৫. ভদ্দালিসুত্তং

১৩৪. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে. তত্র খো ভগৰা ভিক্খূ আমন্তেসি – ‘‘ভিক্খৰো’’তি. ‘‘ভদন্তে’’তি তে ভিক্খূ ভগৰতো পচ্চস্সোসুং. ভগৰা এতদৰোচ – ‘‘অহং খো, ভিক্খৰে, একাসনভোজনং ভুঞ্জামি; একাসনভোজনং খো, অহং, ভিক্খৰে, ভুঞ্জমানো অপ্পাবাধতঞ্চ সঞ্জানামি অপ্পাতঙ্কতঞ্চ লহুট্ঠানঞ্চ বলঞ্চ ফাসুৰিহারঞ্চ. এথ, তুম্হেপি, ভিক্খৰে, একাসনভোজনং ভুঞ্জথ; একাসনভোজনং খো, ভিক্খৰে, তুম্হেপি ভুঞ্জমানা অপ্পাবাধতঞ্চ সঞ্জানিস্সথ অপ্পাতঙ্কতঞ্চ লহুট্ঠানঞ্চ বলঞ্চ ফাসুৰিহারঞ্চা’’তি. এৰং ৰুত্তে, আযস্মা ভদ্দালি ভগৰন্তং এতদৰোচ – ‘‘অহং খো, ভন্তে, ন উস্সহামি একাসনভোজনং ভুঞ্জিতুং; একাসনভোজনঞ্হি মে, ভন্তে, ভুঞ্জতো সিযা কুক্কুচ্চং, সিযা ৰিপ্পটিসারো’’তি. ‘‘তেন হি ত্ৰং, ভদ্দালি, যত্থ নিমন্তিতো অস্সসি তত্থ একদেসং ভুঞ্জিত্ৰা একদেসং নীহরিত্ৰাপি ভুঞ্জেয্যাসি. এৰম্পি খো ত্ৰং, ভদ্দালি, ভুঞ্জমানো একাসনো যাপেস্সসী’’তি [ভুঞ্জমানো যাপেস্সসীতি (সী. স্যা. কং. পী.)]. ‘‘এৰম্পি খো অহং, ভন্তে, ন উস্সহামি ভুঞ্জিতুং; এৰম্পি হি মে, ভন্তে, ভুঞ্জতো সিযা কুক্কুচ্চং, সিযা ৰিপ্পটিসারো’’তি. অথ খো আযস্মা ভদ্দালি ভগৰতা সিক্খাপদে পঞ্ঞাপিযমানে ভিক্খুসঙ্ঘে সিক্খং সমাদিযমানে অনুস্সাহং পৰেদেসি. অথ খো আযস্মা ভদ্দালি সব্বং তং তেমাসং ন ভগৰতো সম্মুখীভাৰং অদাসি, যথা তং সত্থুসাসনে সিক্খায অপরিপূরকারী.

১৩৫. তেন খো পন সমযেন সম্বহুলা ভিক্খূ ভগৰতো চীৰরকম্মং করোন্তি – নিট্ঠিতচীৰরো ভগৰা তেমাসচ্চযেন চারিকং পক্কমিস্সতীতি. অথ খো আযস্মা ভদ্দালি যেন তে ভিক্খূ তেনুপসঙ্কমি; উপসঙ্কমিত্ৰা তেহি ভিক্খূহি সদ্ধিং সম্মোদি. সম্মোদনীযং কথং সারণীযং ৰীতিসারেত্ৰা একমন্তং নিসীদি. একমন্তং নিসিন্নং খো আযস্মন্তং ভদ্দালিং তে ভিক্খূ এতদৰোচুং – ‘‘ইদং খো, আৰুসো ভদ্দালি, ভগৰতো চীৰরকম্মং করীযতি [করণীযং (ক.)]. নিট্ঠিতচীৰরো ভগৰা তেমাসচ্চযেন চারিকং পক্কমিস্সতি. ইঙ্ঘাৰুসো ভদ্দালি, এতং দোসকং সাধুকং মনসি করোহি, মা তে পচ্ছা দুক্করতরং অহোসী’’তি. ‘‘এৰমাৰুসো’’তি খো আযস্মা ভদ্দালি তেসং ভিক্খূনং পটিস্সুত্ৰা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি. একমন্তং নিসিন্নো খো আযস্মা ভদ্দালি ভগৰন্তং এতদৰোচ – ‘‘অচ্চযো মং, ভন্তে, অচ্চগমা যথাবালং যথামূল়্হং যথাঅকুসলং, যোহং ভগৰতা সিক্খাপদে পঞ্ঞাপিযমানে ভিক্খুসঙ্ঘে সিক্খং সমাদিযমানে অনুস্সাহং পৰেদেসিং. তস্স মে, ভন্তে, ভগৰা অচ্চযং অচ্চযতো পটিগ্গণ্হাতু আযতিং সংৰরাযা’’তি.

‘‘তগ্ঘ ত্ৰং, ভদ্দালি, অচ্চযো অচ্চগমা যথাবালং যথামূল়্হং যথাঅকুসলং, যং ত্ৰং মযা সিক্খাপদে পঞ্ঞাপিযমানে ভিক্খুসঙ্ঘে সিক্খং সমাদিযমানে অনুস্সাহং পৰেদেসি. সমযোপি খো তে, ভদ্দালি, অপ্পটিৰিদ্ধো অহোসি – ‘ভগৰা খো সাৰত্থিযং ৰিহরতি, ভগৰাপি মং জানিস্সতি – ভদ্দালি নাম ভিক্খু সত্থুসাসনে সিক্খায অপরিপূরকারী’তি. অযম্পি খো তে, ভদ্দালি, সমযো অপ্পটিৰিদ্ধো অহোসি. সমযোপি খো তে, ভদ্দালি, অপ্পটিৰিদ্ধো অহোসি – ‘সম্বহুলা খো ভিক্খু সাৰত্থিযং ৰস্সং উপগতা, তেপি মং জানিস্সন্তি – ভদ্দালি নাম ভিক্খু সত্থুসাসনে সিক্খায অপরিপূরকারী’তি. অযম্পি খো তে, ভদ্দালি, সমযো অপ্পটিৰিদ্ধো অহোসি. সমযোপি খো তে, ভদ্দালি, অপ্পটিৰিদ্ধো অহোসি – ‘সম্বহুলা খো ভিক্খুনিযো সাৰত্থিযং ৰস্সং উপগতা, তাপি মং জানিস্সন্তি – ভদ্দালি নাম ভিক্খু সত্থুসাসনে সিক্খায অপরিপূরকারী’তি. অযম্পি খো তে, ভদ্দালি, সমযো অপ্পটিৰিদ্ধো অহোসি. সমযোপি খো তে, ভদ্দালি, অপ্পটিৰিদ্ধো অহোসি – ‘সম্বহুলা খো উপাসকা সাৰত্থিযং পটিৰসন্তি, তেপি মং জানিস্সন্তি – ভদ্দালি নাম ভিক্খু সত্থুসাসনে সিক্খায অপরিপূরকারী’তি. অযম্পি খো তে, ভদ্দালি, সমযো অপ্পটিৰিদ্ধো অহোসি. সমযোপি খো তে, ভদ্দালি, অপ্পটিৰিদ্ধো অহোসি – ‘সম্বহুলা খো উপাসিকা সাৰত্থিযং পটিৰসন্তি, তাপি মং জানিস্সন্তি – ভদ্দালি নাম ভিক্খু সত্থুসাসনে সিক্খায অপরিপূরকারী’তি. অযম্পি খো তে, ভদ্দালি, সমযো অপ্পটিৰিদ্ধো অহোসি. সমযোপি খো তে, ভদ্দালি, অপ্পটিৰিদ্ধো অহোসি – ‘সম্বহুলা খো নানাতিত্থিযা সমণব্রাহ্মণা সাৰত্থিযং ৰস্সং উপগতা, তেপি মং জানিস্সন্তি – ভদ্দালি নাম ভিক্খু সমণস্স গোতমস্স সাৰকো থেরঞ্ঞতরো ভিক্খু সাসনে সিক্খায অপরিপূরকারী’তি. অযম্পি খো তে, ভদ্দালি, সমযো অপ্পটিৰিদ্ধো অহোসী’’তি.

‘‘অচ্চযো মং, ভন্তে, অচ্চগমা যথাবালং যথামূল়্হং যথাঅকুসলং, যোহং ভগৰতা সিক্খাপদে পঞ্ঞাপিযমানে ভিক্খুসঙ্ঘে সিক্খং সমাদিযমানে অনুস্সাহং পৰেদেসিং. তস্স মে, ভন্তে, ভগৰা অচ্চযং অচ্চযতো পটিগ্গণ্হাতু আযতিং সংৰরাযা’’তি. ‘‘তগ্ঘ ত্ৰং, ভদ্দালি, অচ্চযো অচ্চগমা যথাবালং যথামূল়্হং যথাঅকুসলং, যং ত্ৰং মযা সিক্খাপদে পঞ্ঞাপিযমানে ভিক্খুসঙ্ঘে সিক্খং সমাদিযমানে অনুস্সাহং পৰেদেসি’’.

১৩৬. ‘‘তং কিং মঞ্ঞসি, ভদ্দালি, ইধস্স ভিক্খু উভতোভাগৰিমুত্তো, তমহং এৰং ৰদেয্যং – ‘এহি মে ত্ৰং, ভিক্খু, পঙ্কে সঙ্কমো হোহী’তি, অপি নু খো সো সঙ্কমেয্য ৰা অঞ্ঞেন ৰা কাযং সন্নামেয্য, ‘নো’তি ৰা ৰদেয্যা’’তি?

‘‘নো হেতং, ভন্তে’’.

‘‘তং কিং মঞ্ঞসি, ভদ্দালি, ইধস্স ভিক্খু পঞ্ঞাৰিমুত্তো… কাযসক্খি… দিট্ঠিপ্পত্তো… সদ্ধাৰিমুত্তো… ধম্মানুসারী… সদ্ধানুসারী, তমহং এৰং ৰদেয্যং – ‘এহি মে ত্ৰং, ভিক্খু, পঙ্কে সঙ্কমো হোহী’তি, অপি নু খো সো সঙ্কমেয্য ৰা অঞ্ঞেন ৰা কাযং সন্নামেয্য, ‘নো’তি ৰা ৰদেয্যা’’তি?

‘‘নো হেতং, ভন্তে’’.

‘‘তং কিং মঞ্ঞসি, ভদ্দালি, অপি নু ত্ৰং, ভদ্দালি, তস্মিং সমযে উভতোভাগৰিমুত্তো ৰা হোসি পঞ্ঞাৰিমুত্তো ৰা কাযসক্খি ৰা দিট্ঠিপ্পত্তো ৰা সদ্ধাৰিমুত্তো ৰা ধম্মানুসারী ৰা সদ্ধানুসারী ৰা’’তি?

‘‘নো হেতং, ভন্তে’’.

‘‘ননু ত্ৰং, ভদ্দালি, তস্মিং সমযে রিত্তো তুচ্ছো অপরদ্ধো’’তি?

‘‘এৰং, ভন্তে. অচ্চযো মং, ভন্তে, অচ্চগমা যথাবালং যথামূল়্হং যথাঅকুসলং, যোহং ভগৰতা সিক্খাপদে পঞ্ঞাপিযমানে ভিক্খুসঙ্ঘে সিক্খং সমাদিযমানে অনুস্সাহং পৰেদেসিং. তস্স মে, ভন্তে, ভগৰা অচ্চযং অচ্চযতো পটিগ্গণ্হাতু আযতিং সংৰরাযা’’তি. ‘‘তগ্ঘ ত্ৰং, ভদ্দালি, অচ্চযো অচ্চগমা যথাবালং যথামূল়্হং যথাঅকুসলং, যং ত্ৰং মযা সিক্খাপদে পঞ্ঞাপিযমানে ভিক্খুসঙ্ঘে সিক্খং সমাদিযমানে অনুস্সাহং পৰেদেসি. যতো চ খো ত্ৰং, ভদ্দালি, অচ্চযং অচ্চযতো দিস্ৰা যথাধম্মং পটিকরোসি, তং তে মযং পটিগ্গণ্হাম. ৰুদ্ধিহেসা, ভদ্দালি, অরিযস্স ৰিনযে যো অচ্চযং অচ্চযতো দিস্ৰা যথাধম্মং পটিকরোতি, আযতিং সংৰরং আপজ্জতি’’.

১৩৭. ‘‘ইধ, ভদ্দালি, একচ্চো ভিক্খু সত্থুসাসনে সিক্খায অপরিপূরকারী হোতি. তস্স এৰং হোতি – ‘যংনূনাহং ৰিৰিত্তং সেনাসনং ভজেয্যং অরঞ্ঞং রুক্খমূলং পব্বতং কন্দরং গিরিগুহং সুসানং ৰনপত্থং অব্ভোকাসং পলালপুঞ্জং. অপ্পেৰ নামাহং উত্তরি [উত্তরিং (সী. স্যা. কং. পী.)] মনুস্সধম্মা অলমরিযঞাণদস্সনৰিসেসং সচ্ছিকরেয্য’ন্তি. সো ৰিৰিত্তং সেনাসনং ভজতি অরঞ্ঞং রুক্খমূলং পব্বতং কন্দরং গিরিগুহং সুসানং ৰনপত্থং অব্ভোকাসং পলালপুঞ্জং. তস্স তথাৰূপকট্ঠস্স ৰিহরতো সত্থাপি উপৰদতি, অনুৰিচ্চপি ৰিঞ্ঞূ সব্রহ্মচারী উপৰদন্তি, দেৰতাপি উপৰদন্তি, অত্তাপি অত্তানং উপৰদতি. সো সত্থারাপি উপৰদিতো, অনুৰিচ্চপি ৰিঞ্ঞূহি সব্রহ্মচারীহি উপৰদিতো, দেৰতাহিপি উপৰদিতো, অত্তনাপি অত্তানং উপৰদিতো ন উত্তরি মনুস্সধম্মা অলমরিযঞাণদস্সনৰিসেসং সচ্ছিকরোতি. তং কিস্স হেতু? এৰঞ্হি তং, ভদ্দালি, হোতি যথা তং সত্থুসাসনে সিক্খায অপরিপূরকারিস্স.

১৩৮. ‘‘ইধ পন, ভদ্দালি, একচ্চো ভিক্খু সত্থুসাসনে সিক্খায পরিপূরকারী হোতি. তস্স এৰং হোতি – ‘যংনূনাহং ৰিৰিত্তং সেনাসনং ভজেয্যং অরঞ্ঞং রুক্খমূলং পব্বতং কন্দরং গিরিগুহং সুসানং ৰনপত্থং অব্ভোকাসং পলালপুঞ্জং. অপ্পেৰ নামাহং উত্তরি মনুস্সধম্মা অলমরিযঞাণদস্সনৰিসেসং সচ্ছিকরেয্য’ন্তি. সো ৰিৰিত্তং সেনাসনং ভজতি অরঞ্ঞং রুক্খমূলং পব্বতং কন্দরং গিরিগুহং সুসানং ৰনপত্থং অব্ভোকাসং পলালপুঞ্জং. তস্স তথাৰূপকট্ঠস্স ৰিহরতো সত্থাপি ন উপৰদতি, অনুৰিচ্চপি ৰিঞ্ঞূ সব্রহ্মচারী ন উপৰদন্তি, দেৰতাপি ন উপৰদন্তি, অত্তাপি অত্তানং ন উপৰদতি. সো সত্থারাপি অনুপৰদিতো, অনুৰিচ্চপি ৰিঞ্ঞূহি সব্রহ্মচারীহি অনুপৰদিতো, দেৰতাহিপি অনুপৰদিতো, অত্তনাপি অত্তানং অনুপৰদিতো উত্তরি মনুস্সধম্মা অলমরিযঞাণদস্সনৰিসেসং সচ্ছিকরোতি. সো ৰিৰিচ্চেৰ কামেহি ৰিৰিচ্চ অকুসলেহি ধম্মেহি সৰিতক্কং সৰিচারং ৰিৰেকজং পীতিসুখং পঠমং ঝানং উপসম্পজ্জ ৰিহরতি. তং কিস্স হেতু? এৰঞ্হি তং, ভদ্দালি, হোতি যথা তং সত্থুসাসনে সিক্খায পরিপূরকারিস্স.

১৩৯. ‘‘পুন চপরং, ভদ্দালি, ভিক্খু ৰিতক্কৰিচারানং ৰূপসমা অজ্ঝত্তং সম্পসাদনং চেতসো একোদিভাৰং অৰিতক্কং অৰিচারং সমাধিজং পীতিসুখং দুতিযং ঝানং উপসম্পজ্জ ৰিহরতি. তং কিস্স হেতু? এৰঞ্হি তং, ভদ্দালি, হোতি যথা তং সত্থুসাসনে সিক্খায পরিপূরকারিস্স.

‘‘পুন চপরং, ভদ্দালি, ভিক্খু পীতিযা চ ৰিরাগা উপেক্খকো চ ৰিহরতি, সতো চ সম্পজানো সুখঞ্চ কাযেন পটিসংৰেদেতি, যং তং অরিযা আচিক্খন্তি – ‘উপেক্খকো সতিমা সুখৰিহারী’তি ততিযং ঝানং উপসম্পজ্জ ৰিহরতি. তং কিস্স হেতু? এৰঞ্হি তং, ভদ্দালি, হোতি যথা তং সত্থুসাসনে সিক্খায পরিপূরকারিস্স.

‘‘পুন চপরং, ভদ্দালি, ভিক্খু সুখস্স চ পহানা দুক্খস্স চ পহানা পুব্বেৰ সোমনস্সদোমনস্সানং অত্থঙ্গমা অদুক্খমসুখং উপেক্খাসতিপারিসুদ্ধিং চতুত্থং ঝানং উপসম্পজ্জ ৰিহরতি. তং কিস্স হেতু? এৰঞ্হি তং, ভদ্দালি, হোতি যথা তং সত্থুসাসনে সিক্খায পরিপূরকারিস্স.

‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে পুব্বেনিৰাসানুস্সতিঞাণায চিত্তং অভিনিন্নামেতি. সো অনেকৰিহিতং পুব্বেনিৰাসং অনুস্সরতি, সেয্যথিদং – একম্পি জাতিং দ্ৰেপি জাতিযো…পে… ইতি সাকারং সউদ্দেসং অনেকৰিহিতং পুব্বেনিৰাসং অনুস্সরতি. তং কিস্স হেতু? এৰঞ্হি তং, ভদ্দালি, হোতি যথা তং সত্থুসাসনে সিক্খায পরিপূরকারিস্স.

‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে সত্তানং চুতূপপাতঞাণায চিত্তং অভিনিন্নামেতি. সো দিব্বেন চক্খুনা ৰিসুদ্ধেন অতিক্কন্তমানুসকেন সত্তে পস্সতি চৰমানে উপপজ্জমানে হীনে পণীতে সুৰণ্ণে দুব্বণ্ণে সুগতে দুগ্গতে যথাকম্মূপগে সত্তে পজানাতি – ‘ইমে ৰত ভোন্তো সত্তা কাযদুচ্চরিতেন সমন্নাগতা…পে… ৰিনিপাতং নিরযং উপপন্না; ইমে ৰা পন ভোন্তো সত্তা কাযসুচরিতেন সমন্নাগতা…পে… সুগতিং সগ্গং লোকং উপপন্না’তি ইতি দিব্বেন চক্খুনা ৰিসুদ্ধেন অতিক্কন্তমানুসকেন…পে… যথাকম্মূপগে সত্তে পজানাতি. তং কিস্স হেতু? এৰঞ্হি তং, ভদ্দালি, হোতি যথা তং সত্থুসাসনে সিক্খায পরিপূরকারিস্স.

‘‘সো এৰং সমাহিতে চিত্তে পরিসুদ্ধে পরিযোদাতে অনঙ্গণে ৰিগতূপক্কিলেসে মুদুভূতে কম্মনিযে ঠিতে আনেঞ্জপ্পত্তে আসৰানং খযঞাণায চিত্তং অভিনিন্নামেতি. সো ‘ইদং দুক্খ’ন্তি যথাভূতং পজানাতি, ‘অযং দুক্খসমুদযো’তি যথাভূতং পজানাতি, ‘অযং দুক্খনিরোধো’তি যথাভূতং পজানাতি, ‘অযং দুক্খনিরোধগামিনী পটিপদা’তি যথাভূতং পজানাতি; ‘ইমে আসৰা’তি যথাভূতং পজানাতি, ‘অযং আসৰসমুদযো’তি যথাভূতং পজানাতি, ‘অযং আসৰনিরোধো’তি যথাভূতং পজানাতি, ‘অযং আসৰনিরোধগামিনী পটিপদা’তি যথাভূতং পজানাতি. তস্স এৰং জানতো এৰং পস্সতো কামাসৰাপি চিত্তং ৰিমুচ্চতি, ভৰাসৰাপি চিত্তং ৰিমুচ্চতি, অৰিজ্জাসৰাপি চিত্তং ৰিমুচ্চতি. ৰিমুত্তস্মিং ৰিমুত্তমিতি ঞাণং হোতি. ‘খীণা জাতি, ৰুসিতং ব্রহ্মচরিযং, কতং করণীযং, নাপরং ইত্থত্তাযা’তি পজানাতি. তং কিস্স হেতু? এৰঞ্হি তং, ভদ্দালি, হোতি যথা তং সত্থুসাসনে সিক্খায পরিপূরকারিস্সা’’তি.

১৪০. এৰং ৰুত্তে, আযস্মা ভদ্দালি ভগৰন্তং এতদৰোচ – ‘‘কো নু খো, ভন্তে, হেতু, কো পচ্চযো যেন মিধেকচ্চং ভিক্খুং পসয্হ পসয্হ [পৰয্হ পৰয্হ (সী. স্যা. কং. পী.)] কারণং করোন্তি? কো পন, ভন্তে, হেতু, কো পচ্চযো যেন মিধেকচ্চং ভিক্খুং নো তথা পসয্হ পসয্হ কারণং করোন্তী’’তি? ‘‘ইধ, ভদ্দালি, একচ্চো ভিক্খু অভিণ্হাপত্তিকো হোতি আপত্তিবহুলো. সো ভিক্খূহি ৰুচ্চমানো অঞ্ঞেনঞ্ঞং পটিচরতি, বহিদ্ধা কথং অপনামেতি, কোপঞ্চ দোসঞ্চ অপ্পচ্চযঞ্চ পাতুকরোতি, ন সম্মা ৰত্ততি, ন লোমং পাতেতি, ন নেত্থারং ৰত্ততি, ‘যেন সঙ্ঘো অত্তমনো হোতি তং করোমী’তি নাহ. তত্র, ভদ্দালি, ভিক্খূনং এৰং হোতি – অযং খো, আৰুসো, ভিক্খু অভিণ্হাপত্তিকো আপত্তিবহুলো. সো ভিক্খূহি ৰুচ্চমানো অঞ্ঞেনঞ্ঞং পটিচরতি, বহিদ্ধা কথং অপনামেতি, কোপঞ্চ দোসঞ্চ অপ্পচ্চযঞ্চ পাতুকরোতি, ন সম্মা ৰত্ততি, ন লোমং পাতেতি, ন নেত্থারং ৰত্ততি, ‘যেন সঙ্ঘো অত্তমনো হোতি তং করোমী’তি নাহ. সাধু ৰতাযস্মন্তো ইমস্স ভিক্খুনো তথা তথা উপপরিক্খথ যথাস্সিদং [যথযিদং (স্যা. কং. ক.)] অধিকরণং ন খিপ্পমেৰ ৰূপসমেয্যাতি. তস্স খো এৰং, ভদ্দালি, ভিক্খুনো ভিক্খূ তথা তথা উপপরিক্খন্তি যথাস্সিদং অধিকরণং ন খিপ্পমেৰ ৰূপসম্মতি.

১৪১. ‘‘ইধ পন, ভদ্দালি, একচ্চো ভিক্খু অভিণ্হাপত্তিকো হোতি আপত্তিবহুলো. সো ভিক্খূহি ৰুচ্চমানো নাঞ্ঞেনঞ্ঞং পটিচরতি, বহিদ্ধা কথং ন অপনামেতি, ন কোপঞ্চ দোসঞ্চ অপ্পচ্চযঞ্চ পাতুকরোতি, সম্মা ৰত্ততি, লোমং পাতেতি, নেত্থারং ৰত্ততি, ‘যেন সঙ্ঘো অত্তমনো হোতি তং করোমী’তি আহ. তত্র, ভদ্দালি, ভিক্খূনং এৰং হোতি – অযং খো, আৰুসো, ভিক্খু অভিণ্হাপত্তিকো আপত্তিবহুলো. সো ভিক্খূহি ৰুচ্চমানো নাঞ্ঞেনঞ্ঞং পটিচরতি, বহিদ্ধা কথং ন অপনামেতি, ন কোপঞ্চ দোসঞ্চ অপ্পচ্চযঞ্চ পাতুকরোতি, সম্মা ৰত্ততি, লোমং পাতেতি, নেত্থারং ৰত্ততি, ‘যেন সঙ্ঘো অত্তমনো হোতি তং করোমী’তি আহ. সাধু ৰতাযস্মন্তো, ইমস্স ভিক্খুনো তথা তথা উপপরিক্খথ যথাস্সিদং অধিকরণং খিপ্পমেৰ ৰূপসমেয্যাতি. তস্স খো এৰং, ভদ্দালি, ভিক্খুনো ভিক্খূ তথা তথা উপপরিক্খন্তি যথাস্সিদং অধিকরণং খিপ্পমেৰ ৰূপসম্মতি.

১৪২. ‘‘ইধ, ভদ্দালি, একচ্চো ভিক্খু অধিচ্চাপত্তিকো হোতি অনাপত্তিবহুলো. সো ভিক্খূহি ৰুচ্চমানো অঞ্ঞেনঞ্ঞং পটিচরতি, বহিদ্ধা কথং অপনামেতি, কোপঞ্চ দোসঞ্চ অপ্পচ্চযঞ্চ পাতুকরোতি, ন সম্মা ৰত্ততি, ন লোমং পাতেতি, ন নেত্থারং ৰত্ততি, ‘যেন সঙ্ঘো অত্তমনো হোতি তং করোমী’তি নাহ. তত্র, ভদ্দালি, ভিক্খূনং এৰং হোতি – অযং খো, আৰুসো, ভিক্খু অধিচ্চাপত্তিকো অনাপত্তিবহুলো. সো ভিক্খূহি ৰুচ্চমানো অঞ্ঞেনঞ্ঞং পটিচরতি, বহিদ্ধা কথং অপনামেতি, কোপঞ্চ দোসঞ্চ অপ্পচ্চযঞ্চ পাতুকরোতি, ন সম্মা ৰত্ততি, ন লোমং পাতেতি, ন নেত্থারং ৰত্ততি, ‘যেন সঙ্ঘো অত্তমনো হোতি তং করোমী’তি নাহ. সাধু ৰতাযস্মন্তো, ইমস্স ভিক্খুনো তথা তথা উপপরিক্খথ যথাস্সিদং অধিকরণং ন খিপ্পমেৰ ৰূপসমেয্যাতি. তস্স খো এৰং, ভদ্দালি, ভিক্খুনো ভিক্খূ তথা তথা উপপরিক্খন্তি যথাস্সিদং অধিকরণং ন খিপ্পমেৰ ৰূপসম্মতি.

১৪৩. ‘‘ইধ পন, ভদ্দালি, একচ্চো ভিক্খু অধিচ্চাপত্তিকো হোতি অনাপত্তিবহুলো. সো ভিক্খূহি ৰুচ্চমানো নাঞ্ঞেনঞ্ঞং পটিচরতি, ন বহিদ্ধা কথং অপনামেতি, ন কোপঞ্চ দোসঞ্চ অপ্পচ্চযঞ্চ পাতুকরোতি, সম্মা ৰত্ততি, লোমং পাতেতি, নেত্থারং ৰত্ততি, ‘যেন সঙ্ঘো অত্তমনো হোতি তং করোমী’তি আহ. তত্র, ভদ্দালি, ভিক্খূনং এৰং হোতি – অযং খো, আৰুসো, ভিক্খু অধিচ্চাপত্তিকো অনাপত্তিবহুলো. সো ভিক্খূহি ৰুচ্চমানো নাঞ্ঞেনঞ্ঞং পটিচরতি, ন বহিদ্ধা কথং অপনামেতি, ন কোপঞ্চ দোসঞ্চ অপ্পচ্চযঞ্চ পাতুকরোতি, সম্মা ৰত্ততি, লোমং পাতেতি, নেত্থারং ৰত্ততি, ‘যেন সঙ্ঘো অত্তমনো হোতি তং করোমী’তি আহ. সাধু ৰতাযস্মন্তো, ইমস্স ভিক্খুনো তথা তথা উপপরিক্খথ যথাস্সিদং অধিকরণং খিপ্পমেৰ ৰূপসমেয্যাতি. তস্স খো এৰং, ভদ্দালি, ভিক্খুনো ভিক্খূ তথা তথা উপপরিক্খন্তি যথাস্সিদং অধিকরণং খিপ্পমেৰ ৰূপসম্মতি.

১৪৪. ‘‘ইধ, ভদ্দালি, একচ্চো ভিক্খু সদ্ধামত্তকেন ৰহতি পেমমত্তকেন. তত্র, ভদ্দালি, ভিক্খূনং এৰং হোতি – ‘অযং খো, আৰুসো, ভিক্খু সদ্ধামত্তকেন ৰহতি পেমমত্তকেন. সচে মযং ইমং ভিক্খুং পসয্হ পসয্হ কারণং করিস্সাম – মা যম্পিস্স তং সদ্ধামত্তকং পেমমত্তকং তম্হাপি পরিহাযী’তি. সেয্যথাপি, ভদ্দালি, পুরিসস্স একং চক্খুং, তস্স মিত্তামচ্চা ঞাতিসালোহিতা তং একং চক্খুং রক্খেয্যুং – ‘মা যম্পিস্স তং একং চক্খুং তম্হাপি পরিহাযী’তি; এৰমেৰ খো, ভদ্দালি, ইধেকচ্চো ভিক্খু সদ্ধামত্তকেন ৰহতি পেমমত্তকেন. তত্র, ভদ্দালি, ভিক্খূনং এৰং হোতি – ‘অযং খো, আৰুসো, ভিক্খু সদ্ধামত্তকেন ৰহতি পেমমত্তকেন. সচে মযং ইমং ভিক্খুং পসয্হ পসয্হ কারণং করিস্সাম – মা যম্পিস্স তং সদ্ধামত্তকং পেমমত্তকং তম্হাপি পরিহাযী’তি. অযং খো, ভদ্দালি, হেতু অযং পচ্চযো যেন মিধেকচ্চং ভিক্খুং পসয্হ পসয্হ কারণং করোন্তি. অযং পন, ভদ্দালি, হেতু অযং পচ্চযো, যেন মিধেকচ্চং ভিক্খুং নো তথা পসয্হ পসয্হ কারণং করোন্তী’’তি.

১৪৫. ‘‘‘কো নু খো, ভন্তে, হেতু, কো পচ্চযো যেন পুব্বে অপ্পতরানি চেৰ সিক্খাপদানি অহেসুং বহুতরা চ ভিক্খূ অঞ্ঞায সণ্ঠহিংসু? কো পন, ভন্তে, হেতু, কো পচ্চযো যেন এতরহি বহুতরানি চেৰ সিক্খাপদানি হোন্তি অপ্পতরা চ ভিক্খূ অঞ্ঞায সণ্ঠহন্তী’তি? ‘‘এৰমেতং, ভদ্দালি, হোতি সত্তেসু হাযমানেসু, সদ্ধম্মে অন্তরধাযমানে, বহুতরানি চেৰ সিক্খাপদানি হোন্তি অপ্পতরা চ ভিক্খূ অঞ্ঞায সণ্ঠহন্তীতি. ন তাৰ, ভদ্দালি, সত্থা সাৰকানং সিক্খাপদং পঞ্ঞাপেতি যাৰ ন ইধেকচ্চে আসৰট্ঠানীযা ধম্মা সঙ্ঘে পাতুভৰন্তি. যতো চ খো, ভদ্দালি, ইধেকচ্চে আসৰট্ঠানীযা ধম্মা সঙ্ঘে পাতুভৰন্তি, অথ সত্থা সাৰকানং সিক্খাপদং পঞ্ঞাপেতি তেসংযেৰ আসৰট্ঠানীযানং ধম্মানং পটিঘাতায. ন তাৰ, ভদ্দালি, ইধেকচ্চে আসৰট্ঠানীযা ধম্মা সঙ্ঘে পাতুভৰন্তি যাৰ ন সঙ্ঘো মহত্তং পত্তো হোতি. যতো চ খো, ভদ্দালি, সঙ্ঘো মহত্তং পত্তো হোতি, অথ ইধেকচ্চে আসৰট্ঠানীযা ধম্মা সঙ্ঘে পাতুভৰন্তি. অথ সত্থা সাৰকানং সিক্খাপদং পঞ্ঞাপেতি তেসংযেৰ আসৰট্ঠানীযানং ধম্মানং পটিঘাতায. ন তাৰ, ভদ্দালি, ইধেকচ্চে আসৰট্ঠানীযা ধম্মা সঙ্ঘে পাতুভৰন্তি যাৰ ন সঙ্ঘো লাভগ্গং পত্তো হোতি, যসগ্গং পত্তো হোতি, বাহুসচ্চং পত্তো হোতি, রত্তঞ্ঞুতং পত্তো হোতি. যতো চ খো, ভদ্দালি, সঙ্ঘো রত্তঞ্ঞুতং পত্তো হোতি, অথ ইধেকচ্চে আসৰট্ঠানীযা ধম্মা সঙ্ঘে পাতুভৰন্তি, অথ সত্থা সাৰকানং সিক্খাপদং পঞ্ঞাপেতি তেসংযেৰ আসৰট্ঠানীযানং ধম্মানং পটিঘাতায.

১৪৬. ‘‘অপ্পকা খো তুম্হে, ভদ্দালি, তেন সমযেন অহুৰত্থ যদা ৰো অহং আজানীযসুসূপমং ধম্মপরিযাযং দেসেসিং. তং সরসি [সরসি ত্ৰং (সী. পী.), সরসি তং (?)] ভদ্দালী’’তি?

‘‘নো হেতং, ভন্তে’’.

‘‘তত্র, ভদ্দালি, কং হেতুং পচ্চেসী’’তি?

‘‘সো হি নূনাহং, ভন্তে, দীঘরত্তং সত্থুসাসনে সিক্খায অপরিপূরকারী অহোসি’’ন্তি.

‘‘ন খো, ভদ্দালি, এসেৰ হেতু, এস পচ্চযো. অপি চ মে ত্ৰং, ভদ্দালি, দীঘরত্তং চেতসা চেতোপরিচ্চ ৰিদিতো – ‘ন চাযং মোঘপুরিসো মযা ধম্মে দেসিযমানে অট্ঠিং কত্ৰা মনসি কত্ৰা সব্বচেতসো [সব্বং চেতসো (ক.)] সমন্নাহরিত্ৰা ওহিতসোতো ধম্মং সুণাতী’তি. অপি চ তে অহং, ভদ্দালি, আজানীযসুসূপমং ধম্মপরিযাযং দেসেস্সামি. তং সুণাহি, সাধুকং মনসি করোহি; ভাসিস্সামী’’তি. ‘‘এৰং, ভন্তে’’তি খো আযস্মা ভদ্দালি ভগৰতো পচ্চস্সোসি. ভগৰা এতদৰোচ –

১৪৭. ‘‘সেয্যথাপি, ভদ্দালি, দক্খো অস্সদমকো ভদ্রং অস্সাজানীযং লভিত্ৰা পঠমেনেৰ মুখাধানে কারণং কারেতি. তস্স মুখাধানে কারণং কারিযমানস্স হোন্তিযেৰ ৰিসূকাযিতানি ৰিসেৰিতানি ৰিপ্ফন্দিতানি কানিচি কানিচি, যথা তং অকারিতপুব্বং কারণং কারিযমানস্স. সো অভিণ্হকারণা অনুপুব্বকারণা তস্মিং ঠানে পরিনিব্বাযতি. যতো খো, ভদ্দালি, ভদ্রো অস্সাজানীযো অভিণ্হকারণা অনুপুব্বকারণা তস্মিং ঠানে পরিনিব্বুতো হোতি, তমেনং অস্সদমকো উত্তরি কারণং কারেতি যুগাধানে. তস্স যুগাধানে কারণং কারিযমানস্স হোন্তিযেৰ ৰিসূকাযিতানি ৰিসেৰিতানি ৰিপ্ফন্দিতানি কানিচি কানিচি, যথা তং অকারিতপুব্বং কারণং কারিযমানস্স. সো অভিণ্হকারণা অনুপুব্বকারণা তস্মিং ঠানে পরিনিব্বাযতি. যতো খো, ভদ্দালি, ভদ্রো অস্সাজানীযো অভিণ্হকারণা অনুপুব্বকারণা তস্মিং ঠানে পরিনিব্বুতো হোতি, তমেনং অস্সদমকো উত্তরি কারণং কারেতি অনুক্কমে মণ্ডলে খুরকাসে [খুরকাযে (সী. পী.)] ধাৰে দৰত্তে [রৰত্থে (সী. স্যা. কং. পী.)] রাজগুণে রাজৰংসে উত্তমে জৰে উত্তমে হযে উত্তমে সাখল্যে. তস্স উত্তমে জৰে উত্তমে হযে উত্তমে সাখল্যে কারণং কারিযমানস্স হোন্তিযেৰ ৰিসূকাযিতানি ৰিসেৰিতানি ৰিপ্ফন্দিতানি কানিচি কানিচি, যথা তং অকারিতপুব্বং কারণং কারিযমানস্স. সো অভিণ্হকারণা অনুপুব্বকারণা তস্মিং ঠানে পরিনিব্বাযতি. যতো খো, ভদ্দালি, ভদ্রো অস্সাজানীযো অভিণ্হকারণা অনুপুব্বকারণা তস্মিং ঠানে পরিনিব্বুতো হোতি, তমেনং অস্সদমকো উত্তরি ৰণ্ণিযঞ্চ পাণিযঞ্চ [ৰলিযঞ্চ (সী. পী.), বলিযঞ্চ (স্যা. কং.)] অনুপ্পৰেচ্ছতি. ইমেহি খো, ভদ্দালি, দসহঙ্গেহি সমন্নাগতো ভদ্রো অস্সাজানীযো রাজারহো হোতি রাজভোগ্গো রঞ্ঞো অঙ্গন্তেৰ সঙ্খ্যং গচ্ছতি.

‘‘এৰমেৰ খো, ভদ্দালি, দসহি ধম্মেহি সমন্নাগতো ভিক্খু আহুনেয্যো হোতি পাহুনেয্যো দক্খিণেয্যো অঞ্জলিকরণীযো অনুত্তরং পুঞ্ঞক্খেত্তং লোকস্স. কতমেহি দসহি? ইধ, ভদ্দালি, ভিক্খু অসেখায সম্মাদিট্ঠিযা সমন্নাগতো হোতি, অসেখেন সম্মাসঙ্কপ্পেন সমন্নাগতো হোতি, অসেখায সম্মাৰাচায সমন্নাগতো হোতি, অসেখেন সম্মাকম্মন্তেন সমন্নাগতো হোতি, অসেখেন সম্মাআজীৰেন সমন্নাগতো হোতি, অসেখেন সম্মাৰাযামেন সমন্নাগতো হোতি, অসেখায সম্মাসতিযা সমন্নাগতো হোতি, অসেখেন সম্মাসমাধিনা সমন্নাগতো হোতি, অসেখেন সম্মাঞাণেন সমন্নাগতো হোতি, অসেখায সম্মাৰিমুত্তিযা সমন্নাগতো হোতি – ইমেহি খো, ভদ্দালি, দসহি ধম্মেহি সমন্নাগতো ভিক্খু আহুনেয্যো হোতি পাহুনেয্যো দক্খিণেয্যো অঞ্জলিকরণীযো অনুত্তরং পুঞ্ঞক্খেত্তং লোকস্সা’’তি.

ইদমৰোচ ভগৰা. অত্তমনো আযস্মা ভদ্দালি ভগৰতো ভাসিতং অভিনন্দীতি.

ভদ্দালিসুত্তং নিট্ঠিতং পঞ্চমং.