৯. মট্ঠকুণ্ডলীৰিমানৰত্থু

১২০৭. [পে. ৰ. ১৮৬] ‘‘অলঙ্কতো মট্ঠকুণ্ডলী [মট্টকুণ্ডলী (সী.)], মালধারী হরিচন্দনুস্সদো;

বাহা পগ্গয্হ কন্দসি, ৰনমজ্ঝে কিং দুক্খিতো তুৰ’’ন্তি.

১২০৮. ‘‘সোৰণ্ণমযো পভস্সরো, উপ্পন্নো রথপঞ্জরো মম;

তস্স চক্কযুগং ন ৰিন্দামি, তেন দুক্খেন জহামি [জহিস্সং (সী.), জহিস্সামি (স্যা. পী.)] জীৰিত’’ন্তি.

১২০৯. ‘‘সোৰণ্ণমযং মণিমযং, লোহিতকমযং [লোহিতঙ্গমযং (স্যা.), লোহিতঙ্কমযং (সী.), লোহমযং (কত্থচি)] অথ রূপিযমযং;

আচিক্খ [আচিক্খথ (ক.)] মে ভদ্দমাণৰ, চক্কযুগং পটিপাদযামি তে’’তি.

১২১০. সো মাণৰো তস্স পাৰদি, ‘‘চন্দিমসূরিযা উভযেত্থ দিস্সরে;

সোৰণ্ণমযো রথো মম, তেন চক্কযুগেন সোভতী’’তি.

১২১১. ‘‘বালো খো ত্ৰং অসি মাণৰ, যো ত্ৰং পত্থযসে অপত্থিযং;

মঞ্ঞামি তুৰং মরিস্সসি, ন হি ত্ৰং লচ্ছসি চন্দিমসূরিযে’’তি.

১২১২. ‘‘গমনাগমনম্পি দিস্সতি, ৰণ্ণধাতু উভযত্থ ৰীথিযা;

পেতো [পেতো পন (সী. স্যা.)] কালকতো ন দিস্সতি, কো নিধ কন্দতং বাল্যতরো’’তি.

১২১৩. ‘‘সচ্চং খো ৰদেসি মাণৰ, অহমেৰ কন্দতং বাল্যতরো;

চন্দং ৰিয দারকো রুদং, পেতং কালকতাভিপত্থযি’’ন্তি.

১২১৪. ‘‘আদিত্তং ৰত মং সন্তং, ঘতসিত্তংৰ পাৰকং;

ৰারিনা ৰিয ওসিঞ্চং, সব্বং নিব্বাপযে দরং.

১২১৫. ‘‘অব্বহী [অব্বূল়্হ (পী.), অব্বূল়্হং (স্যা. ক.)] ৰত মে সল্লং, সোকং হদযনিস্সিতং;

যো মে সোকপরেতস্স, পুত্তসোকং অপানুদি.

১২১৬. ‘‘স্ৰাহং অব্বূল়্হসল্লোস্মি, সীতিভূতোস্মি নিব্বুতো;

ন সোচামি ন রোদামি, ৰত সুত্ৰান মাণৰাতি.

১২১৭. ‘‘দেৰতা নুসি গন্ধব্বো, অদু [আদু (সী. স্যা.)] সক্কো পুরিন্দদো;

কো ৰা ত্ৰং কস্স ৰা পুত্তো, কথং জানেমু তং ময’’ন্তি.

১২১৮. ‘‘যঞ্চ [যং (ক.)] কন্দসি যঞ্চ রোদসি, পুত্তং আল়াহনে সযং দহিত্ৰা;

স্ৰাহং কুসলং করিত্ৰা কম্মং, তিদসানং সহব্যতং গতো’’তি [পত্তোতি (সী. স্যা. পী.)].

১২১৯. ‘‘অপ্পং ৰা বহুং ৰা নাদ্দসাম, দানং দদন্তস্স সকে অগারে;

উপোসথকম্মং ৰা [উপোসথকম্মঞ্চ (ক.)] তাদিসং, কেন কম্মেন গতোসি দেৰলোক’’ন্তি.

১২২০. ‘‘আবাধিকোহং দুক্খিতো গিলানো, আতুররূপোম্হি সকে নিৰেসনে;

বুদ্ধং ৰিগতরজং ৰিতিণ্ণকঙ্খং, অদ্দক্খিং সুগতং অনোমপঞ্ঞং.

১২২১. ‘‘স্ৰাহং মুদিতমনো পসন্নচিত্তো, অঞ্জলিং অকরিং তথাগতস্স;

তাহং কুসলং করিত্ৰান কম্মং, তিদসানং সহব্যতং গতো’’তি.

১২২২. ‘‘অচ্ছরিযং ৰত অব্ভুতং ৰত, অঞ্জলিকম্মস্স অযমীদিসো ৰিপাকো;

অহম্পি মুদিতমনো পসন্নচিত্তো, অজ্জেৰ বুদ্ধং সরণং ৰজামী’’তি.

১২২৩. ‘‘অজ্জেৰ বুদ্ধং সরণং ৰজাহি, ধম্মঞ্চ সঙ্ঘঞ্চ পসন্নচিত্তো;

তথেৰ সিক্খায পদানি পঞ্চ, অখণ্ডফুল্লানি সমাদিযস্সু.

১২২৪. ‘‘পাণাতিপাতা ৰিরমস্সু খিপ্পং, লোকে অদিন্নং পরিৰজ্জযস্সু;

অমজ্জপো মা চ মুসা ভণাহি, সকেন দারেন চ হোহি তুট্ঠো’’তি.

১২২৫. ‘‘অত্থকামোসি মে যক্খ, হিতকামোসি দেৰতে;

করোমি তুয্হং ৰচনং, ত্ৰংসি আচরিযো মমাতি.

১২২৬. ‘‘উপেমি সরণং বুদ্ধং, ধম্মঞ্চাপি অনুত্তরং;

সঙ্ঘঞ্চ নরদেৰস্স, গচ্ছামি সরণং অহং.

১২২৭. ‘‘পাণাতিপাতা ৰিরমামি খিপ্পং, লোকে অদিন্নং পরিৰজ্জযামি;

অমজ্জপো নো চ মুসা ভণামি, সকেন দারেন চ হোমি তুট্ঠো’’তি.

মট্ঠকুণ্ডলীৰিমানং নৰমং.