১১. সুনিক্খিত্তৰিমানৰত্থু

১২৮২. ‘‘উচ্চমিদং মণিথূণং ৰিমানং, সমন্ততো দ্ৰাদস যোজনানি;

কূটাগারা সত্তসতা উল়ারা, ৰেল়ুরিযথম্ভা রুচকত্থতা সুভা.

১২৮৩. ‘‘তত্থচ্ছসি পিৰসি খাদসি চ, দিব্বা চ ৰীণা পৰদন্তি ৰগ্গুং;

দিব্বা রসা কামগুণেত্থ পঞ্চ, নারিযো চ নচ্চন্তি সুৰণ্ণছন্না.

১২৮৪. ‘‘কেন তেতাদিসো ৰণ্ণো, কেন তে ইধ মিজ্ঝতি;

উপ্পজ্জন্তি চ তে ভোগা, যে কেচি মনসো পিযা.

১২৮৫. ‘‘পুচ্ছামি ‘তং দেৰ মহানুভাৰ, মনুস্সভূতো কিমকাসি পুঞ্ঞং;

কেনাসি এৰং জলিতানুভাৰো, ৰণ্ণো চ তে সব্বদিসা পভাসতী’’তি.

১২৮৬. সো দেৰপুত্তো অত্তমনো, মোগ্গল্লানেন পুচ্ছিতো;

পঞ্হং পুট্ঠো ৰিযাকাসি, যস্স কম্মস্সিদং ফলং.

১২৮৭. ‘‘দুন্নিক্খিত্তং মালং সুনিক্খিপিত্ৰা, পতিট্ঠপেত্ৰা সুগতস্স থূপে;

মহিদ্ধিকো চম্হি মহানুভাৰো, দিব্বেহি কামেহি সমঙ্গিভূতো.

১২৮৮. ‘‘তেন মেতাদিসো ৰণ্ণো,

তেন মে ইধ মিজ্ঝতি;

উপ্পজ্জন্তি চ মে ভোগা,

যে কেচি মনসো পিযা.

১২৮৯. ‘‘অক্খামি তে ভিক্খু মহানুভাৰ,

মনুস্সভূতো যমহং অকাসিং;

তেনম্হি এৰং জলিতানুভাৰো,

ৰণ্ণো চ মে সব্বদিসা পভাসতী’’তি.

সুনিক্খিত্তৰিমানং একাদসমং.

সুনিক্খিত্তৰগ্গো সত্তমো নিট্ঠিতো.

তস্সুদ্দানং –

দ্ৰে দলিদ্দা ৰনৰিহারা, ভতকো গোপালকণ্ডকা;

অনেকৰণ্ণমট্ঠকুণ্ডলী, সেরীসকো সুনিক্খিত্তং;

পুরিসানং ততিযো ৰগ্গো পৰুচ্চতীতি.

ভাণৰারং চতুত্থং নিট্ঠিতং.