১০. সেরীসকৰিমানৰত্থু

১২২৮. [পে. ৰ. ৬০৪] সুণোথ যক্খস্স চ ৰাণিজান চ, সমাগমো যত্থ তদা অহোসি;

যথা কথং ইতরিতরেন চাপি, সুভাসিতং তঞ্চ সুণাথ সব্বে.

১২২৯. ‘‘যো সো অহু রাজা পাযাসি নাম [নামো (সী.)], ভুম্মানং সহব্যগতো যসস্সী;

সো মোদমানোৰ সকে ৰিমানে, অমানুসো মানুসে অজ্ঝভাসীতি.

১২৩০. ‘‘ৰঙ্কে অরঞ্ঞে অমনুস্সট্ঠানে, কন্তারে অপ্পোদকে অপ্পভক্খে;

সুদুগ্গমে ৰণ্ণুপথস্স মজ্ঝে, ৰঙ্কং ভযা [ধঙ্কংভযা (ক.)] নট্ঠমনা মনুস্সা.

১২৩১. ‘‘নযিধ ফলা মূলমযা চ সন্তি, উপাদানং নত্থি কুতোধ ভক্খো;

অঞ্ঞত্র পংসূহি চ ৰালুকাহি চ, ততাহি উণ্হাহি চ দারুণাহি চ.

১২৩২. ‘‘উজ্জঙ্গলং তত্তমিৰং কপালং, অনাযসং পরলোকেন তুল্যং;

লুদ্দানমাৰাসমিদং পুরাণং, ভূমিপ্পদেসো অভিসত্তরূপো.

১২৩৩. ‘‘অথ তুম্হে কেন [কেন নু (স্যা. ক.)] ৰণ্ণেন, কিমাসমানা ইমং পদেসং হি;

অনুপৰিট্ঠা সহসা সমেচ্চ, লোভা ভযা অথ ৰা সম্পমূল়্হা’’তি.

১২৩৪. ‘‘মগধেসু অঙ্গেসু চ সত্থৰাহা, আরোপযিত্ৰা পণিযং পুথুত্তং;

তে যামসে সিন্ধুসোৰীরভূমিং, ধনত্থিকা উদ্দযং পত্থযানা.

১২৩৫. ‘‘দিৰা পিপাসং নধিৰাসযন্তা, যোগ্গানুকম্পঞ্চ সমেক্খমানা,

এতেন ৰেগেন আযাম সব্বে [সব্বে তে (ক.)], রত্তিং মগ্গং পটিপন্না ৰিকালে.

১২৩৬. ‘‘তে দুপ্পযাতা অপরদ্ধমগ্গা, অন্ধাকুলা ৰিপ্পনট্ঠা অরঞ্ঞে;

সুদুগ্গমে ৰণ্ণুপথস্স মজ্ঝে, দিসং ন জানাম পমূল়্হচিত্তা.

১২৩৭. ‘‘ইদঞ্চ দিস্ৰান অদিট্ঠপুব্বং, ৰিমানসেট্ঠঞ্চ তৰঞ্চ যক্খ;

ততুত্তরিং জীৰিতমাসমানা, দিস্ৰা পতীতা সুমনা উদগ্গা’’তি.

১২৩৮. ‘‘পারং সমুদ্দস্স ইমঞ্চ ৰণ্ণুং [ৰনং (স্যা.), ৰণ্ণং (ক.)], ৰেত্তাচরং [ৰেত্তং পরং (স্যা.), ৰেত্তাচারং (ক.)] সঙ্কুপথঞ্চ মগ্গং;

নদিযো পন পব্বতানঞ্চ দুগ্গা, পুথুদ্দিসা গচ্ছথ ভোগহেতু.

১২৩৯. ‘‘পক্খন্দিযান ৰিজিতং পরেসং, ৰেরজ্জকে মানুসে পেক্খমানা;

যং ৰো সুতং ৰা অথ ৰাপি দিট্ঠং, অচ্ছেরকং তং ৰো সুণোম তাতা’’তি.

১২৪০. ‘‘ইতোপি অচ্ছেরতরং কুমার, ন তো সুতং ৰা অথ ৰাপি দিট্ঠং;

অতীতমানুস্সকমেৰ সব্বং, দিস্ৰান তপ্পাম অনোমৰণ্ণং.

১২৪১. ‘‘ৰেহাযসং পোক্খরঞ্ঞো সৰন্তি, পহূতমল্যা [পহূতমাল্যা (স্যা.)] বহুপুণ্ডরীকা;

দুমা চিমে [দুমা চ তে (স্যা. ক.)] নিচ্চফলূপপন্না, অতীৰ গন্ধা সুরভিং পৰাযন্তি.

১২৪২. ‘‘ৰেল়ূরিযথম্ভা সতমুস্সিতাসে, সিলাপৰাল়স্স চ আযতংসা;

মসারগল্লা সহলোহিতঙ্গা, থম্ভা ইমে জোতিরসামযাসে.

১২৪৩. ‘‘সহস্সথম্ভং অতুলানুভাৰং, তেসূপরি সাধুমিদং ৰিমানং;

রতনন্তরং কঞ্চনৰেদিমিস্সং, তপনীযপট্টেহি চ সাধুছন্নং.

১২৪৪. ‘‘জম্বোনদুত্তত্তমিদং সুমট্ঠো, পাসাদসোপাণফলূপপন্নো;

দল়্হো চ ৰগ্গু চ সুসঙ্গতো চ [ৰগ্গু সুমুখো সুসঙ্গতো (সী.)], অতীৰ নিজ্ঝানখমো মনুঞ্ঞো.

১২৪৫. ‘‘রতনন্তরস্মিং বহুঅন্নপানং, পরিৰারিতো অচ্ছরাসঙ্গণেন;

মুরজআলম্বরতূরিযঘুট্ঠো, অভিৰন্দিতোসি থুতিৰন্দনায.

১২৪৬. ‘‘সো মোদসি নারিগণপ্পবোধনো, ৰিমানপাসাদৰরে মনোরমে;

অচিন্তিযো সব্বগুণূপপন্নো, রাজা যথা ৰেস্সৰণো নল়িন্যা [নল়িঞ্ঞং (ক.)].

১২৪৭. ‘‘দেৰো নু আসি উদৰাসি যক্খো, উদাহু দেৰিন্দো মনুস্সভূতো;

পুচ্ছন্তি তং ৰাণিজা সত্থৰাহা, আচিক্খ কো নাম তুৰংসি যক্খো’’তি.

১২৪৮. ‘‘সেরীসকো [সেরিস্সকো (সী. স্যা.)] নাম অহম্হি যক্খো, কন্তারিযো ৰণ্ণুপথম্হি গুত্তো;

ইমং পদেসং অভিপালযামি, ৰচনকরো ৰেস্সৰণস্স রঞ্ঞো’’তি.

১২৪৯. ‘‘অধিচ্চলদ্ধং পরিণামজং তে, সযং কতং উদাহু দেৰেহি দিন্নং;

পুচ্ছন্তি তং ৰাণিজা সত্থৰাহা, কথং তযা লদ্ধমিদং মনুঞ্ঞ’’ন্তি.

১২৫০. ‘‘নাধিচ্চলদ্ধং ন পরিণামজং মে, ন সযং কতং ন হি দেৰেহি দিন্নং;

সকেহি কম্মেহি অপাপকেহি, পুঞ্ঞেহি মে লদ্ধমিদং মনুঞ্ঞ’’ন্তি.

১২৫১. ‘‘কিং তে ৰতং কিং পন ব্রহ্মচরিযং, কিস্স সুচিণ্ণস্স অযং ৰিপাকো;

পুচ্ছন্তি তং ৰাণিজা সত্থৰাহা, কথং তযা লদ্ধমিদং ৰিমান’’ন্তি.

১২৫২. ‘‘মমং পাযাসীতি অহু সমঞ্ঞা, রজ্জং যদা কারযিং কোসলানং;

নত্থিকদিট্ঠি কদরিযো পাপধম্মো, উচ্ছেদৰাদী চ তদা অহোসিং.

১২৫৩. ‘‘সমণো চ খো আসি কুমারকস্সপো, বহুস্সুতো চিত্তকথী উল়ারো;

সো মে তদা ধম্মকথং অভাসি [অকাসি (সী.)], দিট্ঠিৰিসূকানি ৰিনোদযী মে.

১২৫৪. ‘‘তাহং তস্স [তাহং (ক.)] ধম্মকথং সুণিত্ৰা, উপাসকত্তং পটিৰেদযিস্সং;

পাণাতিপাতা ৰিরতো অহোসিং, লোকে অদিন্নং পরিৰজ্জযিস্সং;

অমজ্জপো নো চ মুসা অভাণিং, সকেন দারেন চ অহোসি তুট্ঠো.

১২৫৫. ‘‘তং মে ৰতং তং পন ব্রহ্মচরিযং, তস্স সুচিণ্ণস্স অযং ৰিপাকো;

তেহেৰ কম্মেহি অপাপকেহি, পুঞ্ঞেহি মে লদ্ধমিদং ৰিমান’’ন্তি.

১২৫৬. ‘‘সচ্চং কিরাহংসু নরা সপঞ্ঞা, অনঞ্ঞথা ৰচনং পণ্ডিতানং;

যহিং যহিং গচ্ছতি পুঞ্ঞকম্মো, তহিং তহিং মোদতি কামকামী.

১২৫৭. ‘‘যহিং যহিং সোকপরিদ্দৰো চ, ৰধো চ বন্ধো চ পরিক্কিলেসো;

তহিং তহিং গচ্ছতি পাপকম্মো, ন মুচ্চতি দুগ্গতিযা কদাচী’’তি.

১২৫৮. ‘‘সম্মূল়্হরূপোৰ জনো অহোসি, অস্মিং মুহুত্তে কললীকতোৰ;

জনস্সিমস্স তুয্হঞ্চ কুমার, অপ্পচ্চযো কেন নু খো অহোসী’’তি.

১২৫৯. ‘‘ইমে চ সিরীসৰনা [ইমে সিরীসূপৰনা চ (সী.), ইমেপি সিরীসৰনা চ (পী. ক.)] তাতা, দিব্বা [দিব্বা চ (পী. ক.)] গন্ধা সুরভী [সুরভিং (সী. ক.)] সম্পৰন্তি [সম্পৰাযন্তি (ক.)];

তে সম্পৰাযন্তি ইমং ৰিমানং, দিৰা চ রত্তো চ তমং নিহন্ত্ৰা.

১২৬০. ‘‘ইমেসঞ্চ খো ৰস্সসতচ্চযেন, সিপাটিকা ফলতি একমেকা;

মানুস্সকং ৰস্সসতং অতীতং, যদগ্গে কাযম্হি ইধূপপন্নো.

১২৬১. ‘‘দিস্ৰানহং ৰস্সসতানি পঞ্চ, অস্মিং ৰিমানে ঠত্ৰান তাতা;

আযুক্খযা পুঞ্ঞক্খযা চৰিস্সং, তেনেৰ সোকেন পমুচ্ছিতোস্মী’’তি [সমুচ্ছিতোস্মীতি (পী. ক.)].

১২৬২. ‘‘কথং নু সোচেয্য তথাৰিধো সো, লদ্ধা ৰিমানং অতুলং চিরায;

যে চাপি খো ইত্তরমুপপন্না, তে নূন সোচেয্যুং পরিত্তপুঞ্ঞা’’তি.

১২৬৩. ‘‘অনুচ্ছৰিং ওৰদিযঞ্চ মে তং, যং মং তুম্হে পেয্যৰাচং ৰদেথ;

তুম্হে চ খো তাতা মযানুগুত্তা, যেনিচ্ছকং তেন পলেথ সোত্থি’’ন্তি.

১২৬৪. ‘‘গন্ত্ৰা মযং সিন্ধুসোৰীরভূমিং, ধনত্থিকা উদ্দযং পত্থযানা;

যথাপযোগা পরিপুণ্ণচাগা, কাহাম সেরীসমহং উল়ার’’ন্তি.

১২৬৫. ‘‘মা চেৰ সেরীসমহং অকত্থ, সব্বঞ্চ ৰো ভৰিস্সতি যং ৰদেথ;

পাপানি কম্মানি ৰিৰজ্জযাথ, ধম্মানুযোগঞ্চ অধিট্ঠহাথ.

১২৬৬. ‘‘উপাসকো অত্থি ইমম্হি সঙ্ঘে, বহুস্সুতো সীলৰতূপপন্নো;

সদ্ধো চ চাগী চ সুপেসলো চ, ৰিচক্খণো সন্তুসিতো মুতীমা.

১২৬৭. ‘‘সঞ্জানমানো ন মুসা ভণেয্য, পরূপঘাতায ন চেতযেয্য;

ৰেভূতিকং পেসুণং নো করেয্য, সণ্হঞ্চ ৰাচং সখিলং ভণেয্য.

১২৬৮. ‘‘সগারৰো সপ্পটিস্সো ৰিনীতো, অপাপকো অধিসীলে ৰিসুদ্ধো;

সো মাতরং পিতরঞ্চাপি জন্তু, ধম্মেন পোসেতি অরিযৰুত্তি.

১২৬৯. ‘‘মঞ্ঞে সো মাতাপিতূনং কারণা, ভোগানি পরিযেসতি ন অত্তহেতু;

মাতাপিতূনঞ্চ যো [সো (?)] অচ্চযেন, নেক্খম্মপোণো চরিস্সতি ব্রহ্মচরিযং.

১২৭০. ‘‘উজূ অৰঙ্কো অসঠো অমাযো, ন লেসকপ্পেন চ ৰোহরেয্য;

সো তাদিসো সুকতকম্মকারী, ধম্মে ঠিতো কিন্তি লভেথ দুক্খং.

১২৭১. ‘‘তং কারণা পাতুকতোম্হি অত্তনা, তস্মা ধম্মং পস্সথ ৰাণিজাসে;

অঞ্ঞত্র তেনিহ ভস্মী [ভস্মি (স্যা.), ভস্ম (ক.)] ভৰেথ, অন্ধাকুলা ৰিপ্পনট্ঠা অরঞ্ঞে;

তং খিপ্পমানেন লহুং পরেন, সুখো হৰে সপ্পুরিসেন সঙ্গমো’’তি.

১২৭২. ‘‘কিং নাম সো কিঞ্চ করোতি কম্মং,

কিং নামধেয্যং কিং পন তস্স গোত্তং;

মযম্পি নং দট্ঠুকামম্হ যক্খ, যস্সানুকম্পায ইধাগতোসি;

লাভা হি তস্স, যস্স তুৰং পিহেসী’’তি.

১২৭৩. ‘‘যো কপ্পকো সম্ভৰনামধেয্যো,

উপাসকো কোচ্ছফলূপজীৰী;

জানাথ নং তুম্হাকং পেসিযো সো,

মা খো নং হীল়িত্থ সুপেসলো সো’’তি.

১২৭৪. ‘‘জানামসে যং ত্ৰং পৰদেসি [ৰদেসি (সী.)] যক্খ,

ন খো নং জানাম স এদিসোতি;

মযম্পি নং পূজযিস্সাম যক্খ,

সুত্ৰান তুয্হং ৰচনং উল়ার’’ন্তি.

১২৭৫. ‘‘যে কেচি ইমস্মিং সত্থে মনুস্সা,

দহরা মহন্তা অথৰাপি মজ্ঝিমা;

সব্বেৰ তে আলম্বন্তু ৰিমানং,

পস্সন্তু পুঞ্ঞানং ফলং কদরিযা’’তি.

১২৭৬. তে তত্থ সব্বেৰ ‘অহং পুরে’তি,

তং কপ্পকং তত্থ পুরক্খত্ৰা [পুরক্খিপিত্ৰা (সী.)];

সব্বেৰ তে আলম্বিংসু ৰিমানং,

মসক্কসারং ৰিয ৰাসৰস্স.

১২৭৭. তে তত্থ সব্বেৰ ‘অহং পুরে’তি, উপাসকত্তং পটিৰেদযিংসু;

পাণাতিপাতা ৰিরতা অহেসুং, লোকে অদিন্নং পরিৰজ্জযিংসু;

অমজ্জপা নো চ মুসা ভণিংসু, সকেন দারেন চ অহেসুং তুট্ঠা.

১২৭৮. তে তত্থ সব্বেৰ ‘অহং পুরে’তি, উপাসকত্তং পটিৰেদযিত্ৰা;

পক্কামি সত্থো অনুমোদমানো, যক্খিদ্ধিযা অনুমতো পুনপ্পুনং.

১২৭৯. ‘‘গন্ত্ৰান তে সিন্ধুসোৰীরভূমিং, ধনত্থিকা উদ্দযং [উদয (পী. ক.)] পত্থযানা;

যথাপযোগা পরিপুণ্ণলাভা, পচ্চাগমুং পাটলিপুত্তমক্খতং.

১২৮০. ‘‘গন্ত্ৰান তে সঙ্ঘরং সোত্থিৰন্তো,

পুত্তেহি দারেহি সমঙ্গিভূতা;

আনন্দী ৰিত্তা [আনন্দচিত্তা (স্যা.), আনন্দীচিত্তা (ক.)] সুমনা পতীতা,

অকংসু সেরীসমহং উল়ারং;

সেরীসকং তে পরিৰেণং মাপযিংসু.

১২৮১. এতাদিসা সপ্পুরিসান সেৰনা,

মহত্থিকা ধম্মগুণান সেৰনা;

একস্স অত্থায উপাসকস্স,

সব্বেৰ সত্তা সুখিতা [সুখিনো (পী. ক.)] অহেসুন্তি.

সেরীসকৰিমানং দসমং.