৬. পাযাসিৰগ্গো

১. পঠমঅগারিযৰিমানৰত্থু

১০৪৮. ‘‘যথা ৰনং চিত্তলতং পভাসতি [পকাসতি (ক.)], উয্যানসেট্ঠং তিদসানমুত্তমং;

তথূপমং তুয্হমিদং ৰিমানং, ওভাসযং তিট্ঠতি অন্তলিক্খে.

১০৪৯. ‘‘দেৰিদ্ধিপত্তোসি মহানুভাৰো, মনুস্সভূতো কিমকাসি পুঞ্ঞং;

কেনাসি এৰং জলিতানুভাৰো, ৰণ্ণো চ তে সব্বদিসা পভাসতী’’তি.

১০৫০. সো দেৰপুত্তো অত্তমনো, মোগ্গল্লানেন পুচ্ছিতো;

পঞ্হং পুট্ঠো ৰিযাকাসি, যস্স কম্মস্সিদং ফলং.

১০৫১. ‘‘অহঞ্চ ভরিযা চ মনুস্সলোকে, ওপানভূতা ঘরমাৰসিম্হ;

অন্নঞ্চ পানঞ্চ পসন্নচিত্তা, সক্কচ্চ দানং ৰিপুলং অদম্হ.

১০৫২. ‘‘তেন মেতাদিসো ৰণ্ণো…পে…ৰণ্ণো চ মে সব্বদিসা পভাসতী’’তি.

পঠমঅগারিযৰিমানং পঠমং.

২. দুতিযঅগারিযৰিমানৰত্থু

১০৫৪. ‘‘যথা ৰনং চিত্তলতং পভাসতি, উয্যানসেট্ঠং তিদসানমুত্তমং;

তথূপমং তুয্হমিদং ৰিমানং, ওভাসযং তিট্ঠতি অন্তলিক্খে.

১০৫৫. ‘‘দেৰিদ্ধিপত্তোসি মহানুভাৰো, মনুস্সভূতো কিমকাসি পুঞ্ঞং;

কেনাসি এৰং জলিতানুভাৰো, ৰণ্ণো চ তে সব্বদিসা পভাসতী’’তি.

১০৫৬. সো দেৰপুত্তো অত্তমনো…পে… যস্স কম্মস্সিদং ফলং.

১০৫৭. ‘‘অহঞ্চ ভরিযা চ মনুস্সলোকে, ওপানভূতা ঘরমাৰসিম্হ;

অন্নঞ্চ পানঞ্চ পসন্নচিত্তা, সক্কচ্চ দানং ৰিপুলং অদম্হ.

১০৫৮. ‘‘তেন মেতাদিসো ৰণ্ণো…পে… ৰণ্ণো চ মে সব্বদিসা পভাসতী’’তি.

দুতিযঅগারিযৰিমানং দুতিযং.

৩. ফলদাযকৰিমানৰত্থু

১০৬০. ‘‘উচ্চমিদং মণিথূণং ৰিমানং, সমন্ততো সোল়স যোজনানি;

কূটাগারা সত্তসতা উল়ারা, ৰেল়ুরিযথম্ভা রুচকত্থতা সুভা.

১০৬১. ‘‘তত্থচ্ছসি পিৰসি খাদসি চ, দিব্বা চ ৰীণা পৰদন্তি ৰগ্গুং;

অট্ঠট্ঠকা সিক্খিতা সাধুরূপা, দিব্বা চ কঞ্ঞা তিদসচরা উল়ারা;

নচ্চন্তি গাযন্তি পমোদযন্তি.

১০৬২. ‘‘দেৰিদ্ধিপত্তোসি মহানুভাৰো, মনুস্সভূতো কিমকাসি পুঞ্ঞং;

কেনাসি এৰং জলিতানুভাৰো, ৰণ্ণো চ তে সব্বদিসা পভাসতী’’তি.

১০৬৩. সো দেৰপুত্তো অত্তমনো…পে… যস্স কম্মস্সিদং ফলং.

১০৬৪. ‘‘ফলদাযী ফলং ৰিপুলং লভতি, দদমুজুগতেসু পসন্নমানসো;

সো হি পমোদতি [মোদতি (সী. স্যা. পী.)] সগ্গগতো তিদিৰে [তত্থ (ক.)], অনুভোতি চ পুঞ্ঞফলং ৰিপুলং.

১০৬৫. ‘‘তৰেৰাহং [তথেৰাহং (সী. স্যা. পী.)] মহামুনি, অদাসিং চতুরো ফলে.

১০৬৬. ‘‘তস্মা হি ফলং অলমেৰ দাতুং, নিচ্চং মনুস্সেন সুখত্থিকেন;

দিব্বানি ৰা পত্থযতা সুখানি, মনুস্সসোভগ্গতমিচ্ছতা ৰা.

১০৬৭. ‘‘তেন মেতাদিসো ৰণ্ণো…পে…

ৰণ্ণো চ মে সব্বদিসা পভাসতী’’তি.

ফলদাযকৰিমানং ততিযং.

৪. পঠমউপস্সযদাযকৰিমানৰত্থু

১০৬৯. ‘‘চন্দো যথা ৰিগতৰলাহকে নভে, ওভাসযং গচ্ছতি অন্তলিক্খে;

তথূপমং তুয্হমিদং ৰিমানং, ওভাসযং তিট্ঠতি অন্তলিক্খে.

১০৭০. ‘‘দেৰিদ্ধিপত্তোসি মহানুভাৰা, মনুস্সভূতো কিমকাসি পুঞ্ঞং;

কেনাসি এৰং জলিতানুভাৰো, ৰণ্ণো চ তে সব্বদিসা পভাসতী’’তি.

১০৭১. সো দেৰপুত্তো অত্তমনো…পে… যস্স কম্মস্সিদং ফলং.

১০৭২. ‘‘অহঞ্চ ভরিযা চ মনুস্সলোকে, উপস্সযং অরহতো অদম্হ;

অন্নঞ্চ পানঞ্চ পসন্নচিত্তা, সক্কচ্চ দানং ৰিপুলং অদম্হ.

১০৭৩. ‘‘তেন মেতাদিসো ৰণ্ণো…পে… ৰণ্ণো চ মে সব্বদিসা পভাসতী’’তি.

পঠমউপস্সযদাযকৰিমানং চতুত্থং.

৫. দুতিযউপস্সযদাযকৰিমানৰত্থু

১০৭৫. সূরিযো যথা ৰিগতৰলাহকে নভে…পে….

(যথা পুরিমৰিমানং তথা ৰিত্থারেতব্বং).

১০৭৯. ‘‘তেন মেতাদিসো ৰণ্ণো…পে…ৰণ্ণো চ মে সব্বদিসা পভাসতী’’তি.

দুতিযউপস্সযদাযকৰিমানং পঞ্চমং.

৬. ভিক্খাদাযকৰিমানৰত্থু

১০৮১. ‘‘উচ্চমিদং মণিথূণং ৰিমানং, সমন্ততো দ্ৰাদস যোজনানি;

কূটাগারা সত্তসতা উল়ারা, ৰেল়ুরিযথম্ভা রুচকত্থতা সুভা.

১০৮২. ‘‘দেৰিদ্ধিপত্তোসি মহানুভাৰো, মনুস্সভূতো কিমকাসি পুঞ্ঞং;

কেনাসি এৰং জলিতানুভাৰো, ৰণ্ণো চ তে সব্বদিসা পভাসতী’’তি.

১০৮৩. সো দেৰপুত্তো অত্তমনো…পে… যস্স কম্মস্সিদং ফলং.

১০৮৪. ‘‘অহং মনুস্সেসু মনুস্সভূতো, দিস্ৰান ভিক্খুং তসিতং কিলন্তং;

একাহং ভিক্খং পটিপাদযিস্সং, সমঙ্গি ভত্তেন তদা অকাসিং.

১০৮৫. ‘‘তেন মেতাদিসো ৰণ্ণো…পে… ৰণ্ণো চ মে সব্বদিসা পভাসতী’’তি.

ভিক্খাদাযকৰিমানং ছট্ঠং.

৭. যৰপালকৰিমানৰত্থু

১০৮৭. ‘‘উচ্চমিদং মণিথূণং ৰিমানং…পে… ৰণ্ণো চ তে সব্বদিসা পভাসতী’’তি.

১০৮৯. সো দেৰপুত্তো অত্তমনো…পে… যস্স কম্মস্সিদং ফলং.

১০৯০. ‘‘অহং মনুস্সেসু মনুস্সভূতো, অহোসিং যৰপালকো;

অদ্দসং ৰিরজং ভিক্খুং, ৰিপ্পসন্নমনাৰিলং.

১০৯১. ‘‘তস্স অদাসহং ভাগং, পসন্নো সেহি পাণিভি;

কুম্মাসপিণ্ডং দত্ৰান, মোদামি নন্দনে ৰনে.

১০৯২. ‘‘তেন মেতাদিসো ৰণ্ণো…পে… ৰণ্ণো চ মে সব্বদিসা পভাসতী’’তি.

যৰপালকৰিমানং সত্তমং.

৮. পঠমকুণ্ডলীৰিমানৰত্থু

১০৯৪. ‘‘অলঙ্কতো মল্যধরো সুৰত্থো, সুকুণ্ডলী কপ্পিতকেসমস্সু;

আমুত্তহত্থাভরণো যসস্সী, দিব্বে ৰিমানম্হি যথাপি চন্দিমা.

১০৯৫. ‘‘দিব্বা চ ৰীণা পৰদন্তি ৰগ্গুং, অট্ঠট্ঠকা সিক্খিতা সাধুরূপা;

দিব্বা চ কঞ্ঞা তিদসচরা উল়ারা, নচ্চন্তি গাযন্তি পমোদযন্তি.

১০৯৬. ‘‘দেৰিদ্ধিপত্তোসি মহানুভাৰো, মনুস্সভূতো কিমকাসি পুঞ্ঞং;

কেনাসি এৰং জলিতানুভাৰো, ৰণ্ণো চ তে সব্বদিসা পভাসতী’’তি.

১০৯৭. সো দেৰপুত্তো অত্তমনো…পে… যস্স কম্মস্সিদং ফলং.

১০৯৮. ‘‘অহং মনুস্সেসু মনুস্সভূতো, দিস্ৰান সমণে সীলৰন্তে;

সম্পন্নৰিজ্জাচরণে যসস্সী, বহুস্সুতে তণ্হক্খযূপপন্নে;

অন্নঞ্চ পানঞ্চ পসন্নচিত্তো, সক্কচ্চ দানং ৰিপুলং অদাসিং.

১০৯৯. ‘‘তেন মেতাদিসো ৰণ্ণো…পে…ৰণ্ণো চ মে সব্বদিসা পভাসতী’’তি.

পঠমকুণ্ডলীৰিমানং অট্ঠমং.

৯. দুতিযকুণ্ডলীৰিমানৰত্থু

১১০১. ‘‘অলঙ্কতো মল্যধরো সুৰত্থো, সুকুণ্ডলী কপ্পিতকেসমস্সু;

আমুত্তহত্থাভরণো যসস্সী, দিব্বে ৰিমানম্হি যথাপি চন্দিমা.

১১০২. ‘‘দিব্বা চ ৰীণা পৰদন্তি ৰগ্গুং, অট্ঠট্ঠকা সিক্খিতা সাধুরূপা;

দিব্বা চ কঞ্ঞা তিদসচরা উল়ারা, নচ্চন্তি গাযন্তি পমোদযন্তি.

১১০৩. ‘‘দেৰিদ্ধিপত্তোসি মহানুভাৰো, মনুস্সভূতো কিমকাসি পুঞ্ঞং;

কেনাসি এৰং জলিতানুভাৰো, ৰণ্ণো চ তে সব্বদিসা পভাসতী’’তি.

১১০৪. সো দেৰপুত্তো অত্তমনো…পে… যস্স কম্মস্সিদং ফলং.

১১০৫. ‘‘অহং মনুস্সেসু মনুস্সভূতো, দিস্ৰান সমণে সাধুরূপে [সীলৰন্তে (ক.)];

সম্পন্নৰিজ্জাচরণে যসস্সী, বহুস্সুতে সীলৰন্তে পসন্নে [সীলৰতূপপন্নে (ক. সী. ক.)];

অন্নঞ্চ পানঞ্চ পসন্নচিত্তো, সক্কচ্চ দানং ৰিপুলং অদাসিং.

১১০৬. ‘‘তেন মেতাদিসো ৰণ্ণো…পে…ৰণ্ণো চ মে সব্বদিসা পভাসতী’’তি.

দুতিযকুণ্ডলীৰিমানং নৰমং.

১০. (উত্তর) পাযাসিৰিমানৰত্থু

১১০৮. ‘‘যা দেৰরাজস্স সভা সুধম্মা, যত্থচ্ছতি দেৰসঙ্ঘো সমগ্গো;

তথূপমং তুয্হমিদং ৰিমানং, ওভাসযং তিট্ঠতি অন্তলিক্খে.

১১০৯. ‘‘দেৰিদ্ধিপত্তোসি মহানুভাৰো, মনুস্সভূতো কিমকাসি পুঞ্ঞং;

কেনাসি এৰং জলিতানুভাৰো, ৰণ্ণো চ তে সব্বদিসা পভাসতী’’তি.

১১১০. সো দেৰপুত্তো অত্তমনো…পে… যস্স কম্মস্সিদং ফলং.

১১১১. ‘‘অহং মনুস্সেসু মনুস্সভূতো, রঞ্ঞো পাযাসিস্স অহোসিং মাণৰো;

লদ্ধা ধনং সংৰিভাগং অকাসিং, পিযা চ মে সীলৰন্তো অহেসুং;

অন্নঞ্চ পানঞ্চ পসন্নচিত্তো, সক্কচ্চ দানং ৰিপুলং অদাসিং.

১১১২. ‘‘তেন মেতাদিসো ৰণ্ণো…পে. …ৰণ্ণো চ মে সব্বদিসা পভাসতী’’তি.

(উত্তর) পাযাসিৰিমানং [উত্তরৰিমানং (সী. স্যা. অট্ঠ.)] দসমং.

পাযাসিৰগ্গো ছট্ঠো নিট্ঠিতো.

তস্সুদ্দানং –

দ্ৰে অগারিনো ফলদাযী, দ্ৰে উপস্সযদাযী ভিক্খায দাযী;

যৰপালকো চেৰ দ্ৰে, কুণ্ডলিনো পাযাসীতি [পাঠভেদো নত্থি];

পুরিসানং দুতিযো ৰগ্গো পৰুচ্চতীতি.