১৪. মহারথৰিমানৰত্থু

১০১৫. ‘‘সহস্সযুত্তং হযৰাহনং সুভং, আরুয্হিমং সন্দনং নেকচিত্তং;

উয্যানভূমিং অভিতো অনুক্কমং, পুরিন্দদো ভূতপতীৰ ৰাসৰো.

১০১৬. ‘‘সোৰণ্ণমযা তে রথকুব্বরা উভো, ফলেহি [থলেহি (সী.)] অংসেহি অতীৰ সঙ্গতা;

সুজাতগুম্বা নরৰীরনিট্ঠিতা, ৰিরোচতী পন্নরসেৰ চন্দো.

১০১৭. ‘‘সুৰণ্ণজালাৰততো রথো অযং, বহূহি নানারতনেহি চিত্তিতো;

সুনন্দিঘোসো চ সুভস্সরো চ, ৰিরোচতী চামরহত্থবাহুভি.

১০১৮. ‘‘ইমা চ নাভ্যো মনসাভিনিম্মিতা, রথস্স পাদন্তরমজ্ঝভূসিতা;

ইমা চ নাভ্যো সতরাজিচিত্তিতা, সতেরতা ৰিজ্জুরিৰপ্পভাসরে.

১০১৯. ‘‘অনেকচিত্তাৰততো রথো অযং, পুথূ চ নেমী চ সহস্সরংসিকো;

তেসং সরো সুয্যতি [সূযতি (সী.)] ৰগ্গুরূপো, পঞ্চঙ্গিকং তুরিযমিৰপ্পৰাদিতং.

১০২০. ‘‘সিরস্মিং চিত্তং মণিচন্দকপ্পিতং, সদা ৰিসুদ্ধং রুচিরং পভস্সরং;

সুৰণ্ণরাজীহি অতীৰ সঙ্গতং, ৰেল়ুরিযরাজীৰ অতীৰ সোভতি.

১০২১. ‘‘ইমে চ ৰাল়ী মণিচন্দকপ্পিতা, আরোহকম্বূ সুজৰা ব্রহূপমা.

ব্রহা মহন্তা বলিনো মহাজৰা, মনো তৰঞ্ঞায তথেৰ সিংসরে [সব্বরে (ক.), সপ্পরে (?)].

১০২২. ‘‘ইমে চ সব্বে সহিতা চতুক্কমা, মনো তৰঞ্ঞায তথেৰ সিংসরে;

সমং ৰহন্তা মুদুকা অনুদ্ধতা, আমোদমানা তুরগান [তুরঙ্গান (ক.)] মুত্তমা.

১০২৩. ‘‘ধুনন্তি ৰগ্গন্তি পতন্তি [পৰত্তন্তি (পী. ক.)] চম্বরে, অব্ভুদ্ধুনন্তা সুকতে পিল়ন্ধনে;

তেসং সরো সুয্যতি ৰগ্গুরূপো, পঞ্চঙ্গিকং তুরিযমিৰপ্পৰাদিতং.

১০২৪. ‘‘রথস্স ঘোসো অপিল়ন্ধনান চ, খুরস্স নাদো [নাদী (স্যা.), নাদি (পী. ক.)] অভিহিংসনায চ;

ঘোসো সুৰগ্গূ সমিতস্স সুয্যতি, গন্ধব্বতূরিযানি ৰিচিত্রসংৰনে.

১০২৫. ‘‘রথে ঠিতা তা মিগমন্দলোচনা, আল়ারপম্হা হসিতা পিযংৰদা;

ৰেল়ুরিযজালাৰততা তনুচ্ছৰা, সদেৰ গন্ধব্বসূরগ্গপূজিতা.

১০২৬. ‘‘তা রত্তরত্তম্বরপীতৰাসসা, ৰিসালনেত্তা অভিরত্তলোচনা;

কুলে সুজাতা সুতনূ সুচিম্হিতা, রথে ঠিতা পঞ্জলিকা উপট্ঠিতা.

১০২৭. ‘‘তা কম্বুকেযূরধরা সুৰাসসা, সুমজ্ঝিমা ঊরুথনূপপন্না;

ৰট্টঙ্গুলিযো সুমুখা সুদস্সনা, রথে ঠিতা পঞ্জলিকা উপট্ঠিতা.

১০২৮. ‘‘অঞ্ঞা সুৰেণী সুসু মিস্সকেসিযো, সমং ৰিভত্তাহি পভস্সরাহি চ;

অনুব্বতা তা তৰ মানসে রতা, রথে ঠিতা পঞ্জলিকা উপট্ঠিতা.

১০২৯. ‘‘আৰেল়িনিযো পদুমুপ্পলচ্ছদা, অলঙ্কতা চন্দনসারৰাসিতা [ৰোসিতা (স্যা.), ভূসিতা (ক.)];

অনুব্বতা তা তৰ মানসে রতা, রথে ঠিতা পঞ্জলিকা উপট্ঠিতা.

১০৩০. ‘‘তা মালিনিযো পদুমুপ্পলচ্ছদা, অলঙ্কতা চন্দনসারৰাসিতা;

অনুব্বতা তা তৰ মানসে রতা, রথে ঠিতা পঞ্জলিকা উপট্ঠিতা.

১০৩১. ‘‘কণ্ঠেসু তে যানি পিল়ন্ধনানি, হত্থেসু পাদেসু তথেৰ সীসে;

ওভাসযন্তী দস সব্বসো দিসা, অব্ভুদ্দযং সারদিকোৰ ভাণুমা.

১০৩২. ‘‘ৰাতস্স ৰেগেন চ সম্পকম্পিতা, ভুজেসু মালা অপিল়ন্ধনানি চ;

মুঞ্চন্তি ঘোসং রূচিরং সুচিং সুভং, সব্বেহি ৰিঞ্ঞূহি সুতব্বরূপং.

১০৩৩. ‘‘উয্যানভূম্যা চ দুৰদ্ধতো ঠিতা, রথা চ নাগা তূরিযানি চ সরো;

তমেৰ দেৰিন্দ পমোদযন্তি, ৰীণা যথা পোক্খরপত্তবাহুভি.

১০৩৪. ‘‘ইমাসু ৰীণাসু বহূসু ৰগ্গূসু, মনুঞ্ঞরূপাসু হদযেরিতং পীতিং [হদযেরিতং পতি (সী.), হদযেরিতম্পি তং (স্যা.)];

পৰজ্জমানাসু অতীৰ অচ্ছরা, ভমন্তি কঞ্ঞা পদুমেসু সিক্খিতা.

১০৩৫. ‘‘যদা চ গীতানি চ ৰাদিতানি চ, নচ্চানি চিমানি [চেমানি (সী.)] সমেন্তি একতো;

অথেত্থ নচ্চন্তি অথেত্থ অচ্ছরা, ওভাসযন্তী উভতো ৰরিত্থিযো.

১০৩৬. ‘‘সো মোদসি তুরিযগণপ্পবোধনো, মহীযমানো ৰজিরাৰুধোরিৰ;

ইমাসু ৰীণাসু বহূসু ৰগ্গূসু, মনুঞ্ঞরূপাসু হদযেরিতং পীতিং.

১০৩৭. ‘‘কিং ত্ৰং পুরে কম্মমকাসি অত্তনা, মনুস্সভূতো পুরিমায জাতিযা;

উপোসথং কং ৰা [উপোসথং কিং ৰ (স্যা.)] তুৰং উপাৰসি, কং [কিং (স্যা.)] ধম্মচরিযং ৰতমাভিরোচযি.

১০৩৮. ‘‘নযীদমপ্পস্স কতস্স [নযিদং অপ্পস্স কতস্স (সী. স্যা.), সাসেদং অপ্পকতস্স (ক.)] কম্মুনো, পুব্বে সুচিণ্ণস্স উপোসথস্স ৰা;

ইদ্ধানুভাৰো ৰিপুলো অযং তৰ, যং দেৰসঙ্ঘং অভিরোচসে ভুসং.

১০৩৯. ‘‘দানস্স তে ইদং ফলং, অথো সীলস্স ৰা পন;

অথো অঞ্জলিকম্মস্স, তং মে অক্খাহি পুচ্ছিতো’’তি.

১০৪০. সো দেৰপুত্তো অত্তমনো, মোগ্গল্লানেন পুচ্ছিতো;

পঞ্হং পুট্ঠো ৰিযাকাসি, যস্স কম্মস্সিদং ফলন্তি.

১০৪১. ‘‘জিতিন্দ্রিযং বুদ্ধমনোমনিক্কমং, নরুত্তমং কস্সপমগ্গপুগ্গলং;

অৰাপুরন্তং অমতস্স দ্ৰারং, দেৰাতিদেৰং সতপুঞ্ঞলক্খণং.

১০৪২. ‘‘তমদ্দসং কুঞ্জরমোঘতিণ্ণং, সুৰণ্ণসিঙ্গীনদবিম্বসাদিসং;

দিস্ৰান তং খিপ্পমহুং সুচীমনো, তমেৰ দিস্ৰান সুভাসিতদ্ধজং.

১০৪৩. ‘‘তমন্নপানং অথৰাপি চীৰরং, সুচিং পণীতং রসসা উপেতং;

পুপ্ফাভিক্কিণম্হি সকে নিৰেসনে, পতিট্ঠপেসিং স অসঙ্গমানসো.

১০৪৪. ‘‘তমন্নপানেন চ চীৰরেন চ, খজ্জেন ভোজ্জেন চ সাযনেন চ;

সন্তপ্পযিত্ৰা দ্ৰিপদানমুত্তমং, সো সগ্গসো দেৰপুরে রমামহং.

১০৪৫.

‘‘এতেনুপাযেন ইমং নিরগ্গল়ং, যঞ্ঞং যজিত্ৰা তিৰিধং ৰিসুদ্ধং.

পহাযহং মানুসকং সমুস্সযং, ইন্দূপমো [ইন্দস্সমো (স্যা. ক.)] দেৰপুরে রমামহং.

১০৪৬. ‘‘আযুঞ্চ ৰণ্ণঞ্চ সুখং বলঞ্চ, পণীতরূপং অভিকঙ্খতা মুনি;

অন্নঞ্চ পানঞ্চ বহুং সুসঙ্খতং, পতিট্ঠপেতব্বমসঙ্গমানসে.

১০৪৭. [কথা. ৭৯৯]‘‘নযিমস্মিং লোকে পরস্মিং [নযিমস্মিং ৰা লোকে পরস্মিং (কথাৰত্থু ৭৯৯), নযিমস্মি লোকে ৰ পরস্মি (?)] ৰা পন, বুদ্ধেন সেট্ঠো ৰ সমো ৰ ৰিজ্জতি;

আহুনেয্যানং [যমাহুনেয্যানং (ক.)] পরমাহুতিং গতো, পুঞ্ঞত্থিকানং ৰিপুলপ্ফলেসিন’’ন্তি.

মহারথৰিমানং চুদ্দসমং.

মহারথৰগ্গো পঞ্চমো নিট্ঠিতো.

তস্সুদ্দানং –

মণ্ডূকো রেৰতী ছত্তো, কক্কটো দ্ৰারপালকো;

দ্ৰে করণীযা দ্ৰে সূচি, তযো নাগা চ দ্ৰে রথা;

পুরিসানং পঠমো ৰগ্গো পৰুচ্চতীতি.

ভাণৰারং ততিযং নিট্ঠিতং.