইধানুরুদ্ধা, উপাসিকা সুণাতি – ‘ইত্থন্নামা উপাসিকা কালঙ্কতা; সা ভগৰতা ব্যাকতা – পঞ্চন্নং ওরম্ভাগিযানং সংযোজনানং পরিক্খযা ওপপাতিকা তত্থ পরিনিব্বাযিনী অনাৰত্তিধম্মা তস্মা লোকা’তি. সা খো পনস্সা ভগিনী সামং দিট্ঠা ৰা হোতি অনুস্সৰস্সুতা ৰা – ‘এৰংসীলা সা ভগিনী অহোসি ইতিপি, এৰংধম্মা… এৰংপঞ্ঞা… এৰংৰিহারিনী… এৰংৰিমুত্তা সা ভগিনী অহোসি ইতিপী’তি. সা তস্সা সদ্ধঞ্চ সীলঞ্চ সুতঞ্চ চাগঞ্চ পঞ্ঞঞ্চ অনুস্সরন্তী তদত্থায চিত্তং উপসংহরতি. এৰম্পি খো, অনুরুদ্ধা, উপাসিকায ফাসুৰিহারো হোতি.

‘‘ইধানুরুদ্ধা, উপাসিকা সুণাতি – ‘ইত্থন্নামা উপাসিকা কালঙ্কতা; সা ভগৰতা ব্যাকতা – তিণ্ণং সংযোজনানং পরিক্খযা রাগদোসমোহানং তনুত্তা সকদাগামিনী সকিদেৰ ইমং লোকং আগন্ত্ৰা দুক্খস্সন্তং করিস্সতী’তি. সা খো পনস্সা ভগিনী সামং দিট্ঠা ৰা হোতি অনুস্সৰস্সুতা ৰা – ‘এৰংসীলা সা ভগিনী অহোসি ইতিপি, এৰংধম্মা… এৰংপঞ্ঞা… এৰংৰিহারিনী… এৰংৰিমুত্তা সা ভগিনী অহোসি ইতিপী’তি. সা তস্সা সদ্ধঞ্চ সীলঞ্চ সুতঞ্চ চাগঞ্চ পঞ্ঞঞ্চ অনুস্সরন্তী তদত্থায চিত্তং উপসংহরতি. এৰম্পি খো, অনুরুদ্ধা, উপাসিকায ফাসুৰিহারো হোতি.

‘‘ইধানুরুদ্ধা, উপাসিকা সুণাতি – ‘ইত্থন্নামা উপাসিকা কালঙ্কতা; সা ভগৰতা ব্যাকতা – তিণ্ণং সংযোজনানং পরিক্খযা সোতাপন্না অৰিনিপাতধম্মা নিযতা সম্বোধিপরাযণা’তি. সা খো পনস্সা ভগিনী সামং দিট্ঠা ৰা হোতি অনুস্সৰস্সুতা ৰা – ‘এৰংসীলা সা ভগিনী অহোসি ইতিপি, এৰংধম্মা সা ভগিনী অহোসি ইতিপি, এৰংপঞ্ঞা সা ভগিনী অহোসি ইতিপি, এৰংৰিহারিনী সা ভগিনী অহোসি ইতিপি, এৰংৰিমুত্তা সা ভগিনী অহোসি ইতিপী’তি. সা তস্সা সদ্ধঞ্চ সীলঞ্চ সুতঞ্চ চাগঞ্চ পঞ্ঞঞ্চ অনুস্সরন্তী তদত্থায চিত্তং উপসংহরতি. এৰম্পি খো, অনুরুদ্ধা, উপাসিকায ফাসুৰিহারো হোতি.

‘‘ইতি খো, অনুরুদ্ধা, তথাগতো ন জনকুহনত্থং ন জনলপনত্থং ন লাভসক্কারসিলোকানিসংসত্থং ন ‘ইতি মং জনো জানাতূ’তি সাৰকে অব্ভতীতে কালঙ্কতে উপপত্তীসু ব্যাকরোতি – ‘অসু অমুত্র উপপন্নো, অসু অমুত্র উপপন্নো’তি. সন্তি চ খো, অনুরুদ্ধা, কুলপুত্তা সদ্ধা উল়ারৰেদা উল়ারপামোজ্জা. তে তং সুত্ৰা তদত্থায চিত্তং উপসংহরন্তি. তেসং তং, অনুরুদ্ধা, হোতি দীঘরত্তং হিতায সুখাযা’’তি.

ইদমৰোচ ভগৰা. অত্তমনো আযস্মা অনুরুদ্ধো ভগৰতো ভাসিতং অভিনন্দীতি.

নল়কপানসুত্তং নিট্ঠিতং অট্ঠমং.