৭. সুনিক্খিত্তৰগ্গো

১. চিত্তলতাৰিমানৰত্থু

১১১৪. ‘‘যথা ৰনং চিত্তলতং পভাসতি, উয্যানসেট্ঠং তিদসানমুত্তমং;

তথূপমং তুয্হমিদং ৰিমানং, ওভাসযং তিট্ঠতি অন্তলিক্খে.

১১১৫. ‘‘দেৰিদ্ধিপত্তোসি মহানুভাৰো, মনুস্সভূতো কিমকাসি পুঞ্ঞং;

কেনাসি এৰং জলিতানুভাৰো, ৰণ্ণো চ তে সব্বদিসা পভাসতী’’তি.

১১১৬. সো দেৰপুত্তো অত্তমনো…পে… যস্স কম্মস্সিদং ফলং.

১১১৭. ‘‘অহং মনুস্সেসু মনুস্সভূতো, দলিদ্দো অতাণো কপণো কম্মকরো অহোসিং;

জিণ্ণে চ মাতাপিতরো অভারিং [অভরিং (সী. স্যা.)], পিযা চ মে সীলৰন্তো অহেসুং;

অন্নঞ্চ পানঞ্চ পসন্নচিত্তো, সক্কচ্চ দানং ৰিপুলং অদাসি.

১১১৮. ‘‘তেন মেতাদিসো ৰণ্ণো…পে… ৰণ্ণো চ মে সব্বদিসা পভাসতী’’তি.

চিত্তলতাৰিমানং পঠমং.

২. নন্দনৰিমানৰত্থু

১১২০. ‘‘যথা ৰনং নন্দনং [নন্দনং চিত্তলতং (সী. স্যা. ক.), নন্দৰনং (ক.)] পভাসতি, উয্যানসেট্ঠং তিদসানমুত্তমং;

তথূপমং তুয্হমিদং ৰিমানং, ওভাসযং তিট্ঠতি অন্তলিক্খে.

১১২১. ‘‘দেৰিদ্ধিপত্তোসি মহানুভাৰো, মনুস্সভূতো কিমকাসি পুঞ্ঞং;

কেনাসি এৰং জলিতানুভাৰো, ৰণ্ণো চ তে সব্বদিসা পভাসতী’’তি.

১১২২. সো দেৰপুত্তো অত্তমনো…পে… যস্স কম্মস্সিদং ফলং.

১১২৩. ‘‘অহং মনুস্সেসু মনুস্সভূতো, দলিদ্দো অতাণো কপণো কম্মকরো অহোসিং;

জিণ্ণে চ মাতাপিতরো অভারিং, পিযা চ মে সীলৰন্তো অহেসুং;

অন্নঞ্চ পানঞ্চ পসন্নচিত্তো, সক্কচ্চ দানং ৰিপুলং অদাসিং.

১১২৪. ‘‘তেন মেতাদিসো ৰণ্ণো…পে… ৰণ্ণো চ মে সব্বদিসা পভাসতী’’তি.

নন্দনৰিমানং দুতিযং.

৩. মণিথূণৰিমানৰত্থু

১১২৬. ‘‘উচ্চমিদং মণিথূণং ৰিমানং, সমন্ততো দ্ৰাদস যোজনানি;

কূটাগারা সত্তসতা উল়ারা, ৰেল়ুরিযথম্ভা রুচকত্থতা সুভা.

১১২৭. ‘‘তত্থচ্ছসি পিৰসি খাদসি চ, দিব্বা চ ৰীণা পৰদন্তি ৰগ্গুং;

দিব্বা রসা কামগুণেত্থ পঞ্চ, নারিযো চ নচ্চন্তি সুৰণ্ণছন্না.

১১২৮. ‘‘কেন তেতাদিসো ৰণ্ণো…পে…ৰণ্ণো চ তে সব্বদিসা পভাসতী’’তি.

১১৩০. সো দেৰপুত্তো অত্তমনো…পে…যস্স কম্মস্সিদং ফলং.

১১৩১. ‘‘অহং মনুস্সেসু মনুস্সভূতো, ৰিৰনে পথে সঙ্কমনং [চঙ্কমনং (সী.), চঙ্কমং (স্যা.), সমকং (ক. সী.)] অকাসিং;

আরামরুক্খানি চ রোপযিস্সং, পিযা চ মে সীলৰন্তো অহেসুং;

অন্নঞ্চ পানঞ্চ পসন্নচিত্তো, সক্কচ্চ দানং ৰিপুলং অদাসিং.

১১৩২. ‘‘তেন মেতাদিসো ৰণ্ণো…পে… ৰণ্ণো চ মে সব্বদিসা পভাসতী’’তি.

মণিথূণৰিমানং ততিযং.

৪. সুৰণ্ণৰিমানৰত্থু

১১৩৪. ‘‘সোৰণ্ণমযে পব্বতস্মিং, ৰিমানং সব্বতোপভং;

হেমজালপটিচ্ছন্নং [হেমজালকপচ্ছন্নং (সী.)], কিঙ্কিণি [কিঙ্কণিক (স্যা. ক.), কিঙ্কিণিক (পী.)] জালকপ্পিতং.

১১৩৫. ‘‘অট্ঠংসা সুকতা থম্ভা, সব্বে ৰেল়ুরিযামযা;

একমেকায অংসিযা, রতনা সত্ত নিম্মিতা.

১১৩৬. ‘‘ৰেল়ুরিযসুৰণ্ণস্স, ফলিকা রূপিযস্স চ;

মসারগল্লমুত্তাহি, লোহিতঙ্গমণীহি চ.

১১৩৭. ‘‘চিত্রা মনোরমা ভূমি, ন তত্থুদ্ধংসতী রজো;

গোপাণসীগণা পীতা, কূটং ধারেন্তি নিম্মিতা.

১১৩৮. ‘‘সোপাণানি চ চত্তারি, নিম্মিতা চতুরো দিসা;

নানারতনগব্ভেহি, আদিচ্চোৰ ৰিরোচতি.

১১৩৯. ‘‘ৰেদিযা চতস্সো তত্থ, ৰিভত্তা ভাগসো মিতা;

দদ্দল্লমানা আভন্তি, সমন্তা চতুরো দিসা.

১১৪০. ‘‘তস্মিং ৰিমানে পৰরে, দেৰপুত্তো মহপ্পভো;

অতিরোচসি ৰণ্ণেন, উদযন্তোৰ ভাণুমা.

১১৪১. ‘‘দানস্স তে ইদং ফলং, অথো সীলস্স ৰা পন;

অথো অঞ্জলিকম্মস্স, তং মে অক্খাহি পুচ্ছিতো’’.

১১৪২. সো দেৰপুত্তো অত্তমনো…পে… যস্স কম্মস্সিদং ফলং.

১১৪৩. ‘‘অহং অন্ধকৰিন্দস্মিং, বুদ্ধস্সাদিচ্চবন্ধুনো;

ৰিহারং সত্থু কারেসিং, পসন্নো সেহি পাণিভি.

১১৪৪. ‘‘তত্থ গন্ধঞ্চ মালঞ্চ, পচ্চযঞ্চ [পচ্চগ্গঞ্চ (সী.), পচ্চগ্ঘঞ্চ (?)] ৰিলেপনং;

ৰিহারং সত্থু অদাসিং, ৰিপ্পসন্নেন চেতসা;

তেন ময্হং ইদং লদ্ধং, ৰসং ৰত্তেমি নন্দনে.

১১৪৫. ‘‘নন্দনে চ ৰনে [নন্দনে পৰনে (সী. স্যা.)] রম্মে, নানাদিজগণাযুতে;

রমামি নচ্চগীতেহি, অচ্ছরাহি পুরক্খতো’’তি.

সুৰণ্ণৰিমানং চতুত্থং.

৫. অম্বৰিমানৰত্থু

১১৪৬. ‘‘উচ্চমিদং মণিথূণং ৰিমানং, সমন্ততো দ্ৰাদস যোজনানি;

কূটাগারা সত্তসতা উল়ারা, ৰেল়ুরিযথম্ভা রুচকত্থতা সুভা.

১১৪৭. ‘‘তত্থচ্ছসি পিৰসি খাদসি চ, দিব্বা চ ৰীণা পৰদন্তি ৰগ্গুং;

দিব্বা রসা কামগুণেত্থ পঞ্চ, নারিযো চ নচ্চন্তি সুৰণ্ণছন্না.

১১৪৮. ‘‘কেন তেতাদিসো ৰণ্ণো…পে… ৰণ্ণো চ তে সব্বদিসা পভাসতী’’তি.

১১৫০. সো দেৰপুত্তো অত্তমনো…পে… যস্স কম্মস্সিদং ফলং.

১১৫১. ‘‘গিম্হানং পচ্ছিমে মাসে, পতপন্তে [পতাপন্তে (স্যা.), পতাপেন্তে (ক.)] দিৰঙ্করে;

পরেসং ভতকো পোসো, অম্বারামমসিঞ্চতি.

১১৫২. ‘‘অথ তেনাগমা ভিক্খু, সারিপুত্তোতি ৰিস্সুতো;

কিলন্তরূপো কাযেন, অকিলন্তোৰ চেতসা.

১১৫৩. ‘‘তঞ্চ দিস্ৰান আযন্তং, অৰোচং অম্বসিঞ্চকো;

সাধু তং [সাধুকং (ক.)] ভন্তে ন্হাপেয্যং, যং মমস্স সুখাৰহং.

১১৫৪. ‘‘তস্স মে অনুকম্পায, নিক্খিপি পত্তচীৰরং;

নিসীদি রুক্খমূলস্মিং, ছাযায একচীৰরো.

১১৫৫. ‘‘তঞ্চ অচ্ছেন ৰারিনা, পসন্নমানসো নরো;

ন্হাপযী রুক্খমূলস্মিং, ছাযায একচীৰরং.

১১৫৬. ‘‘অম্বো চ সিত্তো সমণো চ ন্হাপিতো, মযা চ পুঞ্ঞং পসুতং অনপ্পকং;

ইতি সো পীতিযা কাযং, সব্বং ফরতি অত্তনো.

১১৫৭. ‘‘তদেৰ এত্তকং কম্মং, অকাসিং তায জাতিযা;

পহায মানুসং দেহং, উপপন্নোম্হি নন্দনং.

১১৫৮. ‘‘নন্দনে চ ৰনে রম্মে, নানাদিজগণাযুতে;

রমামি নচ্চগীতেহি, অচ্ছরাহি পুরক্খতো’’তি.

অম্বৰিমানং পঞ্চমং.

৬. গোপালৰিমানৰত্থু

১১৫৯. ‘‘দিস্ৰান দেৰং পটিপুচ্ছি ভিক্খু, উচ্চে ৰিমানম্হি চিরট্ঠিতিকে;

আমুত্তহত্থাভরণং যসস্সিং [আমুত্তহত্থাভরণো যসস্সী (স্যা. পী. ক.)], দিব্বে ৰিমানম্হি যথাপি চন্দিমা.

১১৬০. ‘‘অলঙ্কতো মল্যধরো [মালভারী (সী.), মালধরী (ক.)] সুৰত্থো, সুকুণ্ডলী কপ্পিতকেসমস্সু;

আমুত্তহত্থাভরণো যসস্সী, দিব্বে ৰিমানম্হি যথাপি চন্দিমা.

১১৬১. ‘‘দিব্বা চ ৰীণা পৰদন্তি ৰগ্গুং, অট্ঠট্ঠকা সিক্খিতা সাধুরূপা;

দিব্বা চ কঞ্ঞা তিদসচরা উল়ারা, নচ্চন্তি গাযন্তি পমোদযন্তি.

১১৬২. ‘‘দেৰিদ্ধিপত্তোসি মহানুভাৰো, মনুস্সভূতো কিমকাসি পুঞ্ঞং;

কেনাসি এৰং জলিতানুভাৰো, ৰণ্ণো চ তে সব্বদিসা পভাসতী’’তি.

১১৬৩. সো দেৰপুত্তো অত্তমনো…পে… যস্স কম্মস্সিদং ফলং.

১১৬৪. ‘‘অহং মনুস্সেসু মনুস্সভূতো, সঙ্গম্ম রক্খিস্সং পরেসং ধেনুযো;

ততো চ আগা সমণো মমন্তিকে গাৰো চ মাসে অগমংসু খাদিতুং.

১১৬৫. ‘‘দ্ৰযজ্জ কিচ্চং উভযঞ্চ কারিযং, ইচ্চেৰহং [ইচ্চেৰং (ক.)] ভন্তে তদা ৰিচিন্তযিং;

ততো চ সঞ্ঞং পটিলদ্ধযোনিসো, দদামি ভন্তেতি খিপিং অনন্তকং.

১১৬৬. ‘‘সো মাসখেত্তং তুরিতো অৰাসরিং, পুরা অযং ভঞ্জতি যস্সিদং ধনং;

ততো চ কণ্হো উরগো মহাৰিসো, অডংসি পাদে তুরিতস্স মে সতো.

১১৬৭. ‘‘স্ৰাহং অট্টোম্হি দুক্খেন পীল়িতো, ভিক্খু চ তং সামং মুঞ্চিত্ৰানন্তকং [মুঞ্চিত্ৰ নন্তকং (সী.), মুঞ্চিত্ৰা অনন্তকং (স্যা.)];

অহাসি কুম্মাসং মমানুকম্পযা [মমানুকম্পিযা (পী. ক.), মমানুকম্পায (স্যা.)], ততো চুতো কালকতোম্হি দেৰতা.

১১৬৮. ‘‘তদেৰ কম্মং কুসলং কতং মযা, সুখঞ্চ কম্মং অনুভোমি অত্তনা;

তযা হি ভন্তে অনুকম্পিতো ভুসং, কতঞ্ঞুতায অভিপাদযামি তং.

১১৬৯. ‘‘সদেৰকে লোকে সমারকে চ, অঞ্ঞো মুনি নত্থি তযানুকম্পকো;

তযা হি ভন্তে অনুকম্পিতো ভুসং, কতঞ্ঞুতায অভিৰাদযামি তং.

১১৭০. ‘‘ইমস্মিং লোকে পরস্মিং ৰা পন, অঞ্ঞো মুনী নত্থি তযানুকম্পকো;

তযা হি ভন্তে অনুকম্পিতো ভুসং, কতঞ্ঞুতায অভিৰাদযামি ত’’ন্তি.

গোপালৰিমানং ছট্ঠং.

৭. কণ্ডকৰিমানৰত্থু

১১৭১. ‘‘পুণ্ণমাসে যথা চন্দো, নক্খত্তপরিৰারিতো;

সমন্তা অনুপরিযাতি, তারকাধিপতী সসী.

১১৭২. ‘‘তথূপমং ইদং ব্যম্হং, দিব্বং দেৰপুরম্হি চ;

অতিরোচতি ৰণ্ণেন, উদযন্তোৰ রংসিমা.

১১৭৩. ‘‘ৰেল়ুরিযসুৰণ্ণস্স, ফলিকা রূপিযস্স চ;

মসারগল্লমুত্তাহি, লোহিতঙ্গমণীহি চ.

১১৭৪. ‘‘চিত্রা মনোরমা ভূমি, ৰেল়ূরিযস্স সন্থতা;

কূটাগারা সুভা রম্মা, পাসাদো তে সুমাপিতো.

১১৭৫. ‘‘রম্মা চ তে পোক্খরণী, পুথুলোমনিসেৰিতা;

অচ্ছোদকা ৰিপ্পসন্না, সোৰণ্ণৰালুকসন্থতা.

১১৭৬. ‘‘নানাপদুমসঞ্ছন্না, পুণ্ডরীকসমোততা [সমোত্থতা (ক.), সমোগতা (স্যা.)];

সুরভিং সম্পৰাযন্তি, মনুঞ্ঞা মালুতেরিতা.

১১৭৭. ‘‘তস্সা তে উভতো পস্সে, ৰনগুম্বা সুমাপিতা;

উপেতা পুপ্ফরুক্খেহি, ফলরুক্খেহি চূভযং.

১১৭৮. ‘‘সোৰণ্ণপাদে পল্লঙ্কে, মুদুকে গোণকত্থতে [চোলসন্থতে (সী.)];

নিসিন্নং দেৰরাজংৰ, উপতিট্ঠন্তি অচ্ছরা.

১১৭৯. ‘‘সব্বাভরণসঞ্ছন্না, নানামালাৰিভূসিতা;

রমেন্তি তং মহিদ্ধিকং, ৰসৰত্তীৰ মোদসি.

১১৮০. ‘‘ভেরিসঙ্খমুদিঙ্গাহি, ৰীণাহি পণৰেহি চ;

রমসি রতিসম্পন্নো, নচ্চগীতে সুৰাদিতে.

১১৮১. ‘‘দিব্বা তে ৰিৰিধা রূপা, দিব্বা সদ্দা অথো রসা;

গন্ধা চ তে অধিপ্পেতা, ফোট্ঠব্বা চ মনোরমা.

১১৮২. ‘‘তস্মিং ৰিমানে পৰরে, দেৰপুত্ত মহপ্পভো;

অতিরোচসি ৰণ্ণেন, উদযন্তোৰ ভাণুমা.

১১৮৩. ‘‘দানস্স তে ইদং ফলং, অথো সীলস্স ৰা পন;

অথো অঞ্জলিকম্মস্স, তং মে অক্খাহি পুচ্ছিতো’’.

১১৮৪. সো দেৰপুত্তো অত্তমনো…পে… যস্স কম্মস্সিদং ফলং.

১১৮৫. ‘‘অহং কপিলৰত্থুস্মিং, সাকিযানং পুরুত্তমে;

সুদ্ধোদনস্স পুত্তস্স, কণ্ডকো সহজো অহং.

১১৮৬. ‘‘যদা সো অড্ঢরত্তাযং, বোধায মভিনিক্খমি;

সো মং মুদূহি পাণীহি, জালি [জাল (সী.)] তম্বনখেহি চ.

১১৮৭. ‘‘সত্থিং আকোটযিত্ৰান, ৰহ সম্মাতি চব্রৰি;

অহং লোকং তারযিস্সং, পত্তো সম্বোধিমুত্তমং.

১১৮৮. ‘‘তং মে গিরং সুণন্তস্স, হাসো মে ৰিপুলো অহু;

উদগ্গচিত্তো সুমনো, অভিসীসিং [অভিসিংসিং (সী.), অভিসীসি (পী.)] তদা অহং.

১১৮৯. ‘‘অভিরূল়্হঞ্চ মং ঞত্ৰা, সক্যপুত্তং মহাযসং;

উদগ্গচিত্তো মুদিতো, ৰহিস্সং পুরিসুত্তমং.

১১৯০. ‘‘পরেসং ৰিজিতং গন্ত্ৰা, উগ্গতস্মিং দিৰাকরে [দিৰঙ্করে (স্যা. ক.)];

মমং ছন্নঞ্চ ওহায, অনপেক্খো সো অপক্কমি.